Sapwellimen Siohwa Kapai Kan Kin Wiaiong Kitail Kepwehpwehla

“Kapai en Siohwa kan iei ih me kin wahdo kepwehpwe, oh e sohte kin kapataiong met medek.”​—LEPIN PADAHK 10:22, New World Translation.

1, 2. Dahme kahrehda peren sohte kin kohsang paien sampah kan?

RAHNWET, aramas rar kei kin nantihong rapahki paien sampah. Ahpw dipwisou kan en sampah pahn kak kihong irail peren mehlel? The Australian Women’s Weekly koasoia: “I sohte kak tamanda ahnsou ehu me aramas akan kin inenen nsensuwed duwehte irail kin nsensuwed rahnwet.” Makisihn wet pil koasoia met: “Met irair ehu me inenen kapwonopwon. Aramas akan kin ndinda me ni ahnsouwet, Australia inenen kepwehpwe, mouren aramas akan kin inenen mwahu. . . . Ahpw aramas tohto nan wehio pwon kin ahneki pepehm me arail mour sohte pahn pweida. Ohl oh lih akan kin ahneki pepehm ehu me mie mehkot nan arail mour me sohte unsek, ahpw re sohte kak kawehwehda dahkot met.” Pwuhk Sarawi kin mehlel ni e kin kawehwe me peren nan atail mour sohte pahn kak kohsang dipwisou kan me kitail kin ahneki oh naineki!​—Eklesiasdes 5:10; Luk 12:15.

² Pwuhk Sarawi kin padahkiong kitail me peren keieu laud kin kohsang sapwellimen Koht kapai kan. Ihme kahrehda, Lepin Padahk 10:22 (NW) mahsanih: “Kapai en Siohwa kan iei ih me kin wahdo kepwehpwe, oh e sohte kin kapataiong met medek.” Ni ahnsou me aramas emen kin noahrokehda paien sampah kan, e kin kalapw imwikihla medek. Eri, e konehng wahnpoaron Pohl kihda soangen kaweid duwehte met: “Ahpw irail kan me men kepwehpwehla kin pwupwudiong nan songosong oh lohdiong nan lidip en ineng pweipwei oh keper tohto, me kin kauweirailla. Pwe limpoak ong mwohni, iei tepin soangen suwed koaros. Mie ekei me kin inenen kasikasik en naineki mwohni, eri, re ahpw salongalahsang pwoson oh kauwehkihla mohngiongirail soangen kapahtou tohtohie.”​—1 Timoty 6:9, 10.

3. Dahme kahrehda sapwellimen Koht ladu kan kin lelohng kasongosong kan?

³ Ni pali teio, kapai kan me sohte kin kihong aramas medek pahn kak kipehdi ih me kin “karonge kapitien Siohwa.” (Deuderonomi 28:2) Ahpw, ekei aramas ele pahn idek, ‘Ma sapwellimen Siohwa kapai kan sohte pahn kahrehong emen en medekla, dahme kahrehda sapwellimen Koht ladu tohto kin lelohng kalokolok kan?’ Pwuhk Sarawi kin kasalehda me Koht kin mweidong kitail en lelong kasongosong kan me kin kohsang rehn Sehdan, eh koasoandi suwed wet, oh pein atail soh-unsek kan. (Senesis 6:5; Deuderonomi 32:4, 5; Sohn 15:19; Seims 1:14, 15) Siohwa iei utupen “soangen wiawi sapan koaros oh kisakis mwahu koaros.” (Seims 1:17) Kahrehda, sapwellime kapai kan sohte kin kamedekihala aramas akan. Eri, kitail en koasoiapene duwen ekei sapwellimen Koht kisakis unsek kan.

