Atail Mihting Tohrohr kan Kin Wia Mehn Kadehde Laud ong Padahk Mehlel
1. Soangen padahk mehlel kesempwal dah kan me mehn Israel kan kin ahneki ahnsou en medemedewe oh koasoiapene ni kapokon kan me re kin kaukaule wia?
1 Mehn Israel kan mahs kin pokonpene pak siluh nan sounpar ehu pwehn wia kamadipw kan me koasoandi ren kaukaule wia. Mendahki ohl kante me anahne towehda, ahpw peneinei pwon kin kalapw seiloakla Serusalem pwehn paiekihda kapokon kaperen pwukat. (Deud. 16:15, 16) Soangen kapokon pwukat kin kihong irail ahnsou ren medemedewe oh koasoiapene padahk mehlel kesempwal kan. Ia ekei padahk mehlel pwukat? Ehu padahk iei me Siohwa kin ketin kadek sapan oh limpoak ni eh ketikihda me mwahu kan ong irail. (Deud. 15:4, 5) Pil ehu, irail kak koapworopworki me e pahn ketikihda kaweid oh ketin sinsile irail. (Deud. 32:9, 10) Mehn Israel kan pil kak medemedewe duwen ire mehlel duwen arail kin weuwa mwaren Siohwa oh anahne kasalehda sapwellime wiewia pwung kan nan arail mour. (Deud. 7:6, 11) Pil duwehte, kitail kin paiekihda atail mihting tohrohr kan me kin wiawi nan sounpar koaros.
2. Ia duwen prokram en mihting tohrohr eh pahn kamarainihada padahk mehlel?
2 Prokram en Mihting Tohrohr Kin Kamarainihada Padahk Mehlel: Nan atail mihting tohrohr kan, kitail kin perenki rong padahk kan, kilang kasdo en sipai kan, kamwomwada kan oh pil rong sang riatail teikan. Mepwukat kin sewese kitail en wehwehki mwahu oh pil doadoahngki padahk mehlel en Paipel kan. (Sohn 17:17) Doadoahk laud tapihadahr wiawi pwehn kaunopada ong mihting tohrohr me pahn wiawi. Sapwellimen Siohwa pwihn kaukaunop prokram ehu me wiawihda pwehn koasoia duwen dahme anahn ahnsou wet ong doadoahk en kalohk nan sampah pwon. (Mad. 24:45-47) Ia duwe, ke men kilang de rong dahme pahn wiawi?
3. Dahme kitail anahne wia pwe kitail en paiekihda prokram en mihting tohrohr?
3 Kitail pahn keieu paiekihda mihting tohrohr pwukat ma kitail pahn iang towehda oh rong kanahieng padahk kan erein rahn riau ko pwon. Ma ke saikinte wia met, a ken koasoiong omw kaunen doadoahko duwen omw pahn kommoal sang doadoahk oh iang towehda. Koasoanehdi pwe ken meir mwahu ni pwong kan pwe ken kak rong mwahu erein prokramo eh wiawi. Me tohto kin diarada me ni arail kin kilengdalahng me wia padahko oh ntingihedi ire kan, met kin sewese irail en rong mwahu. Dehr mweidohng noumw cellphone en kedirepweiuk de meteikan. Dehr koasoakoasoi, textseli, de kang mehkot erein prokramo wiwiawi.
4. Ia duwen pahpa oh nohno kan ar kak sewese neirail seri kan ren paiekihda padahk kan nan mihting tohrohr?
4 Nan sounpar en Sapad kan, ni ahnsou me peneinei kan en Israel kin pokonpene pwehn rong wadawad en Kosonnedo erein Sarawien Impwal kan, “seri” kan kin iangete irail “pwe re en rong oh esehla.” (Deud. 31:12) E kin wia mehn kangoang ni atail kin kilang peneinei kan ar kin mwohndi wasa kis erein mihting tohrohro oh neirail seri kan sohte kin men meir ahpw kin rongorong. Ni ehuehu soutik ko, ele e mwahu en kilang dahme kumwail ntingihedi sang nan prokramo oh koasoiapene dahme kumwail keieu perenki. “Seri kan kin wia mehkot sapwung ni ar sohte wehwehki oh seukautih,” eri pahpa oh nohno kan en tehk mwahu neirail seri kan iangahki neirail me pwulopwul kan, ni ahnsoun kommoal en souwas oh dehr mweidohng ren wia pein nsenarail.—Lep. Pad. 22:15; 29:15.
