Ia Duwen Mahsen kan en Sises Kin Kahrehda Nsenamwahu

“Sises . . . ahpw ketidahla pohn dohl ehu oh ketidiong powe; a sapwellime tohnpadahk ko ahpw keiong mpe. Ih eri tapihada padahki irail.”​—MAD. 5:1, 2.

1, 2. (a) Dahme wiawi mwohn Sises ketin wia sapwellime Kapahrek en Pohn Dohl? (b) Ia duwen Sises ketin katapiada sapwellime padahk?

NAN PAHR 31 ni eh ketiket sampah, Sises kommoaldi ahnsoukis sang sapwellime doadoahk en kalohk nan Kalili pwehn ketila Serusalem oh iang towehda Pahsohpa. (Sohn 5:1) Ni e pwurehng sapahla Kalili, e ketin loulou pwongo pwon oh peki sapwellimen Koht kaweid pwehn pilada sapwellime wahnpoaron 12 ko. Rahno mwuri, pokon kalaimwun ehu pokonpene rehn Sises oh ih eri kamwahwihala me soumwahu kan. Ni e ketidiong pohn dohl o, sapwellime tohnpadahk ko oh pil meteikan pokonpene reh oh ih eri tapihada padahk.​—Mad. 4:23–5:2; Luk 6:12-19.

² Sises tapihada sapwellime Kapahrek en Pohn Dohl oh kasalehda me nsenamwahu kin kohsang ahn emen kin ahneki nanpwungmwahu rehn Koht. (Wadek Madiu 5:1-12.) Nsenamwahu iei ‘irair en paiamwahu me tepisang pepehm en itarki en emen eh mour de pil ahneki peren laud.’ Irair en nsenamwahu duwau me Sises ketin padahngki kin kasalehda kahrepen Kristian akan kin peren, oh pil wia kamwahu ong rahnwet duwehte pahr 2,000 samwalahr ko. Kitail en tehkpene ehuehu irair pwukat.

“Me Kin Tehk Arail Anahn en Esehla Koht”

3. Ia wehwehn en tehk atail anahn en esehla Koht?

³ “Meid pai me kin tehk arail anahn en esehla Koht, pwe iei arail wehin nanleng.” (Mad. 5:3, NW) “Me kin tehk arail anahn en esehla Koht” kin pohnese me re uhdahn anahne sapwellimen Koht kaweid oh pil sapwellime kalahngan.

4, 5. (a) Dahme kahrehda irail akan me kin pohnese arail anahn en esehla Koht kin nsenamwahu? (b) Ia duwen kitail en kaitarala atail anahn en esehla Koht?

⁴ Irail kan me kin tehk kanaiehng arail anahn en esehla Koht kin nsenamwahu, “pwe iei arail wehin nanleng.” En pohnese me Sises iei Mesaia kin ritingada ahl ehu ong sapwellime tohnpadahk kan mahso en kak iang ih kaunda Wehin Koht nanleng. (Luk 22:28-30) Sohte lipilipil ma kitail ahneki koapworopwor en wia iengen Krais nanleng de kasikasik mour soutuk nan paradais nin sampah pahn kaundahn Wehio, kitail kak nsenamwahu ma kitail uhdahn tehk atail anahn en esehla Koht oh pil pohnese me kitail anahne ih.

⁵ Kaidehn koaros kin pohnese arail anahn en esehla Koht, pwehki tohto sohte pwoson oh sohte kin kalahnganki soahng kan me sarawi. (2 Des. 3:1, 2; Ipru 12:16) Pwehn kaitarala atail anahn en esehla Koht, kitail en nantihong onopki Paipel, ngoangki wia doadoahk en katohnpadahk, oh kaukaule towehda mihting en Kristian kan.​—Mad. 28:19, 20; Ipru 10:23-25.

