Kapwaiada Atail Inou en Kristian ni Saledek

“Wasa me ngehnen Siohwa kin ketiket ie, iei wasao me maiau kin mi ie.”​—2 KORINT 3:17.

1. Ong ihs me Sounkadehdehn Siohwa kan kin inoukihong ahr mour, oh dahme kahrehda re kin doadoahngki mehn doadoahk en pwungen kosonnedo?

SOUNKADEHDEHN SIOHWA KAN kin kamehlele me arail pelien lamalam pahn mihmi kohkohlahte. Ihme, re kin kaskasik en papah Koht “ki ngehn oh mehlel” ni ahnsou kohkohlahte. (Sohn 4:23, 24) Nin duwen aramas me kak wia pein arail pilipil kan, Kristian pwukat kin wiahda arail inou unsek ong Siohwa Koht oh irail kin nantiong en kolokolte ahr inou. Ihme kahrehda, irail kin liki Mahsen en Koht oh sapwellime ngehn sarawi. Nin duwen irail kin ni mongiongarail unsek kapwaiada ahr inou en Kristian ni saledek me Koht ketikihong irail, Sounkadehde kan kin kasalehda wahu ong “kaunen wehi kan” oh kin doadoahngki ni pwung kosonned kan oh koasoandi kan me wehi kan wiahda. (Rom 13:1; Seims 1:25) Karasepe ieu, Sounkadehde kan kin doadoahngki Watch Tower Society nin duwen mehn doadoahk pwung en kosonned​—ehu sang me tohto me mih nan sahpw tohto—​pwehn kak sewese irail en wia ahr doadoahk en sewese aramas teikan, keieu ni pali ngehn. Ahpw Sounkadehde kan kin wiahdahr ahr inou ong Koht, kaidehn ong pwihn en mehn doadoahk pwung en kosonned, oh ahr inou ong Siohwa pahn mihmih kohkohlahte.

2. Dahme kahrehda Sounkadehdehn Siohwa kan kin inenen kalahnganki Watch Tower Society oh arail pwihn teikan me duwehte met?

² Nin duwen ladu kan me inoukihong Koht arail mour, Sounkadehdehn Siohwa kan anahne kapwaiada sapwellimen Sises kaweid kan en “padahkiong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi.“ (Madiu 28:19, 20) Doadoahk wet pahn pousehla lao lel imwin koasoandi wet, pwe Sises pil mahsanih: “Oh Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros​—a mwuri, imwin sampah ahpw pahn kohdo.” (Madiu 24:3, 14} Ehu ehu sounpar, wasahn wiahda pwuhk kan en Watch Tower Society oh pil wasa kan me duwehte met kin wiahda ong Sounkadehdehn Siohwa kan Paipel rar kan, oh pil pwuhk kan oh makisihn kan ong ahr doadoahk en kalohk me kin wiawi nin sampah pwon. Wasa pwukat me inenen kesempwal ong sewese ladu en Koht inouda kan en kapwaiada ahr inou ong Koht.

3. Ni ahl dahieu me Sounkadehdehn Siohwa kan en mahs kin doadoahngki lepin lokaia wet “Society”?

³ Ele mwein, aramas men pahn kak akamaiki duwen ahl me Sounkadehde kan kin ndahki Watch Tower Society​—de pali laud en ahnsou irail kin doadoahngki lepin lokaia wet “Society”—​mwomwen irail kin kilangwong Society nin duwen mehkot laudsang ihte mehn doadoahk ehu. Irail soh kin lemeleme me Society iei me pahn wiahda pilipil laud kan ong irair kan me kin pid duwen kaudok? Pwuhken Jehovah’s Witnesses​—Proclaimers of God’s Kingdom kin kawehwehda met: “Ni ahnsou The Watchtower [June 1, 1938] koasoiada duwen ‘Society’ met wehwehki, kaidehn ihte mehn doadoahk ehu, ahpw kin oarepene pwihn en Kristian keidi kan me wiahda arail pwihn oh doadoahngki.”a Lepin lokaia wet “Society” kin wehwehki “ladu lelepek oh loalokong.” (Madiu 24:45) Ni ahl wet Sounkadehde kan kin kalapw doadoahngki lepin lokaia wet “Society.” Ahpw ni mehlel, pwihn wet me wiahda Society oh “ladu lelepek oh loalokong” sohte duwepenehte. Kaun akan en Watch Tower Society kin pilipilda, ahpw Sounkadehde kan me wiawihkihda ‘ladu lelepeko’ kin keidi sang sapwellimen Siohwa ngehn sarawi.

