Sapwellimen Siohwa Ladu Peren Kan
“Meid pai irail me kin nsenohki arail anahn en pali ngehn.”—MADIU 5:3, NW.
1. Ia wehwehn peren mehlel, oh peren wet kin kasansalehda dah?
PEREN iei irair ieu me sapwellimen Siohwa aramas akan kin kesempwaliki. Sounmelkahka Depit, ni peren, mahsanih: “Meid pai aramas akan me arail Koht iei Siohwa!” (Melkahka 144:15, NW) Peren wehwehki pepehm en nsenamwahu. Peren mehlel—me kin kohsang loalatail—oh e kin kohsang atail wehwehki me Siohwa kin ketin kapaiada kitail. (Lepin Padahk 10:22) Soangen peren wet kin kasansalehda me kitail kin karanih Samatail nanleng oh kitail kin wehwehki me kitail kin kapwaiada kupwuren Koht. (Melkahka 112:1; 119:1, 2) Sises kawehwehda kahrepe duau kitail kin peren. Atail kin kasawihada kahrepe pwukat nan artikel wet oh pil nan artikel en mwurin met pahn sewese kitail en wehwehki ia uwen laud atail pahn kak ahneki peren wet, ma kitail pahn ni lelepek papah “Koht peren men” iei Siohwa.—1 Timoty 1:11.
Wehwehki Duwen Atail Anahn en Pali Ngehn
2. Ni ahnsou dah me Sises mahsanih duwen irairen peren, oh dahme e tepkihda mahsanih?
2 Nan pahr 31 C.E., Sises wiahda padahk ieu me keieu ndand nan poadoapoad en aramas. Sapwellime padahk kin adaneki Kapahrek en Pohn Dohlo, pwe Sises pohn nahna ieu me mih limwahn Sehd en Kalili. Rongamwahu en Madiu kasalehda: “Ni Sises eh mahsanihada pokono, e ahpw ketidahla pohn dohl ehu oh ketidiong powe; a sapwellime tohnpadahk ko ahpw keiong mpe. Ih eri tapihada padahki irail, mahsanih: ‘Meid pai irail me kin nsenohki arail anahn en pali ngehn, pwe iei arail wehi, Wehin Koht.’ ” Uhdahn wehwehn mahsen en Sises pwukat ni lokaiahn Krihk: “Meid pai irail me semwehmwe kan ni ngehno,” de “Meid pai irail akan me kin wia pekipek en ale ngehn sarawi.” (Madiu 5:1-3; Kingdom Interlinear; footnote) Today’s English Version mahsanih: “Meid pai irail me kin wehwehki me re semwehmwe ni pali ngehn.”
3. Iaduwen lamalam en aktikitik kin kahrehong kitail en ahneki peren?
3 Nan eh padahk pohn dohlo, Sises kawehwehda me aramas emen pahn ahneki peren laud ma e pahn nsenohki duwen pein ah anahn akan en pali ngehn. Kristian aktikitik kan, kin wehwehkihla duwen ahr kin mih nan dihp, oh irail kin peki rehn Siohwa en mahk ong irail pwehki sapwellimen Krais meirong en tomw. (1 Sohn 1:9) Eri, irail kin nsenamwahu oh ahneki peren mehlel. “Meid pai aramas me kin ale lapwepen dipe kan, me Koht kin ketin mahkikihong eh sapwung.”—Melkahka 32:1; 119:165.
4. (a) Ni ahl dah kei kitail kak kasalehda atail kin nsenohki atail anahn en pali ngehn oh pil nsenohki meteikan? (b) Dahme pahn kak kalaudehla atail peren ni ahnsou me kitail kin nsenohki atail anahn en pali ngehn?
