Video Ehu me Pahn Konehng Kitail en Medemedewe
“Video wet kin kamwekid ahn emen madamadau!”
“E sair mohngiongi!”
“E kamwekid ahi pepehm kan!”
1 Ih duwen ahmw pepehm met ni ahmw tepin kilang video wet me oaralap koasoia Young People Ask—How Can I Make Real Friends? Nan sounpahr kei samwalahro, emen brother pwulopwul lelohng kahpwal kan nan ah mour, met wiawi pwehki e kin werek suwed. Ah werek kan kahrehiong ih en solahr perenki padahk mehlel, oh e pil kesehla ah nanpwung mwahu rehn Siohwa. Mwuhr, video en Young People Ask—How Can I Make Real Friends? ahpw kohda. E ntingihdi: “Ni ahi pwurepwurehng kilang video, pilen mesei keredi. I kalahngankihong Siohwa ah ketikihda sawas ni ahnsou konehng.” Video wet kamwekid ih en kapwungala ah mour oh rapahkihda kompoakepah kan me mwahu. E doula koasoia: “E sansal me irail kan me wiahda video wet kin wehwehki wekidekla kan me kin lelohng nan ahn me pwulopwul kan arail mour.” Kumwail pahpa oh nohno kan iangahki noumwail me pwulopwul kan, kumwail soh kilangpene video wet nan ehu amwail onop en peneinei? Kumwail kak kauhdi mwurin ehuehu pali en video oh koasoiapene ni saledek oh mehlel duwen peidek kan me pahn pwarada nan parakrap en mwuhr kan.
2 Tepin Koasoi: Dahkot kompoakepah mehlel?—Lepin Padahk 18:24.
3 Mehn Kerempwa kan ong Kompoakepahnki Emen: Iaduwen ahmw pahn kak powehdi pepehm en me ke kin kelekelehpw oh sohte kin iang kisehn soahng kan me kin wiawi? (Pilipai 2:4) Dahme kahrehda ken men kamwahuwihala ahmw wiewia oh elen madamadau, oh ihs me kak sewese iuk en wia met? Dahme kak sewese iuk en kadirehla kompoakepahmw kan, oh iawasa re kak dierek ie?—2 Korint. 6:13.
4 Kompoakepahnki Koht: Iaduwen ahmw kak wiahda nanpwung keren rehn Siohwa oh dahme kahrehda ahmw wia met mie katepe? (Melkahka 34:8) Ihs me kak keieu kakehlailih ahmw nanpwungmwahu oh kompoakepahnki Koht?
5 Kompoakepah Sapwung kan: Ihs me wia werek suwed? (1 Korint 15:33) Iaduwen kompoakepah sapwung kan kak kahrehong emen en lelohng ohlahn pali ngehn? Dahme koasoiepen Daina nan Paipel kin padahkihong uhk?—Senesis. 34:1, 2, 7, 19.
6 Sipai Ehu en Atail Ahnsou: Iaduwen pepehm en sangat kamwakid Tara? Ia kahrepe kan me e kihda me pid ah werekiong irail pwulopwul en sampah kan? Soangen kahpwal dah kei irail kihong ih loale? Dahme kahrehda ah pahpa oh nohno sohte mwadang kilangada kahpwal me e mih loale, ahpw ni soangen elen madamadau oh wiewia dahieu me irail ahneki ni ara sewese ih en kamwahuwihala ah pali ngehn? Iaduwen emen sister pioneer ah kasalehda ah wia kompoakepah mehlel men en Tara? Dahme kahrehda Kristian akan en kapwaiada kaweid en Lepin Padahk 13:20 oh Seremaia 17:9? Mehn kasukuhl kesempwal dahieu me Tara sukuhliki?
7 Kaimwisekla: Iren mehn kasukuhl dah kan me ke sukuhlikihsang video wet? Iaduwen ahmw kak doadoahngki mepwukat pwehn sewese meteikan?—Melkahka 71:17.