Kaperen Kan En Kekeid Ni Lelepek

“Iei kupwuramwahu en Siohwa me kahrehda omw paiamwahu oh e sohte kin ketin kapatahiong medek en iang.”—LEPIN PADAHK 10:22.

1, 2. Dahme kahrehda kitail en pere kitail sang en dehr kedirepwkihla medemedewe dahme pahn wiawi ni ahnsou kohkohdo?

EMEN aramas loalokong en America koasoia: “Kedirepwkihla medemedewe laud duwen dahme pahn kohdo ni ahnsou kan en mwuhr . . . kin pere kitail sang kilang dahme mie nan ahnsouwet.” Met kin uhdahn mehlel rehn irail seri kan me kin kedirepwkihla wiewia mehkan me uhdahn wia ahn aramas laud oh sohte kin tehk mehkan me seri kan kin konehng wia oh irail eri sohla wia seri kei.

² Pil sapwellimen Siohwa tohnkaudok kan pil kin lelohng irair en madamadau wet. Kitail tehkpene dahme kak wiawi. Kitail kin men sapwellimen Koht inou en wahdo paradais pohn sampah en pweida. Kitail kin kasikasik en ale mour ehu me sohte mie soumwahu, mahla, medek oh lokolok. Mehlel me e mwahu kitail en kasik soahng pwukat, ahpw iaduwen ma kitail kin nohn direkihla medemedewe kapai en war akan me pahn kohdo oh kahrehiong atail pahn maskuniengala kapai en ngehn akan me mie rehtail nan ahnsouwet? Ia uwen met ah nohn kansensuwed! Kitail kakete mengeiong pwangahkihda oh ‘ahnekihda pepehm suwed nan atail mohngiong pwehki dahme kitail kasikasik en wiawi nohn pwand’ daulih dahme kitail medemedewe. (Lepin Padahk 13:12) Kahpwal kan en mour wet kakete kihong kitail nan lidip en pein poakeikitailla. Kitail sohla pahn nantihong powehdi kahpwal kan ah kitail ihte kin komplein. Kitail kak irehdi soahng pwukat koaros sang ni atail kin perenki medemedewe kapai kan me mie rehtail nan ahnsouwet.

3. Dahme kitail pahn tehk kanahieng nan artikel wet?

³ Lepin Padahk 10:22 mahsanih: “Iei kupwuramwahu en Kauno me kahrehda omw kepwehpwe oh e sohte kin ketin kapatahiong medek en iang.” Irair en kekeirdahn ngehn en sapwellimen Siohwa ladu en rahn pwukat sou kin wia kapai ehu me irail en kin pereperenki? Kitail tehkpene mahs ekei irair en kekeirdahn ngehn akan oh kilang wehwehn mepwukat ohng pein emen emen kitail. Ni atail kin ahneki ahnsou pwehn medemedewe irair en limpoak kan me Siohwa ketikihong ‘aramas pwung men me kin kekeidwei ni lelepek’ pahn inenen kin kakehlailih atail pilipil en papah samatail nanleng ni peren.—Lepin Padahk 20:7.

‘Kapai kan me kin Kamwahuwihala Atail Mour’ en Ahnsouwet

4, 5. Mehnia padahk en Paipel me ke kin inenen perenki, oh dahme kahrehda?

⁴ Kitail sukuhliki duwen loalokong pwung duwen padahk en Paipel akan. Sarawi kan en palien Kristendom kin kose me re kamehlele Paipel. Ahpw, irail sohte pwungkihpene arail padahk kan. Edetehn nanpwungen aramas akan me towe palien sarawi teieu, arail wehwehki iren Pwuhk Sarawi me re padapadahki kan kin wekpeseng. Irail inenen weksang sapwellimen Siohwa ladu kan! Sohte lipilipil mehnia tohnsahpw, soangen tiahk dah me se kohsang ie, de mehnia keinek me se kohsang ie, se kin kaudokiong Koht emen me se ese mware. Kaidehn ih Koht en trinity men me sohte kak wehwehki duwen ih. (Deuderonomi 6:4; Melkahka 83:18; Mark 12:29) Kitail pil wehwehki me peidek keieu kesempwal me pid ma iei Koht me kaunen lahng oh sampah pahn anahne pwungla oh me atail kolokol atail lelepek ohng ih, emen emen kitail pahn kak kadehde me met me mehlel. Kitail ese padahk mehlel me pid aramas mehla oh kitail masak Koht pwe dene e kin ketin kaloke aramas nan kisiniei de pil kihiraildihong nan purkadori.—Eklesiasdes 9:5, 10.

