Marain Me Kohsang Rehn Koht Kin Powehdi Rotorot!
“Maing Kaun, komwi me kamarainpei; komwi ketin kasarehsang ei rotorot.”—2 SAMUEL 22:29.
1. Iaduwen marain oh mour ara pahrekpene?
“KOHT eri ketin mahsanih: ‘Marain en miehla.’ Marain ahpw pwarada.” (Senesis 1:3) Mahsen konehng pwukat kin kawehwehda duwen kapikapikda kan nan pwuhken Senesis oh e kin kasansalehda me Siohwa iei utupen marain, oh sohte mour nin sampah pahn kak pweida ma sohte marain. Siohwa iei utupen marain ni pali ngehn, oh marain kesempwal wet kin kaweidih atail mour. (Melkahka 43:3) Nanmwarki Depit kasalehda duwen pahrekpene en marain ni pali ngehn oh mour: “Komwi me poahsoan en mour koaros, oh pwehki sapwellimomwi marain se kin kak patohwan marain.”—Melkahka 36:9.
2. Nin duwen Pohl kin kasalehda, marain kin kapahrekiong dah?
2 Mpen sounpar 1,000 mwurin Depit mehla, wahnpoaron Pohl koasoia duwen ahnsoun kapikada kan. E ntingwohng mwomwohdiso en Kristian nan Korint: “Pwe Koht me mahsanih, “Marain en pwarada sang nan rotorot.’ ” Pohl eri kawehwehda me marain ni pali ngehn oh loalokong me kohsang rehn Siohwa kin doadoahkpene: “Marain en pwarada sang nan rotorot,” iei ih Koht ohte me ketin kamakamarainih nan kapehditail kan, pwe kitail en kak marainkihla lingaling en Koht, me dakedaker silangin Krais.” (2 Korint 4:6) Iaduwen marain wet ah dakerkitailda?
Paipel—Mehn Kadarpeseng Marain
3. Sang Paipel, marain dah kei me Siohwa kin ketikihda?
3 Siohwa kin keieu doadoahngki sapwellime Mahsen, iei Paipel en ketkihong aramas akan marain ni pali ngehn. Ni ahnsou me kitail kin onop Paipel oh ale loalokong me kohsang rehn Koht, kitail kin mweidong sapwellime marain en dakedaker kitail. Siohwa kin doadoahngki Paipel en kamarainih kitail me pid duwen sapwellime kupwur kan oh iaduwen kitail kak kapwaiada dahme e kin kupwurki kitail en wia. Met kin kahrehong atail mour en mie katepe oh pil kin kaitarala atail anahn akan en pali ngehn. (Eklesiasdes 12:1; Madiu 5:3) Sises kasansalehda kesempwalpen kitail en nsenoki atail anahn ni pali ngehn, ni ahnsou e doadoahngki Kosonned en Moses, e mahsanih: “E ntingdier nan Pwuhk Sarawi, ‘Kaidehkin pilawahte me aramas kak mourki, pwe mahsen koaros me kin pwilipwilsang nin doaueseng Koht.’ ”—Madiu 4:4; Deuderonomi 8:3.
4. Ni ahl dahieu Sises kin wiahla “marain en sampah wet”?
4 Sises oh marain ni pali ngehn kin raspenehte. E koasoaiahki pein ih nin duwen “marain en sampah” oh e mahsanih: “Mehmen me pahn idawehniehdo pahn ahneki marain en mour, oh sohte pahn weweid nan rotorot.” (Sohn 8:12) Mahsen pwukat kin sewese kitail en wehwehki duwen pwukoa kesempwal ieu me Sises ahneki en padahkiong aramas akan duwen sapwellimen Siohwa padahk mehlel. Ma kitail pahn liksang rotorot oh kekeid nan sapwellimen Koht marain, kitail anahne rong mahsen kan en Sises koaros oh kahlemengih ih oh eh padahk kan nin duwen me ntingihdi nan Paipel.
