Kalahnganki “Kisakis Kan Me Mih Rehn Ohl Akan”
“Kumwail en kin wauneki mehlel irail kan me kin wie doadoahk rehmwail . . . eri, kumwail waunekin irail oh pil poakohng irail ni mehlel, pwehki doadoahk me re kin wia.”—1 DESELONIKA 5:12, 13.
1. Nin duwen Wiewia 20:35 kasalehda, wiewiahn kihkihwei pahn kak imwikihla dah? Kihda karasaras ehu.
“KIHWEI kaperen sang ale.” (Wiewia 20:35) Komw kak tamanda iahd ke pein ekspiriens mehlelpen mahsen pwukat en Sises? Ele mwein ke kihong koampoakepomw kisakis ehu. Ke medemedewe laud dahme ke pahn kihong ih pwe ke men kihong koampoakepomw mehkot me e pahn keneineiki. Mesen koampoakepomw kasalehda uwen e peren—oh met pil kahrehong komwi en ahneki peren mehlel! Kihkihwei iei kasalepen irairen limpoak ma emen pahn kihwei mehkot sang nan mohngiong, oh kasalehda limpoak wet pahn kak wahdohng kitail peren.
2, 3. (a) Dahme kahrehda kitail kak nda me sohte mehmen kak ahneki peren laud sang Siohwa, oh iaduwen sawas en “kisakis kan me mih rehn ohl akan” kin kahrehong sapwellime mohngiong en perenda? (b) Dahme kitail sohte men wiaiong kisakis ehu me kohsang rehn Koht?
2 Ihs me pahn kak ahneki peren laud sang Siohwa, Sounketikihda “kisakis mwahu koaros”? (Seims 1:17; 1 Timoty 1:11) Limpoak kin kamwekid Koht en ketkihda kisakis kan koaros. (1 Sohn 4:8) Limpoak pil kamwekid Koht en ketkihong mwomwohdiso kisakis sang rehn Krais—iei “kisakis kan me mih rehn ohl akan.” (Episos 4:8) Met iei kilelepen sapwellimen Koht limpoak laud ong sapwellime aramas akan ni e ketkihda koasoandi en elder kan pwehn apwalih sapwellime sihpw kan. Ohl pwukat kin pilipilda mwahu—re anahne kapwaiada koasoandi kan sang Pwuhk Sarawi. (1 Timoty 3:1-7; Taitus 1:5-9) Re ese me re anahne “ni kadek apwaliahda pelin sihpwo,” oh pwehki met pelin sihpwo pahn kak kalahnganki silipen sihpw limpoak pwukat. (Wiewia 20:29; Melkahka 100:3) Ni Siohwa ah kin mahsanih me mohngiong en sapwellime kan kin direkihla soangen peren oh kalahngan wet, met pil kin kaperenda kupwuren Koht!—Lepin Padahk 27:11.
3 Kitail sohte men mwamwahleki kisakis kan me kin kohsang rehn Koht; oh kitail pil sohte men kasalehda me kitail sohte kin kalahnganki sapwellime kisakis kan. Ihme kahrehda, peidek riau kin pwarada: Iaduwen elder kan anahne kilangwong pein ahr pwukoah nan mwomwohdiso? Oh iaduwen pelin sihpw teikan kin kasalehda me re kin kalahnganki “kisakis kan me mih rehn ohl akan”?
‘Se Kin Iang Kumwail Doadoahk’
4, 5. (a) Pohl kin kasalehda me mwomwohdiso kin karasaiong dah, oh dahme kahrehda met wia karasaras konehng ehu? (b) Dahme karasaras en Pohl kin kasalehong kitail ong iaduwen kitail pahn kilangwong oh wiaiong meteikan?