5. Ia duwen atail kak kalinganahla padahk mehlel sang mwomwen atail likou kan ni ahnsoun mihting tohrohr?
5 Ni atail kin doadoahngki neitail badge kan, met sohte kin ihte kasalehda duwen mihting tohrohro oh kahrehda towe teikan ren kak ese ihs kitail, ahpw e pil kin wia mehn kadehde mwahu ong aramas teikan. Aramas akan pahn kilang me irail kan me kin doadoahngki neirail badge kin likawih likou me soandi mwahu oh konehng, weksang dahme irail kalapw kilang tohnsampah kan kin likawih. (1 Tim. 2:9, 10) Kahrehda, kitail anahne tehk mwahu mwomwatail oh atail likou kan ahnsoun mihting tohrohr. Ma kitail lemehda kitail en wilian atail likou pwe kitail en kohla mwenge wasahn mwenge kan mwurin mihting tohrohro, kitail anahne tamataman me kitail kin wiahte towe kan en mihting tohrohro oh anahne likouda mwahu.
6. Ia pil ehu ahl me kitail kin paiekihda miniminpene en Kristian kan ni ahnsoun mihting tohrohr?
6 Ni ahnsoun kapokon kan me mehn Israel kan kin kalapw wia, irail kin paiekihda werek mwahu en iengerail tohnkaudok kan sang wasa teikan nan arail wehi oh pil wasa koaros nin sampah, oh met kin kahrehda miniminpene. (Wiewia 2:1, 5) Ni ahnsoun mihting tohrohr kan, ehupene tohrohr me kitail ahneki rehn iengetail Kristian kan kin sansalda laud. Irail kan me kin kilikilang kitail kin kalapw mwekidki irair en miniminpene wet. (Mel. 133:1) E mwahu en dehr kohla ekis wasa ahpw kitail wahdo kanatail mwengehn souwas pwe met pahn kihong kitail ahnsou mwahu en tuhwong oh koasoakoasoi ong riatail kan.
7. Kahrepe dah kan me kitail ahneki pwehn toukihda pein kitail ong doadoahk ma kitail kak?
7 Irail kan me kin kilang kitail kin mwekidki mwomwen soandi mwahu en atail mihting tohrohr kan, ahpw mehlel ni ahnsou me irail esehda me doadoahk koaros kin pweida pwehki mie irail kan me kin toukihda arail ahnsou pwehn wia met ni soh isepe. Ke kak ‘toukihda pein kowe’ pwehn iang doadoahk ni ahnsoun mihting tohrohr? (Mel. 110:3, NW) Tohn peneinei pwon kin kalapw toukihda pein irail en iang doadoahk pwehn kaiahne neirail seri kan ren esehla sewese meteikan. Ma ke kin namenek, omw iang doadoahk ni mihting tohrohr kin wia ahl mwahu en tuhwong riatail teikan. Emen sister koasoia: “I sohte ese me tohto wasao, ihte ei peneinei oh kompoakepahi kan. Ahpw ahnsou me I iang kamwakel, I tuhwongada riatail me tohto. I uhdahn perenkihda!” Atail kin kalaudehla atail esehla riatail kan sang ni atail iang sawas ni mihting tohrohr pahn wahdohng kitail peren laud. (2 Kor. 6:12, 13) Ma ke saikinte wia met, idek rehn elder kan ia duwen omw kak iang sawas.
8. Ia duwen atail pahn luke meteikan ren iang towehda mihting tohrohr?
8 Luke Meteikan en Iang Rong Padahk Mehlel: Duwehte dahme kin wiawi nan sounpar kan mwowe, wihk siluh mwohn mihting tohrohr pahn wiawi, kitail pahn wia doadoahk tohrohr en luke meteikan en iang towehda. Mwomwohdiso kan pahn men kihpeseng doaropwehn luhk kan ni arail wasahn kalohk ni uwen me re kak. (Kilang koakon me koasoia “Ia Duwen Atail Pahn Kihla Doaropwehn Luhk?”) Kitail pahn wahda luhwen doaropwe kan koaros pwe kitail en kak kalohk ni ahnsou sohte lipilipil.
9. Menlau koasoiahda dahme wiawi me kasalehda me doadoahk en luhk kin imwila mwahu.
9 Aramas akan kin mwekidki doadoahk en luhk wet? Ni ehu mihting tohrohr, emen brother me kin sewese tohn mihting kan sewese pwopwoud ehu rapahki wasa ren mwohndi ie. Pwopwoudo ndahng brothero me re alehdi doaropwehn luhko oh “medewe me e mwomwen kaperen en iang.” Ira eri tangahki sidohsa mwail 200 pwehn iang towehda. Oh pil ehu, emen sister kalohk ihmw lel ihmw oh kihong doaropwehn luhko emen ohl me mwomwen men ese duwen mihting tohrohro. Sistero eri koasoiaiong ohlo duwen luhko. Rahn kei mwuhr ni sistero eh iang mihting tohrohro, e kilangada ohlo oh pil iengen ohlo ara iang towehda oh re weuwa ehu pwuhk kapw me ahpwtehn kohda ni mihting tohrohro.
