“Amwail Tiahk kan Nanpwungen me Rotorot akan en Kin Mwahu”

1. Dahme kahrehda e kesempwal kitail en kolokol atail tiahk mwahu erein mihting tohrohr kan me pahn wiawi?

¹ Wehi pokon kin tehk kitail erein atail mihting tohrohr kan ehuehu pahr, eri e kesempwal kitail en wiliandi ni pwung Koht me kitail kin kaudokiong sang atail wiewia mwahu. (Lipai 20:26) Atail tiahk mwahu kan oh pil atail likou oh kapwat, en kasansalehda me kitail tohnpadahk mehlel en Krais. Ni atail pahn iang towehda mihting tohrohr kan (district convention de international convention) me pahn wiawi, ia duwen atail pahn kak kolokol ‘atail tiahk kan nanpwungen me rotorot akan en kin mwahu’ oh eri kawauwih Samatail nanleng?—1 Pit. 2:12.

2. Ahnsou mwahu dah kan me kitail kak kasalehda mour en Kristian erein wihk me mihting tohrohr pahn wiawi?

² Kasalehda Mouren Kristian: Limpoak me kitail kin kasalehiong emenemen oh mwomwen atail wiewia kan ong “me seupwoson” kan en kin uhdahn weksang madamadau me rek nan sampah. (Kol. 3:10; 4:5; 2 Tim. 3:1-5) Kitail anahne kadek oh kanengamah ong irail tohndoadoahk kan nan hotel kan oh imwen mwenge kan, mehnda ma mie kahpwal kan kin pwarada. Tiahk mwahu kin wehwehki me kitail pahn kin kihdi kisin mwohni (tip) me konehng irail tohndoadoahk kan me kin sahpis ong kitail.

3. Mehn kataman dah me kohwong pahpa nohno kan oh pwekida?

³ Pahpa oh nohno kan anahne tehk kanahieng neirail seri kan ni wasahn mihting tohrohro, nan wasahn mwenge kan, oh ni hotel kan. (Lep. Pad. 29:15) Kaun en wasahn mwenge ni hotel ehu padahkihong ehu pwopwoudo: “Uhdahn se perenki kumwail. Amwail peneinei kan oh noumwail seri kan uhdahn kin tiahk mwahu oh kadek. Tohndoadoahk koaros kin koasokoasoia duwen kumwail, oh se mentehno kumwail en kin mi wasaht ni imwin wihk koaros.”

4. Erein atail mi nan sahpw me mihting tohrohro pahn wiawi ie, dahme kitail anahne tehk duwen mwomwatail?

⁴ Likou me Konehng: Atail likou erein mihting tohrohro anahne konehng oh soandi mwahu. E sohte pahn kin nohn daulihala duwehte sidail kan me kalapw pwarada nan sampah wet. (1 Tim. 2:9) Pil ni ahnsou kan me kitail kin tepin pedolong (check in) oh ni atail kohkohlahsang nan hotel kan, oh erein ahnsoun mwemweit kan, oh mwohn oh mwurin prokram kan en mihting tohrohro, kitail sohte men likawih likou me sohte konehng de sohte soandi mwahu. Met pahn kahrehda kitail kak perenki doadoahngki doaropwehn mihting tohrohr me kin kasalehda ihs kitail (convention badge) oh kitail sohte pahn namenengki wia kadehde ni ahnsou mwahu kin pwarada. Mwomwatail oh atail tiahk erein atail towehda mihting tohrohr kan me pahn wiawi pahn kahrehda aramas me mohngiong mehlel en men ese rohng me mi nan Paipel me kak komourirailla. Pil ehu, met kin kaperenda Siohwa.—Sep. 3:17.

Mehn Kataman ong Mihting Tohrohr kan en 2014

◼ Kuloak: Wenihmw kan pahn langada kuloak 8 ni menseng. Ngilen keseng pahn tepida kuloak 9:20 ni menseng en ehuehu rahn. Ni ahnsowo, kitail koaros anahne kohla nan dewetail kan pwe prokramo en kak tepida ni wahu oh soandi mwahu. Kaimwiseklahn koul oh kapakap pahn tepida ni kuloak 4:55 mwurin souwas en Rahn Kaunop oh kuloak 3:50 mwurin souwas en Rahn Sarawi.

