Diren Kapai Sang Rehn Siohwa

1. Dahme kitail kak kasik en ale sang mihting tohrohr en pahret?

¹ Nan wasa ieu me dohsangehr Koht me iei en Sehdan sampah, Siohwa kin ketin pousehlahte kakehlaka sapwellime ladu kan. (Ais. 58:11) Ehu sapwellime sawas iei ni eh kin ketin doadoahngki mihting tohrohr en rahn riau nan ehuehu pahr pwehn kakehlaka kitail. Ia duwen atail pahn kaunopada pwehn ale kapai kan ni mihting tohrohr en pahret eh kerendohr?—Lep. Pad. 21:5.

2. Koasoandi dah kan me kitail anahne koasoanehdi?

² Ma ke saikinte wia met, wiahda ahnsou met pwehn koasoanehdi pein omw koasoandi oh koasoandi en omw doadoahk pwe ken kak iang towehda mihting tohrohr ko pwon. Ke koasoanehdier kuloak me ke pahn mweselahng wasahn mihting tohrohro rahn ko koaros pwe ken kak lella mwo oh rapahkihda dewomw mwohn mihtingo eh pahn tepida? Kitail uhdahn sohte pahn men katihasang mehn kakehl me Siohwa ketin kaunopadahr ong kitail! (Ais. 65:13, 14) Ke kaunopadahr omw mehn peidaid?

3. Sawas dah kan me pahn kak sewese kitail oh atail peneinei en uhdahn paiekihda mihting tohrohr ko?

³ Dahme pahn sewese iuk ken dehr medemedewe mehkot tohrohr erein mihting ko? Ma kak, nantihong mwadang meirla ni pwohng kan en mihting tohrohr ko. Nantihong kilikilangete me wia padahko. Tehk iren Paipel kan koaros me kohda. Ntingihdi kisin ire kan. E pahn mwahu ma peneinei kan pahn mwohdpene pwe pahpa nohno en kak sewese neirail seri kan en rong mwahu. (Lep. Pad. 29:15) Mwein kumwail kak koasoiapene ire kesempwal kan ehuehu nin soutik en mihting tohrohr ko. Pwe omw peneinei en kak pousehlahte paiekihda mihting tohrohr ko, wiahda ahnsou nan Kaudok en Peneinei nin soutik pwehn tehk ire kan me peneinei kak doadoahngki.

4. Ia duwen atail kak sewese meteikan nan atail mwomwohdiso pwehn ale kapai sang mihting tohrohr ko?

⁴ Sewese Meteikan en Pil Iang Paiekihda: Kitail men meteikan en pil ale kapai kan sang ni mihting tohrohr ko. Mie sounkalohk mah kan de meteikan nan mwomwohdiso me anahne sawas pwe ren kak iang towehda? Ke kak sewese irail? (1 Sohn 3:17, 18) Elder kan, ahpw ni mehlel elder kan me kin apwalih pwihn en kalohk kan anahne tehk me irail sounkalohk pwukat alehdi sawas me anahn.

5. Ia duwen atail pahn kihseli doaropwehn luhk nan mihting tohrohr ko? (Pil kilang kakon me mi powe.)

⁵ Duwehte dahme kin wiawi mahs, wihk siluh mwohn mihting tohrohr ko pahn wiawi, kitail pahn wia doadoahk tohrohr en luke meteikan en iang towehda. Mwomwohdiso kan anahne wiahda mehn akadei ren kihpeseng uwen doaropwehn luhk me kohwong irail oh nantihong lella wasahn kalohk koaros me re kak. Luhwen doaropwehn luhk pwukat me mi rehn omw peneinei mwurin doadoahk tohrohro pahn wisikdo nan wasahn mihting tohrohro pwe kumwail en doadoahngki ni amwail kalohk ni ahnsou sou lipilipil. Oaritik kan ong doaropwehn luhk kan pahn pakairda Rahn Kaunop en mihting tohrohro. Luhwen doaropwe pwukat me omw peneinei sohte pahn doadoahngki ni amwail mi nan wasahn mihtingo anahne kohwong irail sounsawas kan ni amwail pahn pedolong nan wasahn mihtingo. Menlau koledi ehu noumw doaropwehn luhko pwe ke pahn anahne doadoahngki ni kaimwiseklahn padahk en Rahn Sarawio.

