Iaduwen Siohwa Kin Kahluwa Kitail

“Kahluwa ie nan ahl pwung.”​—MELKAHKA 27:11, New World Translation.

1, 2. (a) Iaduwen Siohwa kin kahluwa sapwellime aramas akan nan rahnpwukat? (b) Dahme kitail anahne wia pwen kak paiekihda ni unsek mihding kan?

SIOHWA kin wia Utupen marain oh mehlel, nin duwen dahme kitail sukuhlikier nan artikel en mwowe. Ni atail pahn kin kekeid nan ahl pwung, Mahsen en Koht kin kamarainih ahlo. Siohwa kin kahluwa kitail ni E kin kaweidkin kitail duwen sapwellime kosonned akan. (Melkahka 119:105) Duwehte sounmelkahka en mahso, kitail kin kalahnganki oh mwekidki sapwellimen Koht kaweid kan oh kapakapki met: “Maing Kaun [“Siohwa,” NW], komw ketin padahkihong ie kupwuromwien, oh ketin kahluwa ie nan ahl inen.”​—Melkahka 27:11.

² Rahnwet, ahl ehu me Siohwa kin ketkihda kaweid iei sang mihding en Kristian akan. Kitail kin isanekihla ni unsek sawas en limpoak wet sang ni atail kin (1) kaukaule iang towehda mihding kan, (2) rong kanahieng prokram en mihding, oh (3) perenki iang pasepeng kan? Oh pil, kitail kin kalahnganki kaweid kan me kin sewese kitail en mihmihte “nan ahl inen”?

Ke kin Kaukaule Iang Towehda Mihding kan?

3. Iaduwen sounkalohk kaukaule men kakairada ineng en ahnsou koaros iang towehda mihding kan?

³ Ekei sounkalohk kan en Wehio kin iang towehda mihding kan sang ni ahnsou me re wia seri tikitik kan. Emen sounkalohk kaukaule en Sounkadehdehn Siohwa kan tamanda met, “Ni ahnsou me rie serepein kan oh ngehi kekeirada nan pahr 1930 samwa, se sohte anahne idek rehn aht pahpa oh nohno ma se pahn iang towehda mihding de soh. Ma se sohte soumwahu, se ese me se pahn iang mihding kan. Aht peneinei sohte kin katiasang mihding kan.” Duwehte lih soukohp menet, Ana, sister menet “sohte kin katiasang” sapwellimen Siohwa wasahn kaudok.​—Luk 2:36, 37.

4-6. (a) Dahme kahrehda ekei sounkalohk kan en Wehio kin katiasang mihding kan? (b) Dahme kahrehda kesempwal kitail en iang towehda mihding kan koaros?

⁴ Ke kin kaukaule iang towehda mihding en Kristian akan de ke kin iang ekeite ahnsou? Ekei Kristian akan lemeleme me re kin wia mwahu nin duwen arail kaukaule iang towehda mihding kan, ahpw, re anahne tehk kanahieng duwen ire wet. Erein wihk kei, re kin kileledi mehnia mihding kan me re kin iang. Mwurin mwo, re inenen pwuriamwei pwe mwein re lemeleme re iang mihding kan koaros ahpw, ni mehlel, mie ekei mihding kan me re katiasang.

⁵ Mwein emen pahn nda met, ‘Aramas akan kin lelohng kahpwal tohto nan rahnpwukat, eri, e sohte mengei en kaukaule iang towehda mihding kan.’ Mehlel, kitail kin mihmi nan ahnsou apwal akan. Apwal pwukat pahn pil tohtohla. (2 Timoty 3:13) Ahpw, met soh kin sewese kitail en wehwehki kesempwalpen kaukaule iang towehda mihding kan? Kitail sohte kak powehdi kahpwal akan en koasoandi suwed wet ma kitail sohte pahn kaukaule ale ketihnain en pali ngehn. Pwe, ma kitail sohte pahn kaukaule pokonpene, ele mwein kitail pahn lohdi pahn kasongosong en dehr keid nan “ahl me inen”! (Lepin Padahk 4:18) Mehlel, kitail kin pwang ahnsou me kitail pwurodo sang doadoahk, eri, mwein kitail sohte men iang towehda mihding. Ahpw, ni ahnsou me kitail kin iang towehda mihding kan mendahki kitail kin pwang sang doadoahk, kitail kin paiekihda mihding kan oh kangoange iengatail Kristian akan me pil iang towehda mihding kan nan Kingdom Hall.

