Iaduwen Peneinei Kak Ahneki Nanpwungmwahu Rehn Koht?
1 Kaping kin kohwong peneinei Kristian kan me kin ‘kapwaiada mahs arail pwukoahn peneinei.’ (1 Tim. 5:4) Ahpw, pwehki soahng suwed tohto me kak kaluwetala atail pwoson kin kapilkitailpene, e kesempwal peneinei kan en doadoahk laud pwehn kolokolete nanpwungmwahu rehn Koht. Iaduwen met kak pweida?
2 Alasang Kaundahn Krais: Tapwin peneinei kan ahnane alasang Sises Krais ni arail pahn apwalih arail pwukoahn peneinei kan. Sises sohte ihte kasalehda sapwellime limpoak pak ehute ni ahnsou me e meirongkihla eh mour, eh kin ketin kaukaule “kamwenge oh e kin kanai” mwomwohdiso. (Ep. 5:25-29) Pahpa oh nohno limpoak kan kin alasang sapwellime mehn kahlemeng en apwalih ni keneinei ahn arail peneinei nanpwungmwahu rehn Koht nan ehuehu rahn. Met pil kin pid onop en Paipel nan peneinei ehuehu wihk.—Deud. 6:6, 7.
3 Ni Ahnsoun Kalohk: Tohn peneinei pwon ahnane en kalahnganki me kalohk ong meteikan duwen Siohwa oh kupwure kan wia kisehn arail kaudok me inenen kesempwal. (Ais. 43:10-12) Ma kumwail pahpa oh nohno kan men kilang noumwail seri kan en wiahla Sounkadehdehn Siohwa lelepek kei, kumwail ahnane tepida kaunopada arail mohngiong sangete ahnsou me irail tikitik ong kalohk. Kawehwe dahme kahrehda mie anahn en tounmetei nan doadoahk en kalohk oh en iang kalohk nan ehuehu wihk. (Mad. 22:37-39) Eri wiahda koasoandi rehrail irail en iang uhk kalohk kaukaule.
4 Kalaudehla arail kalahnganki doadoahk en kalohk sang ni ahmw pahn koasoanehdi ahnsou en kaunopada oh kamwomwada padahk me pahn pweida mwahu nan ehuehu wihk ni ahnsoun onop en peneinei. Kihong emenemen seri kan kasukuhl ong kalohk, sewese irail en kekeirda nin duwen me konehng arail sounpar oh koahiek. Mwurin amwail kalohk, koasoia iaduwen arail kilang sapwellimen Siohwa kalahngan. Uwen laud en peneinei kan kin “songadahr uwen mwahu en kalahngan en Kaun-o,” ehute arail pahn karanihala Siohwa, kakehlahda irail pwehn pelianda “suwed koaros.”—1 Pit. 2:1-3.
5 Nan Mihding kan: Ia uwen mwahu ni ahnsou me tohnpeneinei kan koaros kin sewese emenemen en kin nantihong iang towehda mihding, keieu ni ahnsou me emen kin pwangada, de nan kapehd tikitikla de toutoula! Emen sister pwulopwul nda: “Ni ahnsou me ei pahpa kin pwurasang doadoahk, e kin pwangada. Ahpw I kin ehukihong ehu ire mwahu me pahn kohda nan mihding en ni soutiko, oh e kin kangoange ih en kohla iang. Eri ni ahnsou me I kin uhd pwangada, e kin uhd kangoange ie en kohla mihding.”—Ipru 10:24, 25.
6 Ehupene Wia Soahng kan: Peneinei kan ahnane ehupene nan soahng kan, duwehte sawaspene nan doadoahk en ihmw. Ahnane en pil wiahda ahnsou ong mehn kamweit me konehng. Pikinik, alialu wasa doh kan, kohla mwadong, oh mwemweitla rehn peneinei de kompoakpatail kak wia ahnsou kaperen oh mehn kataman mwahu nan atail mour mwuhr.—Ekl. 3:4.
7 Peneinei pweida mwahu kan kin powehdi kahpwal ong arail nanpwungmwahu rehn Siohwa ehuehu rahn. Ni arail pahn nantihong karanihala Siohwa, irail kin kehn kehl me Siohwa kin ketikihda.—Ep. 6:10.