6. Ia duwen atail kak kasalehda tiahk mwahu ni wasahn mihting tohrohro?

⁶ Mwomwatail Kin Kamwakid Meteikan: Ni ahnsou wet me aramas tohto kin “roporop ong pein irail” oh sohte nsenohki pepehm en meteikan, ia uwen kansenamwahu en mi rehn irail riatail Kristian kan me kin nantihong kasalehda irair mwahu kan! (2 Tim. 3:2) Kitail kin kasalehda tiahk mwahu ni atail kin pedolong ni meleilei oh soandi mwahu nan wasahn mihtingo ni eh kin ritda kuloak 8 ni menseng. Oh pil ni atail kin rapahkihdahte dewen tohn atail peneinei me kin mi rehtail, de me iang waratail sidohsa de neitail tohnsukuhl en Paipel kan. Kitail kin idawehn Chairmano ni eh kin pakairki kitail en mwohndi nan dewetail ko pwehn rongorong ngilen keseng me kin wiawi mwohn ehuehu prokram eh kin tepida. E pil wia tiahk mwahu ni atail kin kakunla neitail cell phone kan pwe en dehr kedirepwa meteikan erein mihtingko. Kitail pil kin kasalehda tiahk mwahu ni atail sohte kin koasoakoasoi, text seli, kangkang mehkot de alialuseli ni soh kahrepe nan wasahn mihtingo.

7. Ia duwen atail kak alehdi oh pil wia kapai ni atail werekiong riatail kan?

⁷ Werek Mwahu: Mihting tohrohr kan kin kihong kitail ahnsou mwahu en perenki werekiong ehupenehn riatail Kristian kan. (Mel. 133:1-3) Ke sou tiengla mwowe oh tuhwong meteikan me iang kohdo? (2 Kor. 6:13) Ke kak wiahki omw mehn akadei ken nantihong esehla emen me kapw de ehu peneinei kapw nan rahn ako. Kommoal en souwas kin wia ahnsou mwahu en wia met. Kahrehda, wahdo kisin mwenge marahra oh iang mwenge oh werekiong meteikan nan wasahn mihtingo, a dehr kohla pwainda mwenge de mwenge ni imwen mwenge me keren. Met kak kahrehiong ken paiekihda kompoakepahmw kapw kan kohkohlahte.

8. Dahme kahrehda kitail en sawas iang doadoahk ni mihting tohrohr ko? Ia duwen atail kak wia met?

⁸ Ia uwen kansenamwahu en doadoahkpene rehn riatail kan nan atail doadoahk en papah Koht! Ke kak sewese omw mwomwohdiso ong doadoahk en kamwakel ape? (Ais. 6:8) Ma ke sehse dahme ke kak wia, menlau tuhwong brother kan me kin apwalih koasoandi en kamwakel ape. Ma tohto sawaspene, doadoahko pahn kaperen oh mengei.

9. Dahme kahrehda kitail anahne tehk mwahu atail wiewia erein mihting tohrohr ko?

⁹ Atail Wiewia Kin Kamwakid Irail kan me Kilikilang Kitail: Kitail me kin weliwelian mihting tohrohr en rahn ko pwon, a kaidehn erein prokramohte. Irail kan me kin kilang kitail erein ahnsoun mihting tohrohro, anahne kilang wekpeseng en kitail oh irail me kaidehn sounkadehde. (1 Pit. 2:12) Atail likou oh kapwat nan wasahn mihtingo oh nan imwen mwenge kan anahne kasalehda wahu ong Siohwa. (1 Tim. 2:9, 10) Ma kitail doadoahngki neitail badge kan, irail kan me kilang kitail pahn ese me kitail Sounkadehdehn Siohwa kan. Met kakete kihong kitail ahnsou mwahu en padahkihong irail duwen atail mihting tohrohro oh kalohk ong irail.

10. Rohng dahkei me kin kasalehda mehn kadehde mwahu me kin kohsang atail wiewiahn Kristian kan?

¹⁰ Dahme atail wiewia erein mihting tohrohro kak wiahiong meteikan? Sang ehu doaropwehn rohng, kaunen ehu wasa me mihting tohrohr wiawi ie koasoia: “Aramas ako inenen kadek. Se kin kasikasik irail nan pahr koaros.” Pahr nekiero, emen me kaidehn Sounkadehde, sehsehla nah pilihso nan hotel ehu me Sounkadehde kan mi loale. Ni ahnsou me pilihso kapwurpwurlahng kaunen hotelo oh soahng koaros mihmihte loale, iet me kaunen wasao ndaiong me nainekio: “Ke paiamwahu pwehki Sounkadehdehn Siohwa kan iang arail mihting tohrohro oh irail me mi wasaht. Ma kaidehn irail, mwein ke sohte pahn pwurehng alehdi noumw pilihso.”

11. Ni mihting tohrohr eh kerendohr, ia atail mehn akadei oh dahme kahrehda?

¹¹ Mihting tohrohr kan en pahr wet pahn mwadang leledo. Doadoahk laud wiawiher pwehn kaunopada mihting tohrohr oh pwehn wiawi ni soandi mwahu. Wiahki omw mehn akadei ken iang towehda rahn ko koaros oh kaunopada ong dahme Siohwa oh sapwellime pwihn kaunopadahng uhkehr. Koasoanehdi ken wia mehn kangoang ong meteikan sang ni mwomwomw, sang ni omw perenki werekiong irail oh omw wiewia mwahu. Eri, met pahn kahrehiong kowe oh meteikan en kak pil iang koasoia dahme emen me towehda mihting tohrohr en pahr nekiero ntingihdi, “I sohte kak tamanda ehu mehkot me kaperen duwehte met!”

