Ia Pahn Duwen Atail Wiewia ong Meteikan?

“Duwen me ke men aramas en wiahiong uhk, ih duwen me ke pahn wiahiong irail.”—LUK 6:31.

1, 2. (a) Dahme kin pidada Kapahrek en Pohn Dohl? (b) Dahme kitail pahn koasoiapene nan artikel wet oh pil artikel en mwuhr?

SISES KRAIS iei uhdahn Sounpadahk me keieu Lapalap. Ahnsou me kaunen palien lamalam akan me kin imwintihti ong ih kadarala pilismen kei pwehn koledi ih, pilismen pwukat sohte koledi ih ahpw re uhd pwurala rehrail oh nda: “Sohte mehmen me kin padahk duwehte ohlo.” (Sohn 7:32, 45, 46) Ehu kapahrek me Sises ketin wia me inenen siksang mehlel ekei eh padahk teikan iei sapwellime Kapahrek en Pohn Dohl. Kapahrek wet kin kileldi nan irelaud 5 lel 7 en Rongamwahu en Madiu, oh ekei iren mahsen me duwehte met pil kileldi nan Luk 6:20-49.a

² Ele lepin mahsen kan me pali laud en aramas kin esehla sang nan sapwellimen Sises kapahrek wet iei mahsen en kaweid me pil wiahlahr kosonned ehu ong aramas tohto. E kin pidada atail wiewia ong meteikan. Sises mahsanih: “Duwen me ke men aramas en wiahiong uhk, ih duwen me ke pahn wiahiong irail.” (Luk 6:31) Ei, Sises ketin wiahiong soahng mwahu tohto ong aramas akan. E ketin kamwahwihala me soumwahu kan oh pil kaiasada me melahr akan. Ahpw mehlel, ahnsou me aramas akan kin keieu alehdi kapai laud iei ahnsou me irail kin rong oh kamehlele duwen rongamwahu me e kin ketin padapadahngki. (Wadek Luk 7:20-22.) Nin duwen Sounkadehdehn Siohwa kan, kitail kin pil perenki iang wia soangen doadoahk wet en kalohki duwen Wehio. (Mad. 24:14; 28:19, 20) Nan artikel wet oh pil artikel en mwuhr, kitail pahn tehkpene duwen mahsen en Sises me pid duwen doadoahk wet oh pil duwen ire kesempwal teikan me pwarada nan Kapahrek en Pohn Dohl me pid ia pahn duwen atail wiewia ong meteikan.

En Nan Kapehd Opampap

3. Dahkot nan kapehd opampap?

³ Sises mahsanih: “Meid pai me nan kapehd opampap akan; pwe re pahn sohsohki sampah.” (Mad. 5:5, New World Translation) Lepin lokaia nan kapehd opampap me kileldi nan Paipel sohte kin wia irair en luwet ehu. Kitail kin kasalehda irair en opampap ni atail kin wia kupwuren Koht. Irair wet kin sansalda nan atail wiewia ong aramas teikan. Karasepe ehu, kitail sohte kin “dupungkihong me suwed” ong me suwed.—Rom 12:17-19.

4. Dahme kahrehda me nan kapehd opampap akan kin peren?

⁴ Irail me nan kapehd opampap akan kin peren pwehki “re pahn ale dahme Koht ketin inoukihong irail!” Sises “me opampap oh nan kapehd karakarahk,” iei ih me “Koht ketin pilada pwe en sapwellimankihla mehkoaros” kahrehda ih me “pahn limankihla sampah pwon.” (Mad. 11:29; Ipru 1:2; Mel. 2:8) E kokohpdahr me Mesaia “me likamwete aramas” pahn kaunda Wehio nanleng oh pahn mie ienge kan me pahn iang ih kakaun. (Dan. 7:13, 14, 21, 22, 27) Irail meh 144,000 keidi pwukat me kin nan kapehd opampap pahn “iang Krais,” limankihla sampah pwon. (Rom 8:16, 17; Kaud. 14:1) Pahn kaunda en Wehio, meteikan me pil kin nan kapehd opampap pahn paiekihda mour soutuk nin sampah.—Mel. 37:11.