4 Siohwa me ketikihong irail akan me ahneki “kisakis kan me mih rehn ohl akan” pwukoah en apwalih mwomwohdiso. Ahpw, ni mehlel, elder kan sohte men doadoahngki sapwung ahr pwukoah kan, ahpw re ese me e inenen mengei aramas soh-unsek kan en wia met. Eri, iaduwen re anahne kilangwong pein irail oh sihpw kan? Tehk karasaras wet me wahnpoaron Pohl doadoahngki. Mwurin e koasoia duwen ia kahrepen Koht ketkihda “kisakis kan me mih rehn ohl akan,” Pohl ntingihdi: “Ahpw ni atail pahn momourki me mehlel oh limpoak, kitail pahn keirda ni mehkoaros rehn Krais, me iei moangatail. Eri, pahn sapwellime manaman, kakon akan en paliwar wet kin sonamwahupene, oh paliwaro unsek kin tengetengkipene kakon koaros. Eri, ni ehuehu kakon eh kin wiewia pwaise, paliwar unsek kin keirda oh laudla ni limpoak.” (Episos 4:15, 16) Pohl karasaiong mwomwohdiso, iangahki elder kan oh tohnmwomwohdiso teikan ong paliwar en aramas. Dahme kahrehda met karasaras konehng ehu?
5 Paliwar en aramas men kin wiawihkihda kakon tohto ahpw ahneki moang ehute. Ahpw, kakon koaros nan paliwar—uduk, sahl, me kesempwal. Ehu ehu kakon me kesempwal oh kin kihda eh sawas ong roson oh mwohmw mwahu en paliwar. Duwehte mwomwohdiso, pwe mwomwohdiso kin wiawihkihda towe tohto, ahpw tohnmwomwohdiso kan koaros—edetehn irail pwulopwul de mahla, kehlail de luwet—kak kihda arail sawas pwehn sewese mwomwohdiso en kehlail oh lingan ni pali ngehn. (1 Korint 12:14-26) Sohte emen me anahne ahneki soangen madamadau me ih me nohn sohte katepe. Ni pali teio, sohte konehng emen en ahneki madamadau me ih lapalap sang meteikan pwe kitail koaros—silepen sihpw kan oh sihpw kan me duwehpenehte—irail me kisehn paliwaro, ahpw moang ehute mie, iei Krais. Pohl eri kawehwehda me kitail anahne en limpoakpene, nsenohki aramas teikan oh wauneki aramas teikan. Ma elder kan pahn pohnese irair pwukat, met pahn kak sewese irail en ahneki lamalam aktikitik oh toupahrek ong duwen ahr pwukoah nan mwomwohdiso.
6. Mendahki Pohl kin ale manaman nin duwen wahnpoaron men, iaduwen e kasalehda lamalam en aktikitik?
6 Irail me ahneki “kisakis kan me mih rehn ohl akan” sohte kin kaunda mour de pwoson en iengerail tohnkaudok kan. Edetehn Pohl ahneki manaman en wahnpoaron men, ni lamalam en aktikitik e padahkiong mehn Korint kan: “Se sohte men wiahda kosonned ong kumwail dahme kumwail pahn pwoson, pwe amwail pwoson me uhdahn kehlail; ahpw se kin iang kumwail doadoahk ong ni pein amwail peren.” (2 Korint 1:24) Pohl sohte men wiahda kosonned ong irail dahme irail ong pahn pwoson oh kaunda mour en riarail brother kan. E sohte lemeleme me mie anahnpen met, pwe e koasoia me e kin likih me re wiahla ohl oh lih lelepek kan nan sapwellimen Siohwa pwihn oh pwehki re men wia dahme pwung. Mouren en sapwellimen Pohl padahk duwen pein ih oh ienge sounseiloak, Timoty: ‘Met aht doadoahk en iang kumwail doadoahk en papah Koht ni peren.’ (2 Korint 1:1) Ia uwen e kin kasalehda lamalam aktikitik!
7. Dahme elder aktikitik kan kin pohnese duwen ahr pwukoah nan mwomwohdiso, oh irail kin likih iengerail sounkalohk kan en wia dah?
