Tapwin Peneinei kan​—⁠Kolokol Koasoandi Mwahu kan me Pid Pali Ngehn en Ahmw Peneinei

¹ Mendahki Daniel kin mihmi nan Papilon erein sounpahr tohto oh wasao kin diren aramas me kin kaudokiong dikedik en eni oh pil tiahk suwed, koaros kin wehwehki me e kin papah Siohwa “ni lelepek.” (Dan. 6:​16, 20) Iaduwen e kin kolokol eh lelepek ni pali ngehn? Pwuhk Sarawi kin kasalehda me e ahneki koasoandi mwahu ong wia soahng ngehnin kan. Karasepe ieu, e kin kapakap pak siluh nan rahn ehu sang nan pere me mihmi pohn imweo. (Dan. 6:​10) Oh pil, e sansal me e ahneki koasoandi mwahu ehu ong wia soahng ngehnin kan, duwehte wadewadek Kosonnedo. Kahrehda, ahnsou me kasongosong laud lelohng ih​—⁠soangen kasongosong me e kak mehkihla​—⁠e lelepek ong Siohwa oh Siohwa ketin wiahda manaman pwehn kapitala ih.​—Dan. 6:​4-​22.

² Pil duwehte rahnwet, kitail anahne “mwasamwasahn ni lelepek.” (Episos 6:​18) Sampah me kitail mihmi loale kin “mih pahn manaman en Me Suwedo.” (1 Sohn 5:​19) Uhwong oh kasongosong kin kak pwarada mwadang oh kasonge atail pwoson. Nan Kahn Kamakam Kowahlap, Kok en Makok pahn uhwong sapwellimen Koht ladu kan, oh likamwete sohte me pahn kak pitsang. Ihme kahrehda, kitail anahne likih Siohwa ni unsek.​—Esekiel 38:14-​16.

³ “Mehkot me inenen kesempwal iei en wiahki onop Paipel nin duwen peneinei elen atail mour.” Ihme brothero me wia tepin koasoi en spai me oaralap koasoia: “Peneinei kan​—⁠Wiahki Wadawad en Paipel Rahn Koaros Elen Amwail Mour!” (“Families​—Make Daily Bible Reading Your Way of Life!”) me wiawi ni Kapokon en District nan 1998. E doula oh koasoia: “Ni ahnsou me peneinei kan kin koasoanehdi arail koasoandi en wadek Paipel ni ahl ehu me Paipel kin kamwekid atail mour, koasoandi wet kak kamwekid laud arail mour. E kin kalaudehla atail loalokong. E pil kin kakehlailih atail pwoson. Oh e pil kin kasalehda ihs me kin wia mehn kahlemeng mwahu​—irail ohl oh lih lelepek kan me memour mahs mahsie​—re kin inenen kamwekid kitail en kolokol teng padahk mehlel.” Ni atail pahn koasoiapene duwen irair akan en koasoandi mwahu me pid duwen pali ngehn, e pahn mwahu ma tapwin peneinei kan kak tehk ahl ehu de riau en kamwahuwihala koasoandi en arail peneinei me pid duwen arail pali ngehn.

⁴ Wadek Mahsen en Koht Rahn Koaros: “Ni ahnsou me Wehin Koht pahn kakaun sampah oh kupwuren Koht pahn wiawi nin sampah duwehte e pahn wiawi nanleng, oh ahnsowo aramas sohte pahn lemei​—⁠oh pil mahn akan sohte pahn lemei​—oh ‘sohte meninkau de mehkot suwed pahn mie.’ (Aiseia 11:9; Madiu 6:​9, 10)” Mahsen pwukat pwarada nan Iren Rahn​—⁠2001 (Examining the Scriptures Daily​—2001) nan kawehwe kan me mihmi pahnangin iren Paipel ni September 11. Ia uwen mahsen pwukat wia mehn kataman mwahu ong kitail! Nin duwen tapwin peneinei, mie ahmw koasoandi en rahn koaros en wadek Iren Rahn rehn ahmw peneinei iangahki kawehwe me mihmi pahn iren Paipelo? Met kin inenen kesempwal. Ma ahmw peneinei sohte kak kohpene oh wia Iren Rahn ni menseng, mwein kumwail kak wia mwurin souwas de ni soutik. Emen pahpa koasoia: “Ahnsou me se kin mwohndipene pwehn mwehngen soutik, met kin wia ahnsou mwahu ong kiht en wia Iren Rahn.”