⁶ Ipru 10:25 kin kihda pil ehu kahrepe kesempwal kitail anahne en kaukaule iang towehda mihding kan. Nan iretikitik wet, wahnpoaron Pohl kin kangoange ienge Kristian akan en pokonpene ‘pwe duwen amwail ese Rahnen Kauno kerendohr.’ Ei, kitail en dehr manokehla me “rahn en Siohwa” me kerendohr. (2 Piter 3:12) Ma kitail pahn ahneki madamadau me imwin koasoandi wet inenen doh, ele mwein kitail pahn mweidong pein nsenatail en kesempwal sang atail wiewia kan en pali ngehn, duwehte kaukaule iang towehda mihding kan. Eri, nin duwen me Sises mahsanih, ‘pwe Rahno kakete leledohng kumwail ni ahnsou mwadang.’​—Luk 21:34.

Rong Kanahieng

7. Dahme kahrehda e kesempwal ong seri kan en rong kanahieng padahk kan me kin wiawi nan mihding kan?

⁷ E sohte itar en iangte mihding kan. Kitail anahne rong kanahieng padahk kan. (Lepin Padahk 7:24) Neitail seri kan pil anahne rong kanahieng. Ni ahnsou me seri men kin iang sukuhl, e anahne rong kanahieng dahme sounpadahk kan kin nda, mendahki e sohte perenki de e sohte wehwehki oaralapo. Sounpadahk kan ese me ma serio pahn nantihong rong kanahieng, serio pahn kakete sukuhliki mehkot sang onopo. E soh konehng seri kan me kin iang sukuhl en pil rong kanahieng kaweid kan me kin kohda nan mihding en mwomwohdiso kan oh pahpa oh nohno en dehr mweidong irail en meirla ni ahnsou me mihding kan kin wiawi? Padahk mehlel kesempwal akan kin dierekda nan iren Paipel kan “me apwal en kawehwehda.” (2 Piter 3:16) Kitail en dehr mwamwahliki koahiek en seri en sukuhliki mehkot. Koht sohte kin mwamwahliki seri kan. Ni ahnsoun Paipel kan, E padahkiong sapwellime ladu pwulopwul kan en ‘rong oh esehla duwen ar pahn lemmwiki Kauno [“Siohwa,” NW], amwail Koht, oh loalopwoatohng kapwaiada sapwellime padahk kan,’ oh e sansal me ekei padahk kan me apwal ong seri kan en wehwehki. (Deuderonomi 31:12; pil kilang Lipai 18:1-30.) Siohwa kin kupwurki seri kan nan rahnpwukat en pil kapwaiada kaweid wet?

8. Dahme pahpa oh nohno kan kak wia pwehn sewese neirail seri kan en rong kanahieng padahk kan nan mihding kan?

⁸ Kristian pahpa oh nohno kan ese me neirail seri kan kin kak audaudki ekei sawas ni pali ngehn ni arail pahn sukuhliki padahk kan nan mihding kan. Ihme kahrehda, ekei pahpa oh nohno kan kin koasoanehdi neirail seri kan en meir ekis mwohn mihding kan, pwe ni ahnsou me seri kan pahn kohla ni Kingdom Hall, re pahn kak pepehd oh sukuhliki mehkot. Ni rahn me mie mihding kan, ekei pahpa oh nohno kan kin kak keinapwidi neirail seri kan en dehr kilang TV de ren kak kilang ahnsoukiste. (Episos 5:15, 16) Pahpa oh nohno pwukat sohte kin mweidong mehn kerempwa kan en kedirepwehla neirail seri kan, oh met kin kangoange neirail seri kan en rong oh sukuhliki nin duwen me konehng ong arail sounpar oh koahiek.​—Lepin Padahk 8:32.

