Kisinlikou Sang Pwihn me Kin Apwalih Mwomwohdiso nan Sampah Pwon
Ong Riat akan:
Ia uwen kaperen en at kak ntingwohng kumwail ni tepin pahr kesempwal wet! Ni kaimwiseklahn pahr 2014, sounpar epwiki pahn douwehr powe sangete ahnsou me atail Nanmwarki Sises Krais tepida kakaun nanpwungen sapwellime imwintihti kan.—Mel. 110:1, 2.
Tepin pahr en kalohk wet, ni mihting en Watch Tower Bible and Tract Society of Pennsylvania me kin wiawi pahr koaros, pwihn en New World Bible Translation Committee pakairki me re kamwahwihala kawehwehn Paipel me keieu mwahu ni lokaiahn wai. Sounpar 60 samwalahr ako, Siohwa ketin doadoahngki irail me keidi kan en wiahda New World Translation. (Rom 8:15, 16) Met me kahrehiong kawehwe wet eh nohn kesempwal, ke sou pwungki met?
Sounpar tohto, Pali en Nting en Pwihn me Kin Apwalih Mwomwohdiso nan Sampah Pwon kin keieu kesempwalki kawehwehn Paipel. Rahnwet, New World Translation mie nan lokaia 121. Se kangoange kumwail en kasalehiong Siohwa ia uwen amwail kalahnganki Paipel me kumwail naineki. Wadek oh doudouloale rahn koaros. Ni amwail pahn wia met, kumwail pahn karanihala Siohwa Koht me ketikihda Paipel.—Seims 4:8.
Se kin mwekidki ni at rong me riat akan kin lelohng kahpwal kan. Se wehwehki me ong ekei, mwein e kin apwal en kin kolokol arail peren. Karasepe, ehu peneinei nan Asia, arail mour uhdahn wekila douluhl ni ahnsou me arail nohnou mwoatorala. Toahkte ko sohte wehwehki ia mwomwen arail pahn kak kamwahuiala eh irair me e mi loale. Ia uwen kansensuwed! Eri met eh pwoudo kin apwalih ih rahn koaros. Neira pwutako oh neira serepein riemeno kin wia mehn kahlemeng mwahu duwen Kristian sang ni arail kin utung ni limpoak arail pahpa oh nohno. Peneinei kaselel wet oh pil kumwail koaros me kin powehdi soangsoangen kahpwal kan kak pehm peren ni amwail kin powehdi kahpwal kan me kin kasonge amwail pwoson. (Seims 1:2-4) Siohwa kin ketin kamehlelehiong sapwellime me keidi kan oh pil sihpw teikan me kitail pahn peren ma kitail kin powehdi atail kahpwal akan, pwehki kitail pahn alehdi kapai en kisakis en mour soutuk!—Seims 1:12.
Sounpar nekiero, irail me iang towehda Katamano meh 19,241,252. Ia uwen kangoang en kilang me tohto kin kawauwih Siohwa oh Sises Krais sang ni arail iang towehda mihting me keieu kesempwal nan pahro ong sapwellimen Koht pwihn! Erein sounpwong me Katamano wiawi, kaping laud wiawi ni sounkalohk rar kei ar iang sawaspen pioneer nan March oh April. Ia uwen kaperen! Oh ke sou perenki ese me ma emen pahn iang sawaspen pioneer ni ahnsou me sounapwalih me kin seiloak kin mwemweitla ni eh mwomwohdiso, e pahn kak iang mihting en pioneer pwon mendahki ma met sohte wiawi erein sounpwong en March de April? Irail me ahneki erpit kin wehwehki ia kesempwalpen en kedirepwkihla doadoahk en kalohk oh pwukoahn nan mwomwohdiso. En kin kedirepw pahn sewese kitail en kolokol loalopwoat oh uhda teng oh kauhdi ahn Tepil eh kin song en kaluwetehla oh kerempwa atail pwoson.—1 Kor. 15:58.
Ia uwen kangoang en kilang me erein pahr en kalohk nekiero, meh 277,344 kasalehda arail inoukihong Siohwa arail mour sang ni arail papidaisla nan pihl oh met irail kin iang riatail Kristian kan nan sampah pwon keid nan ahl me kohlahng mour! (Mad. 7:13, 14) Irail me kapw pwukat anahne atail sawas pwe arail “pwoson en kin kehlailla.” (Kol. 2:7) Pousehlahte kangoange emenemen en dadaurete lel ni imwi. (Mad. 24:13) “Kumwail kakehlaka irail kan me nan kapehd tikitik, kumwail sewese me luwet akan, oh kanengamahiong aramas koaros.” (1 Des. 5:14) Eri, emenemen kitail en “poadidiong kapakap” oh nda: “Wehiomwi en ketido.”—1 Des. 5:17; Mad. 6:10, NW.
Menlau perenki wadek Pwuhken Pahr wet, oh ese me se poakohng emenemen kumwail oh kumwail koaros me kin poakohng Siohwa!
Riamwail kan,
Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan