Wonowei oh Kekeirada Ni Omw Alialu nan Ahl Soandi Mwahu me Kumwail Ahnlahr
1 Wahnpoaron Pohl kin sapwellimaneki limpoak laud ong mwomwohdiso en Pilipai, me e sewese tepiada. E kin kalahnganki arail sewese ih ni anahn en paliwar oh e kin koasoia me irail wie mehn kahlemeng mwahu.—2 Kor. 8:1-6.
2 Pohl mwekidki limpoak loal ahnsou me E ntingihdi sapwellime kisinlikou ong mehn Pilipai. Pwuhken Insight, Volume 2, pali 631, ripohtki: “Nan sapwellime kisinlikouwo, Pohl kin kangoange mwomwohdisohn Pilipai en nannanti—en rapahki dehdehki mwahu oh kolokol teng Mahsen en komour, pwoson kehlail, oh koapworopwor en kating me pahn kohdo.” Re mwekidki kisinlikouwo oh kahrehda nanpwungen irail oh wahnpoaron Pohl limpoak en lalaudla. Mahsen en Pohl pahn kak pil kamwekid kitail rahnwet, oh kitail anahne medemedewe laud mahsen pwukat, keieu me ntingihdi ni Pilipai 3:15-17.
3 Kitail Anahne Ahneki Madamadau en Mah ni Pali Ngehn: Nan Pilipai 3:15, Pohl wie mahmahsen duwehte emen me mah oh diren ekspiriens. E kin wehwehki duwen mehn Pilipai kan oh arail kekeirada mwahu ni pali ngehn, oh e kin mahsen ong irail duwehte emen me kin mahsen ong Kristian kan me mah ni pali ngehn. Ma arail madamadau kin kasalehda me re ahneki karakarahk oh kalahngan duwehte me Sises kasalehda, re kak “mwakelekel oh pwung, sapwellimen Koht seri kei me sohte sapwung rehrail . . . , kolokol teng mahsen en komour.” (Pilipai 2:15, 16, New World Translation) Ni atail kin wadek mahsen en Pohl, e pahn mwahu ma kitail pahn medemedewe me e mahsen ong kitail. Ih duwen kitail kak ahneki madamadau me duwehte Sises sapwellimaneki oh kitail pahn kalahnganki pwukoah kan me kitail ahneki. Kitail en nantiong peki sawas rehn Siohwa ni kapakap, oh peki sapwellime sawas ong ire wet oh ire teikan.—Pilipai 4:6, 7.
4 Nin duwen dahme Pilipai 3:16 kin koasoia, kitail en nantiong kekeirada. Lepin lokaia “kekeirada” kin wehwehki “wonowei mwowe, en wie mwamwahula ahnsou koaros.” Aramas me kin kekeirada kin “rapahki ahl kapw en wia mehkot, oh rapahki arail ahnsou mwahu en wia mehkot.” Pohl kupwurki mehn Pilipai en wehwehki me pelien lamalam en Kristian sohte kin wie kohkohdi ahpw kin wonowei mwowe ahnsou koaros. Arail kekeirada pahn sansal sang ni arail kin kasawihada pein irail, wehkada pein arail luwet kan, oh rapahki arail ahnsou mwahu en kamwahuihala pein arail pali ngehn. Rahnwet, sapwellimen Siohwa pwihn sansal kin wonowei oh kekeirada, oh kin kalaudehla arail kalohki Rongamwahu oh kalaudehla arail wehwehkihla Mahsen en Koht. Emen emen kitail pil anahne iang sapwellimen Siohwa pwihn sansal wonoweite mwowe, oh ale sawas kan me kin kohsang pwihn wet oh wie uwen me kitail kak nan doadoahk wet.