7 Nan rahnpwukat “kisakis kan me mih rehn ohl akan” pil kin ahneki pwukoahohte. Re pil kin ‘iang kitail doadoahk ni peren.’ Elder kan me aktikitik kin pohnese me kaidehn arail pwukoah en koasoanehdi ia uwen laud emen anahne kihda ni eh kin papah ong Koht. Re ese me re kak kangoange meteikan en kalaudehla ahr doadoahk en kalohk oh kamwahuiala ahr kalohk, ahpw papah ong Koht kin kohsang mohngiong. (Pil kilang 2 Korint 9:7.) Re kin likih met, ma iengerail sounkalohk kan kin peren, eri, sounkalohk pwukat pahn wia uwen me re kak en papah Koht. Ihme elder kan kin sang nan mongiongirail kan men sewese riarail brother kan en “pereperen kaudokiong Kauno [“Siohwa,” New World Translation].”—Melkahka 100:2.
Sewese Koaros en Papah ni Peren
8. Ia ekei ahl akan me elder kan kak sewese riarail brother kan en papah Siohwa ni peren?
8 Iaduwen kumwail elder kan pahn kak sewese riamwail brother kan en papah ni peren? Kumwail kak kangoange irail sang ni ahmw wia mehn kahlemeng mwahu. (1 Piter 5:3) Meteikan kak mwekidki ahmw mehn kahlemeng mwahu ni ahmw pahn kasalehda ahmw ngoang oh perenki iang doadoahk en kalohk. Kapinga meteikan ni ahr kin mour-unsekiong ahr doadoahk kan. (Episos 4:29) Kaping me kin wiawi ni kadek oh mehlel kin sewese aramas en ahneki madamadau me pein irail kin katapanki doadoahk wet. Met kin kangoange sihpw kan en men wia uwen me irail kak en papah Koht. Liksang kapahrekiong en meteikan ar wiewia kan. (Kalesia 6:4) Pwe wiewia wet sohte kin kangoange aramas akan en kekeirada ahpw e kin kahrehda nsensuwed. Oh tamanda, me sapwellimen Siohwa sihpw kan iei aramas akan—me kin ahneki irair kan oh koahiek kan me kin wekpeseng sang pein emenemen irail. Duwehte Pohl, kitail anahne kasalehda me kitail kin likih riatail kan. Limpoak kin “kamehlele koaros,” ihme kitail anahne kamehlele me riatail brother kan kin poakohng Koht oh men kaperenda ih. (1 Korint 13:7) Ni ahnsou me ke kin ‘kasalehda wahu ong meteikan,’ met pahn sewese irail en kasalehda irair mwahu kan loalarail. (Rom 12:10, NW) Kitail wehwehki me ni ahnsou sihpw kan kin ale kangoang oh kin kehlail, pali laud en irail pahn wia uwen me re kak en papah Koht, oh re pahn diarada peren nan ahr doadoahk.—Madiu 11:28-30.
9. Iaduwen elder kan pahn kilangwong iengerail elder teikan me pahn kak sewese irail en papah ni peren?
9 Ma komw pahn ahneki madamadau aktikitik en kilangwong pein komwi nin duwen ‘tohndoadoahk men me kin iang tohndoadoahk teikan’ eri met pahn sewese komwi en papah ni peren oh kalahnganki kisakis mwahu kan me iengomw elder kan kin ahneki. Emenemen elder mie pein eh koahiek kan me e kak doadoahngki pwehn sewese tohnmwomwohdiso kan. (1 Piter 4:10) Ekei kin ahneki koahiek en padahk. Ekei kin ahneki koahiek en koasoanehdi koasoandi kan. Pil ekei kin ahneki koahiek en lokaia limpoak oh kadek oh met kin kahrehda tohnmwomwohdiso tohto kin mengeiki tuhwong ih. Ni mehlel, elder kan koaros sohte kin ahneki kisakis koaros me pahn pahrekpene. Ma emen elder pahn koahiek en wia mehkot—karasepe ieu, e koahiek en padahk—met kin wehwehki elder menet kin laudsang meteikan? Uhdahn soh! (1 Korint 4:7) Ni pali teio, e sohte konehng en nsensuwedki kisakis me meteikan kin ahneki de ahneki madamadau me ke sohte katepe ni ahnsou meteikan kin kapinga elder men duwen eh koahiek. Tamataman, ke pil ale kisakis kan me Siohwa kin mahsanih. Oh e pahn kak sewese iuk en kakairada kisakis pwukat pwe riamwail brother kan kak paiekihda.—Pilipai 4:13.