5. Pwukoa dahieu sapwellimen Sises tohnpadahk kan alehdi mwurin e pwoula?
5 Rahn kei mwohn e pahn matala, Sises pwurehng koasoaiahki pein ih nin duwen marain, ni e padahkiong sapwellime tohnpadahk kan: “Maraino pahn mihmihte nanpwungamwail ni ahnsou kis. Eri, kumwail weweidki maraino ni eh mi rehmwail, pwe rotorot de koanoikumwaildi. Pwehki mehmen me kin weweid nan rotorot sohte kin ese wasa e kin kohkowohng ie.” (Sohn 12:35, 36) Irail akan me wiahla seri en marain kan kin sukuhliki duwen “mahsen mehlel kan” en Paipel.” (2 Timoty 1:13, 14) Irail uhd doadoahngki mahsen mehlel pwukat en sewese aramas teikan me kin ahneki mohngiong mehlel en pedoi sang rotorot oh pedolong nan marain en Koht.
6. Mehnia padahk kesempwal mehlel ieu duwen marain oh rotorot kin dierekda nan pwuhken 1 Sohn 1:5?
6 Wahnpoaron Sohn ntingihdi: “Koht iei marain, oh sohte kisin rotorot kis mi reh.” (1 Sohn 1:5) Tehk wasaht, duwen wekpeseng marain oh rotorot. Marain ni pali ngehn kin tepsang rehn Siohwa, oh rotorot ni pali ngehn sohte kak mih reh. Eri, ihs me utupen rotorot?
Utupen Rotorot ni Pali Ngehn
7. Ihs me kin kaunda sampah rotorot ni pali ngehn, oh ia uwen kehlail ih?
7 Wahnpoaron Pohl kosoia duwen “koht suwed en sampah wet.” Mahsen wet kin wehwehki Sehdan me Tepil. E pil pousehla koasoia me e “karotongeirailla pwe re dehr kilang marain me dakedaker irail, marain en Rongamwahu duwen lingan en Krais, me uhdahn duwehte mwomwen Koht.” (2 Korint 4:4) Aramas tohto dene me re kin kemehlele Koht; ahpw, tohto rehrail sohte kin kemehlele me mie Tepil. Pwekihda? Pwe, irail sohte men kemehlele me mie emen me ahneki manaman kehlail suwed ieu oh e kin kaunda arail madamadau kan. Ahpw nin duwen Pohl kasalehda, uhdahn mie Tepil, oh e kin kaunda madamadau en aramas akan pwe re dehr kilang marain en padahk mehlel. Manaman en Sehdan ong kaunda madamadau en aramas akan kin pwarada nan kokohp ieu me kin kawehwehda ih nin duwen “[emen] . . . me kin pitipitih sampah pwon.” (Kaudiahl 12:9) Pwehki doadoahk kan en Sehdan, Soukohp Aiseia kohpadahr duwen irair suwed ieu me pahn lelong aramas koaros nan atail ahnsou, ahpw ihte irail akan me kin papah Siohwa sohte pahn lelong irair suwed wet: “Rotorot pahn kipehdi wehi teikan en sampah.”—Aiseia 60:2.
8. Ni ahl dah kei irail akan me kin mih nan rotorot ni pali ngehn kin kasalehda me re kin salongala oh pingada?
8 Kitail sohte kak kilang mehkot nan wasa me uhdahn rotorot. E mengei aramas en salongala. Duwehte irail akan me mih nan rotorot ni pali ngehn, irail sohte kak dehdehki mehkot, irail kin mwomwen salongala de pingada ni pali ngehn. Re kak sohlahr dehdehki dahme me mehlel oh dahme me suwed, mehkot me mwahu oh mehkot me suwed. Soukohp Aiseia kin koasoiahki soangen aramas akan me kin mih nan rotorot, e ntingihdi: “Meid suwediong kumwail! Kumwail kin kahdaneki me suwed me mwahu oh me mwahu me suwed. Kumwail wekidohng rotorot ni marain oh marain ong ni rotorot. Kumwail wekidala mehkot katik pwehn memla oh mehkot mem pwehn katikala!” (Aiseia 5:20) Irail akan me kin mih nan rotorot ni pali ngehn kin mih pahn manaman en koht en rotorot, iei Sehdan me Tepil, oh irail kin dohsang utupen marain oh mour.—Episos 4:17-19.
