“Amwail Marain en Sansal Mwohn Aramas akan”
1 Sampah wet kin mihmi nan rotorot ni pali ngehn oh nin duwen tiahk. Ahpw, marain me kin kohsang padahk mehlel kin kasansalehda “tiahk suwed oh sohte katepe” en sampah rotorot wet pwe kitail en kak kilang mehn kerempwa pwukat oh liksang. Ihme kahrehda, wahnpoaron Pohl kangoangehki Kristian kan: “Eri, kumwail en mourki mouren aramas marain.”—Episos 5:8, 11.
2 “Wahn marain” kin weksang wahn rotorot en sampah wet. (Episos 5:9) Pwehn kapwarehda soangen wahn marain wet, kitail anahne kasalehda me kitail kin wia mehn kahlemeng mwahu en mouren Kristian, soangen aramas me Sises kin kupwurki. Kitail pil anahne kasalehda soangen irair akan me duwehte mehlel, ngoang oh wia uwen me kitail kak pwehn utungada padahk mehlel. Wahn marain pwukat anahne en sansalda nan atail mour en ehuehu rahn oh pil ahnsou me kitail kalohk.
3 Ahmw Marain en Sansal Ahnsou Koaros: Sises padahkiong sapwellime tohnpadahk kan: “Amwail marain en sansal mwohn aramas akan.” (Madiu 5:16) Ma kitail men kahlemengih Sises, kitail anahne kasalehda marain me kohsang Siohwa ni atail pahn kalohki Wehin Koht oh sapwellime kupwur kan. Kitail kin lingalingki marain wet (rasehng usu kan me kin dakedaker nanleng) ahnsou me kitail kin kalohk ong aramas akan ni imwarail kan oh pil ni wasahn doadoahk, wasahn sukuhl, oh ahnsou me kitail kin kalohk ong mehn mpatail kan oh wasa koaros me kitail kin tuhwong aramas oh mie atail ahnsou mwahu en kalohk ong irail.—Pilipai 2:15.
4 Sises kasalehda me mie aramas me pahn kailongki marain en me mehlel. (Sohn 3:20) Eri, kitail sohte pahn nsensuwedla ma pali laud en aramas pahn kahng kilang “marain en Rongamwahu duwen lingan en Krais.” (2 Kor. 4:4) Siohwa mwahngih mohngiong en aramas akan oh E sohte kupwurki irail me kin wia dahme suwed en iang kisehn sapwellime aramas akan.
5 Ni ahnsou me kitail kin idawehn sapwellimen Siohwa ahl akan oh nsenamwahuki marain me kohsang Siohwa, kitail men kasalehong aramas teikan marain wet. Ma kitail kasalehda sang atail tiahk mwahu me kitail “ahneki marain en mour,” aramas teikan pahn mwekidki met oh wiliakapwala oh wiahla sounwah marain sang Siohwa Koht.—Sohn 8:12.
6 Ni atail pahn kasalehong aramas teikan me kitail mourki marain me kohsang Siohwa, met pahn kapinga Sounkapikpatail oh pahn sewese meteikan en men sukuhliki duwen Siohwa oh ale mour soutuk. (1 Pit. 2:12) Pwehki kitail ahneki marain me kohsang Siohwa Koht, kitail anahne doadoahngki marain wet pwehn sewese meteikan en pitsang rotorot ni pali ngehn me kin kapilpene irail oh wia soangen tiahk mwahu me kin kasalehda me re mihmi nan marain.