‘Peikiong oh Kapwaiada’
10. Dahme kahrehda e konehng kitail en kasalehda atail kalahnganki “kisakis kan me mih rehn ohl akan”?
10 Ni ahnsou me kitail kin ale kisakis ehu, e konehng kitail en kasalehda atail kalahngan. “Eri, kumwail en kin kasapahlkalahngan ong Koht,” pwuhken Kolose 3:15 mahsanih. Eri, iaduwen “kisakis kan me mih rehn ohl akan,” kisakis kesempwal me Siohwa ketikihong kitail? Ni mehlel, kitail kin keieu kasalehda atail kalahngan ong Siohwa, Sounketikihda kisakis kadek men. Ahpw iaduwen irail akan me kin ale “kisakis kan me mih rehn ohl akan”? Iaduwen kitail kak kasalehong irail me kitail kin kalahnganki irail?
11. (a) Iaduwen kitail kak kasalehda atail kalahnganki “kisakis kan me mih rehn ohl akan”? (b) Ia wehwehn lepin lokaia pwukat: “peikiong” oh “uhpaiong”?
11 Kitail kak kasalehda atail kalahnganki “kisakis kan me mih rehn ohl akan” ni atail pahn mwadang en kapwaiada ahr kaweid kan oh pilipil kan me kin poahsoanda pohn Paipel. Paipel kaweidkinkitail: “Kumwail peikiong amwail sounkaweid akan oh uhpaiong irail. Pwe re sohte kin tokedihsang apwahpwalih ngenomwail kan; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.” (Ipru 13:17, NW) Tehk wasaht me kitail sohte pahn ihte “peikiong” ahpw pil “uhpaiong” irail akan me kin apwalih kitail. Lepin lokaia “uhpaiong” ni lokaiahn Krihk kin wehwehki “ahneki ngehnin pahsan.” Emen me semenih Paipel R. C. H. Lenski koasoi duwen lepin lokaia pwukat “peikiong” oh “uhpaiong”: “Ma emen kin pwungki oh kilang katepen dahme aramas padahkiong ih en wia, e kin peik; ahpw emen kin uhpaiong . . . ni ahnsou e kin ahneki madamadau me kin weksang.” E mengei ong kitail en peik ni ahnsou kitail wehwehki oh pwungki kaweid kan sang rehn irail kan me kin apwalih kitail. Ahpw iaduwen ma kitail sohte kin wehwehki kahrepen pilipil ehu me wiawiehr?
12. Dahme kahrehda kitail en uhpaiong, de pahsan, pilipil ehu edetehn kitail sohte kin uhdahn wehwehki kahrepen pilipilo?
12 Eri, ih ahnsou me kitail anahne en uhpaiong elder kan, oh ahneki ngehnin pahsan. Dahme kahrehda? Ehu kahrepe, pwe kitail anahne likih me ohl koahiek ni pali ngehn pwukat kin nsenohkin kitail. Re ese me re pahn pwukoahki mwohn Siohwa pelin sihpw me Siohwa ketin mweidong irail en apwahpwalih. (Seims 3:1) Patehng met, kitail anahne tamanda me kitail ele mwein sohte ese ire rir kan me kin sewese irail en wiahda arail pilipil kan.—Lepin Padahk 18:13.
13. Dahme pahn kak sewese kitail en uhpaiong pilipil kan en elder me kin pid ma kaweid kehlail kin kohwong emen tohnmwomwohdiso?