Mahsen en Koht kin wia Kisakis Kesempwal Ehu

4. Kapai oh kisakis kesempwal dah kei me sapwellimen Siohwa aramas akan kin paiekihda nan “imwin ahnsou wet”?

⁴ Me pid duwen “imwin ahnsou,” kokohp en Daniel mahsanih: “loalokong mehlel pahn tohtohla.” Ahpw, wehwehn mahsen pwukat kin sansalda sang mahsen kan me ntingdi mwuri: “Me suwed kan sohte pahn dehdehki, ahpw re pahn usehla wiewia ar mour suwed; irail kante me kupwurokong me pahn dehdehki.” (Daniel 12:4, 10) Nna, medewehla met! Mahsen en Koht​—keieu: kokohp kan​—kin wiawihkihda erpit en Koht, kahrehda aramas suwed akan sohte pahn kak wehwehki, ahpw sapwellimen Siohwa aramas akan kak dehdehki. Sapwellimen Koht Ohl kapakapki: “Maing Semei, Kaun en nanleng oh sampah! I kapingahkin komwi omwi ketin ekihsang soahng pwukat me loalokong oh koahiek en sampah kan, ahpw ketin kasalehiong me soaloalokong kan.” (Luk 10:21) Kapai laud ehu en naineki kisakis kesempwal iei sapwellimen Koht Mahsen, Paipel, oh en iang pwihn en aramas akan me Siohwa kin ketikihda sawas pwehn kak dehdehkihla mehkan me ngehnin!​—1 Korint 1:21, 27, 28; 2:14, 15.

5. Dahkot erpit, oh iaduwen kitail kak ale irair wet?

⁵ Kitail sohte pahn kak dehdehkihla soahng ngehnin kan ma kitail sohte kin alehda “erpit me kin sang powe.” (Seims 3:17) Erpit iei koahiek en doadoahngkihla loalokong ong kapwungala kahpwal akan, liksang keper kan, kapwaiada mehn akadei kan, de kihda kaweid pwung kan. Iaduwen kitail kak ale erpit me kin kohsang powe? Lepin Padahk 2:6 mahsanih: “Pwe Kauno [“Siohwa,” NW] iei ih me kin ketikihdo kupwurokong; iei ih me kin ketikihdo loalokong oh dehdehki.” Ei, Siohwa pahn kapaikihda kitail erpit ma kitail pahn poadidiong kapakap, duwehte me e ketikihong Nanmwarki Solomon “loalokong oh wehwehki laudsang me aramas ahneki.” (1 Nanmwarki 3:11, 12; Seims 1:5-8) Pwehn alehdi erpit, kitail pil anahne karonge Siohwa ni atail kin kaukaule onop oh kapwaiada sapwellime Mahsen.

6. Dahme kahrehda elen loalokong en kapwaiada sapwellimen Koht kosonned akan oh mouren kaweid kan nan atail mour?

⁶ Mehn kahlemeng mwahu kan duwen erpit me kohsang rehn Koht kin dierekda nan kosonned akan oh mouren kaweid akan en Paipel. Kitail kin paiekihda sang sawas pwukat​—ni paliwaratail, atail madamadau kan, pepehm akan oh ni pali ngehn. Sounmelkahkao koulki: “Kosonned en Kauno [“Siohwa,” NW] me unsek mehlel; e kin pwurehng kakehlahda aramas. Mahsen en Kauno [“Siohwa,” NW] me likilik, e kin kaloalokongihala me soaloalokong kan. Kosonned en Kauno [“Siohwa,” NW] me pwung; oh irail kan me kin peikiong kin pereperen. Sapwellime mahsen kan me uhdahn pwung oh kin kamarainihada lamalam en aramas. E mwahu ong aramas en wauneki Kauno [“Siohwa,” NW]; pwe met pahn poatopoat kohkohlahte. Kopwung en Kauno [“Siohwa,” NW] me pwung, e kin pahrek ahnsou koaros. Sapwellime kopwung kan kesempwal sang kohl me keieu kaselel.”​—Melkahka 19:7-​10; 119:72.

7. Dahme kin imwikihla sohpeisang sapwellimen Koht koasoandi pwung kan?

⁷ Ahpw, aramas akan me kin sohpeisang sapwellimen Koht kosonned pwung kan sohte kin ahneki peren oh saledek me re kin raparapahki. Ehu rahn, irail pahn wehwehki me aramas sohte kak pitih Koht, pwe mehkot me aramas pahn padokedi, ihme re pahn dolung. (Kalesia 6:7) Aramas rar kei me kin sohpeisang sapwellimen Koht mouren kaweid kan kin lelohng kahpwal en arail wiewia suwed akan duwehte liseian en kiripw, soumwahu kan, de soumwahukihla wini suwed. Ma re sohte pahn koluhla oh wiliakapwala, arail mour pahn kahluwairaillahng mehla oh Koht pahn kasorehla irail.​—Madiu 7:13, 14.

