Aramas kin Mwekidki Dahme Re Kin Kilang Nan Video Cassette kan me Kin Kihda Mehn Kadehde Mwahu
1 “Neit pwutak tepida kilang video cassette wet sangete ahnsou me e tepida alu. E kin pwurepwurehng kilang video cassette wet pak tohto. E inenen kaselel en ahneki soangen “mehn doadoahk” kan me kin sewese neit seri kan en poakohng Siohwa!” Mehnia video cassette me pahpa/nohno menet koasoia? Video cassette me oaralap koasoia Noah—He Walked With God. Emen nohno me sohte iang Sounkadehdehn Siohwa kan ahpw me nah pwutak kilang video cassette me oaralap koasoia Noah—He Walked With God ni imwen aramas teikan kadaralahng Branch Ohpis $90 oh idek rehrail ma re kak kadarodo video cassette kan me re kin wiahda ong seri kan. Video cassette kan me sapwellimen Siohwa pwihn wiahdahr kin kamwekid laud irail me pwulopwul oh me laud kan.
2 Nan Peneinei: Mwurin ehu peneinei en Sounkadehde kan kilang video cassette me oaralap koasoia Jehovah’s Witnesses Stand Firm Against Nazi Assault, nohno en peneinei wet koasoia: “I kin medemedewe rahn koaros iaduwen Siohwa kin sewese aramas akan en dadaur oh lelepek ong Ih mendahki re kin lelohng kasongosong laud kan! Ahnsou me I kin medemedewe duwen met, e kin sewese ie en wehwehki me ahi kahpwal kan inenen tikitik. Ni aht iang neit seri kan kilang video cassette wet, se kilang me e kin sewese irail en wehwehki me re anahne likih Siohwa. Ni aht koasoiapene duwen video cassette wet mwurin aht kilangada, se kak sewese neit serepein kan en kaunopada mwahu pwe ahnsou me re pahn lelohng kahpwal kan oh kasongosong kan, re pahn wehwehki dahme re pahn wia pwehn powehdi mehpwukat.”
3 Nan Sukuhl: Ni ahnsou me emen Sounkadehde pwulopwul wia eh ripoht nan sukuhl, e kasalehong ienge tohnsukuhl kan video cassette me oaralap koasoia Jehovah’s Witnesses Stand Firm Against Nazi Assault. Mwowe sang met, ah sounpadahk kasalehda me e sohte perenki Sounkadehdehn Siohwa kan. Ahpw, mwurin sounpadahko kilang video cassette wet, e koasoia: “Video cassette wet sewese ie en kawekila ahi madamadau me pid Sounkadehdehn Siohwa kan. I inoukihda me ahnsou me Sounkadehde kan pahn pwarek rehi ni imwei, I pahn rong irail oh tepida onop Paipel rehrail!” Dahme kahrehda ah madamadau duwen Sounkadehde wekila? E nda me e kak kilang me Sounkadehde kan kin ahneki “limpoak mehlel oh lelepek.”
4 Nan Kalohk: Emen sister tuhwong emen lih me sohte men ale neitail pwuhk de brochure de makisihn kan mendahki e kin wia peidek kan duwen Sounkadehdehn Siohwa kan oh dahme re kin kamehlele. Sistero pwurala rehn liho oh kasalehong ih oh ah pwoudo video cassette me oaralap koasoia Jehovah’s Witnesses—The Organization Behind the Name. Ira koaros inenen pwuriamweikihla dahme re kilang oh pwungki me re men onop Paipel rehn Sounkadehde kan. Pwe re rong duwen mehn kadehde mwahu kan me kasalehda duwen Sounkadehdehn Siohwa kan, re tepida kawekila arail mour pwehn pahrekiong kupwuren Koht.
5 Ke kin doadoahngki video cassette kan pwe re kak kamwekid aramas akan ni ahl me keieu mwahu?