5. Ni atail kin ahneki irair en opampap me Sises ketin kasalehda, iaduwen met kin kamwakid atail wiewia kan?

⁵ Ma kitail kin lemei, kitail kakete kahrehiong meteikan en mwakarada pahtail oh sohla men patehng kitail de sohla men pohnese kitail. Ahpw, ma kitail kin kapwarehda soangen opampap me Sises kin ketin kasalehda, kitail pahn wiahla soangen aramas me meteikan pahn perenki ieiang oh me pil kin kakehle tohn mwomwohdiso. Opampap iei ehu sapwellimen Koht wahn ngehn me kin kekeirda loalatail ma kitail mweidohng ‘ngehno en ketin kakaun mouratail.’ (Wadek Kalesia 5:22-25.) Ei kitail kin uhdahn men warohng iang mih nanpwungen irail kan me nan kapehd opampap me Siohwa kin ketin kaweidih ki sapwellime ngehn sarawi!

Ia Uwen Pai en Irail kan me Kin Kalahngan!

6. Soangen irair kaselel dah kan me irail “me kin kalahngan” ahneki?

⁶ Nan sapwellime Kapahrek en Pohn Dohl, Sises pil mahsanih: “Meid pai me kin kalahngan ong meteikan; pwe re pahn diar kalahngan rehn Koht!” (Mad. 5:7) “Me kin kalahngan” kin ahneki kadek oh pil kin kasalehda nsenohki, de poakehla irail me paisuwed kan. Sises ketin doadoahngki manaman pwehn kamaiauda aramas akan sang lokolok pwehki e kin ‘ketin kupwureirailla.’ (Mad. 20:34) Atail kin poakehla oh pil nsenohki meteikan anahne en kin kamwakid kitail en kasalehda kalahngan.—Seims 2:13.

7. Dahme pepehm en poakehla kin kamwakid Sises en ketin wia?

⁷ Ni en Sises ketiket kohla pwehn kommoaldi, e ketin mahsanihada pokon ehu, “e ahpw kupwurohkinirailla. Ih eri ketin tapihada kawehwehiong irail soahng tohto.” (Mark 6:34) Ia uwen kaperen en atail kin iangete ehukihong meteikan duwen padahk en Wehio oh padahkihong irail duwen sapwellimen Koht kupwurkalahngan, duwehte me Sises kin ketin wia.

8. Dahme kahrehda me kin kasalehda kalahngan kin peren?

⁸ Me kin kasalehda kalahngan kin uhdahn peren pwehki “re pahn diar kalahngan.” Ni ahnsou me kitail kin kasalehda kalahngan ong aramas akan, irail pil kin kasalehda kalahngan ni soahngohte. (Luk 6:38) Patehng met, Sises pil mahsanih: “Pwe ma kumwail pahn mahkikihong meteikan sapwung kan me re wiahiong kumwail, nahn Samamwail me ketiket nanleng pahn pil ketin mahkikihong kumwail dipamwail kan.” (Mad. 6:14) Irail kante me kin kalahngan kin wehwehki duwen peren me kin kohsang arail kin ale mahkpen diparail oh kin pwungla rehn Koht.

Dahme Kahrehda “Me Kin Wia Doadoahk en Kamwahu Nanpwungen Aramas” Kin Peren

9. Ia mwomwen atail wiewia ma kitail wia emen me kin kahrehda popohl nanpwungen aramas akan?

⁹ Pwehn kihda pil ehu kahrepen peren, Sises mahsanih: “Meid pai me kin wia doadoahk en kamwahu nanpwungen aramas akan; pwe Koht pahn ketin ‘wiahkinirailla uhdahn sapwellime!’” (Mad. 5:9) Ma kitail kin wia emen me kin kahrehda popohl nanpwungen aramas akan, eri kitail sohte pahn men iang pidada soangen wiewia kan, duwehte karaun likamw, me kak “kauwehla nanpwungen aramas akan.” (Lep. Pad. 16:28) Sang ni atail lokaia oh wiewia, kitail en nantihong rapahki popohl rehn aramas koaros nan mwomwohdiso en Kristian oh pil likin mwomwohdiso. (Ipru 12:14) Ahpw ni mehlel kitail pahn wia uwen atail kak pwehn rapahki popohl rehn Siohwa Koht.—Wadek 1 Piter 3:10-12.