⁵ Oh pil, ia uwen kaperen en ese me kitail sohte katialahte miehla ni pein mwomwen Koht! Ahpw, Koht kapikada kitail aramas, oh wiahda kitail rasehng Ih. (Senesis 1:26; Malakai 2:10) Sounmelkahka koulki duwen Koht: “I kin patohwan kapingahkin komwi omwi lemmwin kowahlap; wiepen nin limomwi kan me kapwuriamwei oh inenen mwahu mehlel. I kin wehwehki duwen met.”—Melkahka 139:14.

6, 7. Soangen wekidekla dah kan nan ahmw mour de mouren meteikan, me ke ese kin wahdo kapai?

⁶ Kitail pitsang wiewia kan me keper oh wiewia kan me kin kauwehla paliwaratail. Mehn kair akan inenen direki kehkehlik kan me pid duwen keper en simoak, kamamsakau, oh mour samin en nenek. Pali laud en kehkehlik en kalik pwukat sohte me kin kapwaiada. Dahme kin wiawi, ni ahnsou me aramas mehlel emen ah kin esehda me Koht mehlelo kin kalahdeki soangen wiewia pwukat oh kin kupwur pahtoukihla irail akan me kin wia mepwukat? Eri, aramaso kin katohrehwei wiewia pwukat sang nan ah mour! (Aiseia 63:10; 1 Korint 6:9, 10; 2 Korint 7:1; Episos 4:30) Nin doken ah kin wia met pwehn kaperenda kupwuren Siohwa Koht, e pil kin ale kapai kapatapat akan—roson en paliwar oh madamadau meleilei.

⁷ Kesehla wiewia kan me keper oh wiewia kan me kin kauwehla paliwar kin wia mehkot apwal ohng aramas tohto. Ahpw, nan pahr koaros aramas nen kei kin wia met. Irail kin inoukihong Siohwa arail mour oh kin papidaisla nan pihl, oh eri kin kasalehda ohng wehipokon, nan irair wet, me re kin kesehsang nan arail mour wiewia kan me Koht sohte kupwurki. Met wia mehn kangoang laud ohng kitail koaros! Atail lamalam kehlail en pitsang pahn kanaudok en dihp oh wiewia kamedek kin ale kangoangepe.

8. Mehnia kaweid sang nan Paipel me kin kahrehda peneinei peren?

⁸ Kitail ahneki mour en peneinei me nsenamwahu oh peren. Nan wehi tohto mour en peneinei kin ohla. Pwopwoud tohto kin mweipeseng oh kin kalapw kihong lipwalipw suwed ohng seri kan. Nan ekei wehin Iurop akan, persent 20 en tohnihmw kan kin wia nohno kiripw kei. Iaduwen Siohwa ah ketin sewese kitail en weweidte nan elen lelepek nan soangen irair wet? Menlau wadek Episos 5:22–6:4, oh tehk kaweid mwahu me Mahsen en Koht ketikihda ohng ohl pwopwoud, lih pwopwoud oh seri kan. Ni aramas akan ahr kin idawehn kaweid pwukat oh kaweid en iren Pwuhk Sarawi teikan, me kin inenen kakehlailihala selin pwopwoud, oh sewese pahpa oh nohno kan kakairada seri kan ni pwung, oh kin kahrehda mour en peneinei peren. Met sou kin wia kapai ieu me kitail en perenkihda?

9, 10. Iaduwen atail madamadau ohng ahnsou kohkohdo ah weksang ahn sampah?

⁹ Kitail kin kamehlele me kahpwal en sampah kan pahn mwahula ni ahnsou keren. Mendahki loalokong en palien sains oh wiawihdahn dipwisou kapw akan oh pil doadoahk ngoang en kaun akan, kahpwal laud akan nan mour en rahnpwukat saikinte mwahula. Klaus Schwab, me kauwada World Economic Forum, met koasoia me “ntingpen kairekdi en apwal akan me sampah lelohng wie reireila oh ahnsou en kapwungala ire pwukat wie mwotomwotala.” E pil koasoia duwen “irair keper akan me kotelahr irepen wehin sampah kan me rasehng terrorism, saminlahn wasahn kousoan oh ohlahn paien wehi.” Schwab pil koasoia: “Nan ahnsouwet, sampah lelohngehr irair kan me kahrehda anahn en utuhtpene oh wiahki ehute mwekid kin laudsang mahs.” Ni senturi 21 mwekimwekid kohwei mwowe, kasikpen ahnsou kohkohdo ohng aramas saikinte sansal mwahu ohng kitail.