4. (a) Iaduwen Sounkadehde tohto kan kin kanaiheng doadoahngki ahr lokaia kan pwehn dehr kahrehda sawehwehpene? (b) Dahme kahrehda kitail anahne en toupahrek me kin pid duwen lepin lokaia kan?

⁴ Pwehn dehr mie sawehwehpene, Sounkadehdehn Siohwa kan kin song en kanahieng ahr koasoi kan. Irail sohte kin doadoahngki lepin koasoi pwukat, “Society kin padahkiong kitail,” Sounkadehde kan tohto kin doadoahngki lepin lokaia pwukat “Paipel mahsanih” de “I wehwehki me Paipel padahkiong kitail.” Ni ahl wet irail kin kasansalehda me pein emen emen Sounkadehde kan me wiahda pein arail pilipil kan en kamehlele padahk en Paipel oh met pahn pil sewese aramas teikan en wehwehkihla me Sounkadehde kan sohte kin liduwih pahn koasoandi en pelien lamalam ehu. Ni mehlel, kitail sohte pahn akamaikipene lepin lokaia kan. Kawehwehda lepin lokaia kan me kesempwal ihte pwehn irehdi sawehwehpene. Kesempwal kitail en doadoahngki toupahrek nin duwen Kristian akan. Paipel kin panawih kitail en “dehr akamaipene nanpwungatail.” (2 Timoty 2:14, 15) Iren Paipel kan pil mahsanih duwen kaweid wet: “Eri, ih pil duwen rehmwail, ma amwail mahsen kapwonopwon kan sohte pahn dehdehda, ihs me pahn ese dahme kumwail ndinda?”​—1 Korint 14:9.

Sapwellimen Koht Ngehn kin Katikitikiala Anahn kan ong Koasoandi kan

5. Ia wehwehn 1 Korint 10:23?

⁵ “E mweimweiong kiht se en wia mehkoaros. Mehlel, ahpw mehkoaros sohte mwahu ong kitail,“ wahnponron Pohl mahsanih. E pil kapataiong: “E mweimweiong kitail, kitail en wia mehkoaros; ahpw mehkoaros sohte kin wia mehn sawas mwahu ehu ong kitail.“ (1 Korint 10:23) Ni sansal, mahsen en Pohl sohte kin wehwehki me kitail pahn kak wia mehkot me sapwellimen Koht mahsen kin sapwungki. Kaparekihong mpen kosonned 600 me kohwong mehn Israel en mahs, mie kosonned malaulaute me kin pid duwen mouren Kristian ni oaretik. Ihme, mie irair tohto me emen emen pahn pein pilada ni ah pahn doadoahngki pein eh nsen mwakelekel. Emen me inoukiong Siohwa eh mour kin paiekihda saledek me kohsang sapwellimen Koht ngehn sarawi. Ni ahnsou me Kristian men pahn poadidiong padahk mehlel, e pahn doadoahngkihla pein eh nsenmwakelekel me poahsoanda pohn Paipel oh e pahn liki kaweid en Koht ki ngehn sarawi. Met pahn sewese Kristian men me inoukihong Koht eh mour en tehk dahme pahn “wia mehn sawas mwahu” ong pein ih oh mehteikan. E wehwehki me pilipil kan me e pahn wiahda, pahn doke eh nanpwungmwahu rehn Koht, me e pein inoukihong eh mour.

