“Amwail Marain en Sansal”
1. Kisakis tohrohr dahieu me mi rehtail me kitail anahne ehukihong meteikan?
1 Sang nin sohrahn lel nin soutik, lingan en marain kin wahdo kaping ong Siohwa Koht. Ahpw mie ehu soangen marain tohrohr me Sises ketin luke sapwellime tohnpadahk ko ren ahneki. Met iei “marain en mour.” (Sohn 8:12) En ahneki marain wet iei kisakis tohrohr ehu me iangahki pwukoa kesempwal kei. Sises ketin kaweidki: “Amwail marain en sansal mwohn aramas akan” pwe meteikan en paiekihda. (Mad. 5:16) Nan atail ahnsou me uhdahn rotorot, marain wet anahne kowohng meteikan oh anahn wet inenen laudsang mahs! Ia duwen atail kak duwehte Krais oh mweidohng atail marain en sansalda?
2. Ia duwen Sises eh ketin kasalehda kesempwalpen ehukihong meteikan padahk mehlel?
2 Sang Atail Kalohk: Sises kin ketin doadoahngki sapwellime ahnsou, kehl oh dipwisou kan pwehn kasalehda marain en padahk mehlel ong aramas akan nan imwarail, nan wehipokon, pohn dohl akan de wasa koaros me aramas kak dierek ie. E kin ketin pohnese kesempwalpen kamwahu kan me kohsang padahk mehlel me pahn mihmi kohkohlahte. (Sohn 12:46) Pwehn lel aramas tohto, Sises ketin kaunopada sapwellime tohnpadahk ko pwe ren wia “kamarainpen sampah.” (Mad. 5:14) Arail marain kin sansalda sang arail wiewia mwahu ong mehn mparail kan oh ni arail ehukihong irail padahk mehlel kan.
3. Ia duwen atail kak kasalehda atail kesempwalki marain en padahk mehlel?
3 Sapwellimen Koht aramas akan kin kesempwalki mehlel arail pwukoa en “mourki mouren aramas marain,” oh re kin kalohk wasa koaros me re kak diar aramas ie. (Ep. 5:8) En wadekete Paipel de sawaspen Paipel teikan wasa me aramas kak kilang, duwehte ahnsoun kommoal en sukuhl de doadoahk, kak ritingada elen kalohk ong irail. Ih met me wiawihong emen riatail sister pwulopwul oh e tepida onop en Paipel ren emen oh e kihla pwuhk 12 ong ienge tohnsukuhl kan!
4. Dahme kahrehda atail ‘mweidohng atail marain en sansalda’ kin dokedoke atail wiewia mwahu?
4 Sang Atail Wiewia Mwahu: Kasansalehda atail marain pil kin dokedoke atail wiewiahn ehuehu rahn. (Ep. 5:9) Ni wasahn doadoahk, sukuhl oh wasahn wehi pokon, wiewiahn Kristian men kin sikla oh sansal ong meteikan oh met kin kahrehda ahnsou mwahu en ehukihong meteikan padahk mehlel kan. (1 Pit. 2:12) Karasepe, wiewia mwahu en kisin pwutak sounpar 5 men kamwakid eh sounpadahko en delepwonlahng ren eh pahpa oh nohno. E nda, “I sohte kin kilang soangen seri duwehte met me kin wehwehki mwahu dahme suwed oh dahme mwahu oh nantihong kapwaiada!” Ei, atail kalohk oh wiewia mwahu kin kahrehiong aramas ren kohdohng “marain en mour” oh pil kahrehda kaping ong atail Koht.