9. Dahme pahn kak sewese kitail en rong kanahieng?

⁹ Sises mahsanihong aramas mah kan: “Kumwail eri kanahieng duwen amwail kin rong.” (Luk 8:18) Nan rahnpwukat, e mengei en nda met ahpw apwal en kapwaiada. Ni mehlel, en rong kanahieng kin inenen doadoahk laud, ahpw kitail pahn kak sukuhliki en wia met. Ni ahnsou me ke pahn rong padahk en Paipel de pil ehu pwais nan mihding, nantihong en tamataman ire kesempwal kan. Song en medemedewe dahme sounkapahrek pahn koasoia mwuhr. Rapahki ire kesempwal kan me ke kak doadoahngki nan omw kalohk de kapwaiada nan omw mour. Pwurehng kousapahlih nan omw lamalam ire kesempwal kan ni ahnsou me ire pwukat kin kohda nan padahko. Ni ahnsou ire kesempwal kan kin kohda nan padahk, kousapahlih nan moangomw ire pwukat. Ntingihdi ni mwotomwot ire kesempwal kan.

10, 11. Iaduwen ekei pahpa oh nohno kan kin sewese neirail seri tikitik kan en rong kanahieng nan mihding kan, oh dahme ke diarada me sewese iuk en rong kanahieng?

¹⁰ Ese rong kanahieng kin mwahu ma e tepida ahnsou aramas seri. Mwohn arail esehla wadawad oh nting, ekei seri kan me saikinte iang sukuhl kin ale kangoang sang rehn arail pahpa oh nohno kan en mwomwehda me re ntingtingih audepen padahk kan. Ni ahnsou me re kin rong nan mihding lepin lokaia kan me re kin ese duwehte “Siohwa,” de “Sises,” de “Wehio,” re kin ntingihdi lepin lokaia pwukat nan doaropwe ehu. Ni ahl wet, seri tikitik kan kak sukuhliki en rong kanahieng padahk kan.

¹¹ Pil seri laud kan ekei ahnsou anahne kangoang en kohwong irail en rong kanahieng. Emen tapwin peneinei kilang nah pwutak me sounpar 11, sohte rong kanahieng oh mwomwen kin auremen ahnsou me padahk kan kin wiawi nan kapokon en Kristian, ihme kahrehda, pahpa menet kihong nah pwutako Paipel ehu oh idek reh en pakala nah Paipel oh wadek iren Paipel kan me sounkapahrek kan kin koasoia. Ni ahnsou me pahpa menet ntingihdi nan doaropwe ire kesempwal kan, e kin kilang nah pwutak doadoahngki nah Paipel. Mwuri, pwutako kin perenki prokram en kapokon.

Aramas Teikan en Rong Ngilomw

12, 13. Dahme kahrehda e kesempwal en iang koul nin duwen pwihn en mwomwohdiso ehu?

¹² Nanmwarki Depit koulki: “Maing Kaun, I kin wia ei kaudok kapil sapwellimomwi pehi sarawi, I kin koulki koulen kasapahlkalahngan oh koasoia wiepen nin limomwi kapwuriamwei kan.” (Melkahka 26:6, 7) Nan mihding kan en Sounkadehdehn Siohwa kan, kitail kak isaneki ahnsou kaselel ehu en kasalehda atail pwoson ni ngihl laud. Ehu ahl kitail kak wia met: sang ni atail pahn iang koul nin duwen mwomwohdiso. Met iei kisehn atail kaudok me inenen kesempwal, ahpw e pahn kak mengei kitail en sohte kapwaiada.