◼ International Convention kan: International convention kan pahn wiawi nan ekei sahpw kan. Tamatamante me ohpis en Sounkadehdehn Siohwa kan nan ehuehu sahpw luke mwomwohdiso kan oh irail kan me kohsang sahpw teikan mwurin re kapatahdi uwen tohtohn sehr, wasahn peidi sidohsa, oh uwen tohtohn perehn nan hotel kan me mie. Kahpwal laud pahn wiawi ma sounkalohk kan me sohte ale luhk pahn iang towehda. Ma kahrepe de irair me ke sohte kak iang towehda mihting tohrohr en omw wasa a komw pahn seiloak, ke sohte kak en pilada en iang international convention.

◼ Wasahn Peidi Sidohsa: Wasahn mihting tohrohr kan wasa me se ale manaman en koasoanehdi wasahn peidi kan pahn sohte pweipwei oh pahn audauda ahnsou me aramas kan pahn lella mwo. Pwehki wasahn peidi sohte laud, e pahn mwahu ekei en sawaski wararail oh idan meteikan. Irailte me naineki license plate de placard ong irail me kahpwal en paliwar me kak mweimwei en peidi wasa kan me koasoandier ong irail.

◼ Dewetail: Ni ahnsou me wenihmw en wasahn mihting tohrohr ritda nimenseng, menlau dehr weirih dewemwail mwomwen me kumwail siai ong meteikan. Irair en tounmetei me kin kamwakid kitail en rapahki dahme mwahu ong meteikan kin kasalehda me kitail Kristian mehlel kei oh met kin kamwakid meteikan en kapinga Koht. (Sohn 13:34, 35; 1 Kor. 13:4, 5; 1 Pit. 2:12) Kitail kak kihsang dewen tohn atail peneinei me kin mi rehtail de irail me iang waratail sidohsa de neitail tohnsukuhl en Paipel kan. Mie dewen me mah kan oh me luwet ni paliwar kan. Pwehki wasahn mwomwohd pwukat malaulau, emen de riemente me kin sewese me mah de me luwet ni paliwar kak iang mwohndi limwah.

◼ Mwengehn Souwas: Menlau wahda kisin mwengehn souwas ahpw ieremen kohkohlahsang wasahn mihting tohrohro pwehn ale mwengehn souwas. Ke kak doadoahngki kisin cooler me pahn itarohng pahn omw sehro. Cooler lapala oh dipwisoun mwenge me wiawihkihda kilahs sohte mweimwei nan wasahn mihting tohrohro.

◼ Sawas en Mwohni: Kitail kak kasalehda atail kalahnganki koasoandi wet ni atail kihda atail sawas en mwohni ni wasahn mihting tohrohro ong doadoahk me kin wiawi nan sampah pwon. Ma ke pahn doadoahngki check, menlau ntingihedi pohn checko “Christian Congregation of Jehovah’s Witnesses.” Ke kak pil doadoahngki debit de credit card pwehn kihda sawas en mwohni.

◼ Wini: Ma ke kin kangkang wini, menlau wahda uwen me ke anahne pwehki sohte me pahn kohda nan wasahn mihting tohrohro. Dikek en dok ong soumwahu en suke anahne koskosla ni ahl ehu me sohte pahn kahrehda keper ong meteikan, dehr kesehla nan wasahn mihting tohrohro de nan hotel kan.

◼ Soahng Keper kan me Kitail anahne Kanahieng: Menlau medewe mwahu en perehsang meteikan kahpwal kan me kak kahrehiong kirisdi de pwupwudi. Ehuehu pahr nan sampah, aramas kin ohkihla arail doadoahngki suht ileile. E mwahu en pilada sohri de suht me konehng pwe en dehr kahrehda pwupwudi, ohla de kahpwal teikan.

◼ Kahpwal en Rongorong: Ma prokram pahn kohda ni frequency en FM nan wasahn mihting tohrohro, ke anahne wahdo noumw kisin radio me doadoahngki battery oh earphones pwe ken kak rong.

◼ Mehn Kadahr Seri (Baby Strollers) oh Sehr Teikan: Mehn kadahr seri oh sehr teikan en dehr wisikla nan wasahn mihting tohrohro. Ahpw doupen seri me mwahu oh kak itar pohn sehr limwahn me naineki serio kak wisikda.