¹⁰ Ia uwen kansenamwahu en ese me Siohwa ketikihdahr koasoandi ieu me kak kapwungala ahn tohnsampah kahpwal koaros—sapwellimen Koht Wehin Mesaia! Sang ni met, Koht mehlelo pahn ‘kauhkihdi mahwen’ oh wahdo ‘meleilei mwuledek.’ (Melkahka 46:9; 72:7) Nanmwarki keidi, Sises Krais, ‘pahn ketin kapitala me semwehmwe kan, me paisuwed kan sang arail kehnaudek oh wiewia lemei kan.’ (Melkahka 72:12-14) Pahn kaundahn wehio, sohte pahn mie soh itar en mwenge. (Melkahka 72:16) Siohwa “pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 21:4) Wehio koukoudahr nanleng oh ahnsou keren pahn wia wiewia konehng kan pwe en sairada wiewiahn sampah kan koaros.—Daniel 2:44; Kaudiahl 11:15.

11, 12. (a) Rapahki nsenamwahu en uduk kin wahdo peren mehlel me kin werei? Kawehwehda. (b) Dahme kin wahdo peren mehlel?

¹¹ Kitail ese dahme pahn wahdo peren mehlel nan atail mour. Dahme kin wahdo peren mehlel? Emen semen en palien madamadau koasoia me mie soahng siluh me kin wahdo peren—nsenamwahu, iang pidada koasoandi kan (duwehte en iang mwekid kan nan wasahn doadoahk de nan peneinei) oh mie kahrepen ahmw mour (akadeiong soangen mehn akadei laud kan sang ihte nsenohki pein ih). Nanpwungen soahng siluh pwukat, e ntingihdi me nsenamwahu me keieu sohte nohn kesempwal oh koasoia: “E katapan kitail en tehkpene duwen met pwehki aramas tohto kin kihong arail mour en raparapahki pein arail nsenamwahu.” Ia madamadau en Paipel ohng ire wet?

¹² Nanmwarki Solomon en wehin Israel en kawao mahsanih: “I koasoanehdi nan kapehdi I en pereperenki peren en sampah kan oh rapahki dahkot nsenamwahu. Ahpw, I diarada me met pil wia mehkot mwahl. I diarada me kokouruhr iei tiahk en pweipwei, oh peren en sampah sohte kin wiahda kamwahu ehu.” (Eklesiasdes 2:1, 2) Padahk en Pwuhk Sarawi kasalehda me ma mie peren me kin kohsang rapahki pein atail nsenamwahu, e kin kalapw ohng ahnsou mwotomwot. A iaduwen iang pidada doadoahk ehu? Kitail ahneki pwukoah doadoahk ieu me keieu katapan kitail en wia—kalohki Wehin Koht oh katohnpadahk. (Madiu 24:14; 28:19, 20) Ni atail kin ehukihong meteikan mahsan en komour me Paipel kawehwehda duwe, kitail kin iang wia doadoahk ieu me kak wahdo komour ohng pein kitail oh ohng irail ako me kin rong kitail. (1 Timoty 4:16) Nin duwen atail wia “sapwellimen Koht tohndoadoahk kan,” kitail kin diarada me “kihwei kaperen sang ale.” (1 Korint 3:9; Wiewia 20:35) Doadoahk wet kin kihong wehwehn atail mour oh pil kin sewese atail Sounkapikada oh kihda pasapeng ohng ih me pelianda ih, Sehdan me Tepil. (Lepin Padahk 27:11) Ni mehlel Siohwa ketin kasalehong kitail me lelepek ohng Koht kin wahdo peren poatopoat oh peren mehlel.—1 Timoty 4:8.

13. (a) Ni ahl dahieu Theocratic Ministry Sukuhl kin wia kapai ieu ohng kitail me kitail en pereperenki? (b) Iaduwen omw kin ale kapai sang Theocratic Ministry Sukuhl?