Kohsang nan Rotorot ong Nan Marain—Mehkot Apwal
9. Kawehwehda iaduwen aramas dipan akan kin perenki rotorot en pwohng oh rotorot en pali ngehn.
9 Sohp, ohl lelepek men kin kasansalehda me irail aramas dipan akan kin perenki mih nan rotorot en pwohng: “Me kin kamwahl akan kin awiawih rotorot en pwohng en leledo; e kin ekihla mese pwe emen en dehr kilang.” (Sohp 24:15) Aramas dipan akan kin pil mih nan rotorot ni pali ngehn, oh soahngen rotorot wet pahn kak powehdi emen. Wahnpoaron Pohl kin kawehwehda me dipen nenek, pirap, noahrok, kamamsakau, lokaia kamedek kan, doadoahngki kehl ni ahl sapwung iei wiewia pwukat me kin kalapw wiawi rehn irail akan me kin wiahla lidu kan nan rotorot wet. Ahpw mehmen me pahn sohpeiong marain en Mahsen en Koht pahn kak wiliakapwala. Nan sapwellimen Pohl kisinlikou ong mehn Korint, e kin ni sansal kawehwehda me wekidekla wet pahn kak wiawi. Kristian tohto nan Korint kin iang wiewia kan en rotorot wet mwohn irail wiahla Kristian, ahpw Pohl padahkiong irail: “Eri, ekei kumwail iang mihmi ni soangen aramas pwukat mahso, ahpw met kumwail mwakelekelsangehr dihp, oh kasarawihongehr Koht, oh pwunglahr rehn Koht ni mwaren atail Kaun Sises Krais oh ni ngehnen atail Koht.”—1 Korint 6:9-11.
10, 11. (a) Iaduwen Sises kasalehda kadek ong ohl emen me e kamwahuiahla mese kan? (b) Dahme kahrehda aramas tohto sohte kin pilada en mih nan maraino?
10 Ni ahnsou me aramas emen pahn pedoisang nan wasa rotorot ong wasa marain, e pahn anahne ahnsou kis en kaianehda ong kilang marain. Nan Pedsaida, Sises kamwahuwihala ohl maskun men ahpw e ekis ekis wia met. “Sises eri ketin ale pehn me maskuno oh kahrelahng likin kahnimwo. Mwurin eh ketin likidiong pohn pwoaren mese ko oh ketikidahng lime ko pohn ohlo, e keinemwe ma e kilangehr wasa de soh. Me maskuno eri pehdpeseng oh patohwanohng Sises, “Maing, I kak patohwan aramas akan, ahpw likamwete tuhke kei me alialuseli.” Sises pil pwurehng ketikihda lime ko ni pwoaren mese ko, ohlo ahpw pwurehng pehdpeseng; a met ahpw mwahula, e kakehr kilangada mehkoaros mwahu.” (Mark 8:23-25) Ni sansal, Sises ni ekis ekis kamwahuwihala mesen ohlo, pwe ohlo en kak ekis ekis kaianehong mese kan en kilang marain en ketipino. Kitail kak kilang uwen laud en peren me ohl menet ahneki ni ahnsou e kilangada wasa.
11 Ahpw, peren me ohl menet ahneki kin tikitik sang peren me aramas akan kin ahneki ni ahnsou me irail kin ni ekis ekis ale sawas pwehn pedoi sang rotorot ni pali ngehn oh pedelong nan marain en mehlelo. Ni ahnsou me kitail kin kilangada arail peren, ele mwein kitail kin medemedewe dahme kahrehda aramas tohto sohte kin perenki maraino. Sises kin kihda kahrepe: “Eri, iet duwen kadeiko; maraino pwarodohngehr nin sampah, ahpw aramas akan poakohng rotorot laudsang maraino, pwehki arail kin wia me suwed. Pwehki mehmen me kin wia me suwed kin kailongki marain en me mehlel, oh e sohte kin men pwarodohng marain wet, pwehki e sohte mwahuki eh wiewia suwed kan en sansalda.” (Sohn 3:19, 20) Ei, aramas tohto kin perenki wiewia “suwed akan”—duwehte dipen nenek, kaunda lemei, likamw, widingih aramas teikan, oh pirap—oh ahn Sehdan rotorot ni pali ngehn kin wiahda wasa mwahu ieu ong irail en wia pein nsenarail kan.