Meid “Pai” me Kin Mwahiei kan

6. Ihs irail akan “me kin mwahiei”? Ahpw dahme kahrehda re kin meid “pai”?

⁶ “Meid pai me kin mwahiei; pwe Koht pahn ketin kaloalamwahwihirailla!” (Mad. 5:4) “Me kin mwahiei” kan iei irailte me kin “tehk arail anahn en esehla Koht.” Re sohte kin mwahiei pwehki ar kin kaulimki ar pwunod kan en mour. Arail mwahiei kin kohsang arail nsensuwedkihla arail wia aramas dipan kei oh pil duwen irair en soh unsek me re mi loale. Ahpw dahme kahrehda irail me mwahiei kan kin meid “pai”? Iei pwehki re kin pwoson Koht oh Krais oh kin perenki arail nanpwungmwahu rehn Siohwa.​—Sohn 3:36.

7. Ia pahn duwen atail madamadau ong ahn Sehdan sampah?

⁷ Ia duwe, kitail kin mwahiei pwehki wiewia sapwung kan kin inenen rek nan ahn Sehdan sampah? Ia uhdahn atail madamadau ong dahme sampah wet kak kihong kitail? Wahnpoaron Sohn ntingihdi: “Pwe mepwukat koaros kisehn sampah: dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda​—mepwukat koaros sohte kohsang rehn Sahm.” (1 Sohn 2:16) Ahpw ia duwen ma kitail pehm me “irair en madamadau en sampah wet,” de manaman me kin kaunda aramas akan me sehse Koht, kin ekisekis kaluwetehla atail nanpwungmwahu rehn Siohwa? Kitail anahne en kapakap ni ngidingid, onopki sapwellimen Koht Mahsen, oh peki sawas sang elder kan. Ni atail kin karanihala Siohwa, met pahn kin ‘kansenamwahuwikitailla,’ sohte lipilipil dahme kin kahrehiong kitail en nsensuwed.​—1 Kor. 2:12, NW; Mel. 119:52; Seims 5:14, 15.

Ia Uwen Pai en “Me nan Kapehd Opampap akan”

8, 9. Ia wehwehn en nan kapehd opampap? Dahme kahrehda irail pwukat kin peren?

⁸ “Meid pai me nan kapehd opampap akan; pwe re pahn sohsohki sampah.” (Mad. 5:5, NW) “Nan kapehd opampap” de “aktikitik,” sohte wehwehki irair en luwet ehu de en mwomwehda kadek. (1 Tim. 6:11) Ma kitail kin nan kapehd opampap, kitail pahn kasalehda aktikitik ni atail pahn wia kupwuren Siohwa oh pil pwungki sapwellime kaweid. Nan kapehd opampap pahn sansalda nan atail wiewia kan ong riatail kan nan pwoson oh pil meteikan. Soangen aktikitik wet kin pahrekiong dahme wahnpoaron Pohl kin kaweidki.​—Wadek Rom 12:17-19.

⁹ “Dahme kahrehda me nan kapehd opampap akan” kin nsenamwahu? Pwehki Sises, me kin ketin opampap, mahsanih me “re pahn sohsohki sampah.” Ih me ketin limankihla sampah pwon. (Mel. 2:8; Mad. 11:29; Ipru 2:8, 9) Ahpw irail ‘iengen Krais’ me opampap kan pahn iang paiekihda sapwellime sohso wet. (Rom 8:16, 17) Ni sapwellimen Sises Wehi pahn kaunda sampah, me aktikitik teikan pahn perenki mour soutuk.​—Mel. 37:10, 11.

10. Ma ke sohte ahneki irair en opampap dahme met kak wiaiong uhk ma ke men ale pwukoa kan? Dahme e pahn pil wiaiong omw nanpwungmwahu rehn meteikan?

¹⁰ Duwehte Sises, kitail anahne en kin nan kapehd opampap. Ahpw ia duwen ma kitail wia aramas lemei men? Soangen irair en kahngohdi oh lemei kak kahrehda aramas en sohte men patehng kitail. Ma brother men kin men ahneki pwukoa nan mwomwohdiso, irair en lemei wet pahn kahrehiong ih en sohte warohng ale pwukoa kan. (1 Tim. 3:1, 3) Pohl ndaiong Taitus en katamankihong Kristian en Krihd kan re en dehr lemei ahpw en “kin meleilei oh kadek, oh ahnsou koaros re en kin kasalehda saramwahu ong aramas koaros.” (Taitus 3:1, 2) Ia uwen irair en opampap kin wia kapai ehu ong meteikan!

