Wiewia me Kalinganahla Koht

1. Dahme kahrehda e mengei ong aramas en pohnese me Sounkadehdehn Siohwa kan iang towehda mihting tohrohr?

¹ E mengei ong aramas en pohnese me kitail iang towehda mihting tohrohr. Nan kahnimw tohto me mihting tohrohr kin wiawi, pali en nuhs kan en wasa ko kin pakairkiong wehi pokon duwen met. Riatail kan me kohsang sahpw teikan kin kalapw audehla hotel kan oh imwen mwenge kan, oh aramas me kousoan wasa ko kin kilang me tohto irail me mwemweitla kin doadoahngki badge. Ekei mehn kataman kan me mi pah pahn sewese kitail en kalinganahla Koht sang ni atail wiewia mwahu erein atail mi nan wasahn mihting tohrohr.—1 Pit. 2:12.

2. Ia duwen atail pahn kalinganahla Koht sang ni atail likou me konehng ni atail mi nan kahnimw me mihting tohrohr wiawi?

² Likou me Konehng: Ni atail iang prokram, aramas me kilang kitail kin kalapw kapinga atail likou me konehng. Ahpw mwomwen atail likou ni ahnsou teikan me duwehte mi nan hotel, mi ni imwen mwenge, de netinet ape kakete kamwakid madamadau en irail me kilang kitail. Kitail sohte anahne likou kaselel ni soangen ahnsou pwukat, ahpw dahme kitail likouki anahne konehng, mwomw mwahu. Irail me kilang kitail kak kilang wekpeseng en kitail oh irail me kaidehn Sounkadehdehn Siohwa kan. (Rom 12:2) Patehng met, kitail anahne doadoahngki badge en mihting tohrohr, pwehki met pahn pakairki mihting tohrohr, e pahn kihda ahnsou mwahu en kalohk, oh riatail kan me kohsang sahpw teikan ren ese kitail.

3. Ia duwen atail pahn kasalehda kanengamah oh kadek?

³ Kanengamah oh Kadek: Nan ahnsou me aramas tohto nan sampah kin roporop ong pein irail oh sohte kasapahlkalahnganki mehkot, atail kanengamah oh kadek uhdahn pahn kansenamwahu ong irail me kilang kitail, me duwehte tohndoadoahk en hotel oh imwen mwenge kan. (2 Tim. 3:1-5) Ni atail koledi dewetail kan de lalain pwehn ale soahng kapw kan me kohda, kitail anahne rapahki kamwahupen meteikan a kaidehn atail. (1 Kor. 10:23, 24) Mwurin eh tepin iang towehda mihting tohrohr, emen ohl me perenki rong nda, “I sohte tamanda padahk ko me wiawi rahno, ahpw I tamataman wiewia kan en Sounkadehde kan.”

4. Dahme kahrehda kitail anahne medemedewe toukihda pein kitail ni mihting tohrohr ma kak?

⁴ Irail me Perenki Toukihda Pein Irail: Madamadau en “perenki toukihda pein irail” iei kilelepen Kristian mehlel. (Mel. 110:3, NW) Ke kak toukihda pein kowe pwehn sawas ni mihting tohrohr? Ni ehu mihting tohrohr, mpen riatail 600 toukihda pein irail pwehn kamwakel mwohn mihting tohrohr. Tohndoadoahk men nda: “Met iei mehkot me keieu kapwuriamwei me se kilang! E apwal en kamehlele me aramas pwukat koaros pein toukihda arail ahnsou.” Kitail uhdahn kasikasik mihting tohrohr en pahr 2013 oh ahnsou mwahu me kitail pahn kaidehn ihte rong oh sukuhlki sang Koht ahpw kalinganahla ih.

[Kaokon nan Pali 3]

Mehn Kataman ong Mihting Tohrohr en 2013

◼ Kuloak: Wenihmw kan pahn langada kuloak 8 ni menseng. Ngilen keseng pahn tepida kuloak 9:20 ni menseng en rahn riau ko koaros. Ni ahnsowo, kitail koaros anahne kohla nan dewetail kan pwe prokramo en kak tepida ni wahu oh soandi mwahu. Kaimwiseklahn koul oh kapakap pahn tepida ni kuloak 4:50 mwurin souwas en Rahn Kaunop oh kuloak 3:35 mwurin souwas en Rahn Sarawi.

◼ Wasahn Peidi Sidohsa: Wasahn peidi sidohsa kan pahn mie, ahpw me mwadangodo me pahn ahneki wasa mwahu en peidi. Pwehki wasahn peidi sohte laud, e pahn mwahu ekei en sawaski wararail oh idan meteikan.

◼ Dewetail: Kitail kak kihsang dewen tohn atail peneinei me kin mi rehtail, irail me iang waratail sidohsa de neitail tohnsukuhl en Paipel kan. Dewen me mah kan oh me luwet ni paliwar kan kin malaulau, kahrehda mwein kaidehn tohn arail peneinei koaros kak iang irail mwomwohd wasao. Menlau mweidohng me mah oh me luwet ni paliwar kan oh irail me sewese aramas pwukat ren doadoahngki sehr pwukat.—1 Kor. 13:5.

◼ Mwengehn Souwas: Menlau wahda kisin mwengehn souwas ahpw ieremen kohkohlahsang wasahn mihting tohrohro pwehn ale mwengehn souwas. Ke kak doadoahngki kisin cooler me pahn itarohng pahn omw sehro. Cooler lapala oh dipwisoun mwenge me wiawihkihda kilahs sohte mweimwei nan wasahn mihting tohrohro.

