Ihs me Kin Kahluwa Sapwellimen Koht Aramas akan Rahnwet?

1, 2. Mwurin Sises eh ketidahla nanleng, dahme wahnpoaron ko ele medewe?

SAPWELLIMEN Sises wahnpoaron ko kesihnen pohn Nahnahn Olip oh kilang arail kauno oh kompoakparailo, Sises, eh ketidahla nanleng oh depwek pali ehu karirihala sang irail. (Wiewia 1:9, 10) Erein sounpar riau, Sises ketin padahkih, kangoange, oh kahluwa irail. Ahpw met e solahr pahn ketiket rehrail. Dahme re pahn wia?

² Mwohn eh ketidahla nanleng, Sises mahsanihong sapwellime tohnpadahk ko: “Kumwail ahpw pahn kadehde ie nan Serusalem, nan Sudia pwon, oh Sameria, oh lelohng ni irepen sampah.” (Wiewia 1:8) Ia duwen arail kak wia doadoahk wet? Sises ketin inoukihda me sapwellimen Koht manaman pahn sewese irail. (Wiewia 1:5) Ahpw ihs me pahn kahluwa irail oh koasoanehdi doadoahk en kalohk nin sampah pwon? Wahnpoaron ko ese me Siohwa ketin doadoahngki ohl akan en kahluwa mehn Israel ko mahso. Eri, ele re medewe ma Siohwa pahn ketin pilada sounkaweid kapw men de soh.

3. (a) Mwurin Sises eh ketidahla nanleng, pilipil kesempwal dahieu me wahnpoaron lelepek ko wiahda? (b) Peidek dah kan me kitail pahn sapengala nan iren onop wet?

³ Mwurinte Sises ketidahla nanleng, sapwellime tohnpadahk ko doadoahngki Paipel pwehn kaweid irail, kapakapki sapwellimen Koht sawas, oh pilada Madaias en wiliandi Sudas Iskariot nin duwen kaeisek riemen en wahnpoaron. (Wiewia 1:15-26) Dahme kahrehda pilipil wet uhdahn kesempwal ong irail oh pil Siohwa? Tohnpadahk ko pohnesehda me anahne mie wahnpoaron 12.a Sises ketin pilada wahnpoaron ako kaidehn ihte en iang ih kalohk ahpw ren wia pwukoa uhdahn kesempwal ehu nanpwungen sapwellimen Koht aramas akan. Pwukoa dahieu met, oh ia duwen Siohwa oh Sises ara ketin kaunopada irail ong pwukoa wet? Soangen koasoandi dahieu rahnwet me pil pahrekiong met? Oh ia duwen atail kak “tamanda irail kan me kin tiengla mwowe” nanpwungatail, ahpw mehlel “ladu lelepek oh loalokongo”?—Ipru 13:7, NW; Mad. 24:45, NW.

SISES KIN KETIN KAHLUWA PWIHN ME KIN APWALIH MWOMWOHDISO NAN SAMPAH PWON

4. Pwukoa dahieu me wahnpoaron ko oh elder teikan nan Serusalem ahneki?

⁴ Wahnpoaron ko tepida tiengla mwowe nan mwomwohdisohn Kristian ni Pendekos en pahr 33. Paipel mahsanih me “Piter eri uhda iangahki wahnpoaron ehk emeno” oh padahkihong pokon laud ehu duwen padahk mehlel me kak komourla aramas. (Wiewia 2:14, 15) Me tohto rehrail wiahla Kristian kei. Mwurin mwo, Kristian kapw pwukat pousehlahte “poadidiong ale padahk sang rehn wahnpoaron ko.” (Wiewia 2:42) Wahnpoaron ko ahneki pwukoa en apwalihala mwohni nan mwomwohdiso. (Wiewia 4:34, 35) Re pil kin padahkih sapwellimen Koht aramas akan oh kapakapkin irail, ndinda: “Pein kiht, se pahn mweidohng at ahnsou unsek ong kapakap oh doadoahk en wia padahk.” (Wiewia 6:4) Oh re kin kadarala Kristian koahiek kan en kalohk wasa kapw kan. (Wiewia 8:14, 15) Mwuhr, elder me keidi teikan pil iangala wahnpoaron ako tiengla mwowe nan mwomwohdiso. Nin duwen pwihn me kin apwalih mwomwohdiso pwon, re kin kihda kaweid ong mwomwohdiso koaros.​—Wiewia 15:2.