8. Dahme kahrehda irail akan me kin poakohng Mahsen en Koht kin ahneki peren?

⁸ Ahpw, irail akan me kin poakohng sapwellimen Koht Mahsen oh kapwaiada pahn ale kapai tohto ni ahnsouwet oh pil ni ahnsou kohkohdo. Sapwellimen Koht kosonned akan kin kahrehong irail en ahneki pepehm en saledek, peren mehlel, oh irail pil kin kasikasik ahnsou me re pahn saledek sang dihp oh imwilahn suwed kan me kin kohsang dihp duwehte mehla. (Rom 8:20, 21; Seims 1:25) Koapworopwor wet uhdahn pahn pweida pwehki e poahsoankihda sapwellimen Koht kisakis ong aramas akan​—iei tomw meirong en sapwellime Ohl Iehros, Sises Krais. (Madiu 20:28; Sohn 3:16; Rom 6:23) Soangen kisakis kaselel wet kin kamehlelehong kitail uwen loal sapwellimen Koht limpoak ong aramas akan oh met kin pil kamehlelehong aramas akan koaros me kin karonge Siohwa duwen kapai soutuk kan.​—Rom 8:32.

Kitail kin Kalahnganki Kisakis en Ngehn Sarawi

9, 10. Iaduwen kitail kin paiekihda sapwellimen Siohwa kisakis en ngehn sarawi? Kihda karasepe ehu.

⁹ Pil ehu kisakis limpoak en Koht me kitail anahne en kalahnganki iei sapwellime ngehn sarawi. Ni rahn en Pendekos 33 C.E., wahnpoaron Piter kangoange pokono me mih nan Serusalem: “Emenemen kumwail en koluhla oh wiliakapwala, oh pil papidaisla ni mwaren Sises Krais, pwe dipamwail kan en lapwada; kumwail ahpw pahn ale ngehn sarawi, iei kalahngan ehu sang rehn Koht.” (Wiewia 2:38) Rahnwet, Siohwa kin ketikihong sapwellime ladu kan me inoukihong Siohwa arail mour ngehn sarawi, ahpw re anahne kapakapki ngehn sarawi oh nseneki en kapwaiada sapwellime kupwur kan. (Luk 11:9-​13) Mahs mahsie, kehl wet me keieu kehlail nan audepen nanleng oh sampah​—iei sapwellimen Koht ngehn sarawi, de manaman en Koht​—kin kakehlahda ohl oh lih pwoson akan, iangahki tepin Kristian akan. (Sekaraia 4:6; Wiewia 4:31) Rahnwet, e pil kak wia met ong kitail, mendahki kitail kin lelohng kahpwal laud kan nin duwen sapwellimen Siohwa aramas akan.​—Soel 2:28, 29.

¹⁰ Medemedewe duwen mehn kahlemeng mwahu en Laurel, me iang soumwahu me adaneki polio, oh ahnsou koaros e anahne mih nan misihn ehu me kin sewese eh ngolungol en doadoahk ni erein sounpar 37.a Edetehn e lelohng kahpwal laud wet, e kin ngoangki papah Koht lao lel eh mehla. Ni sounpar kan me e wia momour, sapwellimen Siohwa kapai laud kan kipehdi Laurel. Karasepe ieu, e sewese aramas 17 en sukuhliki duwen padahk mehlel en Paipel, edetehn e anahne mih nan misihn ni aua 24 ehu ehu rahn! Irairo me e mihmi loale kin katamankin kitail duwen mahsen kan en wahnpoaron Pohl: “Pwe ni ei kin luwet, iei ahnsou me I kin kehlail.” (2 Korint 12:10) Ei, pweidahn atail doadoahk en kalohkiseli Rongamwahu sohte kin wiawi pwehki pein atail koahiek oh kehl, ahpw sang sapwellimen Koht ngehn sarawi, me Koht kin ketikihong aramas akan me kin karonge kapitien Koht.​—Aiseia 40:29-​31.

11. Irair dah kei me sapwellimen Koht ngehn sarawi kin kekeirada nan loalen aramas akan me kin “wiahla aramas kapw”?

¹¹ Ma kitail kin karonge Koht oh peikiong Ih, sapwellime ngehn sarawi pahn kekeirada loalatail irair akan duwehte limpoak, peren, popohl, kanengamah, kamwahu, pwoson, opampap, oh liksang me suwed. (Kalesia 5:22, 23) Kristian akan kin doadoahngki “wahn ngehn” pwukat kin wia kisehn “aramas kapw” oh irair pwukat pahn wiliandi irair akan me kin rasehng mahn lawalo kan me re kin kasalehda mahs. (Episos 4:20-​24; Aiseia 11:6-9) Wahn ngehn me keieu kesempwal iei limpoak, me kin kahrehong aramas akan en “wiahla ehu ni mehlel.”​—Kolose 3:14.

