Mihding kan kin Sewese me Pwulopwul kan
1 Emen peinakapw koasoia: “Ekei pak I kin medemedewe me irail me pwulopwul kan kin lelohng kahpwal kan me keieu apwal oh tohto nan mour. Aramas akan me kin nenek, doadoahngki wini suwed kan oh kamomsakau kin kapilpene me pwulopwul kan.” Ke kin pil ahneki soangen pepehm kan? Ma iei, dahme ke lemeleme pahn sewese iuk en powehdi kasongosong pwukat? Ke anahne pwoson, soangen pwoson me kehlail pwehn kamehlele me sapwellimen Siohwa ahl kan koaros me pwung, pwe “sohte me kak kenikenla pahn kupwuren Koht ma sohte eh pwoson.” (Ipru 11:6) Ma ke pahn kaukaule iang towehda mihding kan, e pahn sewese iuk kakehlail ahmw pwoson oh ahmw nantihong powehdi kasongosong kan en wia dahme suwed.
2 Mihding kan kin Kihda Soangsoangen Sawas: Dahme kahrehda ke kin perenki iang kompoakepahmw keren kan ahnsou me kumwail pahn kang mwenge iou? E soh pwehki patehng werek mwahu ahnsou me ke kang mwenge iou nan wasa kansenamwahu kin uhdahn mwahu? Ni mehlel, atail mihding kan kin kihda soangen kamwahu kan duwehte met, ahpw soahng kamwahu kan kin wiawi ni pali ngehn.
3 Ire kan me kin kohda ahnsoun mihding kin kamwahuihala aramas, pwehki oaralap kan kin pid powehdi kahpwal kan me kin pwarada nan mour oh pil onopki kokohp kan nan Paipel. Kaweid kan kin kohda ahnsoun mihding me kin kak sewese iuk en mourki mour me keieu mwahu oh powehdi kahpwal kan me kin lelohng uhk. Irail me kin pil iang towehda mihding kan kin wia soangen aramas me kin keieu mwahu, oh irair en Kingdom Hall kin kansenamwahu. (Mel. 133:1) Ihme kahrehda emen peinakapw koasoia: “I kin mihmi ni imwen sukuhl rahn pwon oh I kin pwang mwurin sukuhl. Ahpw, ong ie, iang towehda mihding kin kin duwehte wasa ehu me kansenamwahu nan sapwtehn, oh met wehwehki me mihding kan kin kihong ie kehl en kak pil iang sukuhl lakapw oh powehdi kasongosong kan me kin lelohng ie.” Pil emen peinakapw koasoia: “I diarada me werekiong aramas me kin poakohng Siohwa kin sewese ie en pil karanih Ih.”
4 Ma ke iang Theocratic Ministry Sukuhl, ke kin sukuhliki duwen ire kan nan Paipel, koasoanehdi ire pwukat pwehn wia padahk oh pil wia ahmw padahk mwohn tohnmwomwohdiso kan oh mwomwehda me ke koasoiong emen nan kalohk. Medewehla kamwahupen kaiahn me kin kohwong kitail pwehn padahkiong mehteikan, ni ahl koahiek, padahk mehlel sang Mahsen en Koht me kak kamourirailla! Mie wasakis likin mihding kan me irail me pwulopwul kan kak ale soangen kaiahn me kesempwal?
5 Iaduwen Ke Kak Paiekihda Laud Sang Mihding kan: Pwehn paiekihda laud sang mihding kan, mie soahng siluh me kitail anahne wia. Soahng siluh pwukat iei kaunopada, iang pasepeng oh kapwaiada dahme ke sukuhliki.
6 Kaunopada: Koasoanehdi ahmw ahnsou pwehn kaunopada ong mihding kan koaros. Ke dehr mweidong homework, doadoahk en mwohni, de mwadong oh mehn kamweit en kihsang ahmw ahnsou en kousapahlih dahme kitail pahn sukuhliki nan ehu ehu mihding. E kin mwahu ma mie ahmw koasoandi mwahu me ke kin kolokol. Keieu kesempwal, ken wia ahmw wadawad en Paipel me kileledi ong Theocratic Ministry Sukuhl ehu ehu wihk. Ihte me ke anahne wia: wadek noumw Paipel minit kei ehuehu rahn oh doudouloale irelaud kan me ke wadek. Koasoanehdi ahmw ahnsou pwehn kaunopada ong Pwuhk Study en Mwomwohdiso oh Onop en Kahn Iroir. Ekei kin wia met rahn ehu de riau mwohn rahn en mihdingo. Ma ke pil kak, kaunopada ong Mihding en Kalohk (Service Mihding) ehu ehu wihk.
7 Iang Pasepeng: Pwuhk Sarawi kasalehda me Sises, ni ah mahki sounpahr 12, e mihmi nan Tehnpas Sarawio, wia rongorong, wia peidek kan oh kihda pasepeng kan. (Luk 2:46, 47) Ni mehlel, e uhdahn men iang pidada dahme irail koasoia. Ke kak pil paiekihda laud mihding kan ma ke pahn iang pasepeng ahnsoun mihding.—Lepin Padahk 15:23.
8 Ke anahne rong kanahieng audepen mihding kan. Ekei pak, rong kanahieng padahk kin apwalsang wia padahk. Pwekihda? Pwehki ahmw madamadau kakete medemedewe mehkot tohrohr ahnsou me emen kin wia padapadahk. Iaduwen ke kak irehdi met en dehr wiawi? Ken ntingihdi ire kesempwal kan me ke kak doadoahngki ehu rahn. Ma ke wia met, e pahn sewese iuk en rong kanahieng prokram en mihding kan. Oh pil, e pahn mwahu en pahkalahng iren Paipel kan, oh idawehn wadawad en aramaso me wia padahk.
9 Oh pil, wiahda ahmw mehn akadei en iang pasepeng ahnsou koaros me mie peidek oh pasepeng nan mihding kan. Ke kak paiekihda laud ma ke pahn medemedewe mwowe dahme ke pahn nda ahnsou me ke pahn pasepeng. Lepin Padahk 15:28 koasoia: “Aramas mwahu kin medemedewe mwohn ar pahn kin wia ar pasepeng.”
10 Kapwaiada Dahme Ke Sukuhliki: Kaimwiseklahn ewen kahk iei en tehk me ke kin “doadoahngki” dahme ke kin sukuhliki. (1 Deselonika 2:13) Ni ahmw pahn doadoahngki ire kan me ke kin sukuhliki nan ehu ehu mihding, ke pahn kamwahuihala ahmw nanpwung mwahu rehn Siohwa Koht. Ke pahn uhdahn kamehlele Ih, oh ke pahn ahneki peren mehlel oh nsenamwahu ni ahmw pahn “momourki mour mehlel,” oh esehla padahk mehlel.—3 Sohn 4.
11 Brother oh sister pwulopwul kan, ni amwail kin kaukaule kaunopada ong mihding kan, iang pasapeng, oh kapwaiada dahme kitail sukuhliki, ke pahn paiekihda laud sang mihding kan. Ni ahl wet, ke pahn ale kamwahu kan koaros sang mihding kan. Ahmw pwoson pahn kehlailla, oh ahmw lelepek pil pahn kehlailla ni ahmw men mehlel ong Siohwa.—Mel. 145:18.