Kupwurmwahu en Siohwa me Kahrehda Atail Kepwehpwe
1 Aramas tohto kin lemehda me ke kak ese uwen emen pweida mwahu nan eh mour ma aramaso kin ale mwohni laud sang eh doadoahk. Ihme kahrehda, aramas tohto kin lemeleme me aramas kepwehpwe kan irail me keieu nsenamwahu. Ahpw, aramas kin sapwung ma re kin lemeleme me naineki mwohni tohto kin kahrehda peren mehlel. (Ekl. 5:12) Ni mehlel, ong irail me “men kepwehpwehla” ni palien mwohni oh dipwisou, re sohte pahn ahneki peren ong ahnsou werei. (1 Tim. 6:9) Ni pali teio, sapwellimen Siohwa ladu kan kin ahneki peren mehlel oh re wia aramas me keieu “kepwehpwe” nin sampah pwon. (Lepin Padahk 10:22; Kaudiahl 2:9) Iaduwen?
2 Mehn Kadehde kan Duwen Atail “Kepwehpwe”: Kitail kin “kepwehpwe” nin duwen atail wehwehkihla Mahsen en Koht, Pwuhk Sarawi. Ki sapwellime pwihn sansal, Siohwa kin padahkiong kitail duwen pein Ih oh Sapwellime Ohl, oh kitail kin paiekihda sang met kaidehn ihte ahnsou wet, pil ahnsou kohkohdo. Atail wehwehki pwung kin kak sewese kitail en karanih Siohwa oh wiahda nanpwung mwahu reh. (Seims 4:8) Atail kasawihada dahme mwahu sang dahme suwed oh pil atail idawehn sapwellimen Koht kosonned akan kin pere kitail sang ekei soumwahu kan oh keper kan. Kitail kak likih Siohwa me e pahn apwalih kitail, oh met pahn imwikihla nsenamwahu oh peren mehlel.—Madiu 6:33.
3 Kitail kin nsenamwahuki popohl oh minimin me kin mihmi nanpwungen kitail oh riatail kan ni pali ngehn pwehki kitail kin nantihong kasalehda wahn Ngehn Sarawi en Koht. Pwehki kitail kin miniminkihpene limpoak kehlail, kitail sohte pahn pehm me Koht de riatail kan kak keseikitailla ahnsou me kitail kin lelohng kahpwal kan.—Kal. 6:10.
4 Kitail kin wehwehki duwen kahrepen atail mour oh met kin kihong kitail nsenamwahu. Kitail pil wehwehki me kitail ahneki pwais kaselel en iang doadoahk en kalohki Rongamwahu en Wehin Koht. Met kin kihong kitail nsenamwahu ni atail pil kin sewese aramas teikan en ahneki nanpwung mwahu rehn Koht oh iang kitail papah Ih ni kaudok min. Atail pwais kaselel en papah Siohwa kin kihong Siohwa wahu oh pil kin kihong kitail nsenamwahu pwe kitail wehwehki me kitail kasarawi mwaren Koht. Kitail kin ahneki madamadau me kitail pahn pweida mwahu nan atail mour pwe kitail wehwehki me atail koapworopwor en ahnsou kohkohdo pahn kereniong pweida.
5 Kasalehda Atail Kalahngan: Kitail en kalahnganki kapai koaros me kin kohsang Siohwa, pwehki kapai pwukat kin kahrehda kitail en kin wia aramas me keieu “kepwehpwe” nanpwungen aramas koaros nan sampah. (Lepin Padahk 22:4) Ma kitail kin medemedewe rahn koaros duwen kapai kan, met pahn kamwekid kitail en kalahngankihong Siohwa limpoak me e kin kasalehong kitail oh kitail men kihong Ih kelepw atail kaudok.