4 Ma kitail kin nsenohki atail kehl ni pali ngehn, met pahn kamwekid kitail en wadek Pwuhk Sarawi rahn koaros pwehn kak kang mwengehn ngehn “ni ahnsou me konehng” me kohsang pwihn “en lelepek oh loalokong,” oh en kaukaule iang towehda mihding en Kristian kan. (Madiu 24:45; Melkahka 1:1, 2; 119:111; Ipru 10:25) Limpoak ong mehn mpatail pahn sewese kitail en nsenohki meteikan ahr anahn en pali ngehn oh pil pahn kamwekid kitail en ngoangki iang doadoahk en kalohkseli duwen Rongamwahu en Wehio. (Mark 13:10; Rom 1:14-16) Ehukihong mehteikan duwen padahk mehlel en Pwuhk Sarawi pahn wahdohng kitail peren. (Wiewia 20:20, 35) Atail peren kin wia lalaudla ni ahnsou me kitail pahn doudouloale duwen atail koapworopwor kaselel ieu me pid Wehio oh kapai kan me Wehio pahn wahdohng kitail koaros. Ong “pwihn tikitik” en Kristian me keidi kan, arail koapworopwor en Wehio kin wehwehki me irail pahn alehdi mour soutuk nanleng oh wiahla kisehn koperment en Wehin Koht me Krais pahn kaunda. (Luk 12:32; 1 Korint 15:50, 54) Ong “sihpw teikan,” arail koapworopwor iei en alehdi mour soutuk nan paradais nin sampah pahnangin Wehio.—Sohn 10:16; Melkahka 37:11; Madiu 25:34, 46.
Iaduwen Irail me kin Mwahiei Kak Ahneki Peren
5. (a) Ia wehwehn mahsan pwukat “irail akan me kin mwahiei”? (b) Iaduwen aramas me kin mwahiei alehdi kamweit?
5 Lepin lokaia kan en “meid pai” me Sises kasalehda mwurin met kin mwomwen uhpene. E mahsanih: “Meid pai irail me kin mwahiei; pwe irail pahn alehdi kamweit.” (Madiu 5:4, NW) Iaduwen aramas kak mwahiei ahpw ni ahnsowohte ahneki peren? Pwehn wehwehki duwen sapwellimen Sises mahsen pwukat, kitail anahne tehk duwen soangen mwahiei dah me e kin mahsanih duwen. Tohnpadahk Seims kin kawehwehda me irairen dihp me kitail kin mihla pah anahne kahrehong kitail en mwahiei. E ntingihdi: “Kumwail me dipan akan, kumwail kamwakelehda pehmwail kan. Kumwail me mwalaun kan, kumwail kaminehla loalamwail kan. Kumwail nsensuwedla, sengiseng oh makimakiaki; kumwail kawekiong amwail kouruhr ni mwahiei, oh amwail peren ni nsensuwed. Kumwail aktikitikla mwohn silangin Koht, e ahpw pahn ketin kasapwilkumwailda.” (Seims 4:8-10) Irail akan me kin mwahiei ni mehlel pwehki ahr kin wia aramas dipan akan kin ale kamweit ni ahnsou me re kin sukuhliki me irail kak ale mahkpen diparail kan ma irail pahn pwoson meirong tomw en Krais oh koluhla mehlel ni ahr kin wia kupwuren Siohwa. (Sohn 3:16; 2 Korint 7:9, 10) Irail kak ahneki nanpwungmwahu rehn Siohwa oh ahneki koapworopwor en pahpa oh kapinga ih ni ahnsou kohkohlahte. Met kin wahdohng irail peren mehlel.—Rom 4:7, 8.