¹³ Ekei seri kan me saikinte kak wadek, re kin wadlikihla lepin lokaia kan en koul kan en Wehio me pahn kadoadoahk nan mihding kan en ehu ehu wihk. Irail kin perenki iang aramas laud kan koul. Ni ahnsou me seri kan lalaudla, mwein re sohte pahn perenki iang koulki koul en Wehio kan. Ekei aramas laud kan pil kin namenek en koul nan mihding kan. Ahpw, iang koul kin wia kisehn atail kaudok, duwehte kalohk kin wia kisehn atail kaudok. (Episos 5:19) Kitail kin wia uwen me kitail kak en kapinga Siohwa nan doadoahk en kalohk. Kitail soh pil kak kapinga Ih sang ni atail pahn doadoahngki ngilatail kan​—mehnda ma kitail ngilamwahu de soh—​ni ahnsoun koul en kaping sang mongiongitail kan?​—Ipru 13:15.

14. Dahme kahrehda kitail anahne kaunopada mwahu neitail sawaspen Paipel kan me kitail kin doadoahngki nan mihding en mwomwohdiso kan?

¹⁴ Kitail pil kin kapinga Koht ni ahnsou me kitail kin wia pasepeng kan me pahn kangoange mehteikan nan mihding kan. Ahpw, met wehwehki me kitail anahne kaunopada. Kitail anahne ahnsou laud ma kitail men doudouloale padahk loal kan en Mahsen en Koht. Wahnpoaron Pohl, me kin ngoangki wadek Pwuhk Sarawi, pil kin pohnese ire wet. E ntingihdi met: “Ia uwen laud en sapwellimen Koht kapai kan! Ia uwen loalen sapwellime erpit oh kupwurokong!” (Rom 11:33) E kesempwal kumwail tapwin peneinei kan en sewese koaros nan omw peneinei en rapahki sapwellimen Koht erpit, nin duwen dahme Pwuhk Sarawi kin kasalehda. Koasoanehdi ekis ahnsou ni ahnsou me kumwail pahn wia onop en Paipel en peneinei en kawehwehda ire kan me apwal en wehwehki oh pil sewese omw peneinei en kaunopada ong mihding kan.

15. Sawas dah kei mwein pahn kak sewese emen en iang pasepeng nan mihding kan?

¹⁵ Ma ke men iang pasepeng nan mihding kan ahnsou koaros, dahme ke soh kaunopada mehkot me ke men nda mwohn mihding kan? Sohte anahne wia pasepeng ni oaritik. Ke kak wadek ni mehlel iren Paipel konehng ehu de pilada ekei lepin lokaia kan me kohsang omw mohngiong. Ekei sounkalohk kan kin peki rehn brother me pahn wia onopo en kileledi ong irail keieun pasapeng nan ehu parakrap pwe en uhdahn mie arail ahnsou en kasalehda ahr pwoson.

Irail Soakoahiek kan kin Loalokongla

16, 17. Mehnia kaweid emen elder kihong emen ministerial servant, oh dahme kahrehda kaweid wet pweida?

¹⁶ Nan mihding kan en Sounkadehdehn Siohwa kan, kitail kin kalap ale kangoang en wadek Mahsen en Koht rahn koaros. Inenen kaperen en wia met. E pil kin sewese kitail en wia atail pilipil pwung kan, kapwungala irair sapwung akan, powehdi kasongosong kan, oh pwurehng kehlailda ni pali ngehn ma kitail pahn keidla ni ahl sapwung.​—Melkahka 19:7.