5, 6. (a) Ia duwen sapwellimen Koht manaman eh kin sewese pwihn me kin apwalih mwomwohdiso pwon? (Menlau kilang tepin kilel.) (b) Ia duwen tohnleng kan ar kin sewese pwihn wet? (c) Ia duwen Mahsen en Koht eh kin kaweid pwihn wet?

⁵ Tepin Kristian ko ese me Siohwa ketin doadoahngki Sises en kaweid pwihn me kin apwalih mwomwohdiso pwon en ahnsowo. Ia duwen arail kak kamehlele met? Keieu, sapwellimen Koht manaman kin sewese pwihno. (Sohn 16:13) Kristian keidi koaros kin keikihdi sapwellimen Koht manaman, ahpw manamano kin sewese wahnpoaron ko oh elder ko nan Serusalem en kapwaiada arail pwukoa nin duwen sounapwalih kei. Karasepe, nan pahr 49, sapwellimen Koht manaman kaweid pwihn wet en wiahda pilipil ehu me pid sirkumsais. Mwomwohdiso ko idawehn kaweid wet oh “kehlaillahr nan pwoson oh towe kan wie tohtohla rahn koaros.” (Wiewia 16:4, 5) Sang nan kisinlikowo ong mwomwohdiso ko me pid sirkumsais, kitail kak kilang me pwihn me kin apwalih mwomwohdiso pwon ahneki sapwellimen Koht manaman oh re kin kasalehda irair kan duwehte limpoak oh lelepek.—Wiewia 15:11, 25-29; Kal. 5:22, 23.

⁶ Keriau, tohnleng kan kin sewese pwihn me kin apwalih mwomwohdiso pwon. Karasepe, tohnleng men ndaiong Kornilius en rapahkihda wahnpoaron Piter. Mwurin Piter kalohk ong Kornilius oh eh peneineio, re keikihdi sapwellimen Koht manaman, mendahki irail saikinte sirkumsaisla. Kornilius iei tepin aramas me kaidehn mehn Suhs oh sohte sirkumsaisla me wiahla Kristian men. Ni wahnpoaron ko oh Kristian teikan ar rongada duwen met, re pwungki dahme Koht kupwurkio oh kasamwolong nan mwomwohdisohn Kristian irail kan me kaidehn mehn Suhs oh sohte sirkumsaisla. (Wiewia 11:13-18) Tohnleng kan kin doadoahk laud ni ar kin utung doadoahk en kalohk me pwihn me kin apwalih mwomwohdiso pwon kin kaukaweid. (Wiewia 5:19, 20) Kesiluh, Mahsen en Koht kin kaweid pwihn wet. Ohl pwukat kin doadoahngki Paipel pwehn sewese irail wiahda pilipil kesempwal kan duwen dahme Kristian kan kin kamehlele oh pil pwehn kaweid mwomwohdiso kan.​—Wiewia 1:20-22; 15:15-20.