6. Ia kahrepe ekei aramas kin mwahiei, oh iaduwen irail kin alehki kamweit?
6 Mahsen en Sises kin pil oarapene irail akan me kin mwahieiki irair suwed akan me kin wiawi nin sampah wet. Sises kin doadoahngki kokohp en Aiseia 61:1, 2 ong pein ih, oh e mahsanih: “Ngenen Siohwa ketier rehi, pwe e ketin keieiedier pwe I en lohkiong me opampap kan rongamwahu. I en kansenamwahuwihala me nan kapehd toutoulahr kan, . . . pwe I en koaloalamwahuwihala koaros me kin pahtou kan.” Kehkehlik wet kin pil kohwong irail Kristian mekeidi kan me kin mih nin sampah ni ahnsouwet, me kin wiahda doadoahk wet oh iengarail “sihpw teikan” pil kin sewese irail nan doadoahk wet.” Irail koaros kin iang wia doadoahk en kihdiong kilel ehu “ni temwen aramas koaros me pahtoulahr oh milahr nan apwal pwehki soahng saut akan me wiewiawi nan kahnimwet [Serusalem me lahlahwe padahk mehlelo, kin karasaiong Kristendom].” (Esekiel 9:4) Aramas pahtoulahr kan kin ale kamweit sang “Rongamwahu en wehio.” (Madiu 24:14) Irail kin perenki sukuhliki me ahn Sehdan koasondi suwed wet pahn sohlahr mie, ahpw sapwellimen Siohwa sampah kapw oh pwung pahn uhd wiliandi.
Meid Pai me nan Kapehd Opampap akan
7. Lepin lokaia wet “opampap” sohte kin wehwehki dah?
7 Sises pousehla wia sapwellime Kapahrek en Pohn Dohlo: “Meid pai me nan kapehd opampap, pwe irail pahn sohsohki sampah.” (Madiu 5:5, NW) Ekei ahnsou, aramas akan kin lemeleme me irairen nan kapehd opampap kin wehwehki me emen kin luwet de masapwehk. Ahpw met sohte pwung. Emen me samanih Pwuhk Sarawi kawehwehda duwen wehwehn lepin lokaia wet “opampap akan” oh koasoia: “Aramas emen me kin nan kapehd opampap kin kasalehda irair ehu me kin keieu sansal nan eh mour iei me e kin kak powehdi ah ineng kan. Met sohte kin wehwehki me e kin nohn kadek oh kohwei kohdo sohte kak wiahda ah pilipil kan. Ahpw e kin kasalehda me e kin ahneki kehl ieu me kin mih pahn ah manaman ahnsou koaros.” Sises mahsanih duwen pein ih: “Pwe I me opampap oh nan kapehd karakarahk.” (Madiu 11:29) Ahpw, Sises kin ni eimah utungada mouren kaweid pwung kan.—Madiu 21:12, 13; 23:13-33.
8. Irairen opampap kin duwehte mehnia irair, oh dahme kahrehda kitail anahne irair wet ni atail kin mih rehn aramas teikan?
8 Irairen nan kapehd opampap, kin duwehte irairen powehdi ahmw ineng kan. Pwe, wahnpoaron Pohl ntingihdi irairen opampap oh irair en powehdi ahmw ineng kan me irair pwukat kin wia kisehn “wahn ngehn akan.” (Kalesia 5:22, 23) Kitail kak kalaudehla atail irairen opampap ma kitail pahn alehdi sawas sang ngehn sarawi. Met iei irairen Kristian ieu me kin imwikihla popohl rehn aramas soh-pwoson akan oh popohl rehn irail tohnmwomwohdiso kan. Pohl ntingihdi: “Kumwail en limpoak ong me mi nan apwal akan, kadek, karakarahk, opampap oh kanengamah. Kumwail uhdahn pahn mahkpene nanpwungamwail.”—Kolose 3:12, 13.
9. (a) Dahme kahrehda atail kin kasalehda opampap sohte kin ihte pid kitail oh aramas teikan? (b) Iaduwen irail me opampap kan “sohsohki sampah”?