“Me kin Duhpekla ong me Pwung”

11-13. (a) Ia wehwehn en duhpekla ong me pwung? (b) Ia duwen irail kan me duhpekla ong me pwung kin “medla”?

¹¹ “Meid pai me kin duhpekla ong me pwung, pwe re pahn medla.” (Mad. 5:6) “Pwung” me Sises ketin mahsanih duwe kin wehwehki irair en wia dahme pwung me pahrekiong kupwuren Koht oh sapwellime kosonned kan. Sounmelkahkao nda me “mohngiongi tihwohkilahr” eh men esehla sapwellimen Koht kadeik pwung kan. (Mel. 119:20) Ia duwe, kitail kin mwomwen duhpeklahr pwehki atail kin kesempwalki en esehla dahme pwung?

¹² Sises mahsanih me irail akan me duhpekla ong me pwung pahn nsenamwahu pwehki irail pahn “medla” de arail anahn kan pahn kaitarala douluhl. Met pweidahr nan Pendekos nan pahr 33 ni ahnsou me sapwellimen Siohwa manaman tepida “kadehdehiong tohn sampah . . . duwen dahme pwung.” (Sohn 16:8) Ki sapwellime manaman, Koht ketin kamwakid ohl akan en ntingihada Pwuhk Sarawi ni lokaiahn Krihk, me mwahu ong “atail padahk duwen mour lelepek [“pwung,” NW].” (2 Tim. 3:16) Sapwellimen Koht manaman pil kin sewese kitail en ‘onehda sapahl pein kitail ong ni aramas kapw me wiawihda rasehng Koht, oh me kin kasalehda pein kitail ni mour mehlel en pwung oh sarawi.’ (Ep. 4:24) E sou kaperen en ese me irail kan me men koluhkihla diparail kan ki meirong tomw en Sises kak ahneki mour pwung mwohn silangin Koht?​—Wadek Rom 3:23, 24.

¹³ Ma atail koapworopwor iei en mour nin sampah, atail duhpekla ong me pwung pahn kaitarala mehlel ahnsou me kitail pahn perenki mour kohkohlahte pahn kaunda pwung. Ahpw ahnsou wet, kitail en koasoanehdi en mour pahrekiong sapwellimen Siohwa koasoandi kan. Sises mahsanih: “Kumwail rapahki mahs Wehin Koht oh dahme [Koht] kin ketin kupwurki.” (Mad. 6:33) Ni atail pahn wia met, kitail pahn soupisengki sapwellimen Koht doadoahk oh mohngiongitail pahn diren nsenamwahu mehlel.​—1 Kor. 15:58.

Kahrepen “me Kin Kalahngan” Kin Nsenamwahu

14, 15. Ia duwen kitail pahn kasalehda kalahngan? Ia kahrepen “me kin kalahngan” kin nsenamwahu?

¹⁴ “Meid pai me kin kalahngan ong meteikan; pwe re pahn diar kalahngan rehn Koht!” (Mad. 5:7) “Me kin kalahngan” kin poakohng meteikan. Sises ketin kamwahwihala kahpwal en me tohto pwehki e ketin poakehla irail. (Mad. 14:14) En kalahngan kin wia kasalepen en emen kin mahkohng me wiahda sapwung ong irail, duwehte en Siohwa kin ketin mahkohng me koluhlahr kan. (Eks. 34:6, 7; Mel. 103:10) Kitail kak kasalehda kalahngan ni ahl wet, oh pil sang atail lokaia kan oh wiewia kadek me kin wahdo kamwahu ong me paisuwed kan. Pil ehu ahl mwahu en kasalehda kalahngan iei en ehukihong meteikan padahk mehlel en Paipel. Sises ketin poakehla pokono oh “tapihada kawehwehiong irail soahng tohto.”​—Mark 6:34.