⁵ Ma ke ahnekiehr koasoandi mwahu ong wadek Iren Rahn nin duwen peneinei ehu, se men kapinga komwi. Mwein ke kak kapataiong met oh wadek wasahkis nan Pwuhk Sarawi mwurinte Iren Rahn. Ekei kin wadek iren Paipel me Iren Rahn poahsoanda powe oh mwurin mwo wadek irelaudo pwon me iren Paipel kohsang. Pil ekei kin wia arail wadawad en Paipel ni arail kin pilada pwuhk ehu sang Pwuhk Sarawi oh wadek sang tepin pwuhko lel ni imwio. Wadek Paipel rahn koaros pahn sewese ahmw peneinei en kakairada arail lahn Siohwa oh kalaudehla arail ineng en kapwaiada kupwure.​—Deud. 17:18-​20.

⁶ Koasoandi en ahmw peneinei en wadek Paipel oh Iren Rahn pahn katapan ma ke pahn doadoahngki minit kei en kawehwe iaduwen irail kak doadoahngki dahme kumwail wadek. Pwuhko me adaneki Benefit From Theocratic Ministry School Education, pali 60, kin kihda sawas wet: “Ke kak . . . pilada ekei ire kan sang amwail wadawad en Paipel erein wihko, kawehwehda wehwehn ire pwukat, oh mwurin mwo, idek rehn ahmw peneinei peidek pwukat: ‘Soangen kaweid dah kan me iren Paipel pwukat kihda? Iaduwen kitail kak doadoahngki ire pwukat nan kalohk? Dahme ire pwukat kin kasalehda duwen Siohwa oh sapwellime wiewia kan, oh iaduwen met kin kalaudehla atail kalahnganki Siohwa?’ ” Soangen koasoakoasoipene duwen soahng ngehnin kan kin kak sewese koaros nan ahmw peneinei en “song rapahki oh wehwehkihla duwen kupwuren Siohwa.”​—Episos 5:​17, NW.

⁷ Onop en Peneinei: Ma kumwail, tapwin peneinei kan, pahn wia onop en Paipel nin duwen peneinei wihk koaros, met kin wia ahl mwahu ehu me kumwail kak kasalehong noumwail seri kan me soahng ngehnin kan kin keieu kesempwal nan amwail mour. Emen ohl pwulopwul kin tamataman: “Ekei pak aht pahpa kin pwurodo sang doadoahk inenen pwung​—⁠e kin apwaliki pepehd​—⁠ahpw aht onop en peneinei kin wiwiawihte, oh met kin sewese kiht en wehwehki ia uwen kesempwal aht onopo.” Seri kan kak pil sewese koasoandio en pweida. Seri duwemen nan ehu peneinei kin kalap pirida kuloak limau ni sohrahn pwe irail koaros kak wia arail onop en peneinei pwehki ihte ahnsowo me irail koaros kak koasoanehdi en kohpene onop.

⁸ Ma onop en peneinei pahn pweida, tapwin peneinei anahne ‘kanahieng eh padahk.’ (1 Tim. 4:​16) Pwuhken Ministry School, pali 32, koasoia: “Onop en peneinei me kin pweida mwahu kin tepikihda kasawihada anahn akan en ahmw peneinei. Iaduwen​—⁠tohn ahmw peneinei kin kekeirada ni pali ngehn? . . . Ni ahnsou me ke kin iang noumw seri kan nan kalohk, ke kin kilang me re mengeiong kasalehong meteikan me irail Sounkadehdehn Siohwa kan? Noumw seri kan kin perenki amwail koasoandi en wadek oh onop Paipel nin duwen peneinei ehu? E sansal me irail kin wiahki padahk mehlel arail elen mour? Ma ke pahn kasawihada kanahieng, ke pahn kak diarada dahme ke anahne wia, nin duwen tapwin peneinei men, pwehn sewese emenemen nan ahmw peneinei en kekeirada ni pali ngehn.”

⁹ Mihding en Mwomwohdiso kan: Kaunopada oh iang towehda mihding en mwomwohdiso kan koaros kin wia mehkot me kesempwal nan ahmw koasoandi en wihk koaros. (Ipru 10:24, 25) Ekei pak, kumwail pahn kak kaunopada ong mihding kan nin duwen peneinei ehu. Mwahu sang awih lao lel mwohnte mihding pahn wiawi pwehn kaunopada, e soh pahn mwahu en kaunopada rahn kei de pil wihk kei mwohn mihding pahn wiawi? Koasoandi mwahu nin duwen mehpwukat pahn sewese kumwail koaros en wia pasapeng kan me mihmi ni pein amwail lokaia oh kohsang amwail mohngiong oh kumwail koaros pahn paiekihda mihding kan.​—Lepin Padahk 21:5.