[Kilel nan Pali 4]

Duwehte dahme kin wiawi mahs, wihk siluh mwohn mihting tohrohr ko pahn wiawi, kitail pahn wia doadoahk tohrohr en luke meteikan en iang towehda

[Kilel nan Pali 6]

Atail likou oh kapwat nan wasahn mihtingo oh nan imwen mwenge kan anahne kasalehda wahu ong Siohwa

[Kilel nan Pali 7]

Koasoanehdi ken wia mehn kangoang ong meteikan sang ni mwomwomw, sang ni omw perenki werekiong irail oh omw wiewia mwahu

[Kaokon nan Palis 4-7]

Mehn Kataman kan ong Mihting Tohrohro en Pahr 2011

◼ Kuloak: Prokram pahn tepida kuloak 9:20 ni menseng en rahn riau ko koaros. Wenihmw kan pahn langada kuloak 8 ni menseng. Ni ahnsou me pakair kohda me ngilen keseng pahn tepidahr, kitail koaros anahne kohla nan dewetail kan pwe prokramo en kak tepida ni wahu oh soandi mwahu.

◼ Dewetail: Kitail kak kihsang dewen tohn atail peneinei me kin mi rehtail, iang waratail sidohsa de neitail tohnsukuhl en Paipel kan.—1 Kor. 13:5.

◼ Mwengehn Souwas: Menlau wahdo mwengehn souwas ahpw ieremen kohkohlahsang wasahn mihting tohrohro pwehn ale mwengehn souwas. Ke kak doadoahngki kisin cooler me pahn itarohng pahn omw sehro. Cooler lapala sohte mweimwei nan wasahn mihting tohrohro.

◼ Sawas en Mwohni: Kitail kak kasalehda atail kalahnganki koasoandi wet ni atail kihda atail sawas en mwohni ni wasahn mihting tohrohro ong doadoahk me kin wiawi nan sampah pwon. Ma ke pahn doadoahngki check, ke anahne ntingihdi checko ni ahd wet “Christian Congregation of Jehovah’s Witnesses.”

◼ Aksident oh Emergency kan: Ma mie emergency pwarada nan wasahn mihting tohrohro, menlau mwadang kehsehki sounsawas me karanih iuk. E pahn mwadang kalellehki wasahn sawas pwe emen me konehng en kohdo kilang irairo oh dahme konehng wiawi. Ma mie anahnepe, e pahn eker delepwon nempe 320-2213. Met pahn sawas pwe me tohto en dehr wiahkinteieu call emergency.

◼ Wini: Ma ke kin kangkang wini, menlau wahdo uwen me ke anahne pwehki sohte me pahn kohda nan wasahn mihting tohrohro.

◼ Doaropwehn Please Follow Up (S-43): Doaropwehn Please Follow Up pahn audauda pwehn kihda ire kan me pid irail kan me kitail kalohk ong nan wasahn mihting tohrohro oh re perenki rong. Sounkalohk kan anahne wahdo doaropwe ehu de riau ni mihting tohrohro. Mwurin audaudahn doaropwe pwukat, kihong irail me mi nan wasahn kihla pwuhk de sekteri en mwomwohdiso mwohn omw pahn mwesel.—Kilang Atail Doadoahk ong Wehio en November 2009 pali 4.

◼ Imwen Mwenge kan: Kawauwihala mwaren Siohwa sang omw wiewia kan nan imwen mwenge kan.

◼ Iang Sawas: Peren me kitail pahn alehdi sang atail towehda mihting tohrohro pahn laudla ma kitail iang sawas ong doadoahk kan me anahne wiawi. (Wiewia 20:35) Mehmen me men iang sawas anahne idek rehn irail kan me apwalih doadoahk en kamwakel ape nan wasahn mihting tohrohro. Seri kan pahnangin sounpar 16 kak pil iang sawas ni arail pahn iang arail pahpa oh nohno de me kin apwalih irail de emen me laud me pahpa nohno de me kin apwaliho, mweidada ren iang.

[Kaokon nan Pali 5]

Ia Mwomwen Atail Pahn Kihla Doaropwehn Luhko?

Pwe kitail en kak kanekehla atail wasahn kalohk, kitail anahne koasoi ni mwotomwot. Kitail kak nda met: “Kaselehlie. Se iang wia doadoahk en kihseli doaropwehn luhk wet me wiawi nan sampah pwon. Iet noumwen. Ke pahn diar oaritik kan nan doaropwe wet.” Mwohn doaropwehn luhko kin kamwakid aramas en men rong, kahrehda kasalehong irail ni ahl ehu me re pahn kak kilang mwoweo. Ken ngoangki doadoahk wet. Ni omw pahn iang wia doadoahk wet ni imwin wihk kan, pil kihla Kahn Iroir kan en sounpwongo ma e konehng.