10. Dahme kahrehda “me kin wia kamwahu nanpwungen aramas akan” kin peren?

¹⁰ Sises mahsanih me “me kin wia doadoahk en kamwahu nanpwungen aramas akan” kin peren, “pwehki Koht pahn ketin wiahkinirailla uhdahn sapwellime!” Pwehki irail kin pwoson Sises me iei ih Mesaia, Kristian keidi kan aleier “pwung en wiahla sapwellimen Koht.” (Sohn 1:12; 1 Pit. 2:24) Ahpw iaduwen irail sapwellimen Sises ‘sihpw teikan’ me pil kin wia kamwahu nanpwungen aramas akan? Sises pahn ketin wiahla arail “Sahm Poatopoat,” erein Kaundahn Pahr Kido me ih oh sapwellime me keidi kan pahn kaunda. (Sohn 10:14, 16; Ais. 9:6; Kaud. 20:6) Ni Imwin Kaundahn Pahr Kid wet, irail me kin wia kamwahu nanpwungen aramas akan pahn ni unsek wiahla sapwellimen Koht seri kan.—1 Kor. 15:27, 28.

11. Ia pahn duwen atail wiewia ong meteikan ma kitail kin weweidki “erpit me kin sang powe”?

¹¹ Pwehn ahneki nanpwung mwahu rehn Siohwa, “Koht me kin ketikihong kitail popohl,” kitail anahne en alasang sapwellime irair kaselel kan, me duwehte meleilei. (Pil. 4:9) Ma kitail kin mweidohng pein kitail en kin weweidki “erpit me kin sang powe,” atail wiewia ong meteikan pahn kin wiawi ni elen meleilei. (Seims 3:17) Ei, kitail pahn wia aramas peren kei me kin wia kamwahu nanpwungen aramas akan.

“Amwail Marain en Sansal”

12. (a) Dahme Sises ketin mahsanih duwen marain me pid duwen Koht? (b) Iaduwen atail marain kak sansalda?

¹² Kitail kin men wia uwen atail kak en mwahu ong meteikan ni ahnsou me kitail sewese irail en alehda marain en padahk mehlel sang Koht. (Mel. 43:3) Sises ketin mahsanih ong sapwellime tohnpadahk kan me irail iei “kamarainpen sampah” oh ketin kangoange irail en kasalehda arail marain pwe aramas akan en kak kilang arail “wiewia mwahu” kan ong meteikan. Met pahn imwikihla padahk mehlel wet me pid duwen Koht en sansal “mwohn aramas akan,” de en wia kamwahu ong aramas koaros. (Wadek Madiu 5:14-16.) Rahnwet, atail marain kin sansalda ni atail kin kasalehda kadek ong mehn mpatail kan oh pil sang ni atail kin iang wia doadoahk en kalohki rongamwahu wet “nin sampah,” de, “nan wehi koaros.” (Mad. 26:13; Mark 13:10) Ia uwen atail kin perenki pwais kaselel wet!

13. Dahme meteikan kin kilangada duwen kitail?

¹³ Sises mahsanih: “Kahnimw ehu me mi pohn dohl ehu sohte kak rirla.” E kin mengei en kilangada kahnimw ehu ma e mihmi pohn dohl ehu. Eri ni atail kin wia sounkalohki Wehio kan, meteikan kin kilangada duwen atail wiewia mwahu kan oh pil atail irair kan duwehte en ese powehdi atail ineng kan, oh pil atail tiahk mwakelekel.—Taitus 2:1-14.

14. (a) Iaduwen lamp akan en mwehin Sises kin kadoadoahk? (b) Ia wehwehn en dehr ekihla marain en mahsen en Koht pahn “kohpwa”?

¹⁴ Sises ketin mahsanih me aramas sohte kin isikada lamp oh kihdiong pahn kohpwa, ahpw irail kin kihda pohn dewe pwe en kamarainihada koaros me mi nan ihmwo. Lamp akan me aramas en mwehin Sises kin doadoahngki kin mi nan sah ehu me wiawihda sang pwehl oh kin mie wihk me kin mihkada leho (lehn olip) sang loale pwehn kahrehiong mpwul en lampo en kin wie lullul. Ni eh kin kohdi ong nan dewe, mehnda ma dewe kin wiawihda sang lepin tuhke de mete, lamp wet pahn “kamarainihada koaros me mi nan ihmwo.” Aramas akan sohte kin isikada lamp oh kihdiong pahn “kohpwa.” Sises sohte ketin kupwurki sapwellime tohnpadahk kan en ekihla arail marain. Eri kitail anahne en kasalehda atail marain, dehr mweidohng uhwong de kalokolok en kahrehiong kitail en ekihla mahsen mehlel kan en Paipel de kolokolete marain en mahsen pwukat ong pein kitail.