9 Irairen nan kapehd opampap sohte kin ihte pid kitail oh aramas teikan. Pwe sang ni atail kin perenki uhpaiong sapwellimen Siohwa kaunda, kitail kin kasalehda me kitail wia aramas opampap. Karasepe me keieu mwahu iei Sises Krais, pwe ni ahnsou me e kin ketiket nin sampah e kin kasansalehda opampap oh e kin ni unsek uhpaiong kupwuren Seme. (Sohn 5:19, 30) Sises kin keieu warohng en sohsohki sampah, pwe ih me idihda en wiahla Kaun. (Melkahka 2:6-8; Daniel 7:13, 14) E kin pil kihong pwihn en 144,000 “me pahn iang Krais paieki dahme Koht ketin nekinekidohng irail” oh irail pilipilda sang rehn “aramas akan” pwen “kakaun nin sampah nin duwen nanmwarki kan.” (Rom 8:17; Kaudiahl 5:9, 10; 14:1, 3, 4; Daniel 7:27) Krais oh ienge kaun akan pahn kaunda aramas rar kei me kin rasehng sihpw kan, ohl oh lih akan me kokohp en melkahka pahn pweida rehrail: “A me aktikitik kan pahn sapwenikihla sahpwo oh re pahn paiamwahu oh popohl.”—Melkahka 37:11; Madiu 25:33, 34, 46.
Meid Pai Irail akan me kin Ngoangki Dahme Pwung
10. Ia ehu ahl me irail akan me kin ‘ngoangki dahme pwung’ pahn nsenamwahula?
10 Pil ehu “meid pai” me Sises kileledi ni ahnsou me e mahsanih ong aramas pohn dohl ieu nan Kalili: “Meid pai irail me kin ngoangki dahme pwung, pwe Koht pahn ketin kaitarirailla.” (Madiu 5:6) Ong Kristian akan, Siohwa kin ketin wiahda koasoandi ong dahme pwung. Ihme kahrehda, irail kan me kin men kilang dahme pwung en pweida kin pil men alehda sapwellimen Koht kaweid kan. Aramas pwukat kin wehwehki duwen diparail kan oh soh unsek kan oh irail kin kasikasik en pwungla rehn Siohwa. Irail kin inenen peren ni ahnsou me re sukuhliki sang Mahsen en Koht me ma re pahn koluhla oh rapahki mahkpen diparail kan me kin poahsonda pohn meirong tomw en Krais, irail pahn pwungla rehn Koht!—Wiewia 2:38; 10:43; 13:38, 39; Rom 5:19.
11, 12. (a) Iaduwen pwihn en Kristian me keidi kan pahn kak pwunglahr? (b) Iaduwen iengen pwihn en me keidi kan pahn kilang arail kin men kilang pwung en pweida?
11 Sises mahsanih me soangen aramas pwukat pahn peren, pwe re pahn “nsenamwahula.” (Madiu 5:6, Kingdom Interlinear) Kristian me keidi kan me kin alehda luhk en iang Krais wiahla “nanmwarki kan oh kakaun” sang nanleng oh irail “pwunglahr en alehda mour.” (Rom 5:1, 9, 16-18) Siohwa kin sapwellimanikinirailla nin duwen sapwellime seri kan en pali ngehn. Irail kin wiahla iengen Krais nin duwen nanmwarki kan oh samworo kan nan sapwellime Wehin nanleng.—Sohn 3:3; 1 Piter 2:9.
12 Iengen pwihn en me keidi kan saikinte pwungla en alehda mour. Ahpw, Siohwa kin mweidong irail en ekis pwungla pwehki ahr kin pwoson ntahn Krais. (Seims 2:22-25; Kaudiahl 7:9, 10) Irail kin pwungla nin duwen kompoakepah kan en Siohwa me pahn pitsang “kahn kamakam kowahlap.” (Kaudiahl 7:14) Koht pahn kaitarirailla arail kin men kilang pwung en pweida ni ahnsou me irail pahn mih pahn kaundahn “lahng kapw,” oh re pahn iang kisehn sampah kapw “wasa me pwungen kalahngan en Koht pahn poadada ie poatopoat.”—2 Piter 3:13; Melkahka 37:29.