7. Dahme kahrehda kitail kak nda me Sises me ketin kahluwa tepin Kristian kan?

⁷ Mendahki pwihn me kin apwalih mwomwohdiso pwon ahneki manaman nan mwomwohdiso, towe kan en pwihn wet wehwehki me Sises Krais iei arail Kaun. Ia duwen atail ese met? Wahnpoaron Pohl nda me Krais me ketin idihada ekei en “wahnpoaron.” E pil nda me Krais iei “moangatail,” de Kaun, en mwomwohdiso. (Ep. 4:11, 15) Oh tohnpadahk ko sohte adanekihla ehu eden wahnpoaron ko ahpw re “adanekihla sapwellimen Krais,” de Kristian. (Wiewia 11:26) Pohl ese me e kesempwal en idawehn padahk kan sang nan Paipel me wahnpoaron ko oh ohl teikan me tiengla mwowe kin padahngki. Mendahki met, Pohl nda: “Ahpw I men kumwail en dehdehkihla mwahu padahk wet: duwen Krais eh tapwin aramas koaros.” Ire wet dokedoke towe kan koaros nan pwihn me kin apwalih mwomwohdiso pwon. Pohl pil nda me Koht iei tapwin Krais. (1 Kor. 11:2, 3) E sansal me Siohwa ketin idihada sapwellime Ohlo, Krais Sises, pwehn kahluwa mwomwohdiso.

“KAIDEHN DOADOAHK EN ARAMAS MET”

8, 9. Pwukoa kesempwal dahieu me Brother Russell ahneki?

⁸ Tepisang pahr 1870, Charles Taze Russell oh ekei ienge kan men sewese pein irail oh meteikan en kaudokiong Koht nin duwen me Paipel kasalehda. Met pil pidada sewese aramas akan me kin lokaiahki ehu lokaia tohrohr. Eri Zion’s Watch Tower Tract Society wiawihda nan pahr 1884, oh Brother Russell wiahla president.b E uhdahn onopki mwahu Paipel oh sohte masak en ndaiong meteikan me padahk kan en pelien lamalam kan, duwehte padahk me dene koht meh silimen oh padahk me dene mie mehkot soh sansal nan paliwar me kin wie momour mwurin emen eh mehla, sohte kileldi nan Paipel. E sukuhlki me Krais eh pahn pwurehng ketido sohte pahn sansal ong masatail oh me “ahnsou me kileldier ong wehi kan” pahn imwisekla nan pahr 1914. (Luk 21:24, NW) Brother Russell doadoahngki eh ahnsou, kehl, oh nah mwohni pwehn padahkihong meteikan duwen padahk mehlel pwukat. E sansal me Siohwa oh Sises ketin doadoahngki Brother Russell en tiengla mwowe nan ahnsou kesempwal wet nan poadopoad.

⁹ Brother Russell sohte men aramas akan en kapinga ih. Nan pahr 1896, e ntingihedi me ih oh pil brother koahiek teikan sohte douluhl men meteikan en kawauwih irail. Re sohte men aramas akan en ekerkin irail mwar kan, oh re sohte men pwihn en aramas akan en adanekihla adarail kan. Brother Russell mwuhr nda: “Kaidehn doadoahk en aramas met.”

10. (a) Iahd me Sises ketin idihada “ladu lelepek oh loalokongo”? (b) Menlau kawehwehda ia duwen eh sansalda me Pwihn me Kin Apwalih Mwomwohdiso nan Sampah Pwon weksang Watch Tower Society.