¹⁰ Uwen mwahu oh uwen kaukaule kin wia irair kan me kesempwal nan koasoandi en pali ngehn me kin pweida mwahu. Iaduwen ma irair kan en ahmw mour kin kahrehong uhk en apwaliki kaunopada ong mihding kan koaros? Pwuhken Ministry School, pali 31, kihda iren sawas wet: “Ken dehr karuwaru pwehn mwadang kanokehla ahmw onop oh ken dehr medewehla ken ieremen onop pwehki ke sohte kak kanokehla koaros. Ken medemedewe ia uwen laud me ke kak onopki; oh wia ahmw onop mwahu. Wia ahmw onop wihk koaros. Kedekedeo, kalaudehla ahmw onop pwehn kak kaunopada ong mihding kan koaros.”

¹¹ Ni ahnsou me peneinei kan kin mwadang lel Kingdom Hall mwohn mihding kan kin tepida, met kin sewese irail en ahneki madamadau oh lamalam konehng ong kapinga Siohwa oh paiekihda kaweid kan me E kin kihda. Ih duwen ahmw peneinei kin wia? E kin wehwehki koasoandi mwahu oh pil tohnpeneinei koaros en sawaspene. Ma ke kin kilang me ahmw peneinei kin karuwaru oh pwunod mwohn mihding kan, mie mehkot me ke kak kawekila nan amwail koasoandi? Mie soahng kan me kumwail kak wia ehu ahnsou tohrohr, kaidehn mwohn mihding? Ma emen tohn ahmw peneinei kin ahneki diren doadoahk mwohn mihding, meteikan kak sawas? E pahn kak katikitikala pwunod ma koaros nan peneinei kaunopada minit kei mwadang sang ahnsou me koaros kin mwesel en kohla mihding met? Koasoandi mwahu kin kahrehong meleilei en mie nan peneinei oh pil nan mwomwohdiso.​—1 Kor. 14:33, 40.

¹² Kalohk: Ma kumwail koasoanehdi ahnsou kan ong iang kalohk​—⁠me kin wia pil ehu ahl en koasoanehdi mwahu soahng ngehnin kan nan amwail mour. Emen mwahnakapw Jayson kin tamataman: “Nan ahi peneinei, se kin ahnsou koaros iang kalohk ni menseng en Rahn Kaunop kan. Met kin wia mehkot mwahu ong ie pwe I diarada me ma I kin iang kalohk ahnsou koaros, I kin kak kilang me kamwahupen kin inenen tohto oh pil I kin perenki kalohk.” Seri tohto me tikida nan peneinei en Sounkadehde kan kin diarada me: ma re pahn koasoanehdi ahnsou kan wihk koaros ong kalohk, met kin sewese irail en koahiekla nan kalohk.

¹³ Ma mie koasoandi en kalohk me mwahu nan ahmw peneinei, e pahn sewese ahmw peneinei en perenki kalohk oh amwail kalohk pahn katapan. Iaduwen met kak wiawi? Watchtower (lokaiahn wai) en July 1, 1999, pali 21 (Kahn Iroir en December 1, 1999, pali 30) kihda kaweid wet: “Ke kin ekei pak doadoahngki ahnsoun onop en peneinei pwehn sewese ahmw peneinei en kaunopada ong kalohk erein wihko? En wia met pahn kak imwikihla kapai tohto. (2 Timoty 2:​15) Met kak sewese ahr doadoahk en kalohk en pweida mwahu. Ekei pak, ke kak koasoanehdi ehu ahnsou nan amwail onop en peneinei pwehn ihte kaunopada ong kalohk. Ahpw, ni mehlel, e pahn mwahu en koasoiaiong ahmw peneinei duwen ekei wasa me irail kak kamwahuwihala ahr padahk kan en kalohk mwurin onop en peneinei de pil ehu ahnsou erein wihko.” Ahmw peneinei songehr wia met?

¹⁴ Nantihong Kekeirada Ni Pali Ngehn: Sang nan artikel wet, ke kilang wasa kan me ahmw peneinei wia mwahu? Kapinga irail, oh nantihong pil kamwahuwihala wasa pwukat. Ma ke kilang wasa kan me ahmw peneinei kak kamwahuwihala, pilada wasa ehu de riau en kamwahuwihala mahs. Ni ahnsou me kumwail ahnla koasoandi kapw kan, kumwail kak kamwahuwihala pil ehu wasa (de riau). Kumwail en ahneki madamadau en pweida oh doadoahngki amwail loalokong ong dahme mwahu ong peneineio pwon. (Pilipai 4:​4, 5) E kin wia doadoahk laud en koasoanehdi koasoandi mwahu ehu me pid amwail pali ngehn, ahpw e konehng oh katapan, pwe Siohwa kin kamehleleong kitail: “Aramas emen me kin kolokol koasoandi ehu, I pahn kahrehong ih en ale komourpe sang Koht.”​—Melkahka 50:23.