Meid Pai Irail me kin Mahk ong Meteikan
13, 14. Ni ahl dah kei kitail kak kasalehda kadek oh mahk ong meteikan, oh iaduwen pein kitail pahn paiekihda kasalehda irair pwukat?
13 Sises pousehla ah Kapadahk en Pohn Dohlo oh mahsanih: “Meid pai irail me kin mahk ong meteikan; pwe re pahn diar kalahngan oh mahk sang rehn Koht.” (Madiu 5:7, NW) Ni palien kosonned, mahk kin wehwehki me emen sounkopwung pahn katikitikihala kalokolok me pahn kohwong aramas men me kauwehla kosonned ehu. Ahpw nan Pwuhk Sarawi, lepin lokaia wet “mahk” kin pali laud en ahnsou wehwehki wiewia kadek oh limpoak me pahn kansenamwahuwihala aramas akan me kin lelohng kahpwal de semwehmwe. Eri, irail akan me kin mahkong meteikan kin ahnsou koaros kasalehda kadek ong meteikan. Nan sapwellimen Sises karasaras en mehn Samaria kin kihda mehn kasukuhl mwahu ieu me pid aramas emen me kin “kasalehda kadek” ong emen me anahne sawas.—Luk 10:29-37.
14 Ma kitail men ahneki soangen peren me kin kohsang atail kasalehda kadek ong meteikan, kitail anahne en sewese meteikan me kin anahne sawas. (Kalesia 6:10) Sises kin poakpoake aramas akan. “E ahpw mahsanihada lapalahn pokon ehu, e ahpw kupwurohkinirailla. Pwe re rasehng pelin sihpw ehu me sohte silepe. Ih eri ketin tapihada kawehwehiong irail soahng tohto.” (Mark 6:34) Sises kin pohnese me mehkot me aramas akan keieu anahne: iei sawas en kaitarala arail anahn en pali ngehn. Kitail pil kak kasalehda kadek oh limpoak ong aramas teikan ni atail kin ehukihong meteikan mehkot me re kin keieu anahne—iei “Rongamwahu en Wehio.” (Madiu 24:14) Kitail pil kak kihda sawas kan ong iengetail Kristian mah kan, liohdi kan, oh sepwoupwou kan oh “kakehlaka irail kan me nan kapehd tikitik.” (1 Deselonika 5:14; Lepin Padahk 12:25; Seims 1:27) Met pahn wahdohng kitail peren laud oh e pil pahn kahrehong kitail en paiekihda kalahngan oh mahk me kohsang rehn Siohwa.—Wiewia 20:35; Seims 2:13.
Meid Pai Irail me nan Mohngiongarail Mwakelekel oh Popohl
15. Iaduwen kitail kak ahneki mohngiong mwakelekel oh popohl?
15 Sises kawehwehda kaweneu oh kaisuh en meid pai kan: “Meid pai irail me nan mohngiongarail mwakelekel, pwe re pahn udiahl Koht. Meid pai irail me kin popohl, pwe irail pahn adanekihla ‘sapwellimen Koht akan.’ ” (Madiu 5:8, 9) Mohngiong mwakelekel kin wehwehki me emen kin tiahk mwakelekel oh pil mwakelekel ni pali ngehn oh miniminpene ni ah kin kaudokiong Siohwa. (1 Kronikel 28:9; Melkahka 86:11) Ni ahnsou me lepin lokaia “popohl” tepin mihmi nan Pwuhk Sarawi, e kin wehwehki “ahneki popohl rehn meteikan.” Aramas me ahneki popohl rehn meteikan kin miniminiong riarail Kristian akan, oh re pil kin nantiong ahneki popohl rehn mehn mparail kan. (Rom 12:17-21) Irail kin “rapahki popohl ni ahr kehl unsek.”—1 Piter 3:11.
