Ripoht En Sounkalohk Kan En Wehio
Kalohk ong Irail me Apwal en Tuhwong kan
SOUNKADEHDEHN SIOHWA KAN kin song en tuhwong aramas koaros pwe ren kak ehukihong irail padahk mehlel duwen Wehin Koht. Ekei ahnsou, irail kin wia wiewia tohrohr akan pwe irail en tuhwong irail akan me sohte kalap mih ni imwarail kan. (Mark 13:10) Ni irair wette, emen Special Pioneer nan South America koasoia ekspiriens wet.
“Ehu rahn, I esehda me Kepina en Wehio pahn pwaredo wasa me ngehi oh ahi pwoud kin wia doadoahk en kalohk. Pwehki e sansal me ih emen soangen aramas me sohte kin kalap mih ni imwe, I ntingihdi kisinlikou ieu ong ih oh ngehi kapataiong loale doaropwe (tract) tohto me koasoia duwen Paipel, oh pil ehu brochure me oaralap koasoia: Dahme Koht Kupwurki Kitail en Wia? oh pil pwuhk pwukat: Mankind’s Search for God oh Knowledge That Leads to Everlasting Life. Nei kisinlikou kawehwe kahrepen ehu ehu tract, brochure oh pwuhk.
“Pwehki I men ese ia mwomwen ah lamalam ohng pwuhk pwukat, I peki ien tuhwong ih. Wihk kei mwuri, mweimwei kohwong ie ien tuhwong ih, oh ngehi eri wahda video cassette me oaralap koasoia Jehovah’s Witnesses—The Organization Behind the Name. Tuhpene wet reireiki awa riau. Mwurin aht kilang video cassette, I idek reh ia ah madamadau ong met. E sapengki: ‘Sohte ehu pwihn nan sampah pwon me duwehte amwailen. I mentehno mie soangen aramas duwehte kumwail pwe ren sewesehkin ie ahi doadoahk en koperment kan!’ Ih eri idek rehi ma I kohlahr ni poason kaun en ahi pwihn en Sounkadehdehn Siohwa kan. I padahkiong ih me mendahki e wia ahi mehn akadei sangete ni ahnsou me I sounpahr 14, lel met I saikinte ahnekihdi ahnsou mwahu en lelahng poason kaunen Sounkadehdehn Siohwa kan nan Brooklyn, New York. Met iei ehu kisehn mehn akadei kan me I apwaliki lel. E kilikilang ie ahnsou werei. Mwuri, e nda me e men ien alehdi soangen ahnson mwahu wet. E koasoanehdi mweimwei en seiloak ni palien kosonned oh pil kihong kiht neit ticket kan, ni wiepen kisakis!
“Ahnsou wet, Kepina kin kaukaule ale nah Watchtower oh Awake! makisihn kan. Se kin kasikasik me ahnsou keren se pahn kak tepida onop Paipel reh.”