10. Dahme kahrehda atail iang towehda mihting tohrohr en pahr koaros kesempwal?
10 Kapokon kan me mehn Israel kan kin kalapw wia iei sawas limpoak ehu sang rehn Siohwa pwehn sewese irail en “papah ih ni mehlel oh loalopwoat.” (Sos. 24:14) Pil duwehte, atail iang towehda mihting tohrohr en pahr koaros kin sewese kitail en “momourki me mehlelo ahnsou koaros” oh met wia kisehn atail kaudok me kesempwal. (3 Sohn 3) Siohwa en ketin kapaiada nannanti en koaros me poakohng mehlel pwe ren iang towehda oh uhdahn paiekihda!
[Kilel nan Pali 4]
Atail tiahk mwahu ni ahnsoun mihting tohrohr kin kalinganahla padahk mehlel
[Kilel nan Pali 5]
Wihk siluh mwohn mihting tohrohr pahn wiawi, kitail pahn wia doadoahk tohrohr en luke meteikan en iang towehda
[Kaokon nan Pali 3-6]
Mehn Kataman Kan Ong Mihting Tohrohr En Pahr 2012
◼ Kuloak: Prokram pahn tepida kuloak 9:20 ni menseng en rahn riau ko koaros. Ni ahnsou me pakair kohda me ngilen keseng pahn tepidahr, kitail koaros anahne kohla nan dewetail kan pwe prokramo en kak tepida ni wahu oh soandi mwahu. Prokramo pahn imwisekla kuloak 4:55 mwurin souwas en Rahn Kaunop oh kuloak 3:40 mwurin souwas en Rahn Sarawi.
◼ Dewetail: Kitail kak kihsang dewen tohn atail peneinei me kin mi rehtail, irail me iang waratail sidohsa de neitail tohnsukuhl en Paipel kan.—1 Kor. 13:5.
◼ Mwengehn Souwas: Menlau wahdo mwengehn souwas ahpw ieremen kohkohlahsang wasahn mihting tohrohro pwehn ale mwengehn souwas. Ke kak doadoahngki kisin cooler me pahn itarohng pahn omw sehro. Cooler lapala sohte mweimwei nan wasahn mihting tohrohro.
◼ Sawas en Mwohni: Kitail kak kasalehda atail kalahnganki koasoandi wet ni atail kihda atail sawas en mwohni ni wasahn mihting tohrohro ong doadoahk me kin wiawi nan sampah pwon. Ma ke pahn doadoahngki check, menlau ntingihedi pohn checko “Watch Tower.”
◼ Aksident oh Emergency kan: Ma mie emergency pwarada nan wasahn mihting tohrohro, menlau mwadang kehsehki brother me kin sewese tohn mihting me karanih iuk. E pahn mwadang kalellehki wasahn sawas pwe emen me konehng en kohdo kilang irairo oh dahme konehng wiawi. Ma mie anahnepe, e pahn eker delepwon nempe 320-2213. Met pahn sawas pwe me tohto en dehr wiahkinteieu eker emergency.
◼ Wini: Ma ke kin kangkang wini, menlau wahdo uwen me ke anahne pwehki sohte me pahn kohda nan wasahn mihting tohrohro. Dikek en dok ong soumwahu en suke anahne koskosla ni ahl ehu me sohte pahn kahrehda keper ong meteikan.
◼ Imwen Mwenge kan: Kawauwihala mwaren Siohwa sang omw wiewia kan nan imwen mwenge kan.
◼ Iang Sawas: Mehmen me men iang sawas anahne idek rehn irail kan me apwalih doadoahk en kamwakel nan wasahn mihting tohrohro. Seri kan pahnangin sounpar 16 kak pil iang sawas ni arail pahn iang arail pahpa oh nohno de me kin apwalih irail de emen me laud me pahpa nohno de me kin apwaliho, mweidada ren iang.
[Kaokon nan Pali 6]
Ia Duwen Atail Pahn Kihla Doaropwehn Luhk?
Pwehn kanekehla atail wasahn kalohk, mwein kitail anahne koasoi ni mwotomwot. Ele kitail kak nda: “Kaselehlie. Se iang doadoahk me wiawi nan sampah pwon en kihseli doaropwehn luhk wet. Iet sapwellimomwien. Ke pahn kilang ire teikan nan doaropwe wet.” Kasalehda ngoang oh peren. Ni omw pahn iang kihseli doaropwehn luhk ni imwin wihk kan, ke pil anahne kihla Kahn Iroir ni ahnsou me konehng.