6. Nan mihding kan en Kristian, iaduwen kitail kak kasansalehda me kitail poadidi nan padahk mehlel?

⁶ Sounkadehde men kin kasansalehda me e poadidi nan padahk mehlel sang ni e pahn iang pasepeng nan mihding en Kristian. Nin tepio, mwein e pahn wia e pasepeng ni mwomwen wadekte dahme pwuhk kan ntingihdi. Ahpw mwuhr, e pahn kekeirada lao lel e pahn kak doadoahngki pein eh lokaia kan kawehwehda padahk kan en Paipel. Met pahn kasalehda me e doadoahngki eh madamadau, kaidehn ihte alasang dahme aramas teikan ntingihdi. Doadoahngki mour en koasoi ni pein eh lokaia oh doadoahngki lepin lokaia kan en padahk mehlel ni ahl me konehng sang nan mongiong pahn kainsenamwahuih ih oh kasalehda me e uhdahn kamehlele.​—Eklesiasdes 12:10; pil tehk Rom 14:5b.

7. Soangen pilipil dah kei me sapwellimen Siohwa ladu kan kin wiahda ni pein nsenarail?

⁷ Sounkadehdehn Siohwa kan kin mwekidki ahr limpoak ong Koht oh iengarail aramas akan. (Madiu 22:36—10) Mehlel, irail kin miniminkihpene limpoak en Krais 11in duwen pwihn en pirien ehu nin sampah pwon. (Kolose 3:14; 1 Piter 5:9) Ahpw nin duwen emen me pahn kak wiahda pein eh pilipil, emen emen irail me kin pein wiahda ahr pilipil en lohkiseli rongamwahu en Wehin Koht, soupoupalih ki politik kan, oh liksang nta, oh liksang ekei mehn kamweit kan, oh mourki koasoandi en Paipel kan. Sohte me kin idingkiong irail en wia pilipil pwukat. Pilipil pwukat kin pid duwen elen mour me aramas akan pein wiahda mwohn irail palm wiahla Sounkadehde kan oh inoukihong Koht arail mour.

Kitail Pwukoahki Atail Wiewia kan ong Governing Body?

8. Mehnia peidek anahne en kawehwehda mwahu?

⁸ Paipel kin kasalehda ni sansal me Kristian mehlel kan sohte kin papah Koht pwehki aramas kin idingkiong irail en wia met. E mahsanih: “Siohwa iei Ngehno; oh wasa me ngehnen Siohwa kin ketiket ie, iei wasao me maiau kin mi ie.” (2 Korint 3:17) Ahpw iaduwen iren Paipel wet kin pid duwen “ladu lelepek oh loalokong” iangahki pwihn en Governing Body?​—Madiu 24:45-47.

9, 10. (a) Iaduwen koasoandi en tapwi kin kadoadoahk nan mwomwohdiso en Kristian? (b) Nan keieun senturi, dahme anahn ong mwomwohdiso en Kristian pwehki koasoandi en tapwi?

⁹ Pwehn sapengla peidek wet, kitail anahne tamanda iren Paipel kan me kin pid duwen koasoandi en tapwi. (1 Korint 11:3) Nan pwuhken Episos 5:21-24, Krais iei “tapwin mwomwohdiso,” oh “mwomwohdiso eh kin uhpah Krais.” Sounkadehde Siohwa ken kin wehwehki me ladu lelepek oh loalokong wiawihkihda rien Sises kan ni pali ngehn. (Ipru 2:10-13) Pwihn en ladu lelepek wet me idihada pwehn kihong sapwellimen Koht aramas akan “kmrail kisin mwenge ahnsou me konehng.“ Ni imwin ahnsou, Krais me idihada ladu menet “en kaunda eh dipwisou kan koaros.” Mehmen me kin nda irail me ih Kristian men, pahn anahne wauneki pwukoa wet me kohwong pwihn en ladu lelepek.