¹⁰ Brother Russell mehla nan pahr 1916. Sounpar siluh mwuri, nan pahr 1919, Sises ketin idihada “ladu lelepek oh loalokongo.” Dahme kahrehda? Pwehn ketikihong sapwellime tohnpadahk kan kanarail “mwenge ahnsou me konehng.” (Mad. 24:45, NW) Erein sounpar ko, pwihn tikitik ehu en me keidi kan me mi ni poasen kaun nan Brooklyn, New York, kihda padahk mehlel kan me rasehng kisin tungoal ong sapwellimen Sises tohnpadahk kan. Ahd wet “pwihn me kin apwalih mwomwohdiso nan sampah pwon” tepida pwarada nan sawaspen Paipel kan mwurin pahr 1940. Ni ahnsowo, kitail nda me pwihn wet kin pidada Watch Tower Bible and Tract Society. Ahpw, nan pahr 1971, e sansalda me Pwihn me Kin Apwalih Mwomwohdiso nan Sampah Pwon weksang Watch Tower Society, me kin apwalih soahng kan me pidadahte kosonned kan. Sangete ahnsowo, brother keidi kan kak wiahla kisehn Pwihn wet oh sohte wia sounkaweid kei en Society. Me keren, brother koahiek kan me kisehn “sihpw teikan” kin papah nin duwen sounkaweid kei en Society oh koasoandi teikan (corporation) me sapwellimen Koht aramas akan kin doadoahngki. Pwehki met, Pwihn me Kin Apwalih Mwomwohdiso nan Sampah Pwon kak medemedewehte en kihda iren kasukuhl oh kaweid kan sang Paipel. (Sohn 10:16; Wiewia 6:4) Kahn Iroir en July 15, 2013 kawehwehda me “ladu lelepek oh loalokongo” iei pwihn tikitik en brother keidi kei me wiahda Pwihn wet.

11. Ia duwen Pwihn me Kin Apwalih Mwomwohdiso nan Sampah Pwon ar kin wiahda pilipil kan?

¹¹ Pwihn me Kin Apwalih Mwomwohdiso nan Sampah Pwon kin wiahda pilipil kesempwal kan nin duwen pwihn ehu ni ar kin tuhpene ong mihting wihk koaros. Arail kin tuhpene ong mihting ni ahl wet kin sewese irail en ahneki saledek en koasoakoasoipene oh miniminpene. (Lep. Pad. 20:18) Sohte emen nan Pwihn wet kesempwalsang meteikan nan Pwihno, eri ehuehu pahr brother ko kin weliali pwehn tiengla mwowe nan mihting ko. (1 Pit. 5:1) Met pil kin wiawi ong pali weneu en Pwihn me Kin Apwalih Mwomwohdiso nan Sampah Pwon. Sohte emen nanpwungen Pwihn wet kin medewe me ih kaun emen ong rie ko. Emenemen irail kin wia kisehn papah teikan oh kin ale padahk mehlel me rasehng kisin tungoal oh kin idawehn kaweid sang ladu lelepek oh loalokongo.

“IHS ME UHDAHN LADU LELEPEK OH LOALOKONGO?”

12. Peidek dah kan me kitail pahn sapengala?

¹² Sapwellimen Koht manaman sohte kin koasoiong Pwihn me Kin Apwalih Mwomwohdiso nan Sampah Pwon. Irail pil sohte unsek. Re kin kak wiahda sapwung ni arail kawehwe duwen Paipel de kaweid sapwellimen Koht pwihn. Karasepe, oaralapo “Beliefs Clarified” nan Watch Tower Publications Index (lokaiahn wai) kin audaudki wekideklahn atail wehwehki soahng kan nan Paipel sangete pahr 1870. Sises sohte ketin mahsanihong kitail me sapwellime ladu lelepeko pahn kihda padahk mehlel unsek kan. Eri ia duwen atail kak sapengala sapwellimen Sises peideko: “Ihs me uhdahn ladu lelepek oh loalokongo?” (Mad. 24:45, NW) Mehn kadehde dah me kasalehda me Pwihn me Kin Apwalih Mwomwohdiso nan Sampah Pwon iei ladu lelepeko? Kitail pahn tehkpene soahng siluh kohte me sewese pwihn me kin apwalih mwomwohdiso pwohn ni mwehin wahnpoaron ko.