Limpoak en Kristian ​—Kisakis Ehu me Keneinei

12. Iaduwen Dapida oh Kristian teikan nan keieun senturi kasalehda arail limpoak?

¹² Limpoak en Kristian iei pil kisakis kaselel ehu me kohsang rehn Siohwa​—⁠kisakis ehu me kitail kin kesempwaliki. Kisakis wet kin daur mouren kaweid akan, oh e kin direkihla pepehm limpoak oh met kin kahrehong irail akan me mih nan pwoson en kerenpene oh arail kin kerenpene kin kehlail sang arail kin ehupene rehn kiserail kan. (Sohn 15:12, 13; 1 Piter 1:22) Karasepe ieu, kitail en koasoia duwen Dapida, emen lih Kristian me kadek nan keieun senturi. “Lih menet kin mweidohng eh ahnsou koaros en wiewia mwahu oh sewese me semwehmwe kan,” keieu irail liohdi kan nan mwomwohdiso. (Wiewia 9:36) Ele mwein lih pwukat​—⁠mie kisehrail kan, ahpw Dapida kin nseneki wia uwen me e kak en sewese oh kangoange irail. (1 Sohn 3:18) Mehn kahlemeng mwahu me Dapida wia! Limpoak ong riarail kan kamwekid Persila oh Akwila en ‘lelohng nan keper laud’ pwehki Pohl. Limpoak pil kamwekid Epapras, Luk, Onesiporus, oh meteikan en sewese wahnpoaron Pohl ni ahnsou me e selidi nan imweteng nan Rom. (Rom 16:3, 4; 2 Timoty 1:16; 4:11; Pailimwon 23, 24) Ei, soangen Kristian akan nan rahnwet kin ‘poakpene nanpwungarail,’ kisakis kaselel wet me kohsang rehn Koht oh me kin kasansalehda me irail kin wia sapwellimen Sises tohnpadahk mehlel akan.​—Sohn 13:34, 35.

13. Iaduwen kitail kak kasalehda atail kalahnganki pwihn en Kristian pirien ehu?

¹³ Ke kin kesempwaliki limpoak me mwomwohdiso en Kristian kin kasalehda? Ke kin kalahnganki atail pwihn en pirien ni pali ngehn, me kin mihmi wasa koaros nan sampah? Met pil kin wia kisakis kaselel me kin kohsang rehn Siohwa. Dahme kitail kak wia pwehn kasansalehda me kitail kin kesempwaliki kisakis pwukat? Kitail kak papah Koht, ni atail kin iang pasapeng nan mihding en Kristian akan, oh sang ni atail kin kasalehda limpoak oh wahn ngehn teikan.​—Pilipai 1:9; Ipru 10⁠:⁠24, 25.

“Kisakis kan me Mih Rehn Ohl akan”

14. Ma emen Kristian pahn papah nin duwen emen elder de ministerial servant, irair dah kei e anahne kasalehda?

¹⁴ Ohl Kristian akan me men papah iengarail tohnkaudok akan nin duwen elder kan de ministerial servant kan kin ahneki mehn akadei kaselel ehu. (1 Timoty 3:1, 8) Ma brother men kin ale pwais wet, e anahne wia ohl ngehnen men, wehwehkihla iren Paipel kan oh ngoangki doadoahk en kalohk. (Wiewia 18:24; 1 Timoty 4:15; 2 Timoty 4:5) E anahne kasalehda lamalam en aktikitik, mpai, oh kanengamah, pwe kapai kan sang Koht sohte kin kipehdi aramas aklapalap akan. (Lepin Padahk 11:2; Ipru 6:15; 3 Sohn 9, 10) Ma brothero pwopwoud, e anahne wia tapwin peneinei limpoak men me kin uhdahn apwahpwalih mwahu eh peneinei. (1 Timoty 3:4, 5, 12) Pwehki e kin kesempwaliki pai kan me kohsang soahng ngehnin kan, soangen ohl pwukat pahn alehdi sapwellimen Siohwa kapai kan.​—Madiu 6:19-​21.