¹⁰ Kahrepen koasoandi en tapwi iei en kolokolte miniminpene oh tehk me “kitail wiahda mehkoaros nin duwen me konehng oh koasoandi pwung.” (1 Korint 14:40) Pwe irairen miniminpene en pweida ni tepin pahro, ekei Kristian me keidi kan me pilipilda sang rehn pwihn en ladu lelepek oh loalokong, pwehn wiliandi pwihno pwon. Nin duwen me wiewia kan mwuhr kasalehda, epwelepen Governing Body ni tepin pahro alehda sapwellimen Siohwa kupwur oh kapai kan. Kristian akan ni keieun senturi kin perenki oh pwungki koasoandi wet. Ei, irail kalahnganki imwila mwahu kan me kohsang koasoandi wet.​—Wiewia 15:1-32.

11. Iaduwen kitail pahn kilangwong Governing Body en nan rahnpwukat?

¹¹ Kesempwalpen koasoandi wet kin mihmihte lau lel ni ahnsouwet. Ni ahnsouwet, Governing Body en Sounkadehdehn Siohwa kan kin wiawihkihda Kristian keidi kan ehk, oh irail koaros ahneki ekspiriens en Kristian tohto. Irail kin kihda kaweid ni pali ngehn ong Sounkadehdehn Siohwa kan, duwehte me Governing Body ni tepin senturi kin wia. (Wiewia 16:4) Duwehte Kristian akan en mahs, Sounkadehde kan kin perenki sohpeiong brother mah kan en Governing Body pwehn ale kaweid me poasoanda pohn Paipel oh kaweid ni ire kan me kin pid kaudok. Nin duwen irail akan me kin iang pwihn en Governing Body kin wia ladu kan en Siohwa oh Krais, oh duwehte iengarail Kristian akan, Paipel kin kihda kaweid wet: “Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih ngenomwail kan; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.”​—Ipru 13:17.

12. Ihs me emen emen Kristian kan koaros pahn pwukoahki arail wiewia ong?

¹² Pwehki Nting Sarawi kan kin kasalehda me Governing Body ahneki pwukoah ehu en apwalih kitail, met kin wehwehki me emen emen Sounkadehdehn Siohwa kan pahn pwukoahki atail wiewia kan ong irail? Soh, oh mahsen en Pohl ong Kristian akan me mihmi nan Rom me kin kasalehda met ni e koasoia: “Eri, kumwail​—dahme kahrehda kumwail kin kadeikekihda riamwail [Kristian akan]? Oh pil kumwail teikan—​dahme kahrehda kumwail kin kauwehki riamwail [Kristian kan]? Pwe kitail koaros pahn uh mwohn silangin Koht . . . Eri, emen emen kitail uhdahn pahn wehkohng Koht duwen pein ih.”​—Rom 14:10-12.

13. Dahme kahrehda Sounkadehdehn Siohwa kan kin wiahda neirail ripoht ong ahr doadoahk en kalohk?

¹³ Ahpw, e soh mehlel me emen emen Sounkadehde kan anahne en wiahda neirail ripoht en kalohk? Ehi, ahpw kahrepen met kin kawehwehda nan ehu pwuhken Sounkadehde kan, me ntingihdi: “Tepin tohnpadahk kan en Sises Krais kin nsenohki duwen ripoht kan en kekeiradahn doadoahk en kalohk. (Mark 6:30) Nin duwen doadoahk wet kekeirada, irail kin kihpene ripoht kan iangahki ekspiriens kaselel kan me kin pid duwen kalohki rongamwahu. . . . (Wiewia 2:5—11, 41, 47; 6:7; 1:15; 4:4) . . . Tohndoadoahk en Kristian lelepek pwukat kin ale kangoang laud ni ahnsou me irail kin rong duwen ripoht kan en doadoahk wet me kin pweida mwahu! . . . Me duwehte met, sapwellimen Siohwa pwihn nan atail ahnsou kin nantiong en wiahda rekohd kan ni pwung ong doadoahko me kin kapwaiada pwuhken Madiu 24:14.”

14, 15. (a) Iaduwen 2 Korint 1:24 kadoadoahk ong pwihn en Governing Body? (b) Emen emen Kristian akan koaros anahne wiahda pein ahr pilipil kan me poahosoanda pohn dah, oh e pohnese duwen ire dahieu?