◼ Lehn Wai: Mihting tohrohr tohto kin wiawi nan wasa kan me wenihmw oh wenihmwtok kin ritidi. Kahrehda kitail men kasalehda kadek ong meteikan ni atail ekiste de sohte doadoahngki lehn wai me kakete kahrehiong aramas en apwalki esingek de kahpwal teikan.—1 Kor. 10:24.

◼ Doaropwehn Please Follow Up (S-43): Doaropwehn Please Follow Up pahn audauda pwehn kihda ire kan me pid irail kan me kitail kalohk ong nan wasahn mihting tohrohro oh re perenki rong. Mwurin omw audehda doaropwe pwukat, ke pahn kihong irail me mi nan wasahn kihla pwuhk de sekteri en mwomwohdiso mwuhr.

◼ Imwen Mwenge kan: Kawauwihala mwaren Siohwa sang omw wiewia kan nan imwen mwenge kan. Likawih likou me konehng Kristian men. Kihdi kisin mwohni (tip) ma met tiahk en sahpwo.

◼ Hotel kan:

Menlau dehr wiahda koasoandi ni hotel en kolokol pere ong uhk me tohtohsang dahme ke uhdahn pahn doadoahngki, oh dehr kahrehlong aramas nan omw pere tohtohsang uwen me hotelo mweidada.
Dehr kasohrehla omw koasoandi en doadoahngki perehn hotel ihte ma mie irair karuwaru pwarada, oh kalelehki hotel ni ahnsowohte pwe meteikan me anahne pere en uhd doadoahngki pereo. (Mad. 5:37) Ma ke anahne kasohrehla omw koasoandio, ke anahne alehdi nempehn met. Ma ke kasohrehla omw koasoandio mwotomwot sang awa 48 mwohn rahn en omw koasoandien pweidi, noumw mwohni en deposit sohte pahn kapwurupwurwei.
Ma ke pahn doadoahngki debit oh credit card ni omw kohla ni hotel, ken taman me mie koasoandi en hotel kan en katohrehla uwen pweinen omw pere sang nan noumw account, pil patehng uwen mwohni me pahn pwain dahme ke kakete kauwehla erein omw mihmi ni hotelo. Ke sohte kak doadoahngki uwen mwohni ko lao rahn kei mwurin omw pwainla hotelo.
Doadoahngki mehn kadahr kapang ihte ni ahnsou me ke anahne, mwurin mwo mwadang kapwurehla pwe meteikan pahn doadoahngki.
Ma aramas kin kihdi tip ni hotel kan wasao, menlau kihong tohndoadoahk en hotel me kadahre omw kapang ko oh pil kihdi tip ong tohn kamwakele omw pereo.
Kuk nan pere kante me mweimwei en kuk.
Dehr isaneki mwengehn ni menseng, koahpi de ais me kohda ongete irail me pweidi ni hotel sang ni omw wahla ni wasahn mihting tohrohr.
Ahnsou koaros ken kasalehda irair kan en wahn sapwellimen Koht manaman ni omw koasoiong de peki sawas rehn tohndoadoahk en hotelo. Re kin apwahpwalih aramas tohto oh pahn kalahnganki atail kadek, kanengamah, oh madamadau toupahrek.
Ahnsou koaros, pahpa oh nohno kan anahne tetehk neirail seri kan ni arail mihmi nan hotelo de likin hotelo, oh pil ni elevator kan, swimming pool, wasahn mwomwohd oh kommoal, wasahn eksersais de wasa teikan.
Pweinen perehn hotel me mi nan doaropwehn Recommended Lodging List iei pweinen rahn ehu, ahpw pweinen daksis sohte patehng. Ma hotel nda ken pwain laudsang, ke dehr pwain oh mwadang padahkihong Palien Koasoanehdi Wasahn Pweidi ong mihting tohrohro.
Ma mie kahpwal ehu pwarada me pid omw hotel, menlau padahkihong Palien Koasoanehdi Wasahn Pweidi erein omw mi ni mihting tohrohro pwe ren kak seweseiuk.

◼ Iang Sawas: Mehmen me men iang sawas anahne idek rehn irail kan me kin apwalih doadoahk wet nan wasahn mihting tohrohro. Seri kan pahnangin sounpar 16 pil kak iang sawas ni arail pahn iang arail pahpa oh nohno de emen me kin apwalih irail de emen me laud me pahpa nohno de me kin apwaliho pwungki.