IREN MEHN KASUKUHL 10
Ia Duwen At Mihting kan Eh Kak Seweseiuk?
Mie pak ke iang towehda mihting en Sounkadehdehn Siohwa kan? Ma saikinte, mweinele ke pahn ekis saloh ni omw pahn tepin iang towehda. Mwein ke kin medemedewe: ‘Dahme kin wiawi ni mihting pwukat? Dahme kahrehda mihting pwukat kesempwal? Dahme kahrehda I anahne iang towehda?’ Nan iren mehn kasukuhl wet, ke pahn sukuhlki ia duwen towehda mihting eh kak kakerenihiukala rehn Koht oh seweseiuk.
1. Dahme kahrehda Sounkadehdehn Siohwa kan kin pokonpene nan mihting kan?
Tehk ia duwen emen sounnting en Paipel eh kasalehda kahrepe keieu kesempwal en iang meteikan pokonpene: “I kin kapinga KAUN-O mwohn pokon en sapwellime aramas akan.” (Melkahka 26:12) Duwehte met, Sounkadehdehn Siohwa kan kin perenki pokonpene nan ar mihting kan. Nan sampah pwon, re kin tuhpene ehuehu wihk pwe ren kapinga Koht, koul oh kapakap. Ekei pak nan sounpar koaros, re pil kin iang towehda kapokon laud kan.
2. Dahme ke pahn sukuhlki nan mihting kan?
Nan mihting kan, se kin padahngki Mahsen en Koht oh “kawehwehda mwahu pwe aramas koaros en kak dehdehki.” (Wadek Nehmaia 8:8.) Sang ni omw iang towehda ke pahn sukuhlki duwen Siohwa oh sapwellime irair kaselel kan. Ni omw kalaudehla omw wehwehki duwen eh ketin poakohng uhk, ke pahn karanihala ih. Ke pil pahn sukuhlki ia duwen eh kak ketin seweseiuk ken ahneki mour nsenamwahu.—Aiseia 48:17, 18.
3. Ia duwen meteikan me ke patehng nan at mihting kan ar kak seweseiuk?
Siohwa ketin kehkehlingkihong kitail en “medemedewe emenemen pwe kitail en kangoange emenemen en kasalehda limpoak oh wiewia mwahu kan, dehr soukautihong atail kin tuhpene.” (Ipru 10:24, 25) Nan at mihting kan, ke pahn tuhwong aramas akan me kin uhdahn nsenohki emenemen oh me kin men kalaudehla ar esehla duwen Koht, duwehte kowe. Ke pahn rong ar kin koasoia koasoi kangoang kan sang nan Paipel. (Wadek Rom 1:11, 12.) Ke pil pahn kak koasoiong me kiripw oh me pwopwoud kan me kin powehdi ar kahpwal akan. Mepwukat iei ekeite kahrepe me Siohwa ketin kupwurki kitail en kin kaukaule tuhpene!
KALAUDEHLA OMW ESE MET
Kilang dahme kin wiawi ni mihting en Sounkadehdehn Siohwa kan oh dahme kahrehda e mwahu ken nantihong iang towehda.
4. Mihting en Sounkadehdehn Siohwa kan
Sang ni mwehin tepin Kristian akan, Kristian kan kin kaukaule tuhpene pwe ren kaudokiong Siohwa. (Rom 16:3-5) Wadek Kolose 3:16, oh mwuri koasoiapene peidek wet:
Ia duwen tepin Kristian ko ar kin kaudokiong Siohwa?
Rahnwet, Sounkadehde kan pil kin kaukaule tuhpene nan ar wasahn kaudok kan. Pwe ken kilang mwomwen ar mihting kan, kilang KISIN KASDO. Mwuri, kilang kilelen mihting en mwomwohdiso, oh koasoiapene peidek pwukat.
Mie mehkot me ke tehk me duwepenehte nanpwungen dahme kin wiawi nan Wasahn Kaudok oh dahme ke wadek nan Kolose 3:16?
Mie mehkot me ke kilang nan mihting kan me ke mwahuki nan kisin kasdou de nan kilelo?
Wadek 2 Korint 9:7, oh mwuri koasoiapene peidek wet:
Dahme kahrehda Sounkadehdehn Siohwa kan sohte kin peki mwohni nan ar mihting kan?
Iang omw sounpadahko tehkpene oaralap kan me pahn kohda nan ehu mihting en wihket.
Mehnia pali nan mihtingo me ke medewe me ke pahn perenki de pahn seweseiuk?
Ke ese met?
Nan jw.org, ke kak diar ia wasa oh iahd me mihting kan kin wiawi nan sampah pwon.
At mihting kan kin mie padahk, kamwomwada oh kisin kasdo. Mihting kan kin tepikihda oh imwikihla koul oh kapakap
Nan ekei pali en prokramo, luhk kin kowohng me rongorong kan ren pasapeng
Koaros kak iang towehda, peneinei, me kiripw, me mah oh seri kan
Sohte isais en at mihting kan. Sounkadehdehn Siohwa kan sohte kin ale pweinen pedolong de pahsseli delen meirong
5. Nanti laud kin anahn pwehn iang towehda mihting kan
Medewehla mehn kahlemeng sang en Sises peneinei. Pwe ren iang towehda kasarawien ehuehu pahr, re anahne aluhki rahn siluh samwa nan wasa nahnahn kan sang Nasaret lel Serusalem. Wadek Luk 2:39-42, oh mwuri koasoiapene peidek pwukat:
Ke medewe me ar seiloakla Serusalem doadoahk laud?
Dahme kakete kauhiukedi sang towehda mihting oh dahme ke kak wia pwehn powehdi mepwukat?
Ke medewe e pahn mwahu ken iang towehda mihting kan mehnda ma apwal? Dahme kahrehda?
Paipel mahsanih me e uhdahn kesempwal en tuhpene ong kaudok. Wadek Ipru 10:24, 25, oh mwuri koasoiapene peidek wet:
Dahme kahrehda kitail anahne kaukaule iang towehda mihting kan?
EKEI ARAMAS KIN NDA: “Ke sohte anahne iang meteikan pokonpene kaudok. Ke kak pein wadekte Paipel ni imwomwo.”
Mehnia iren Paipel de karasepe nan Paipel me kasalehda dahme Siohwa ketin kupwurki?
DAHME KE SUKUHLKIER
Omw iang towehda mihting kan pahn sewese kalaudehla omw esehla Siohwa, kakehlaka omw nanpwungmwahu reh oh iang meteikan kaudokiong ih.
Kousapahl
Dahme kahrehda Siohwa ketin kangoangehkin kitail en kin tuhpene?
Dahme ke pahn sukuhlki nan mihting en Sounkadehdehn Siohwa kan?
Ia pil ekei ahl me ke medewe omw iang towehda mihting kak seweseiuk?
PIL TEHK
Ia duwen ma ke salohki iang towehda mihting? Kilang duwen emen ohl me ahneki pepehm wet eh perenkihla towehda mihting kan.
Kilang duwen mwahnakapw men me perenki towehda mihting kan oh dahme e wia pwehn kaukaule iang towehda.
Kilang ia en meteikan pepehm duwen towehda mihting kan.
Kilang ia duwen mour en emen ohl me kin iang pwihn lemei ehu eh wekila mwurin eh iang towehda mihting en Sounkadehdehn Siohwa kan.
“I Never Went Anywhere Without My Gun” (The Watchtower, July 1, 2014)