Kaualahng Atail Madamadau ong Sises me Wia “Marain en Sampah”
1. Soangen marain lapalap dahieu me Mahsen en Koht kohpada, oh wiewia dahieu pahn sewese kitail en kaualahng atail madamadau ong marain wet?
1 Siohwa doadoahngki soukohp Aiseia pwehn kohpada met: “Aramas akan me weweid nan rotorot kilangehr marain lapalap ehu. Marain ehu dakeradahr irail kan me kin mihmi nan sapwen seukoapworopwor.” (Aiseia 9:2) “Marain lapalap ehu” sansalda sang rehn Sises Krais, Sapwellimen Koht Ohl. Sapwellime Sises doadoahk en kalohk me e wia ni ahnsou me e ketiket sampah oh pil kapai kan me kohsang meirong me e wiahda sewese aramas en solahr mihmi nan rotorot en pali ngehn. Rahnwet, aramas me kin mihmi nan rotorot en pali ngehn anahne soangen marain wet. Atail luhke aramas ong Katamanpen Kamatalahn Krais pahn kihong kitail atail ahnsou mwahu en kaualahng atail madamadau ong Sises me wia “marain en sampah.” (Sohn 8:12) Nan pahr me ahpwtehn neko, aramas million kei kasalehda arail pwoson ni arail iang kitail peikiong sapwellimen Sises kehkehlik wet: “Kumwail wia met ong ni katamanpei.” (Luk 22:19) Ni atail Kataman en pahret kerendohr, iaduwen kitail kak iang kaualahng ahn aramas madamadau ong Sises me wia “marain lapalap ehu” me Siohwa ketin kahrehiong en kamarainih wasa?—Pilipai 2:15.
2. Dahme pahn sewese kitail en kalahnganki meirong tomw en Sises, oh wia met pahn imwikihla dah?
2 Sewese Aramas en Kasalehda Arail Kalahngan: Sounpwong en March oh April kin wia ahnsou mwahu en medemedewe limpoak laud me Siohwa oh Sises kasalehda ni ara koasoanehdi meirong en tomw en wiawi pwehn pwaindi dipen tohnsampah. (Sohn 3:16; 2 Korint 5:14, 15) Atail medemedewe duwen limpoak laud me ira kasalehiong aramas koaros pahn sewese kitail en kalahnganki Katamanpen Kamatalahn Krais. Sapwellimen Koht aramas akan koaros kin koasoanehdi arail ahnsou pwehn kak wadek oh doudouloale duwen wadawad en Paipel wihk ehu mwohnte Kataman pahn wiawi nin duwen me sansalda nan pwuhken Examining the Scriptures Daily. Ma kitail pahn medemedewe duwen sapwellimen Siohwa irair kaselel kan, mehlel irair pwukat me kamwekid Ih en kadarodo Sapwellime Ohl pwehn matkinkitailla, soangen irair pwukat kin kahrehiong kitail en perenki atail kin papah Ih. Oh pil, ma kitail kin doudouloale iaduwen pein kitail paiekihda meirong tomw en Krais, met pahn sewese atail limpoak ong Koht oh sapwellime Ohl en laudla oh kehlailla oh met pahn pil sewese kitail en wia uwen atail kak koaros ni atail wia kupwuren Koht.—Kalesia 2:20.
3. Iaduwen kitail kak kasalehda atail kin kalahnganki Kataman?
3 Ma kitail pahn kalaudehla atail kalahnganki sapwellimen Siohwa koasoandi en komour, atail kasikasik oh perenki Katamano pahn sansal rehn atail Paipel Study kan, atail Return Visit kan, atail peneinei kan, mehn mpatail kan, iengetail tohnsukuhl kan, iengetail tohndoadoahk kan, oh aramas teikan me kitail kin luhke ong wiewia kesempwal wet. (Luk 6:45) Ihme kahrehda, e kesempwal kitail en luhke aramas pwukat, oh kihong irail doaropwe en luhk ong Kataman wet pwehn sewese irail en tamataman rahno. Pwehn dehr manokehla emen, sounkalohk tohto diarada me e kin sewese irail en ntingihdi eden aramas akan me irail kin kalap luhke ong Kataman kan, oh pahr koaros irail kin kapataiong eden aramas teikan me irail pil men luhke. Ni atail pahn koasoanehdi mwahu ihs me kitail men luhke, oh pil uhdahn luhke irail, met pahn kasalehda atail kalahngankihong Siohwa Koht “sapwellime kisakis kesempwal.”—2 Korint 9:15.
4. Ke kak kalaudehla ahmw ahnsoun kalohk nan sounpwong en March oh April?
4 Kalaudehla Atail Ahnsou nan Kalohk: Ke kak kalaudehla ahmw ahnsou nan kalohk nan sounpwong en March oh April? Koht pahn kapaia kitail ma kitail pahn nantihong ehukihong meteikan duwen “marain en Rongamwahu duwen lingan en Krais.” Siohwa, me wia utupen marain en pali ngehn koaros, mahsanih: “Marain en pwarada sang nan rotorot.” (2 Korint 4:4-6) Ma anahn, elder kan pahn koasoanehdi pil ekei tuhpene en kalohk kan oh elder kan pahn apwalih tuhpene en kalohk kan ni ahnsou me kalohk pahn wiawi erein awa kei. Nan ekei mwomwohdiso kan, elder kan pahn koasoanehdi kalohk nanial en wiawi ni mensehngie de kalohk nan wasahn pisnis de kalohk doadoahngki telephone mwurin souwas de ni soutik. Pwehn sewese iuk en kalaudehla ahmw ahnsou nan kalohk, ke kak wiahda ahmw mehn akadei en kalohk erein awa kan me mwahu ong ahmw irair en ahnsou, oh akadeiong kalohk awa kan me ke koasoanehdi. Ong sounkalohk tohto, arail kin kihong Siohwa dahme keieu mwahu kin wehwehki me irail en iang doadoahk en Auxiliary Pioneer.—Kolose 3:23, 24.