5 Ma Kitail Men Kekeirada, Kitail Anahne Alialu Nan Ahl Soandi Mwahu me Kitail Ahnlahr: Pohl kangoange rie kan en “alialu nan ahl soandi mwahu me kumwail ahnlahr.” (Pilipai 3:16) En soandi mwahu kin wehwehki me aramas akan en tiahk mwahu oh en kihong dipwisou kan en mihmi nan wasa kan me konehng. Kristian kan me mihmi nan Pilipai anahne mihmi nan wasa me konehng me iei nan sapwellimen Siohwa limpoak oh en limpoakpene nanpwungarail. Arail mour kin mwekidki kosonned en limpoak. (Sohn 15:17; Pilipai 2:1, 2) Pohl kangoange irail en “momourkihte soangen mour me konehng rongamwahu.” (Pilipai 1:27) Rahnwet, e pil kesempwal Kristian akan en soandi mwahu oh tiahk mwahu.
6 “Ahl me emen ahnlahr” kin wehwehki soahng kan me emen kin wia ahnsou koaros. E duwehte koasoandi ehu me kitail kin kaukaule wia. Ma kitail kin ahnla wia koasoandi ehu, e pahn mwahu pwe kitail sohte anahne uhdi oh medemedewe dahme kitail pahn wia—pwe kitail wiahier koasoandio pak tohto.
7 “Ahl soandi mwahu me kitail ahnlahr” kin wehwehki koasoandi ehu me kitail ahnlahr wia me mwahu oh ngehnin—oh koasoandi wet kin kekeirada atail pali ngehn, oh pil sewese pali ngehn en meteikan, oh koaros kak kalaudehla dahme re wia ni ahr papah Siohwa. Ma mie atail koasoandi en pein onop, kaukaule iang towehda mihding kan oh kaukaule iang kalohk, e pahn sewese kitail en kekeirada ni pali ngehn oh pweida mwahu ni atail nantiong mehn akadei ngehnin kan.
8 Anahn akan nan Ahl Soandi Mwahu me Kitail Ahnlahr: Anahn ehu me kesempwal iei “loalokong pwung oh dehdehki mehlel.” (Pilipai 1:9, NW) Pein atail onop kin kakehlailla atail pwoson oh atail kalahnganki padahk mehlel, oh pil kamwekid kitail en tiahk mwahu. Ahpw, ekei diarada me re sohte kak idawehn arail koasoandi en onop. Ehu kahrepe iei sohte arail ahnsou.
9 Atail wadek Pwuhk Sarawi rahn koaros kin kesempwal mehlel oh wahdo kamwahu tohto. Kaweid kan me kin mihmi loale kin inenen “mwahu” ni ahl koaros. (2 Tim. 3:16, 17) Iaduwen kitail kak diarada ahnsou pwehn onop Paipel ehu ehu rahn? Ekei diarada me re anahne pirida mwadangasang ahnsou me re kin kalap pirida ni menseng, oh ih ahnsou mwahu me re kak onop oh doudouloale mwahu. Ekei diarada me re kak onop Paipel minit kei mwohn re meir. Lih pwopwoud kan me kin mihmi ni imwarail kan ni rahn kin kak wadek Pwuhk Sarawi mwurin souwas mwohn meteikan kin pwurodo sang sukuhl oh doadoahk. Pwehn kapataiong arail wadawad en Paipel, ekei kin pil wadek pwuhken Proclaimers wihk koaros.
10 Ni atail kin koasoanehdi koasoandi kapw ehu, koasoandi kapwo kakete uhwong dahme kitail kin ahnlahr wia. Mwein mahs, kitail kin mweidohng soahng kan me sohte kesempwal en kangala atail ahnsou laud. En kauwehla atail koasoandi en mahso kin apwal. Sohte me pahn idingkihong kitail en onop; de kitail sohte anahne ntingihdi dahme kitail wia me pid atail koasoandi en onop. Kitail kin tengediong atail koasoandi mwahu en kaukaule onop pahn kohsang atail kalahnganki “soahng kesempwal kan” oh atail men isaneki atail “ahnsou mwahu” en paiekihda atail onop.—Pilipai 1:10, NW; Episos 5:16.
11 Mihding en Kristian kan kin inenen kesempwal ma kitail men kekeirada pwehki ih wasao me kitail kak ale kaweid oh kangoang. Ihme kahrehda, en iang towehda mihding kan anahne en kisehn atail koasoandi. Pohl kasalehda kesempwalpen met. En kaukaule iang towehda mihding kan kin anahn.—Ipru 10:24, 25.