Kekeirada nan Marain
12. Kapai dah kei kitail alehdi ni ahnsou kitail sukuhliki duwen maraino?
12 Sangehr ni ahnsou me kitail sukuhlikier duwen maraino lel ahnsowet, soahngen wekidekla dah kei me kitail kilangehr nan atail mour? Ekei pak, e kin mwahu kitail en pwurehng medemedewe duwen ia uwen laud atail kin kekeirada ni pali ngehn. Mehnia tiahk suwed akan me kitail kesehlahr? Mehnia kahpwal akan me pid atail mour me kitail kapwungala? Wekidek dah kei wiawi ong atail pilahn kan ong ni ahnsou kohkohdo? Ki sapwellimen Siohwa kehl iangahki sapwellime ngehn sarawi, kitail kak pousehla en kapwungala atail irair akan oh madamadau kan oh met pahn kasalehda me kitail kin mweidong marain en kaunda kitail. (Episos 4:23, 24) Pohl kin kawehwehda ni ahl wet: “Mahso pein kumwail mihmi nan rotorot, a sang ni amwail wialahr sapwellimen Kauno aramas pilipil kei, kumwail milahr nan marain. Eri, kumwail en kin mourki mouren aramas marain. Pwe iei wahn marain mepwukat: soangen mwahu koaros, soangen pwung koaros, oh soangen mehlel koaros.” (Episos 5:8, 9) Mweidong sapwellimen Siohwa marain en kahre atail mour pahn kihong pein kitail koapworopwor ieu oh katepen atail mour oh met pil pahn sewese aramas teikan me kitail kin kalapw werekiong en pil ahneki peren. Ni ahnsou me kitail kin wiahda wekidekla laud kan nan atail mour, met kin wahdohng Siohwa peren laud ieu!—Lepin Padahk 27:11.
13. Iaduwen kitail kak kasalehda atail kalahnganki sapwellimen Siohwa marain, oh dahme anahn ni soahngen ahl wet?
13 Kitail kin kasalehda atail kalahngan ong mour nsenamwahu me kitail kin paiekihda sang ni atail kin kasalehong meteikan duwen sapwellimen Siohwa marain—ehukiong tohnpeneinei kan, kompoakpatail kan, oh mehn mpatail kan dahme kitail sukuhliki sang Paipel. (Madiu 5:12-16; 24:14) Atail doadoahk en kalohk oh atail kin wia mehn kahlemeng mwahu nin duwen mour en Kristian akan, kin wia elen kapehm ieu ong irail akan me kin kahng rong. Pohl kawehwehda: “Kumwail kin song rapahki dahme Kauno kin ketin kupwurperenki. Eri, kumwail dehr kin werekiong aramas akan me kin wiewia tiahk en rotorot, ahpw kumwail kapwung ong irail tiahk pwukat.” (Episos 5:10, 11) Kitail anahne en eimah, ma kitail men sewese aramas teikan en kesehla rotorot oh pilada en mih nan marain. Ahpw keieu kesempwal, kitail anahne poakepoake oh nsenohki aramas teikan oh inengieng en men ehukihong irail padahk en maraino pwe irail en kak ale pai soutuk kan.—Madiu 28:19, 20.
Kaleke Marain Likamw Akan!