¹⁵ Mie kahrepen kitail en pwungki sapwellimen Sises mahsen: “Meid pai me kin kalahngan ong meteikan; pwe re pahn diar kalahngan rehn Koht!” Ma kitail kin kalahngan ong meteikan, irail pahn wia soahngohte ong kitail. Ni atail pahn kasalehda kalahngan ong meteikan, met pahn kahrehda kitail en kakete pitsang sapwellimen Siohwa kadeik. (Seims 2:13) Mahkpen dihp oh mour soutuk pahn kohwongete me kin kasalehda kalahngan.​—Mad. 6:15.

Kahrepen “me nan Kapehd Mwakelekel kan” Kin Nsenamwahu

16. Ia wehwehn en kin “nan kapehd mwakelekel”? Ia duwen irail kan me ahneki irair wet kin “udiahl Koht”?

¹⁶ “Meid pai me nan kapehd mwakelekel kan; pwe re pahn udiahl Koht!” (Mad. 5:8) Ma kitail kin “nan kapehd mwakelekel,” e pahn sansalda nan atail pepehm kan, ineng kan oh kahrepen atail wiewia kan. Kitail pahn kasalehda “limpoak me kin pwilisang ni mohngiong mwakelekel.” (1 Tim. 1:5) Ma loalatail kin mwakelekel, kitail pahn “udiahl Koht.” Met sohte wehwehki me kitail pahn kak kilang Siohwa ki mesetail, “pwe sohte aramas emen kak kilang [Koht] ahpw momour.” (Eks. 33:20) Ahpw pwehki Sises kin ketin alasang sapwellimen Koht irair kan ni unsek, e kak mahsanih: “Mehmen me kilangieier pil kilangehr Sahm.” (Sohn 14:7-9) Nin duwen sapwellimen Siohwa tohnkaudok kei pohn sampah, kitail kak “udiahl Koht” ni atail kin kilang duwen eh kin ketin sewese kitail. (Sohp 42:5) En udiahl Samarail nanleng ni arail pahn iasada nin duwen ngehn kei kin wia mehkot keieu laud nan mouren Kristian keidi kan.

17. Ia imwilahn atail kin kasalehda irair en nan kapehd mwakelekel?

¹⁷ Ma emen kin ahneki nan kapehd mwakelekel, eh wiewia oh nanpwungmwahu rehn Koht kin mwakelekel oh e sohte pahn kin medemedewe soahng kan me samin mwohn silangin Siohwa. (1 Kron. 28:9; Ais. 52:11) Dahme kitail kin nda oh wia pil kin mwakelekel, oh atail kaudokiong Siohwa pahn uhdahn mehlel.

“Me Kin Wia Doadoahk en Kamwahu” Kin Wiahla Sapwellimen Koht kei

18, 19. Ia wiewia kan en emen me kin “wia doadoahk en kamwahu nanpwungen aramas akan”?

¹⁸ “Meid pai me kin wia doadoahk en kamwahu nanpwungen aramas akan; pwe Koht pahn ketin wiahkinirailla uhdahn sapwellime!” (Mad. 5:9) “Me kin wia doadoahk en kamwahu nanpwungen aramas akan,” kin sansalda sang dahme re kin wia oh sohte wia. Ma kitail iei soangen aramas me Sises kin ketin mahsanih duwe, kitail sohte pahn kin “dupungkihong en emen eh suwed mehkot suwed.” Ahpw, kitail kin ‘nantihong wia me mwahu ong aramas teikan koaros.’​—1 Des. 5:15.

¹⁹ Pwehn iang “wia doadoahk en kamwahu nanpwungen aramas akan,” kitail anahne en kalaudehla wiewiahn popohl. Sounwia kamwahu men sohte kin “kahrehda kahpwal oh kauwehla nanpwungen aramas akan.” (Lep. Pad. 16:28) Sounwia kamwahu men anahne en “nantihong popohl ong aramas koaros.”​—Ipru 12:14.

20. Ihs irail akan ahnsouwet me “Koht ketin wiahkinirailla uhdahn sapwellime”? Ihs me pahn mwuhr wiahla seri en Koht kan?

