Kasdo Kapw ong Tapiada Onop en Paipel
Kasdo mwotomwot ehu me oaralape koasoia Dahme Kahrehda Ken Onopki Paipel? kin lelohng aramas tohtohie nan jw.org. Kasdo wet wiawihda pwehn kamwakid aramas me men rong en kak pwungki iang onop Paipel ni soh isepe. Ke kak alehdi met sang ni omw pahn pilada “Peki Onop en Paipel” me kileldi pahnangin home page de ke kak scan QR (quick response) code me kileldi ni tihnsewen neitail kisin doaropwe kapw kan (tracts). Iet ekei ahl akan me kitail kak doadoahngki kasdo wet.
Ni omw pahn pwuralahng emen me men rong, ke kak ndaiong tohnihmwo: “I kak kasalehiong komwi kasdo mwotomwot wet me pahn kawehwehda ia duwen omw pahn alehdi pasapeng kan ong pein omw peidek kan duwen Paipel?” Ma e pwungki, kasalehiong ih kasdo wet nan dipwisou en kilang kasdo (mobile device) me ke wahda de nan pein nah computer.
Ma kitail kihla ehu neitail kisin doaropwe kapw kan ni ahnsou me kitail kalohk ni ahnsou sohte lipilipil de kalohk wasa me aramas tohto mi ie, kasalehiong QR code me mi ni doaropweo oh kangoange aramaso en scan ni eh doadoahngki dipwisou en kilang kasdo me e kin weuwa. Pwehki nan lokaia tohto, QR code wet kin kahreiukala wasa me kasdo wet mi nan neitail Web site, eri mwein ke kak uhdahte kilang kasdo wet ni omw doadoahngki dipwisou en kilang kasdo me ke kin weuwa.
Padahkihong iengomw tohndoadoahk kan, tohnsukuhl kan, kisehmw kan oh meteikan me ke kin ese duwen kasdo wet, oh padahkihong me ke kak kasalehiong irail kasdo wet. De kadarohng irail e-mail me re pahn uhdahte kohla ni kasdo wet nan Web site wet, oh luke irail en pein kilang.
Ni atail pahn isaneki mehn sawas kapw wet, mwein kitail pahn kak tapiada onop en Paipel oh sewese irail me “mihmier nan irair en kak ale mour soutuk” en wiahda arail nanpwungmwahu rehn Koht.—Wiewia 13:48, NW.