14. Me kin pid duwen marain, kaweid dahieu kitail anahne en kapwaiada?
14 Ong irail akan me kin seiseiloakseli nan sehd ni pwong, marain soh lipilipil wia mehkot kaperen. Kawao, nan sapwen England, aramas akan kin isikada kisiniei pohn komwon takai ileile kan pohn kehlen oaroar kan, pwe sohp kan en kak diar wasahn ruk sang melimel kan. Sehla kan pohn sohp pwukat kin kalahnganki marain pwukat me kin kaluwahirailong ong nan kepidau. Ahpw ekei kisiniei kan, kin wiawihda pwehn pitihidi aramas akan. Sohp tohto sohte kak diarada kepidau kan pwehki kisiniei kan kin souda nan wasa keper kan, kahrehda wararail sohp kan serada, oh aramas suwed akan uhd kin kuliasang arail dipwisou kan. Nan sampah widing wet, kitail anahne en kanahieng en dehr mweidong marain likamw akan en kahrehong kitail en serada ni pali ngehn. Kitail kin rong, “Sehdan pil kak kawekala pein ih, oh mwomwehda tohnleng en marain.” Duwehte eh lidu kan, iangahki irail me kin lalahwe padahk mehlel, irail kin wiahla “tohndoadoahk widing kan” me kin “pil kawekala pein ihr, pwehn mwomwehda lidun me pwung.” Eri, ma kitail pil pahn rong oh medemedewe duwen madamadau en soahngen aramas pwukat, atail pwoson sapwellimen Siohwa Mahsen mehlel me iei Paipel, pahn kak luwetala oh mehla.—2 Korint 11:13-15; 1 Timoty 1:19.
15. Dahme pahn kak sewese kitail en kekeidte nan elen kamour?
15 Sounmelkahkao ntingihdi met: “Sapwellimomwi mahsen, iei serepei, mehn kaweid ie, oh kamarainpen elei kan.” (Melkahka 119:105) Ei, atail Koht limpoak kin kamarainih ‘ewen kehl wetikitik me kolahng mour’ pwe e kin “ketin kupwurki aramas koaros en ale komourparail oh marainkihla me mehlel.” (Madiu 7:14; 1 Timoty 2:4) Ma kitail pahn kapwaiada mouren en kosonned en Paipel kan, met pahn perehla kitail en dehr sohpeiweisang ahl wetikitik oh kolahng keid nan elen rotoroto. Pohl ntingihdi: “Pwe audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.” (2 Timoty 3:16) Nin duwen kitail kin kekeirada ni pali ngehn, kitail kin ale kasukuhl sang rehn Mahsen en Koht. Pwehki marain en Mahsen en Koht, kitail kak kapwungala pein kitail, de, ale kaweid sang rehn irail silipen sihpw limpoak kan en mwomwohdiso ma anahn kin pwarada. Eri, kitail kak kapwungala atail mour oh ni lamalam aktikitik ale kaweid pwung kan pwen sewese kitail en kekeidte nan elen komour.
Kalahnganki Weweid nan Maraino
16. Iaduwen kitail kak kasalehda atail kalahngan ong sapwellimen Siohwa marain?
16 Iaduwen kitail kak kasalehda atail kalahngan ong sapwellimen Siohwa kisakis en maraino? Sohn irelaud 9 kin padahkiong kitail ni ahnsou me Sises kamwahuwihala ohl emen me ipwidi maskun, ahn ohlo ah madamadau ahpw mwekidkihda en wia ah kasapahl kalahngan. Iaduwen e wia met? E pwoson oh kamehlele me Sises iei ih me sapwellimen Koht Ohl oh e pakairkihda me Sises iei “soukohp emen ih.” E pil kin ni eimah kalohk ong irail akan me kin mwamwahleki manaman me Sises wiahda. (Sohn 9:17, 30-34) Wahnpoaron Piter kin kadaneki aramas keidi kan me kin iang towe mwomwohdisohn Kristian akan nin duwen “sapwellimen Koht aramas pilipil tohrohr kei.” Dahme kahrehda? Pwehki irail kin ahneki soahngen kalahngan laud ieu duwehte ohlo me ipwikihwei eh maskun oh mwahula. Re kin kasalehda arail kalahngan ong Siohwa, arail Sounketikihda Kamwahu kan, sang ni ahr ‘kalohkiseli wiewia kapwuriamwei kan en nin limen Koht, me ketin malipeikumwail do sang nan rotorot ong nan sapwellime marain lingaling.’ (1 Piter 2:9; Kolose 1:13) Irail akan me kin ahneki koapworopwor en mih nin sampah, pil kin kasalehda soangen kalahnganohte, oh re kin sewese riarail brother mekeidi kan en lohkiseli ong wehi pokon duwen sapwellimen Siohwa “wiewia kohwalap kan.” Koht kin ketikihong aramas soh-unsek kan pwais ieu me kin siksang mehkoaros!