◼ Sawas en Mwohni: Kitail kak kasalehda atail kalahnganki koasoandi wet ni atail kihda atail sawas en mwohni ni wasahn mihting tohrohro ong doadoahk me kin wiawi nan sampah pwon. Ma ke pahn doadoahngki check, menlau ntingihedi pohn checko “Watch Tower.”

◼ Wini: Ma ke kin kangkang wini, menlau wahda uwen me ke anahne pwehki sohte me pahn kohda nan wasahn mihting tohrohro. Dikek en dok ong soumwahu en suke anahne koskosla ni ahl ehu me sohte pahn kahrehda keper ong meteikan.

◼ Suht: Ehuehu pahr nan sampah, aramas kin ohkihla arail doadoahngki suht ileile. E mwahu en pilada sohri de suht me konehng pwe en dehr kahrehda pwupwudi, ohla de kahpwal teikan.

◼ Kahpwal en Rongorong: Ma prokram pahn kohda ni freguency en FM nan wasahn mihting tohrohro, ke anahne wahdo noumw kisin radio me doadoahngki battery oh headphones pwe ken kak rong.

◼ Mehn Kadahr Seri (Baby Strollers) oh Sehr Teikan: Mehn kadahr seri oh sehr teikan en dehr wisikla nan wasahn mihting tohrohro. Ahpw doupen seri me mwahu oh kak itar pohn sehr limwahn me naineki serio kak wisikda.

◼ Lehn Wai: Kitail pahn kasalehda kadek ong meteikan ni atail ekiste de sohte doadoahngki lehn wai me kakete kahrehiong aramas en apwalki esingek de kahpwal teikan.—1 Kor. 10:24.

◼ Doaropwehn Please Follow Up (S-43): Doaropwehn Please Follow Up pahn audauda pwehn kihda ire kan me pid irail kan me kitail kalohk ong nan wasahn mihting tohrohro oh re perenki rong. Mwurin omw audehda doaropwe pwukat, ke pahn kihong irail me mi nan wasahn kihla pwuhk de sekteri en mwomwohdiso mwohn omw pahn mwesel.

◼ Imwen Mwenge kan: Kawauwihala mwaren Siohwa sang omw wiewia kan nan imwen mwenge kan. Likawih likou me konehng Kristian men. Kihdi tip ma met tiahk en sahpwo.

◼ Hotel kan:

(1) Menlau dehr wiahda koasoandi ni hotel en kolokol pere ong uhk me tohtohsang dahme ke uhdahn pahn doadoahngki, oh dehr kahrehlong aramas nan omw pere tohtohsang uwen me hotelo mweidada.

(2) Dehr kasohrehla omw koasoandi en doadoahngki perehn hotel ihte ma mie irair karuwaru pwarada, oh kalelehki hotel ni ahnsowohte pwe meteikan me anahne pere en uhd doadoahngki pereo. (Mad. 5:37) Ma ke anahne kasohrehla omw koasoandio, ke anahne alehdi nempehn met. Ma ke kasohrehla omw koasoandio mwotomwot sang awa 48 mwohn rahn en omw koasoandien pweidi, noumw mwohni en deposit sohte pahn kapwurupwurwei.

(3) Ma ke pahn doadoahngki debit oh credit card ni omw kohla ni hotel, ken taman me mie koasoandi en hotel kan en katohrehla uwen pweinen omw pere sang nan noumw account, pil patehng uwen mwohni me pahn pwain dahme ke kakete kauwehla erein omw mihmi ni hotelo. Ke sohte kak doadoahngki uwen mwohni ko lao rahn kei mwurin omw pwainla hotelo.

(4) Doadoahngki mehn kadahr kapang ihte ni ahnsou me ke anahne, mwurin mwo mwadang kapwurehla pwe meteikan pahn doadoahngki.

(5) Ma aramas kin kihdi tip ni hotel kan wasao, menlau kihong tohndoadoahk en hotel me kadahre omw kapang ko oh pil kihdi tip ong tohn kamwakele omw pereo.

(6) Kuk nan pere kante me mweimwei en kuk.

(7) Dehr ale mwengehn ni menseng, koahpi de ais me kohda ong irail me pweidi ni hotel daulihla sang uwen me ke anahne.

(8) Ahnsou koaros ken kasalehda irair kan en wahn sapwellimen Koht manaman ni omw koasoiong de peki sawas rehn tohndoadoahk en hotelo. Re kin apwahpwalih aramas tohto oh pahn kalahnganki atail kadek, kanengamah, oh madamadau toupahrek.

(9) Ahnsou koaros, pahpa oh nohno kan anahne tetehk nehrail seri kan ni arail mihmi nan hotelo de likin hotelo, oh pil ni elevator kan, swimming pool, wasahn mwomwohd oh kommoal, wasahn eksersais de wasa teikan.

(10) Pweinen perehn hotel me mi nan doaropwehn Recommended Lodging List iei pweinen rahn ehu, ahpw pweinen taksis sohte patehng. Ma hotel nda ken pwain laudsang, ke dehr pwain oh mwadang padahkihong Palien Koasoanehdi Wasahn Pweidi ong mihting tohrohro.

(11) Ma mie kahpwal ehu pwarada me pid omw hotel, menlau padahkihong Palien Koasoanehdi Wasahn Pweidi erein omw mi ni mihting tohrohro pwe ren kak seweseiuk.

◼ Iang Sawas: Mehmen me men iang sawas anahne idek rehn irail kan me apwalih doadoahk en kamwakel nan wasahn mihting tohrohro. Seri kan pahnangin sounpar 16 pil kak iang sawas ni arail pahn iang arail pahpa oh nohno de emen me kin apwalih irail de emen me laud me pahpa nohno de me kin apwaliho pwungki.