12 Iaduwen kitail kak kasalehda soandi mwahu ni atail kin pilahnih atail koasoandi en wihk koaros? Ekei kin koasoanehdi pwehn wia pein arail koasoandi mahs oh ma mie ahnsou luhwe, re pahn iang towehda mihding kan. Ahpw, ni mehlel, kitail anahne koasoanehdi mahs iang towehda mihding kan oh mwurin mwo, koasoanehdi pein atail koasoandi kan. Mwohn soahng teikan, kitail en koasoanehdi atail iang towehda mihding koaros oh koasoanehdi soahng teikan ong ahnsou me luhwe.
13 En kaukaule iang towehda mihding kan kin anahne pilahn mwahu oh sawaspene nanpwungen tohnpeneinei koaros. Ni Ehd lel Ni Alem, pali moron en kitail kin kedirepw oh sohte atail ahnsou laud. Met kin wehwehki me, ma kak, mwengehn ni soutik en mwadang, pwe tohnpeneinei koaros kak mwenge, kaunopada oh lel Kingdom Hall mwohn mihding tepida. Tohnpeneinei koaros en sawaspene ni ahl wet.
14 Kaukaule iang kalohk kin pil kesempwal ma kitail men wonowei oh kekeirada ni atail alialu nan ahl soandi mwahu me kitail ahnlahr. Kitail koaros wehwehki me kitail pwukoahki kalohki Rongamwahu en Wehio. Ihme kahrehda, kitail adanekihki Sounkadehdehn Siohwa kan. (Aiseia 43:10) Pwehki doadoahk wet kin kesempwal oh karuaru rahnwet, kitail sohte kak kilangwong doadoahk wet duwehte mehkot me sohte katepe ong atail koasoandi en mour. Pohl kaweidki: “Kitail en ahnsou koaros poaden wiahiong Koht atail tungoal meirong en kaping, pwe ih soangen meirong wet me kin kadehdehda duwen Sises me Kaun.”—Ipru 13:15, NW.
15 Ni atail kin pilahnih dahme kitail pahn wia ehu ehu wihk, kitail anahne koasoanehdi atail ahnsoun kalohk. Ehu ehu mwomwohdiso kin mie arail koasoandi kan ong kalohk, oh ihte kitail anahne pilada mehnia ahnsou kan me kitail pahn iang. E pahn mwahu en koasoanehdi ahnsou pwehn iang ihmw-lel-ihmw oh doadoahngki makasihn kan oh pwuhk kan, oh pil koasoanehdi ahnsou pwehn pwurehng pwurala rehn aramas oh tepiada onop Paipel rehrail. Kitail kak pil koasoanehdi ahnsou pwehn iang kalohk ni ahnsou sohte lipilipil oh ahnsou koaros wahda doaropwe kan, oh makasihn kan oh brochure kan pwe ken kak koasoiong aramas. Pwehki kitail kin iang meteikan kalohk, kitail anahne pil idek rehrail ahnsou me pahn mwahu ong irail oh pein kitail.
16 Atail koasoandi en kalohk sohte pahn wikila mendahki aramas sohte men rong nan atail wasahn kalohk. Kitail esehier me aramas malaulaute pahn mwekidki mwahu atail kalohk. (Madiu 13:15; 24:9) Siohwa kehkehlikiong Esekiel en kalohk ong aramas me kin ‘kahngohdi, men pelian, oh keptakai.’ Ahpw, Siohwa inoukihong Esekiel me e pahn sewese ih oh Esekiel pahn “keptakai oh kahngohdiong irail kohwahlap,” wehwehki e pahn “kekeluwak, rasehng takai kesempwal daimon.” (Esekiel 2:3, 4; 3:7-9) Kitail anahne nannanti ma kitail pahn kolokol teng atail koasoandi mwahu en kalohk.