13. Ia duwen sapwellimen Koht manaman eh sewese Pwihn me Kin Apwalih Mwomwohdiso nan Sampah Pwon?

¹³ Sapwellimen Koht manaman kin sewese Pwihn me Kin Apwalih Mwomwohdiso nan Sampah Pwon. Sapwellimen Koht manaman sewese Pwihn wet en wehwehkihla padahk mehlel kan en Paipel me mwoweo sohte me wehwehki. Karasepe, medewehla wekidekla kan me pid atail wehwehkihla padahk mehlel me kitail koasoiapene mwoweo. Sohte emen kak pein wehwehkihla oh kawehwehda duwen “wasa rir kan en kupwur en Koht.” (Wadek 1 Korint 2:10.) Pwihn wet ahneki soangen pepehmohte me wahnpoaron Pohl ahneki ni eh ntingihedi: “Se sohte kin doadoahngki lepin lokaia me pwilisang loalokong en aramas, pwe lepin mahsen me kin pwilisang rehn [“manamano,” NW].” (1 Kor. 2:13) Mwurin sounpar tohto me padahk likamw kin pitipitih aramas oh sohte kaweid sansal kan, dahme kahrehda sang nan pahr 1919 uhdahn laudla ahn aramas wehwehkihla Paipel? Kahrepeo kak ihte pwehki Koht kin ketin sewesewesehki Pwihn me Kin Apwalih Mwomwohdiso nan Sampah Pwon sapwellime manaman!

14. Nin duwen me Kaudiahl 14:6, 7 kasalehda, ia duwen tohnleng kan ar kin sewese Pwihn me Kin Apwalih Mwomwohdiso nan Sampah Pwon oh sapwellimen Koht aramas akan rahnwet?

¹⁴ Tohnleng kan sewese Pwihn me Kin Apwalih Mwomwohdiso nan Sampah Pwon. Pwihn wet ahneki pwukoa laud en kaweid sounkalohk daulih meh welirar nan doadoahk en kalohk sampah pwon. Dahme kahrehda doadoahk wet inenen pweida? Ehu kahrepe iei sawas sang tohnleng kan. (Wadek Kaudiahl 14:6, 7.) Nan irair tohto, tohnleng kan kin kahluwahla sounkalohk kan rehn emen me ahpwtehn kapakapki sapwellimen Koht sawas!c Doadoahk en kalohk oh katohnpadahk kin pousehlahte kekeirda pil wasa kan me uhwong inenen laud. Met kak wiawi ihte pwehki sawas sang tohnleng kan.

15. Ia duwen Pwihn me Kin Apwalih Mwomwohdiso nan Sampah Pwon ar weksang kaun en pwihn en Kristian likamw kan? Menlau kihda ehu karasaras.

¹⁵ Mahsen en Koht kin kaweid Pwihn me Kin Apwalih Mwomwohdiso nan Sampah Pwon. (Wadek Sohn 17:17.) Tehk dahme wiawi nan pahr 1973. Kahn Iroir (lokaiahn wai) en June 1 kihda peidek ehu me pid ma “aramas akan me sohte uhdihsang arail simoak kak papidaisla.” Pasapeng me Kahn Iroiro kihda poahsoankihda kaweid oh ire mehlel kan en Paipel, oh pasapengo iei soh! Kahn Iroiro kasalehda iren Paipel kei oh kawehwehda dahme kahrehda aramas emen me sohte uhdihsang eh kin simoak anahne piskenla. (1 Kor. 5:7; 2 Kor. 7:1) Makasihno nda me koasoandi kehlail wet sohte kohsang aramas ahpw e kohsang “rehn Koht, me kin ketin kasalehda duwen sapwellime madamadau nan sapwellime Mahsen kan.” Sohte ehu pwihn en pelien lamalam likin pwihn wet me kin uhdahn men likih Mahsen en Koht mehnda ma arail wia met pahn uhdahn apwal ong ekei towe kan. Pwuhk ehu me pid duwen pelien lamalam akan nan Wehin Amerika koasoia: “Kaunen pwihn en Kristian kan kin kalapw wekidala arail padahk kan pwehn pahrekiong madamadau kan me tohn arail mwomwohdiso oh pali laud en aramas kan pahn utung.” Pwihn me Kin Apwalih Mwomwohdiso nan Sampah Pwon sohte kin mweidohng dahme pali laud en aramas akan mwahuki pwehn kaweid irail. Ahpw, Mahsen en Koht me kin kaweid pwihn wet, oh met kadehdehda me Siohwa iei me kin uhdahn ketin kaweid sapwellime kan rahnwet.