²⁰ Irail akan me kin wia kamwahu kin nsenamwahu pwehki Koht pahn ketin “wiahkinirailla uhdahn sapwellime.” Siohwa ketin pwekada Kristian lelepek keidi kan oh “wiahkinirailla uhdahn sapwellime.” Irail ahnekiher nanpwungmwahu rehn Siohwa nin duwen sapwellime kei pwehki irail kin pwoson Krais oh kin kaudokiong “Koht en limpoak oh popohl” ki mohngiong unsek. (2 Kor. 13:11; Sohn 1:12) Ahpw ia duwen irail sapwellimen Sises ‘sihpw teikan’ me kin wia kamwahu nanpwungen aramas akan? Sises pahn wiahla arail “Sahm Poatopoat” erein sapwellime Kaundahn Pahr Kido, ahpw mwurin met, e pahn ketin uhpahiong Siohwa oh irail koaros ahpw pahn wiahla ni unsek sapwellimen Koht seri kan.​—Sohn 10:16; Ais. 9:6; Rom 8:21; 1 Kor. 15:27, 28.

21. Ia pahn atail wiewia ma kitail momourki sapwellimen Koht manaman?

²¹ Ma sapwellimen Koht manaman kin kakaun atail mour, popohl pahn wiahla kisehn atail irair mwahu kan oh pil pahn sansal ong meteikan. Kitail sohte pahn kin “aklapalap de kamwakara emen.” (Kal. 5:22-26) Ahpw, kitail kin nantihong “en ahneki popohl rehn aramas koaros.”​—Rom 12:18.

Nsenamwahu Mendahki Lokolok!

22-24. (a) Ia kahrepe kan me irail akan me kin kapwaiada kupwuren Koht kin nsenamwahu? (b) Dahme kitail pahn onopki nan iren onop riau kan en mwuhr?

²² “Meid pai me kin ale lokolok pwehki ar kapwaiada kupwur en Koht; pwe iei arail wehi, Wehin Koht!” (Mad. 5:10) Sises ketin kalaudehla met oh mahsanih: “Meid pai kumwail ma aramas akan pahn lahlahwei kumwail oh kalokei kumwail oh karaunkin kumwail soangen suwed oh likamw koaros pwehki ngehi. Kumwail nsenamwahu oh perenda, pwe ketingpamwail me laud kowahlap nanleng. Ih duwen ar kaloke soukohp ako me tiengehr mwohmwail.”​—Mad. 5:11, 12.

²³ Duwehte soukohp en Koht kan mahs, Kristian kan kin kasik me aramas akan pahn lahlahwei irail, kalokei oh karaunehki irail soangen likamw koaros “pwehki ar kin kapwaiada kupwuren Koht.” Ni atail kin dadaurete pahn kasongosong kan, kitail kin peren pwehki kitail kin kaperenda oh pil kawauwih Siohwa. (1 Pit. 2:19-21) Atail lelohng lokolok sohte kak katikala atail peren en papah Siohwa met oh pil ahnsou kohkohdo. E sohte pahn pil katikala peren en iang Krais kaunda nan sapwellime Wehi nanleng de peren en iang ale mour soutuk nin sampah nin duwen towe kan pahn kaundahn Wehi wet. Kapai pwukat kin kadehdehda sapwellimen Koht kupwuramwahu oh sapan ong aramas akan.

²⁴ Soahng tohto kitail kak sukuhlki sang Kapahrek en Pohn Dohl. Kitail pahn tehk ekei mehn kasukuhl kan nan iren onop riau kan mwuhr, oh pil kilang ia duwen kitail pahn kapwaiada sapwellimen Sises mahsen pwukat.

Ia Duwen Ke Pahn Sapeng?

• Dahme kahrehda “irail me kin tehk arail anahn en esehla Koht” kin nsenamwahu?

• Ia kahrepen me “nan kapehd opampap kan” kin nsenamwahu?

• Dahme kahrehda ekei kin nsenamwahu mendahki re kin lelohng lokolok?

• Mehnia nsenamwahu me Sises mahsanih me ke perenki?

[Kawehwehpen kilel kan nan ehu ehu pali 11]

Nsenamwahu duwau kan me Sises kasalehda ahnsowo kin pil wia kamwahu rahnwet

[Kawehwehpen kilel kan nan ehu ehu pali 12]

Ehu ahl en kasalehda kalahngan iei en ehukihong meteikan padahk mehlel en Paipel