¹³ Prokram en kasukuhl ieu me kin katapan oh pweida mwahu. Gerhard wia elder men nan mwomwohdiso en Sounkadehdehn Siohwa kan. Ni ah katamanda ahnsou me e pwulopwul, e koasoia: “Ni ahi pwulopwul, I kin apwaliki koasoakoasoi. Ma aramas me idingkihong ie en koasoi, I kak kapadal lokaia malaulau oh I tepida lokaia pweipweiek. I kin pehm me I suwed sang aramas teikan. Ahi pahpa oh nohno koasoanehdi ien ale kasukuhl en wia kapahrek ahpw e sohte pweida. Ahi kahpwal poahsoankihda madamadau kaidehn mehkot ni paliwerei. Ahpw, met kisakis kaselel me kohsang rehn Siohwa—iei Theocratic Ministry Sukuhl. Ni ahi iang ale kasukuhl wet e kin kakehlahda sapahl ahi lamalam. I kihong ahi nanti koaros ohng praktis dahme I sukuhlikihier. Oh met pweida mwahu! I ahnekidahr pepehm saledek, sohla pepehm en me I suwed sang meteikan, oh ngehi eri ahnekihda lamalam kehlail nan doadoahk en kalohk. Met I pil kin wia padahk ohng wehipokon. I inengieng kapinga Siohwa, me ketikihong ie mour kapw sang sukuhl wet.” Eri kaiahn me Siohwa kin ketikihda pwe kitail en wia sapwellime doadoahk sou kin wia kahrepen kitail en pereperen?

14, 15. Ni ahnsou kan me kitail kin pahtou, soangen sawas dah me kin ahnsou koaros mie? Kihda karasepe.

¹⁴ Kitail ahneki nanpwungmwahu rehn Siohwa oh ahneki utuht sang minimin en pirien me kapil sampah. Katrin, me kin mih nan wehin Germany, inenen pahtoukihla ni ah rong ripoht en rerrer en sahpw kalaimwun me wiawi oh kahrehda ilok laud me lel Southeast Asia. Nah serepein mwemweitla Thailand ni ahnsou me kahpwal wet pwarada. Ni erein awa 32 nohno menet, sohte ese ma nah serepeino wie momour de e iang kisehn irail me melahr oko me kin dierekda nan ehuehu awa kan. Ia uwen maiauda me Katrin ahneki ahnsou me e alehdi telephone ieu me kehsehki ih me nah serepeino nsenamwahu!

¹⁵ Dahme sewese Katrin nan erein awahn kapwunod pwukat? E ntingihdi: “I kihong kereniong pali laud en ahnsowo kapakap ohng Siohwa. I kin pwurehng pehm duwen kehlail oh madamadau saledek me met kin wiaiong ie. Laudsang met, riei ni pali ngehn limpoak kan kin pwarek ie oh mihmi mpei erein ahnsowo.” (Pilipai 4:6, 7) Ia uwen ah pahn nohn apwal ohng ih, ma e mihmi nan erein awa kamedek ko oh ahpw sohte kapakap ohng Siohwa oh ma pil sohte kamweit me kohsang rehn irail rie kan ni pali ngehn, limpoak kan! Atail karanih Siohwa oh sapwellime ohlo oh atail kin werekiong riatail Kristian akan wia kapai tohrohr ieu, me nohn kesempwal oh kitail sohte kak mwamwahliki.

16. Kihda ekspiriens ehu me karasahda kesempwal en koapworopwor en iasada.

¹⁶ Kitail ahneki koapworopwor en pwurehng kilang aramas mehlahr akan me kitail poakohng. (Sohn 5:28, 29) Mwahnakapw men me ede Madias tikida wia emen Sounkadehdehn Siohwa. Pwehki e sohte ese kapai kan me e ahneki, e peila sang nan mwomwohdiso en Kristian ni ahnsou me e wia mwahnakapw men. Met e ntingihdi koasoia: “I sohte kin wia koasoi loal akan ohng ahi pahpao. Erein pahr akan se kin kalapw akamai. Ahpw, ahi pahpa ahnsou koaros kin men ien ahneki dahme keieu mwahu ohng ie. E kin inenen poakpoake ie, mehkot me I sohte ese ni ahnsowo. Nan 1996, mpen ah pehto, I koledi peh oh sengiseng, ngehi pek mahk reh oh ndaiong ih me I nsensuwedkihla mehkan koaros me I wia oh me I inenen poakpoake ih. Ahpw, e sohte kak rong ie. Ah soumwahu sohte werei ah e mehla. Ma I pahn momour oh kilang ahi pahpao ni ahnsou en kaiasadao, se pahn ahpw kapwungala soahng kan mehn mahso. Oh e uhdahn pahn perenkihda rong me ahnsouwet I wiahlahr emen elder oh me ngehi oh ahi pwoudo iang ale kapai en iang wia pioneer kei.” Ia uwen koapworopwor en iasada ah wia kapai ieu ong kitail!