¹⁷ Elder koahiek kan nan mwomwohdiso kin kaunopada ahnsou koaros en kihong kitail sawas oh kaweid konehng kan me kin kohsang Paipel. Ihte me kitail anahne wia, “idipasang” oh rapahki ahr kaweid pwukat me poahsoanda pohn Paipel. (Lepin Padahk 20:5) Ehu rahn, emen ministerial servant me pwulopwul ngoangki idek rehn emen elder oh peki reh sawas ong iaduwen e kak kalaudehla eh doadoahk nan mwomwohdiso. Eldero, me kin esehla ohl pwulopwul menet, pakalahng nah Paipel nan pwuhken 1 Timoty 3:3, me mahsanih ohl idihda kan pahn anahne “kadek.” Ni kadek, e kasalehong ohl pwulopwul menet iaduwen e kak kasalehda kadek ong aramas teikan. Brother pwulopwul menet lingeringerda pwehki kaweid inen wet kohwong ih? Uhdahn soh! E kawehwehda met, “Eldero doadoahngki Paipel, met sewese ie en wehwehki me kaweid wet kin kohsang rehn Siohwa.” Ministerial servant menet ni karakarahk kapwaiada kaweido oh ni ahnsouwet e kekeirada.

18. (a) Dahme kin sewese Kristian pwulopwul men en powehdi kasongosong kan me e kin lelong nan sukuhl? (b) Mehnia iren Paipel kan ke kin tamanda ni ahnsou me ke kin lelohng kasongosong kan?

¹⁸ Mahsen en Koht pahn kak pil sewese kumwail pwulopwul kan en “kalekehkin uhk ineng en mwahnakapw akan.” (2 Timoty 2:22) Emen Sounkadehde en Siohwa pwulopwul me ahpwtehn kesepwil sang high sukuhl kak powehdi kasongosong kan me e lelong nan sukuhl pwehki e kin doudouloale ekei iren Paipel oh kin kapwaiada. Serepein menet kin kalap medemedewe duwen kaweid me ntingihdi nan Lepin Padahk 13:20: “Ma ke pahn padahngki mehkot sang rehn me loalokong kan, ke pahn pil loalokongla.” Ihme kahrehda, e kin kanahieng en karanihte irail akan me kin wauneki kaweid kan en Paipel. E medemedewe met: “I sohte mwahusang aramas teikan. Ma I pahn iang pwihn sapwung ehu, I pahn men kaperenda kompoakepai kan, oh met pahn kak kahrehong ie en pil lelohng kahpwal akan.” Kaweid en Pohl me ntingihdi nan 2 Timoty 1:8 pil kin sewese ih. E ntingihdi met: “Eri, ke dehr namenengki omw kadekadehde atail Kauno, . . . ahpw ale pwaisomw ni lokolongki Rongamwahu.” Ni e kin kapwaiada kaweid wet, ni ahnsou konehng koaros, e kin ni eimah ehukihong ienge tohnsukuhl akan padahk kan me poahsoanda pohn Paipel. Ni ahnsou kan e kin ale eh pwais en koasoiong tohnsukuhl teikan nan sukuhl, e kin pilada oaralap ehu me pahn mweidong ih en wia kalohkihong tohnsukuhl teikan duwen Wehin Koht.

19. Dahme kahrehda emen ohl pwulopwul sohte kak powehdi kasongosong kan en sampah, ahpw dahme sewese ih en pwurehng kehlailda ni pali ngehn?

¹⁹ Ehu rahn, ma kitail pahn pwupwusang “ahl inen,” Mahsen en Koht pahn kak sewese kitail en kapwungala atail ewen kahk kan. (Lepin Padahk 4:18) Emen ohl pwulopwul nan Aprika sukuhliki duwen met. Ni ahnsou me emen Sounkadehdehn Siohwa kan tuhwong ih, e pwungki en onop Paipel rehrail. E perenkihda dahme e kin sukuhliki ahpw e tepida werek suwed nan sukuhl. Kedekedeo, e kin wia tiahk en nenek. E wehkada, “Ai nsen mwakelekel kin kaloke ie, oh mwuhr I sohte kak iang towehda mihding kan.” Ahpw, mwuhr e pwurehng tepida iang towehda mihding kan. Ohl pwulopwul menet koasoiada mehkot kesempwal: “I diarada me kahrepe keieu me kahrehong ie en pwupwudi, pwehki I duhpekla ni pali ngehn. I sohte wia pein ai onop Paipel. Ih kahrepe I sohte kak powehdi kasongosong kan. Mwuhr, I tepida wadek makisihn kan en The Watchtower oh Awake! Ekis ekis, I pwurehng kehlailda ni pali ngehn oh kamwakelehda ai mour. Met kin wia kadehde mwahu ong irail akan me kilang wikidekla kan me I wiahda nan ai mour. I papidaisla, oh ahnsouwet, I inenen nsenamwahu.” Dahme sewese ohl pwulopwul menet en kehlailda powehdi eh luwet akan? E pwurehng kehlailkihda wia pein ah onop en Paipel ahnsou koaros.

