Mehn Kataman ong Mihting Tohrohr kan
Kuloak: Wenihmw kan pahn langada kuloak 8 ni menseng. Ngilen keseng pahn tepida kuloak 9:20 ni menseng. Ni ahnsowo, kitail koaros anahne kohla nan dewetail kan pwe prokramo en kak tepida ni wahu oh soandi mwahu. Prokramo pahn imwisekla mpen kuloak 5:00 mwurin souwas.
Koulki Koulen Kaping ong Siohwa: Sapwellimen Koht aramas kan mahso kin kapinga Siohwa nan koul, oh ngilen keseng kan kin pousehlahte wia kisehn mehkot me kesempwal nan atail kaudok rahn pwukat. (Mel. 28:7) Ehuehu rahn ong atail mihting tohrohr (regional convention) kin tepikihda ngilen keseng. Met sohte wiawihdahte pwe kitail en rongorong ngilen keseng ahpw eh kaunopada pwe kitail en kak esehla duwen oh kaudok ong Siohwa. Ihme kahrehda, ni ahnsou me sounpakair pahn pakairki me ngilen keseng pahn kereniong tepida, ih ahnsou me kitail en kohla mwohndi oh perenki rongorong ngilen keseng, ah kaidehn ahnsoun koasoakoasoi. Ni atail wia met e pahn kasalehda me kitail kesempwalki doadoahk laud en irail sounkeseng kan en Watchtower. Pak riau nan sounpar koaros brother oh sister pwukat kin pein pwain irail en kohla, Patterson, New York, pwehn wiahda koul kaselel kan pwe kitail en perenki. Mwurin omw rongorong kanahieng ngilen keseng kan, koaros anahne iang kapinga Siohwa ni arail koulki koul kan en Wehio.
Wasahn Peidi Sidohsa: Wasahn mihting tohrohr kan wasa me se ale manaman en koasoanehdi wasahn peidi kan pahn sohte pweipwei oh pahn audauda ahnsou me aramas kan pahn lella mwo. Pwehki wasahn peidi sohte laud, e pahn mwahu ekei en sawaski wararail oh idan meteikan. Irailte me naineki license plate de placard ong irail me kahpwal en paliwar me kak mweimwei en peidi wasa kan me koasoandier ong irail.
Dewetail: Ni ahnsou me wenihmw en wasahn mihting tohrohr ritida nimenseng, menlau dehr weirih dewemwail mwomwen me kumwail siai ong meteikan. Irair en tounmetei me kin kamwakid kitail en rapahki dahme mwahu ong meteikan kin kasalehda me kitail Kristian mehlel kei oh met kin kamwakid meteikan en kapinga Koht. (Sohn 13:34, 35; 1 Kor. 13:4, 5; 1 Pit. 2:12) Kitail kak kihsang dewen tohn atail peneinei me kin mi rehtail de irail me iang waratail sidohsa de neitail tohnsukuhl en Paipel kan. Mie dewen me mah kan oh me luwet ni paliwar kan. Pwehki wasahn mwomwohd pwukat malaulau, emen de riemente me kin sewese me mah de me luwet ni paliwar kak iang mwohndi limwah.
Likou me Konehng: Atail likou erein mihting tohrohro anahne konehng oh soandi mwahu. E sohte pahn kin nohn daulihala duwehte sidail kan me kalapw pwarada nan sampah wet. (1 Tim. 2:9) Pil erein ahnsoun mwemweit kan, oh mwohn oh mwurin prokram kan en mihting tohrohro, kitail sohte men likawih likou me sohte konehng de sohte soandi mwahu. Met pahn kahrehda kitail kak perenki doadoahngki doaropwehn mihting tohrohr me kin kasalehda ihs kitail (convention badge) oh kitail sohte pahn namenengki wia kadehde ni ahnsou mwahu kin pwarada. Mwomwatail oh atail tiahk erein atail towehda mihting tohrohr kan me pahn wiawi pahn kahrehda aramas me mohngiong mehlel en men ese rohng me mi nan Paipel me kak komourirailla. Pil ehu, met kin kaperenda Siohwa.—Sep. 3:17.
Doadoahngki Cell Phone de Soahng kan me duwehte Tablet ape ni Tiahk Mwahu: Kitail kin kasalehda tiahk mwahu erein mihting kan sang ni atail pahn wiahiong neitail cell phone kan de soahng kan me duwehte (tablet) pwehn dehr kerempwa meteikan. Ma ke doadoahngki camera, rekordi soahng kan, tablet, de soahng teikan kan me duwehte mepwukat, kitail men kanahieng en dehr kedirapwahla meteikan de perei irailla. Kitail pil men kasalehda tiahk mwahu sang ni atail sohte pahn text de email me sohte kesempwal erein prokramo.
Mwengehn Souwas: Menlau wahda kisin mwengehn souwas ahpw ieremen kohkohlahsang wasahn mihting tohrohro pwehn ale mwengehn souwas. Ke kak doadoahngki kisin cooler me pahn itarohng pahn omw sehro. Cooler lapala oh dipwisoun mwenge me wiawihkihda kilahs sohte mweimwei nan wasahn mihting tohrohro.
Sawas en Mwohni: Kitail kak kasalehda atail kalahnganki koasoandi wet ni atail kihda atail sawas en mwohni ni wasahn mihting tohrohro ong doadoahk me kin wiawi nan sampah pwon. Ma ke pahn doadoahngki check, komw kalahngan oh ntingihedi pohn checko “Watch Tower.”