17 Mehn Kahlemeng Mwahu Pwehn Kitail en Kahlemengih: Pali laud en kitail kin wia mwahu nan kalohk ma mie sounkalohk kan me kitail kak idawehn. Pohl oh ienge kan kin wia mehn kahlemeng mwahu kan, oh Pohl kin kangoange meteikan en kahlemengih ih. (Pilipai 3:17) Soahng koaros me e kin wia pwehn kekeirada pein ah pali ngehn kin mwahu ohng kitail en kahlemengih.
18 Rahnwet, kitail kin ale kapai kan ma kitail idawehn irail kan me kin wie mehn kahlemeng mwahu. Nan Ipru 13:7, NW, Pohl kaweidki: “Kumwail tamataman amwail sounapwalih kan nanpwungamwail, . . . medemedewe duwen ar tiahk mwahu oh kahlemengih arail pwoson.” Ni mehlel, Krais wia atail Sounkahlemeng Mwahu, ahpw kitail pil kak kahlemengih pwoson en irail kan me kin apwalih kitail. Duwehte Pohl, elder koaros anahne tamataman me meteikan kin kahlemengih irail. Mendahki arail irair kan pahn wikpeseng, emen emen pahn anahne kasalehda me e kin idawehn pein ah koasoandi mwahu oh mwohnki soahng kan me pid Wehio. Mendahki elder kan pwukoahki doadoahk en mwohni oh pil pwukoahn peneinei, elder kan anahne koasoandi mwahu ong pein arail onop, kaukaule iang towehda mihding kan oh sewese pwihn en kalohk ahnsou koaros. Ma elder kan kin kasalehda me re ‘kak apwahpwalih mwahu eh peneinei,’ koaros nan mwomwohdiso pahn ale kangoang laud en wonowei oh kekeirada ni arail alialu nan ahl soandi mwahu me irail ahnlahr.—1 Tim. 3:4, 5.
19 Mehn Akadei kan ong Pahr en Kalohk Kapw: Ni ahnsou me pahr en kalohk kin tepida, e wia ahnsou mwahu en medemedewe duwen pein atail koasoandi. Ma kitail kousapahlih dahme wiawi sang pahr samwalahr lel met, dahme e kin kasalehda? Kitail wia duwehte pahr samwalahr, de kitail kekeirada ni atail papah Siohwa? Mwein mahs kitail wia uwen me kitail kak ong pein atail onop. Mwein met kitail kin kaukaule iang towehda mihding kan laud sang mahs de mwein kitail kalaudehla atail ahnsoun kalohk ni atail iang doadoahk en auxiliary pioneer. Mwein kitail kin tamataman kadek me kitail kasalehong meteikan nan mwomwohdiso de nan peneinei. Ma iei, kitail kak peren pwe kitail kin alialu nan ahl me kin kaperenda Koht, oh kitail kak “wonoweite kekeirada ni mour wet.”—1 Deselonika 4:1.
20 Iaduwen ma atail koasoandi kin wikwikila ahnsou koaros oh ekei pak atail koasoandi kin pweida mwahu, ekei pak soh? Iaduwen kitail mwekidki koasoandi wet ni pali ngehn? Atail kekeirada solahr nohn mwahu? Ma kitail men kekeirada, kitail anahne peki sapwellimen Siohwa sawas. (Pilipai 4:6, 13) Koasoiaiong ahmw peneinei ahmw anahn, oh peki rehrail ma re kak sewese iuk en kawikila ahmw koasoandi. Ma ke anahne sawas, idek rehn elder kan pwe ren sewese iuk. Ma ke nannanti oh mwekidki sapwellimen Siohwa kaweid, kitail pahn “wah mwahu oh pweida.”—2 Piter 1:5-8.
21 Alialu nan ahl soandi mwahu me kitail ahnlahr kin kahrehda kitail en ale kapai kan. Ni ahmw pahn kekeirada ni ahmw pahn alialu nan ahl soandi mwahu me kitail ahnlahr, kitail en “dehr pohnkahke. Ngoangki papah Siohwa.” (Rom 12:11, NW)—Pwehn kalaudehla ahmw wehwehki ire wet, kilang Watchtower [lokaiahn wai] en May 1, 1985, pali 13-17.