17, 18. (a) Ia pwukoa en pein emenemen kitail koaros? (b) Pwen kahlemengih Timoty, kangoang dahieu kin kohwong Kristian kan koaros en liksang?
17 E kesempwal kitail en kalahnganki ni mehlel marain en mehlelo. Tamanda, sohte emen rehtail me kin ipwidi esehla padahk mehlelo. Ekei kin tepida sukuhliki padahk mehlel ni ahnsou irail wiahla aramas mah, oh irail kin ni mwadang kilang ia uwen mwahu maraino sang me rotorot. Mehteikan kin paiekihda laud pwehki arail pahpa oh nohno kan kin lemwihki Koht, kahrehda seri pwukat kin tikida nan padahk mehlel. E pahn mengei ong aramas pwukat en mwomwen sohte kesempwaliki marain me mie. Sounkadehde men me eh pahpa oh nohno kin papah Siohwa mwohn e ipwidi, wehkada: E doadoahngki ahnsou reirei oh e anahne en nantiong song en koledi ia wehwehn padahk mehlel oh ia uwen kesempwal padahk mehlel kan me e sukuhliki sang ni ahnsou e wiahla seri. (2 Timoty 3:15) Pwulopwul de mah, emen emen kitail koaros pahn anahne kakairada nan loalitail kan atail kalahngan laud ong padahk mehlel me Siohwa kaselehiong kitail.
18 Ohl pwulopwul men Timoty, kin sukuhliki duwen “iren Paipel kan” sang ni eh kisin seri, ahpw e wiahla aramas mah en Kristian ni pali ngehn pwe e kin nantihong wia doadoahk en kalohk. (2 Timoty 3:15) Ih kahrepe e kakong sewese wahnpoaron Pohl, me kangoange ih en wia met: “Wia uwen omw kak mwohn silangin Koht, pwe en ketin pwungkin uhk, nin duwen soundoadoahk men me sohte kin namenengki eh doadoahk, me kin padahkihong aramas akan mahsen en Koht ni mehlel.” Duwehte Timoty, kitail pahn nantiong en liksang wiewia kan me pahn kanamenekiala pein kitail—de wiewia kan me pahn kahrehong Siohwa en namenekinkitailla!—2 Timoty 2:15.
19. (a) Duwehte Depit, dahme kitail koaros anahne nda? (b) Dahme kitail pahn koasoiapene nan artikel en mwuhr?
19 Kitail kin ahneki kahrepe tohto en kapinga Siohwa me ketikihong kitail marain en sapwellime padahk mehlel. Duwehte Nanmwarki Depit, kitail kin nda: “Maing Kaun, komwi me kamarainpei; komwi ketin kasarehsang ei rotorot.” (2 Samuel 22:29) Ahpw, kitail sohte kin mweidong pein kitail en soukauti maraino, pwe met pahn kak kahrehong kitail en pwurehng mihla nan rotorot, wasa me kitail pitsang ie. Ihme kahrehda, artikel en mwuhr pahn sewese kitail en tehk ia uwen kesempwal padahk mehlel me kohsang rehn Koht ong pein emenemen kitail.
Dahme Ke Sukuhlikier?
• Iaduwen Siohwa kin ketikihda marain ni pali ngehn?
• Kahpwal dah kei kitail kin lelong pwehki rotorot ni pali ngehn me kin kapilpene kitail?
• Soahngen keper dah kei kitail anahne en liksang?
• Iaduwen kitail kak kasalehda atail kin kalahnganki marain en padahk mehlelo?
[Kilel nan Pali 20]
Siohwa kin wia utupen marain en paliwar oh pali ngehn
[Kilel nan Pali 22]
Nin duwen Sises ni ekis ekis kamwahuiahla ohl maskun men, e pil kin ketin sewese kitail en pedoi sang nan rotorot en pali ngehn
[Kilel nan Pali 23]
En mweidong marain likamw akan en Sehdan en kahluwa kitail kak kahrehda kitail en serada ni pali ngehn