“TAMANDA IRAIL KAN ME KIN TIENGLA MWOWE NANPWUNGAMWAIL”

16. Ia ehu ahl en tamataman Pwihn wet?

¹⁶ Paipel mahsanih kitail en ‘tamanda irail kan me kin tiengla mwowe nanpwungatail.’ (Ipru 13:7, NW) Ehu ahl me kitail kak wia met iei en kapakapki Pwihn me Kin Apwalih Mwomwohdiso nan Sampah Pwon. (Ep. 6:18) Re ahneki pwukoa tohto, met iangahki kihda padahk mehlel kan me rasehng kisin tungoal, kaweid doadoahk en kalohk nan sampah pwon, oh apwalih mwohni me aramas akan kin toukihda ong sapwellimen Koht pwihn. Eri re uhdahn anahne kitail en kin kaukaule kapakapkin irail!

17, 18. (a) Ia duwen atail kin idawehn kaweid me kohsang Pwihn me Kin Apwalih Mwomwohdiso nan Sampah Pwon? (b) Ia duwen atail doadoahk en kalohk eh kin utung Pwihn wet oh pil Sises?

¹⁷ Kitail pil kak tamataman Pwihn wet ni atail kin idawehn arail kaweid kan. Pwihn wet kin wiahda sawaspen Paipel kan, mihting kan, oh mihting tohrohr kan pwehn kihong kitail kaweid. Pwihn wet pil kin idihada sounapwalih kan me kin seiloak, me kin uhd idihada elder kan. Sang arail kin idawehn kaweid kan me kohwong irail, sounapwalih me kin seiloak oh elder kan kasalehda me re kin tamataman Pwihn wet. Oh kitail koaros kin kasalehda atail wauneki atail Kauno, Sises, sang atail kin peikiong ohl pwukat me e ketin doadoahngki rahnwet.​—Ipru 13:17.

¹⁸ Pil ehu ahl me kitail kak tamataman Pwihn wet iei sang ni atail kin wia uwen atail kak nan doadoahk en kalohk. Ipru 13:7 (NW) kangoange Kristian kan en alasang pwoson en irail kan me kin tiengla mwowe. Pwihn wet kasalehda pwoson kehlail sang ni arail kin kalohk ni ngoang oh pakapakairki rongamwahwo. Ia duwe, kitail kin utung irail nan doadoahk kesempwal wet? Ma ei, kitail pahn perenki ni atail rong Sises mahsanihong kitail: “Soahng koaros me kumwail wiahiong emen riei me tikitik pwukat, ngehi me kumwail wiahiong!”​—Mad. 25:34-40.

19. Dahme kahrehda ke koasoanehdi teng en idawehn atail Kauno, Sises?

¹⁹ Sises sohte ketin likidmeliehla sapwellime tohnpadahk kan ni eh ketidahla nanleng. (Mad. 28:20) E mwahngih me sapwellimen Koht manaman, tohnleng kan, oh Mahsen en Koht me sewese ih en ketin tiengla mwowe ni ahnsou me e ketiket sampah. E kin ketikihong ladu lelepeko soangen sawasohte rahnwet. Pwihn me Kin Apwalih Mwomwohdiso nan Sampah Pwon kin pousehlahte “idawehn Sihmpwulo,” Sises, “wasa koaros me e pahn kin ketila ie.” (Kaud. 14:4) Eri ni ahnsou me kitail kin idawehn kaweid sang Pwihn wet, kitail kin idawehn atail Kauno, Sises. Ahnsou keren, e pahn ketin kahluwakitaillahng mour soutuk. (Kaud. 7:14-17) Sohte kaun emen nan sampah kak inoukihda met!