15, 16. Ihs me kin wiahla “kisakis kan me mih rehn ohl akan”? Kihda karasepe kan.

¹⁵ Ni ahnsou me irail akan me kin papah nin duwen elder kan nan mwomwohdiso kin nantihong wia doadoahk en sounkalohk kan, silipen sihpw kan, oh sounpadahk kan, soahng pwukat kin kahrehong kitail en kalahnganki “kisakis kan me mih rehn ohl akan.” (Episos 4:8, 11) Mendahki ekei tohnmwomwohdiso kin paiekihda doadoahk limpoak kan me elder kan kin wia, ahpw sohte kin kasalehda arail kalahngan, Siohwa kin mahsanih wiewia kan koaros me elder lelepek kan kin wia. E sohte pahn manokehla limpoak me re kin kasalehda ong mware ni arail kin papah sapwellime aramas akan.​—1 Timoty 5:17; Ipru 6:10.

¹⁶ Medemedewe duwen emen elder me kin doadoahk laud oh ni ahnsou ehu e mwemweitla rehn emen serepein en Kristian me kin kaunop ren pwalang eh mwahliel. Emen peneinei en serepein menet ntingihdi duwen elder menet: “E inenen kadek, sawas laud, oh kin kasalehda me e kin nsenohki neit serepein, e pil peki reht ma e kak wia kapakap ong Siohwa rehtail. Ni ahnsou me e wia eh kapakap, en serepeino eh pahpa [me sohte iang Sounkadehdehn Siohwa kan] tepida sengiseng, oh koaros me mih nan pere en imwen winio sengiseng. Ia uwen kadek kapakap en elder menet, oh ia uwen laud limpoak en Siohwa en kadarala elder menet ni ahnsou me konehng!” Pil emen Sounkadehde koasoia duwen elder kan me mwemweitla reh ni ahnsou me e mihmi nan imwen wini: “Ni ahnsou me irail kerendohng ai peht nan wasahn aramas doar, I esehier me sohte lipilipil dahme pahn wiawiong ie, I pahn kakete dadaur. I tepida kehlailda oh meleileidi.” Aramas pahn kak pwain soangen limpoak wet me kin kohsang aramas nsenohki aramas teikan? Sohte kak! Met iei kisakis ehu me kin pwilsang rehn Koht, oh kin wiwiawi nan mwomwohdiso en Kristian.​—Aiseia 32:1, 2.

Kisakis en Doadoahk en Kalohk

17, 18. (a) Mehnia kisakis en papah me Siohwa ketikihong sapwellime aramas akan koaros? (b) Sawas dahieu me Koht ketikihda pwe kitail pahn kak kapwaiada atail doadoahk en kalohk?

¹⁷ Kaping keieu kaselel me pahn kak kohwong aramas akan iei doadoahk en papah Siohwa, Wasa Lapalapie. (Aiseia 43:10; 2 Korint 4:7; 1 Piter 2:9) Pwais en iang doadoahk en kalohk ong wehi pokon kin kohwong koaros​—me pwulopwol oh mah, ohl oh lih⁠—me kin inengieng ni mehlel en papah Koht. Ke kin doadoahngki kisakis kesempwal wet? Ekei kin pweiek oh namenek en iang doadoahk en kalohk pwehki irail lemeleme me irail sohte kak ohng wia doadoahk wet, ahpw kitail en tamataman me Siohwa me kin ketikihong irail akan me kin papah Ih ngehn sarawi, oh sawas wet pahn sewese kitail ni ahnsou kan me kitail anahne sawas.​—Seremaia 1:6-8; 20:11.

¹⁸ Siohwa kin ketikihong sapwellime ladu aktikitik kan doadoahk en kalohkiseli Wehio, e sohte kin kihong pwais wet ong aramas akan me kin aklapalap oh me kin likih pein arail koahiek kan. (1 Korint 1:20, 26-​29) Aramas aktikitik oh mpai kin pohnese duwen arail soh-itar kan oh likih Koht ni ahnsou re kin wia doadoahk en kalohk. Re pil kin kalahnganki sawas en pali ngehn me e kin ketikihong irail sang pwihn en “ladu lelepek oh loalokong.”​—Luk 12:42-​44; Lepin Padahk 22:4.