15. Iaduwen atail “wiewia mwahu kan” kin kamwakid aramas teikan?

¹⁵ Mwurinte en Sises ketin mahsanih duwen marain en lamp wet, e ahpw mahsanihong sapwellime tohnpadahk kan: “Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” Pwehki atail “wiewia mwahu kan,” met kahrehiong ekei en kin “kapikapingahki” Koht oh pil iang wiahla sapwellime ladu kan. Met kihong kitail kahrepe mwahu en doulahte wie ‘lingalingki marain nanpwungatail’!—Pil. 2:15.

16. En wia soun “kamarainpen sampah,” dahme kitail anahne wia?

¹⁶ Pwe kitail en wia “kamarainpen sampah,” kitail anahne en iang pidada laud doadoahk en kalohki Wehio oh katohnpadahk. Ahpw mie pil ehu me kitail anahne en wia. Wahnpoaron Pohl ntingihdi: “Kumwail en kin mourki mouren aramas marain. Pwe iei wahn marain mepwukat: soangen mwahu koaros, soangen pwung koaros, oh soangen mehlel koaros.” (Ep. 5:8, 9) Kitail anahne en wia mehn kahlemeng mwahu oh ahnsou koaros mwekid ni ahl ehu me pahn pahrekiong sapwellimen Koht koasoandi kan. Ni mehlel, kitail anahne en kapwaiada kaweid en wahnpoaron Piter: “Amwail tiahk kan nanpwungen me rotorot akan en kin mwahu, pwe ni ar pahn kin kinehiong kumwail likamw, me dene aramas suwed kei kumwail, eri, ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.” (1 Pit. 2:12) Ahpw dahme kitail pahn wia ma nanpwung suwed pahn pwarada nanpwungen kitail oh pil emen iengetail nan pwoson?

“Kohwei oh Kapwungala Nanpwungamwa”

17-19. (a) Mehnia “meirong” me kileldi nan Madiu 5:23, 24? (b) Ia uwen kesempwal en kamwahwihala nanpwungen kowe oh riomw men, oh iaduwen Sises kin ketin kasalehda met?

¹⁷ Nan sapwellime Kapahrek en Pohn Dohl, Sises ketin panawih sapwellime tohnpadahk kan irail en dehr kin lingeringer pahn riarail akan. Ahpw, irail en kin mwadang en kapwungala mahs nanpwungarail. (Wadek Madiu 5:21-25.) Kitail en tehk mwahu wasaht duwen sapwellimen Sises kaweid. Ma ke pahn wiahiong Koht omw meirong pohn pei sarawi ehu, ke ahpw tamanda me riomw men nsensuwed pahmw, dahme ke pahn wia? Ke pahn pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa. Mwuri, ke ahpw pwurodo wia omw meirong.

¹⁸ Emen kak en wia “meirong” wet nan sapwellimen Siohwa tehnpas sarawio. En meirongki mahn kin inenen kesempwal, pwehki met wia kehkehlik ehu sang Koht ong mehn Israel kan ong duwen koasoandi en kaudok pahn Kosonned en Moses. Ahpw ma ke tamanda me riomw men nsensuwed pahmw, en kapwungala irairo kin uhdahn kesempwal sang en wiahda meirongo. Sises mahsanih: “Pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht.” E uhdahn kesempwal en kapwungala nanpwungen kowe oh riomw men mwohn ahmw pahn wia omw meirong mwohn Koht nin duwen me koasoandier nan Kosonnedo.

¹⁹ Sises sohte ketin mahsanih me ekeite soangen meirong de soangen dihp me met kin dokedoke. Kahrehda, soangen meirong koaros anahne en pwilikihdi mahs oh awih ma emen pahn tamanda me emen rie kin nsensuwed pah. Ma mahn emen me e pahn doadoahngki ong meirongo, e anahne en pwilikihdi “mwohn pei sarawio,” wasahn meirong isihs nan kehl en tehnpas sarawio me samworo kan kin mihmi ie. Mwurin e kamwahwihala kahpwalo, me pahn wia meirongo eri pahn pwurala oh wia eh meirong ong Koht.

