Aramas akan me Keieu Peren Nin Sampah
1 “Meid pai aramas akan me arail Koht iei Siohwa!” (Mel. 144:15, New World Translation) Mahsen pwukat kin kasalehda me Sounkadehdehn Siohwa kan kin wia aramas akan me keieu peren nin sampah. Sohte peren me kin laudsang peren me kitail kak ahneki ni atail kin papah Koht ieias oh mehlel, Siohwa. Pwehki Siohwa kin wia “Koht peren men,” irail me kin kaudokiong Ih pil kin peren. (1 Tim. 1:11) Soahng dah kan me pid atail kaudok me kin kak kahrehong kitail en ahneki peren laud?
2 Kahrepe kan Kitail Kin Ahneki Peren: Sises kamehleleong kitail me peren kin kohsang atail “wehwehki duwen [atail] anahn en pali ngehn.” (Madiu 5:3, NW) Ma aramas emen pahn kaukaule onop Pwuhk Sarawi oh iang towehda mihding kan koaros, mehpwukat pahn kaitarala ah anahn en pali ngehn. Sukuhliki padahk mehlel sang Mahsen en Koht kin kasaledengkitailla sang padahk likamw kan oh sapwung kan. (Sohn 8:32) Pwuhk Sarawi pil kin padahkiong kitail duwen elen mour me keieu mwahu. (Aiseia 48:17) Kahrehda, kitail kin paiekihda miniminiong riatail Kristian kan nin duwen pirien en pali ngehn me kin ahneki peren mehlel.—1 Deselonika 2:19, 20; 1 Pit. 2:17.
3 Kitail kin pil ahneki peren laud pwehki kitail kin peikiong sapwellimen Koht kosonned pwung kan me pid tiahk, pwe kitail wehwehki me mehpwukat pahn pere kitail oh kitail pahn kaperenda Siohwa. (Lepin Padahk 27:11) Emen ohl me kin wia ripoht oh pil nting ong nuhspepa koasoia: “Sounkadehdehn Siohwa kin mwomwen peren mendahki re anahne kapwaiada soangen kosonned me apwal. Ni mehlel, re kin ahneki peren laud. Me pwulopwul kan oh pil me laud kan kin mwomwen ahneki peren oh toupahrek nan arail mour.” Iaduwen kitail kak sewese aramas teikan pwehn ahneki peren mehlel duwehte kitail?
4 Sewese Meteikan Pwehn Diar Peren: Sampah wet kin direkihla aramas nsensuwed, oh pali laud en aramas akan sohte kin ahneki koapworopwor ong ni ahnsou kohkohdo. Ahpw, kitail kin ahneki koapworopwor kaselel pwe kitail wehwehki me ehu rahn aramas akan solahr pahn nsensuwed. (Kaudiahl 21:3, 4) Ihme kahrehda, kitail kin ngoangki iang kalohk oh nantihong rapahki irail me mohngiong mehlel pwehn kak ehukihong irail duwen atail koapworopwor oh dahme kitail kin kamehlele duwen Siohwa.—Esek. 9:4.
5 Emen sister me iang doadoahk en Regular Pioneer koasoia: “Sohte doadoahk me kansenamwahu sang sewese aramas sukuhliki duwen Siohwa oh padahk mehlel.” Kitail en wia uwen me kitail kak en kangoange meteikan en onop Paipel. Ahnsou me kitail kin papah Siohwa oh toukihda pein atail ahnsou oh kehl pwehn sewese meteikan en papah Ih, kitail kak ahneki peren me keieu laud.—Wiewia 20:35.