16, 17. (a) Dahme kahrehda me keidi kan kin adanekihla “sapwellimen Koht seri kan,” oh iaduwen re pahn “udiahl Koht? (b) Oh iaduwen “sihpw teikan” “udiahl Koht”? (c) Iaduwen oh iahd me pwihn me kin iang “sihpw teikan” pahn wiahla “sapwellimen Koht seri kan”?
16 Ong irail me kin ahneki popohl rehn meteikan oh nan mohngiongarail kin mwakelekel, inou kin pweida rehrail me re pahn adanekihla “sapwellimen Koht akan” oh irail “pahn udiahl Koht.” Irail Kristian me keidi kan kin wiahla sapwellimen Siohwa me keidi kan oh sapwellime “seri kan” ni ahnsou irail kin mihmi nin sampah. (Rom 8:14-17) Ni ahnsou me re pahn iasadahng nanleng oh iang Krais kakaun, re pahn papah limwahn Siohwa oh udiahl Ih.—1 Sohn 3:1, 2; Kaudiahl 4:9-11.
17 Aramas popohl kan me kin iang pwihn en “sihpw teikan” kin papah Siohwa oh mih pahn Silepeo Mwahu, Krais Sises, me pahn wiahla arail “Sahm Poatopoat.” (Sohn 10:14, 16; Aiseia 9:6) Irail akan me pahn pweida oh pitsang kaimwiseklahn kasongosongo mwurin sapwellimen Krais Kaunda erein Pahr Kido, oh Siohwa pahn sapwellimanki aramas akan nin sampah oh irail pahn “ahneki saledek lingan nin duwen sapwellimen Koht seri kan.” (Rom 8:21, NW; Kaudiahl 20:7, 9) Ni ahr kin kasikasik met, re kin likwerih Siohwa nin duwen Samarail, pwe re kin inoukihong Ih arail mour, oh re kin pohnese Ih nin duwen arail Sounkomour. (Aiseia 64:8) Duwehte Sohp oh Moses, irail pil kak “udiahl Koht” ki ahr pwoson. (Sohp 42:5; Ipru 11:27) Ki ‘mesen mohngiong’ oh loalokong pwung en Koht, irail kin dehdehkihla sapwellimen Siohwa irair kaselel kan oh nantiong kahlemengih Ih ni ahr kin kapwaiada sapwellime kupwur kan.—Episos 1:18; Rom 1:19, 20; 3 Sohn 11.
18. Nin duwen irerekedi en meid pai isuh me Sises mahsanih, ihs irail kin diarada peren mehlel nan rahnwet?
18 Kitail kin kilang me irail akan me kin nsenohki arail anahn en pali ngehn, irail me kin mwahiei, nan kapehd opampap, oh irail akan me kin ngoangki dahme pwung, irail me kin kasalehda mahk, oh irail me nan mohngiongarail mwakelekel oh popohl kin diar peren ni ahr kin papah Siohwa. Ahpw, aramas pwukat kin ahnsou koaros lelohng uhwong oh pil kalokolok. Eri, met kin kihsang rehrail arail peren? Peidek wet pahn pasapengla nan artikel en mwurin met.
Kousapahl
• Irail akan me kin nsenohki arail anahn en pali ngehn kin ahneki soangen peren dahieu?
• Ni ahl dah kei me irail akan me kin mwahiei kin diarada kamweit?
• Iaduwen kitail kin kasalehda irairen opampap?
• Dahme kahrehda kitail anahne mahk ong meteikan, ahneki mohngiong mwakelekel, oh pil ahneki popohl rehn aramas teikan?
[Kilel nan Pali 8]
“Meid pai irail me kin nsenohki arail anahn en pali ngehn”
[Kilel nan Pali 8]
“Meid pai irail me kin mahk ong mehteikan”
[Kilel nan Pali 8]
“Meid pai irail me kin ngoangki dahme pwung”