¹⁴ Pwihn en Governing Body kin wia koasoandi limpoak ehu, oh kahlemeng en pwoson me warong aramas teikan en alasang. (Pilipai 3:17; Ipru 13:7) Sang ni ahr kin kapwaiada oh idawehnla Krais nin duwen kahlemeng ehu, irail pil kak doadoahngki mahsen en Pohl: “Se sohte men wiahda kosonned ong kumwail dahme kumwail pahn pwoson, pwe amwail pwoson me uhdahn kehlail; ahpw se kin iang kumwail doadoahk ong ni pein amwail peren.” (2 Korint 1:24) Governing Body kin kasawiahda irairen tohn sampah, oh kin padahkiong aramas duwen kapai kan en kapwaiada kaweid en Paipel, kihda sawas me kin pid duwen doadoahngki kosonned kan en Paipel, panawih kitail duwen keper soh-sansal kan, oh kihda kangoang ong “iengarail tohndoadoahk kan”. E kin wiahda eh pwukoa en Kristian en apwalihada tohnmwomwohdiso kan, sewese irail en kolokol ahr peren, oh kakehlailda ahr pwoson pwe irail en kak kesihnenda teng.​—1 Korint 4:1, 2; Taitus 1:7-9.

¹⁵ IMa emen Sounkadehde pahn wiahda eh pilipil me kin poasoanda pohn kaweid en Paipel me Governing Body kin kihda, e kin wia met sang ni pein nsene, pwehki sang ni eh wia pein eh onopki Paipel, me kahrehong ih en kamehlele me ahl wet me pwung. Emenemen Sounkadehde kan kin mwekidki sapwellimen Koht Mahsen en kapwaiada kaweid en Nting Sarawi kan me Governing Body kin kihda, oh e pil wehwehki me pilipil kan me e kin wiahda pahn doke pein eh mour ong Koht, me e inoukihong eh mour.​—1 Deselonika 2:13.

Tohnpadahk kan oh Sounpei kan

16. Mendahki pilipil kan me kin pid tiahk kin wia mehkot me emen pein pilida en wia, dahme kahrehda ekei kin pisikensang mwomwohdiso?

¹⁶ Ma pilipil kan me kin pid duwen tiahk iei pilipil en emenemen kitail, dahme kahrehda ekei Sounkadehdehn Siohwa kan kin pisikinla? Sohte me kin pein wiahda eh pilipil duwen soangen wiewia de dihp dahieu me pahn imwikihla piskensang mwohmwohdiso. Ahpw, wiewia wet kin wiawi ihte ma emen nan mwomwohdiso sohte koluhkihla dihp laud kan me ntingihdi nan irelaud 5 en Keieun Korint. Kristian men mwein pahn piskensang mwomwohdiso pwehki e kin wia dihp en nenek, ahpw met pahn wiawi ihte ma e kahng ale sawas en pali ngehn sang rehn silipen kompoak kan. Kaidehn Sounkadehdehn Siohwa kelepw me kin idawehnla wiewia wet en Kristian. Pwuhk me adaneki The Encyclopedia of Religion koasoia: “Sohte lipilipil pwihn kan kin ahneki pwung en pere pein irail sang towe kan me kahng kapwaiada ahr kosonned akan oh pahn kak kawehla popohl en pwihno. Ma e kin pid duwen pelien lamalam, pwung wet kin pali laud en ahnsou pid duwen piskensang mwomwohdiso me kin doake ahn pein emen kesinenda mwohn Koht.”

17, 18. Karasaras dah kan kin kasansalehda pwungen koasoandi en piskensang emen?