Wini: Ma ke kin kangkang wini, menlau wahda uwen me ke anahne pwehki sohte me pahn kohda nan wasahn mihting tohrohro. Dikek en dok ong soumwahu en suke anahne koskosla ni ahl ehu me sohte pahn kahrehda keper ong meteikan, dehr kesehla nan wasahn mihting tohrohro de nan hotel kan.
Soahng Keper kan me Kitail anahne Kanahieng: Menlau medewe mwahu en perehsang meteikan kahpwal kan me kak kahrehiong kirisdi de pwupwudi. Ehuehu pahr nan sampah, aramas kin ohkihla arail doadoahngki suht ileile. E mwahu en pilada sohri de suht me konehng pwe en dehr kahrehda pwupwudi, ohla de kahpwal teikan.
Kahpwal en Rongorong: Ma prokram pahn kohda ni frequency en FM nan wasahn mihting tohrohro, ke anahne wahdo noumw kisin redio me doadoahngki padiri oh earphones pwe ken kak rong.
Mehn Kadahr Seri (Baby Strollers) oh Sehr Teikan: Mehn kadahr seri oh sehr teikan en dehr wisikla nan wasahn mihting tohrohro. Ahpw doupen seri me mwahu oh kak itar pohn sehr limwahn me naineki serio kak wisikda.
Lehn Wai: Mihting tohrohr tohto kin wiawi nan wasa kan me wenihmw oh wenihmwtok kin ritidi. Kahrehda kitail men kasalehda kadek ong meteikan ni atail ekiste de sohte doadoahngki lehn wai me kakete kahrehiong aramas en apwalki esingek de kahpwal teikan.—1 Kor. 10:24.
Doaropwehn Please Follow Up (S-43): Doaropwehn Please Follow Up pahn audauda pwehn kihda ire kan me pid irail kan me kitail kalohk ong nan wasahn mihting tohrohro oh re perenki rong. Mwurin omw audehda doaropwe pwukat, ke pahn kihong irail me mi nan wasahn kihla pwuhk de sekteri en mwomwohdiso mwuhr.
Imwen Mwenge kan: Kawauwihala mwaren Siohwa sang omw wiewia kan nan imwen mwenge kan. Likawih likou me konehng Kristian men. Kihdi kisin mwohni (tip) ma met tiahk en sahpwo.
Hotel kan:
Menlau dehr wiahda koasoandi ni hotel en kolokol pere ong uhk me tohtohsang dahme ke uhdahn pahn doadoahngki, oh dehr kahrehlong aramas nan omw pere tohtohsang uwen me hotelo mweidada.
Dehr kasohrehla omw koasoandi en doadoahngki perehn hotel ihte ma mie irair karuwaru pwarada, oh kalelehki hotel ni ahnsowohte pwe meteikan me anahne pere en uhd doadoahngki pereo. (Mad. 5:37) Ma ke anahne kasohrehla omw koasoandio, ke anahne alehdi nempehn met. Ma ke kasohrehla omw koasoandio mwotomwot sang awa 48 mwohn rahn en omw koasoandien pweidi, noumw mwohni en deposit sohte pahn kapwurupwurwei.
Ma ke pahn doadoahngki debit oh credit card ni omw kohla ni hotel, ken taman me mie koasoandi en hotel kan en katohrehla uwen pweinen omw pere sang nan noumw account, pil patehng uwen mwohni me pahn pwain dahme ke kakete kauwehla erein omw mihmi ni hotelo. Ke sohte kak doadoahngki uwen mwohni ko lao rahn kei mwurin omw pwainla hotelo.
Doadoahngki mehn kadahr kapang ihte ni ahnsou me ke anahne, mwurin mwo mwadang kapwurehla pwe meteikan pahn doadoahngki.
Ma aramas kin kihdi tip ni hotel kan wasao, menlau kihong tohndoadoahk en hotel me kadahre omw kapang ko oh pil kihdi tip ong tohn kamwakele omw pereo.
Kuk nan pere kante me mweimwei en kuk.
Dehr isaneki mwengehn ni menseng, koahpi de ais me kohda ongete irail me pweidi ni hotel.
Ahnsou koaros ken kasalehda irair kan en wahn sapwellimen Koht manaman ni omw koasoiong de peki sawas rehn tohndoadoahk en hotelo. Re kin apwahpwalih aramas tohto oh pahn kalahnganki atail kadek, kanengamah, oh madamadau toupahrek.
Ahnsou koaros, pahpa oh nohno kan anahne tetehk neirail seri kan ni arail mihmi nan hotelo de likin hotelo, oh pil ni elevator kan, swimming pool, wasahn mwomwohd oh kommoal, wasahn eksersais de wasa teikan.
Pweinen perehn hotel me mi nan doaropwehn Recommended Lodging List iei pweinen rahn ehu, ahpw pweinen daksis sohte patehng. Ma hotel nda ken pwain laudsang, ke dehr pwain oh mwadang padahkihong Palien Koasoanehdi Wasahn Pweidi ong mihting tohrohro.
Ma mie kahpwal ehu pwarada me pid omw hotel, menlau padahkihong Palien Koasoanehdi Wasahn Pweidi erein omw mi ni mihting tohrohro pwe ren kak seweseiuk.
Iang Sawas: Mehmen me men iang sawas anahne idek rehn irail kan me kin apwalih doadoahk wet nan wasahn mihting tohrohro. Seri kan pahnangin sounpar 16 pil kak iang sawas ni arail pahn iang arail pahpa oh nohno de emen me kin apwalih irail de emen me laud me pahpa nohno de me kin apwaliho pwungki.