Mouren Peneinei Nsenamwahu ​—Kisakis Kaselel Ehu

19. Dahme pahn kak kahrehong pweida mwahu en kekeirada seri kan en wiawi?

¹⁹ Pwopwoud oh mouren peneinei nsenamwahu iei kisakis kan me kin kohsang rehn Koht. (Rud 1:9; Episos 3:14, 15) Seri kan me kin wia “sohso [kesempwal] sang Siohwa” kin kaperenda pahpa oh nohno kan pwe pahpa oh nohno pwukat kin pweida mwahu en sewese neirail seri kan en kasalehda irair akan me kin kaperenda Koht. (Melkahka 127:3) Ma ke wia emen pahpa de nohno, ken karonge kapitien Siohwa ni ahmw kin kaiahne noumw seri kan duwen sapwellime Mahsen. Irail pahpa oh nohno kan me kin wia met pahn kak alehdi sapwellimen Siohwa sawas oh kapai kaselel kan.​—Lepin Padahk 3:5, 6; 22:6; Episos 6:1-4.

20. Dahme pahn kak sewese pahpa oh nohno kan me neirail seri kan sohpeisang kaudok mehlel?

²⁰ Edetehn pahpa oh nohno kan kin nantihong sewese neirail seri kan, mwein ekei neirail seri kan pahn pilada en sohpeisang kaudok mehlel ni ahnsou me re laudla. (Senesis 26:34, 35) Met kin inenen kansensuwedihala pahpa oh nohno kan. (Lepin Padahk 17:21, 25) Ahpw menlau dehr mworusala, ahpw tamataman duwen sapwellimen Sises karasaras duwen pwutak me salongala. Edetehn pwutako kohkohlahsang imwe oh tepida mourki mour suwed ehu, mwuhr, e pwuralahng imwen eh pahpa, oh eh pahpa kasamwo ih ni peren oh limpoak. (Luk 15:11-​32) Sohte lipilipil dahme pahn wiawi, Kristian pahpa oh nohno lelepek kan kak kamehlele me Siohwa kin wehwehki duwen irairo, oh e kin nsenohki oh e pahn kihda sapwellime sawas.​—Melkahka 145:14.

21. Ihs me kitail anahne karonge, oh dahme kahrehda?

²¹ Eri, pein emenemen kitail koaros, pahn pilada dahme keieu kesempwal nan atail mour. Kitail kin nantihong alehdi paien sampah me pahn kihong pein kitail oh atail peneinei kan medek? De kitail kin nantihong rapahki ‘soangen wiawi sapan koaros oh kisakis mwahu koaros’ me kin kohsang “rehn Koht, Sounwiepen marain koaros en nanleng kan”? (Seims 1:17) Sehdan, “semen likamw,” men kilang kitail rapahki paien sampah oh katiasang peren oh mour soutuk. (Sohn 8:44; Luk 12:15) Ahpw, Siohwa kin nsenohki kitail ni mehlel. (Aiseia 48:17, 18) Eri, kitail en karonge Samatail limpoak nanleng oh “rapahki atail peren” reh. (Melkahka 37:4) Ma kitail kin nantihong wia met, sapwellimen Siohwa kisakis kesempwal kan oh kapai tohto kak kapwehpwehla kitail​—oh met sohte pahn kamedek.

[Nting tikitik me mi pahs]

Ke Tamanda?

• Iawasa kitail kak diarada peren me keieu laud?

• Ia ekei kisakis kan me Siohwa kin ketikihong sapwellime aramas akan?

• Dahme kahrehda doadoahk en kalohk kin wia kisakis ehu?

• Dahme pahpa oh nohno kan kak wia pwehn alehdi sapwellimen Koht kapai kan ni ahnsou me re kin apwaliahda neirail seri kan?

[Kilel nan Pali 14]

Ke kin kasalehda ahmw kalahnganki sapwellimen Koht kisakis en sapwellime Mahsen?

[Kilel nan Pali 15]

Laurel Nisbet kin ngoangki papah Koht mendahki e kin mihmi nan irair apwal akan

[Kilels nan Pali 16]

Duwehte Dapida, aramas akan kin esehki Kristian akan nan rahnwet arail wiewiahn limpoak kan

[Kilel nan Pali 17]

Elder Kristian kan kin kasalehda limpoak ni arail kin nsenohki iengarail kan