Ke Kak Ale Kapai Tohto Ma Ke Kin Kakairada Tiahk Mwahu kan me Kin Sewese Ahmw Irair en Pali Ngehn en Kehlailla
1. Dahme kahrehda e kesempwal kitail en tehk duwen atail koasoandi ngenin kan en ehuehu rahn?
1 Ni ahnsou me ke tepin wiahla Kristian, ele mwein ke kin kihong ahmw ahnsou laud pwehn kakairada ahmw irair en pali ngehn me pidada onop Paipel, iang towehda mihding en Kristian kan, kalohk oh kapakap. Pwehki sapwellimen Siohwa kapai kan, ke kin kekeirada ni pali ngehn oh karanih Siohwa. Ele met sounpahr tohto dauliher sang ahnsou me ke papidaisla. Iaduwen, ke kin kolokolete koasoandi ngenin kan me ke kakairada ahnsou me ke wiahlahr emen Kristian?
2. Ia kamwahupen kitail en wadek Paipel rahn koaros?
2 Tehk Kanahieng Duwen Ahmw Koasoandi en Ehuehu Rahn: Iaduwen, e kin wia kisehn ahmw koasoandi en ehuehu rahn ken wadek Mahsen en Koht? Ia uwen laud en kapai me kitail kin alehdi sang ni atail wia met! (Sosua 1:8; Melkahka 1:2, 3) Ni mwehin Israel en kawao, emenemen nanmwarki kin ketin wadek nan pein sapwellime pwuhken kosonned “erein eh mour.” Ia kamwahupen met? Met pahn sewese nanmwarkio en kakairada mohngiong en aktikitik oh sukuhliki duwen lahn Siohwa pwe en dehr ketin soikala sapwellimen Siohwa kosonned akan. (Deuderonomi 17:18-20) Duwehte nan rahn pwukat, atail pahn kin wadewadek Paipel rahn koaros pahn sewese kitail en wia dahme pwung nan sampah suwed wet. E pil kin sewese kitail en kaunopada mwahu ong kalohk.—Pilipai 2:15; 2 Timoty 3:17.
3. Kapai dah kan kitail kak alehdi sang ni atail kin iang towehda mihding kan koaros?
3 Sises kin ketin wiahki sapwellime tiahk ehu en kin kalap kohla nan sinakoke, wasa me koasoipen iren Paipel kan kin wiawi ie. (Luk 4:16) Met kin inenen sewese ih laud ni ahnsou me e lelohng nan kalokolok. Kitail pil kak alehda mehn kakehl sang ni kaweid ngenin kan me kin kohda nan mihding en mwomwohdiso kan oh “sawaspene nanpwungatail, arail pwoson en sewese kitail, oh atail pwoson en sewese irail.” (Rom 1:12) Ma kitail pahn werekpene rehn riatail Kristian kan, met pahn sewese kitail en powehdi kahpwal kan oh dadaur nan imwin rahn pwukat. (Ipru 10:24, 25) Iaduwen, e kin wiahte kisehn ahmw tiahk ke en iang towehda mihding kan koaros?
4. Iaduwen atail kin iang kalohk wihk koaros kin wia kamwahu ong kitail?
4 Pwuhk Sarawi kin kasalehda me wahnpoaron kan kin iang kalohki Rongamwahu “rahn koaros, nan Tehnpas Sarawio oh sang ihmw lel ihmw.” (Wiewia 5:42) Ele mwein kitail sohte kak kalohk rahn koaros, ahpw kitail kak wiahki kisehn atail tiahk en kin iang kalohk wihk koaros? Ni atail pahn kin wia met, kitail pahn koahiekla ni atail doadoahngki Mahsen en Koht, oh kitail pahn perenki ehukihong meteikan padahk mehlel sang Paipel.
5. Dahme kahrehda e kesempwal en kaukaule kapakap ong Siohwa?
5 Soukohp Daniel kin alehdi kapai kan pwehki e kin papah Siohwa “ni loalopwoat” erein ah mour. Met pil iangahki tiahk en kapakap kaukaule ong Siohwa. (Daniel 6:10, 16, 20) Pil duwehte met, ni atail pahn kin kaukaule kapakap ong Siohwa, e pahn ketin kapaikitailkihda sapwellime ngehn sarawi. (Luk 11:9-13) Oh pil, Siohwa pahn ketin karanih kitail, kahrehda kitail kak kakairada nanpwung mwahu reh. (Melkahka 25:14; Seims 4:8) Ia uwen laud en kapai wet! Ihme kahrehda, kitail en doulahte oh kolokol atail tiahk ngenin kan oh kitail pahn dolung kapai kan sang rehn Siohwa.