5. Iaduwen sounkalohk tohto arail paiekihda koasoandi en kalohk awa 50te ni ahnsou irail kin iang Auxiliary Pioneer?
5 Ke Kak Iang Auxiliary Pioneer? Sounpahr isuh samwalahro, awa kan me Auxiliary Pioneer kin anahne kalohk nan sounpwong ehu tikitikla. Pwehki met, sounkalohk kan me kak iang Auxiliary Pioneer wie tohtohla. Mie pak me ke iang doadoahk en Auxiliary Pioneer? Ekei sounkalohk kan kin nantihong iang Auxiliary Pioneer pak ehu nan sounpahr ehu. Nan mwomwohdiso tohto, sounkalohk kan kin koasoanehdi nanpwungarail pwe irail en sawaspene Auxiliary Pioneer, oh met wie ahnsou ehu me sounkalohk tohto kin kasikasik nan pahr koaros. Ke kak iang Auxiliary Pioneer nan sounpwong en March de April? April wia ahnsou mwahu en Auxiliary Pioneer pwehki mie Rahn Kaunop limau oh Rahn Sarawi limau nan April.
6. Soangen koasoandi dah kan me wiawihda me sounkalohk kan kak paiekihda?
6 Sounapwalih en Circuit pahn mwemweitwei nan ahmw mwomwohdiso nan sounpwong en March de April? Mie kapai tohrohr me ke kak paiekihda. Nin duwen me pakair ni ahnsou me pahr en kalohk en 2006 tepida, sounkalohk koaros me iang doadoahk en Auxiliary Pioneer nan sounpwong me Sounapwalih en Circuit kin mwemweit pahn kak iang towehda tepin minit 30 en mihding en pioneer erein ahnsou me Sounapwalih menet mihmi nan ahmw mwomwohdiso. E sansal me ire kan nan mihding wet kin kakehlailih pali ngehn en irail me iang towehda oh met pahn sewese irail akan me Auxiliary Pioneer en men wiahla Regular Pioneer. Oh pil, erein sounpwong en March, kitail pahn kak sewese aramas en wehwehki duwen marain en pali ngehn ni atail doadoahngki pwuhken Loalokong Me Pahn Kahluwalahng Mour Soutuk de pwuhken Mour Kohkohlahte Nan Paradais Nin Sampah. Ke soh wiahda ahmw mehn akadei en tepida onop Paipel rehn emen?
7, 8. (a) Dahme kak sewese kitail en koasoanehdi atail koasoandi en iang Auxiliary Pioneer? (b) Iaduwen peneinei kan kak sawaspene pwe emen rehrail de tohto sang en kak Auxiliary Pioneer, oh iaduwen peneinei pwon kak paiekihda?
7 Ni ahmw pahn medemedewe ma ke kak Auxiliary Pioneer oh kalohk awa 50, koasoanehdi ahmw koasoandi pwe ken kak kalohki duwen marain en padahk mehlel awa 12 nan wihk ehu. Koasoiong sounkalohk teikan me Auxiliary Pioneer oh pweida mwahu, oh pil koasoiong meteikan. Kangoange meteikan en iang uhk Auxiliary Pioneer. Sounkalohk kan me papidaislahr, sohte lipilipil ma irail mah de pwulopwul, kak iang Auxiliary Pioneer ma irail pahn koasoanehdi mwahu arail koasoandi kan. Kapakapki mehn akadei wet. Mwurin mwo, ma ke kak, koasoanehdi ahmw koasoandi oh ke uhdahn pahn perenki iang doadoahk en Auxiliary Pioneer!—Malakai 3:10.
8 Peneinei tohto diarada me ma irail koaros pahn sawaspene koasoanehdi arail koasoandi kan mwahu, emen rehrail kak iang doadoahk en Auxiliary Pioneer. Ehu peneinei me limmen wia sounkalohk papidaislahr akan, irail limmen koaros men iang doadoahk en Auxiliary Pioneer. Seri riemen me saikinte papidais nantihong kalaudehla ara ahnsou nan kalohk. Iaduwen irail paiekihda koasoandi wet? Irail ntingihdi: “E wia ahnsou kaperen ong kiht koaros, oh se pehm me kiht koaros kerenpene laud sang mahs. Se kalahngankihong Siohwa kapai kaselel wet!”
9. Iaduwen kitail kak kasalehda duwen marain en padahk mehlel nan sounpwong en March oh April?
9 Iaduwen—atail nanti laud nan sounpwong en March oh April pahn kahrehiong kitail en karanih Siohwa, Samatail nanleng? Met pahn poahsoankihda uwen nanti kitail pahn wia pwehn kalaudehla atail limpoak ong Koht oh Sapwellime Ohl oh pil uwen atail pahn kalaudehla atail ahnsou nan kalohk. Kitail en koasoanehdi nan kapehdatail en duwehte soun melkahka me koulki: “I pahn wia ei kapingkalahngan ni ngihl laud ong Siohwa; I pahn kapinga ih nan pokon en aramas akan.” (Melkahka 109:30) Siohwa pahn kapaiada atail nanti laud ni atail ngoangki papah Ih nan sounpwong en March oh April. Kitail en sewese aramas en kilang marain en padahk mehlel, pwe irail en kak kohsang arail weweid nan rotorot oh irail pahn “ahneki marain en mour.”—Sohn 8:12.