20. Ma kitail lingeringer pahn riatail men, dahme kahrehda kitail en mwadang kapwungala mahs nanpwungatail?

²⁰ Mwohn silangin Koht, atail nanpwungmwahu rehn riatail akan kin wia mehkot me inenen kesempwal nan kaudok mehlel. Meirong en mahn akan kin sohla katepe ong Siohwa ma irail kan me wia meirongo sohte kin kanaiehng arail wiewia ong kisehrail kan. (Maika 6:6-8) Kahrehda, Sises ketin kangoange sapwellime tohnpadahk kan en kin mwadang ‘kapwungala mahs nanpwungara.’ (Mad. 5:25) Pil ni soangen madamadauohte, Pohl ntingihdi: “Ma kumwail pil lingeringer, kumwail dehr mweidohng amwail lingeringer en kahrehiong kumwail nan dihp; pil dehr kolokol amwail lingeringer rahn ehu pwon. Kumwail dehr kihong Tepil eh ahnsou mwahu.” (Ep. 4:26, 27) Ma kitail kin lingeringerda ni kahrepe pwung ehu, kitail anahne en mwekid karuwaru oh kapwungala kahpwalo pwe kitail en dehr lingeringerki rahn ehu pwon pwe met kakete mweidohng Tepilo eh ahnsou mwahu en isaneki kasonge kitail en wiahda dihp.—Luk 17:3, 4.

Ahnsou Koaros Ken Wauneki Meteikan

21, 22. (a) Iaduwen kitail kak doadoahngki sapwellimen Sises kaweid me kitail ahpwtehn koasoiapene? (b) Dahme kitail pahn tehkpene nan artikel en mwuhr?

²¹ Atail kousapahliehr ekei iren mahsen kan me Sises ketin mahsanih nan sapwellime Kapahrek en Pohn Dohl anahne en sewese kitail en kasalehda kadek oh wahu nan atail wiewia kan ong meteikan. Mendahki kitail koaros sohte unsek, ahpw kitail kak doadoahngki sapwellimen Sises kaweid pwukat pwehki e sohte kin ketin kasik laudsang dahme kitail kakohng, ih pil duwen Semeo nanleng. Ki kapakap, ngoang mehlel, oh pil kapai kan de sawas akan sang Siohwa Koht, kitail kak en ahneki nan kapehd opampap, kalahngan, oh popohl. Kitail kak kapwarehda marain en padahk mehlel pwehn kamarainih sapwellimen Siohwa lingan. Patehng met, kitail kak kahrehda meleilei nanpwungen kitail oh riatail akan ni ahnsou me anahn.

²² Kaudok me pwung mwohn silangin Siohwa iei en kin wia mwahu ong mehn mpatail kan. (Mark 12:31) Nan artikel en mwuhr, kitail pahn tehkpene ekei iren mahsen kan sang sapwellimen Sises Kapahrek en Pohn Dohl me pahn sewese kitail en sohte uhdihsang atail en wiewia mwahu ong meteikan. Ahpw mwurin atail doudouloale ire kan sang sapwellimen Sises kapahrek kaselel wet, kitail ele kak pein idek rehtail, ‘Ia uwen mwahu en ei wiewia kan ong meteikan?’

[Nting tikitik me mi pah]

Iaduwen Ke Pahn Sapeng?

• Ia wehwehn en kin nan kapehd opampap?

• Dahme kahrehda me “kin kalahngan” kin peren?

• Iaduwen kitail kak en kahrehiong atail marain en sansalda?

• Dahme kahrehda kitail en kin mwadang ‘kapwungala mahs nanpwungen kitail oh riatail kan’?

[Kawehwehpen kilel kan nan ehu ehu pali 8]

En kalohki rongamwahu en Wehio iei ehu ahl kesempwal me atail marain en kak sansalda

[Kawehwehpen kilel kan nan ehu ehu pali 10]

En wia uwen ahmw kak pwehn kapwungala nanpwungen kowe oh riomw brother men