¹⁷ Sounkadehdehn Siohwa kan kin wia tohnsukuhl akan en Paipel. (Sosua 1:8; Melkahka 1:2; Wiewia 17:11) Prokram en kasukuhlen Paipel me Governing Body kin kihda pahn kak karasaiong prokram en sukuhl ehu me kaun en kasukuhl kan kin kihda. Mendahki pwihn en kasukuhl kan kaidehn utupen ire kan me tohnsukuhl akan pahn sukuhliki, ahpw irail kin koasoanehdi prokramo, pilada mehnia elen kasukuhliki tohnsukuhl akan me keieu mwahu, oh kihda kaweid konehng kan. Ma emen tohnsukuhl pahn uhweng oh kahng kapwaiada koasoandi en pwihno, wiahda kahpwal ong tohnsukuhl teikan, de kawehla eden sukuhlo, e kak piskensang sukuhlo. Kaun en sukuhlo ahneki pwung en wia dahme me pahn keieu mwahu ong tohnsukuhl akan.

¹⁸ Likin arail Wia tohnsukuhl akan, Sounkadehdehn Siohwa kan kin wia sounpei en Sises Krais, oh alehda kaweid en “tangowei uwen irail kak nan weirentang en pwoson.” (1 Timoty 6:12; 2 Timoty 2:3) Ni mehlel, sounpei en Kristian men me kin kaukaule wia tiahk kan me sohte konehng nin duwen Kristian men pahn kak imwikihla sohla kenikenla rehn Koht. Nin duwen aramas men me ahneki saledek en pilipil, sounpei Kristian men kak wiahda pein eh pilipil, ahpw e pahn pwukoahki eh pilipil kan. Pohl mahsanih: “Sounpei men me kin pwahtiet nan eh doadoahk kin men kapwaiada nsenen eh kaun, oh e sohte kin pingkihda wiewiahn irail kan me kaidehn sounpei. Sounmwadong men me kin tang nan weirentang sohte kak koledi ehu kisakis ma e sohte pahn peikiong kosonned akan.” (2 Timoty 2:4, 5) Kristian mah kan, iangahki Governing Body, anahne uhpaiong ahr Kaun, Sises Krais ni unsek, kapwaiada “kosonned akan,” pwe irail pahn kak alehdi kisakis en mour soutuk.​—Sohn 17:3; Kaudiahl 2:10.

19. Dahme kitail kak kamehlele, mwurin kitail kasawiahda ire mehlel kan duwen inou en Kristian akan?

¹⁹ Ire mehlel kan sohte kin kasansalehda me Sounkadehdehn Siohwa kan kin papah Koht, a kaidehn liduhn aramas akan? Nin duwen Kristian inouda kan me kin paiekihda saledek me Krais kasaledekinirailla, re kin mweidong sapwellimen Koht ngehn sarawi oh sapwellime Mahsen en kaunda ahr mour nin ddwen irail oh riarail kan kin ehukihpene papah Koht nan Sapwellimen Koht mwohmwohdiso. (Melkahka 133:1) Ire mehlel pwukat pahn kak kihsang peikasal en iawasa irail kin ale kehlparail. Ki sounmelkahkao, re kak koulki: “Kauno [Siohwa] kin ketin sinsile oh doandoare ie; I kin likih. E kin ketin sewese ie oh kaparanih ie; I kin kapingahki ei koulen peren kan.”​—Melkahka 28:7.

[Nting tikitik me mi pah]

Iaduwen Ahmw Pahn Sapeng?

◻ Ioduwen Watch Tower Society oh ekei pwihn me duwehte met kin sewese Sounkadehdehn Siohwa kan?

◻ Iaduwen Kristian akan kin paiekihda doodoahk en Governing Body en Sounkadehdehn Siohwa kan?

◻ Dahme kahrehda sapwellimen Siohwa aramas akan kin ripohtki ahnsou me re kin iang doadoahk en kalohk?

◻ Iahd e pahn konehng en piskenla Kristian inouda sang nan mwomwohdiso?

[Kilel nan pali 16]

Governing Body nan keieun senturi kin kolokolte ehupenehn padahk kesempwal kan

[Kilel nan pali 20]

Nin sampah pwon, Sounkadehdehn Siohwa kan kin paiekihda saledek me Krais ketin kasaledekinirailla