“Sohte Medek Me E Ketin Kapatahiong”

17. Dahme atail doudouloale sapwellimen Siohwa kapai kan kin wiahiong kitail?

¹⁷ Sises mahsanih met duwen Seme nanleng: “Sahm me ketiket nanleng kin ketin dakerki sapwellime ketipin pohn me suwed oh me mwahu kan, oh e kin ketin kamwerehdi keteu pohn me lelepek kan oh me dipan akan.” (Madiu 5:45) Ma Siohwa kin ketikihdiong kapai pil pohn irail ako me sohte pwung oh suwed akan, ia uwen laud en me e pahn ketikihong irail oko me kin weweid nan arail lelepek! Melkahka 84:11 mahsanih, “Siohwa iei ih me silepatail oh atail nanmwarki lingan, me kin kupwuramwahuwihkin kitail kalahngan oh wahu. E sohte kin ketin soikala mehkot mwahu sang irail me kin kapwaiada me pwung.” Ni atail pahn doudouloale duwen sapwellime epwel tohrohr oh nsenoh me e kin ketikihong irail akan me poakohng ih, mohngiongitail kan kin direkihla kaping oh peren!

18. (a) Iaduwen atail kak nda me Siohwa sohte kin kapatahiong medek ni sapwellime kapai?(b) Dahme kahrehda sapwellimen Koht aramas lelepek kan kin lelohng kansensuwed kan?

¹⁸ “Iei kupwuramwahu en Kauno”—iei me kin wahdo kepwehpwehn ngehn ong sapwellime aramas akan. Oh e ketin kamehlelehiong kitail me “sohte medek me E ketin kapataiong.” (Lepin Padahk 10:22) Eri, dahme kahrehda kasongosong oh apwal akan kin lelohng sapwellimen Koht aramas lelepek tohto, wiahiong irail kamedek laud oh nsensuwed? Apwal akan oh pwunod kin lelohng kitail, pali laud pwehki kahrepe siluh. (1) Pwehki atail sohsohki dihp. (Senesis 6:5; 8:21; Seims 1:14, 15) (2) Pwehki Sehdan oh nah ngehn saut akan. (Episos 6:11, 12) (3) Pwehki sampah me suwed. (Sohn 15:19) Nin doken Siohwa ah ketin mweidohng soahng suwed akan en wiawihong kitail, kaidehn ih me kin ketikihong kitail mepwukat. Ni mehlel, “Soangen wiawi sapan koaros oh kisakis mwahu koaros kin kohdihdo sang nanleng; re kin kohdihdo sang rehn Koht, Sounwiepen marain koaros en nanleng kan. Koht sohte kin ketin wekila, oh sohte kisin mwomwen wekila kis kak mie reh.” (Seims 1:17) Sapwellimen Siohwa kapai kan sohte kamedek kin iang.

19. Dahme wie kaukaunop ohng irail oko me kin wonoweite weweidki lelepek?

¹⁹ Kepwehpwehn pali ngehn ahnsou koaros kin kakerenih kitaillahng Koht. Ni atail kin kakairada elen karanih Siohwa, kitail ‘kaunopada ehu pai kesempwal ong pein irail me pahn wia ehu poahsoan kehlail ong ni ahnsou kohkohdo, pwe kitail pahn kak lelohng ni mouro me uhdahn mour’—mour soutuk. (1 Timoty 6:12, 17-19) Ni ahnsou kohkohdo nan sapwellimen Koht sampah kapw, atail pai en pali ngehn pahn iangete kapai en war akan. Uhdahn mour pahn wia pwais en irail akan koaros me “kin peikiong kapitiehn Siohwa.” (Deuderonomi 28:2, NW) Ki kakehlepen kapehd me kitail ahnekiher, ni peren, kitail wonoweite oh weweidki lelepek.

Dahme Kitail Sukuhliki?

• Dahme e sohte mwahuki kitail en nohn medemedewe daulihala duwen ahnsou kohkohdo?

• Soangen kapai dah kan me kitail paiekihda ahnsouwet?

• Dahme kahrehda sapwellimen Koht ladu lelepek kan kin lelohng kalokolok?