20. Iaduwen irail pwulopwul kan kak powehdi kasongosong kan me kohsang rehn Sehdan?

²⁰ Kumwail Kristian pwulopwul kan, kumwail kin lelohng kasongosong kan tohto nan rahn pwukat! Ma ke men powehdi kasongosong kan me kohsang rehn Sehdan, ke anahne ale ketinain en pali ngehn ni ehu ehu rahn. Sounmelkahkao, emen ohl pwulopwul pil wehwehki duwen met. E kalahngankiong Siohwa sapwellime Mahsen, pwe ‘mwahnakapw men eh kak dadaur eh mour mwakelekel.’​—Melkahka 119:9.

Wasa Koht Pahn Kahre Kitail, Kitail Pahn Idawehnla

21, 22. Dahme kahrehda kitail en dehr lemehong me elen padahk mehlel me nohn apwal?

²¹ Siohwa kahrehsang wehin Israel nan Isip kahrehlahng nan Sapwen Inou. Mwein ong aramas akan, ahl me Koht pilada irail en keid loale me inenen apwal. Siohwa sohte kahre irail en sapahl wasa me mengei, en inenwohngte Sapwen Inou nan ahl me karanih oahroahr en Sehd Mediderenien, ahpw E kahre sapwellime aramas akan en keid nan sapwtehn. Ahpw ni mehlel, Koht kin kasalehda sapwellime kadek ong irail. Pwe mehnda ma ahl limwahn oaroahr me mwotomwot, ma mehn Israel akan pahn keid pohn ahl wet, re pahn mwadang tuhwong irail Mehn Pilisdia lemei akan. Ahpw pwehki Siohwa pilada ren keid nan ehu ahl tohrohr, E ketin doarehla sapwellime aramas akan pwe irail sohte anahne mwadang pei ong mehn Pilisdia kan.

²² Duwehte atail ahnsou, mwein ong kitail, ahl me Siohwa kin kahre kitail ekei pak kin apwal. Ehu ehu wihk, kitail kin soupisengki wiewiahn Kristian tohto, mihding en Kristian akan, pein atail onop, oh kalohk. Ong kitail e mwomwen mengei en keid nan ahl teikan. Ahpw, ihte ma kitail pahn idawehnla Koht, kitail pahn kak lel wasa me kitail kin doadoahk laud en lelohng. Ihme, kitail en pousehla sukuhliki sang Siohwa kaweid kesempwal kan oh weid nan “ahl inen” ni ahnsou kohkohlahte!​—Melkahka 27:11.

Ke Kak Kawehwe?

• Dahme kahrehda kesempwal kitail en kaukaule iang towehda mihding koaros en Kristian akan?

• Dahme pahpa oh nohno kan kak wia pwehn sewese neirail seri kan en rong kanahieng ni ahnsou me mihding kin wiawi?

• Dahme kitail kak wia pwehn rong kanahieng?

• Dahme kak sewese kitail en iang pasepeng kan nan mihding kan?

[Kilel kan nan Pali 14, 15]

Iang towehda mihding kan en Kristian kin sewese kitail en tamataman me rahnen Siohwa kerendohr

[Kilel kan nan Pali 16]

Mie soangsoangen ahl akan en kapinga Siohwa nan mihding en Kristian akan