13 Iaduwen kitail en kak uhpaiong pwihn en elder kan me kin pid duwen arail pilipil kan en wia kaweid kehlail ong dihp me tohnmwomwohdiso kin wiahda. Ni mehlel, met sohte wia mehkot mengei, keieu, ma re anahne piskensang mwomwohdiso emen me kitail kin poakohng—ahn emen elder eh peneinei de emen me karanih emen elder. Eri, e pahn mwahu en uhpaiong elder kan oh pilipil kan me re kin wia nin duwen “kisakis kan me mih rehn ohl akan.” Irail ahneki irair tohrohr en wehwe laud pwe mwein re wehwehki mehkan me kitail sohte iang ese. Brother pwukat kin ahneki katoutou laud ong arail madamadau ni arail kin songosong en wiahda pilipil kan me pahn keieu pwung ong Mahsen en Koht; oh met wia pwukoah toutou ehu en wia ‘sapwellimen Siohwa kopwung.’ (2 Kronikel 19:6, NW) Re kin nantiong en kasalehda mahk, pwe irail wehwehki me Koht kin “diren mahk.” (Melkahka 86:5) Ahpw ahr pwukoah en sewese mwomwohdiso en mwakelekel, oh Paipel kin kihda kaweid en piskensang mwomwohdiso irail akan me wiahda dihp oh sohte koluhla mehlel. (1 Korint 5:11-13) Pak tohto, mehmen me wiahda dihp kin pein pwungki pilipilo. Koasoandi wet ele mwein kak sewese ih en wehwehkihla duwen dihp me e wia oh uhd koluhla mehlel. Ma kitail, peneinei de kompoakpahn aramaso me piskenla, pahn uhpaiong pilipil kan en elder kan, kitail kin sewese meno me piskensang mwomwohdiso en paiekihda koasoandi wet.—Ipru 12:11.
“Kumwail Waunekin Irail oh Poakohng Irail ni Mehlel”
14, 15. (a) Nin duwen 1 Deselonika 5:12, 13, dahme kahrehda elder kan warohng kitail en waunekin irail? (b) Dahme kahrehda kitail kak nda me elder kan kin ‘doadoahk laud rehtail’?
14 Kitail pil kak kasalehda atail kalahngan ong “kisakis kan me mih rehn ohl akan” sang ni atail pahn waunekin irail. Pohl kaweidkin tohnmwomwohdiso kan nan Deselonika: “Riat ko, se peki rehmwail: kumwail en kin wauneki mehlel irail kan me wie doadoahk rehmwail, irail kan me Kauno ketin piladahr pwe re en kin kaweid oh panawih kumwail. . . . waunekin irail oh pil poakohng irail ni mehlel, pwehki doadoahk me re kin wia.” (1 Deselonika 5:12, 13) “Doadoahk laud”—met soh kin kawehwehda duwen elder lelepek kan me kin ni soh-roporop tohnmeteikihla pein irail pwehki kitail? Medemedewe duwen pwukoah toutou kan riatail brother kan kin kapwaiada.
15 Pali laud en irail kin anahne doadoahk en mwohni pwehn sewese ahr peneinei kan ni paliwar. (1 Timoty 5:8) Ma elder men naineki seri kan, eri, nah seri kan kin anahne ahnsou laud sang rehn ahr pahpa. Mwein e anahne sewese irail en wiahda ahr onop kan en sukuhl, oh koasoanehdi mwahu ahnsoun mwadong ni ahnsou me konehng kan. (Eklesiasdes 3:1, 4) Keieu kesempwal, e kin apwalihada anahn akan en eh peneinei, kaukaule wia onop en Paipel rehn eh peneinei, iang irail kalohk, oh kahre irail en iang towehda mihding en Kristian kan. (Deuderonomi 6:4-7; Episos 6:4) Kitail en dehr manokehla me likin pwukoah pwukat me kitail pil kin pwukoahki, elder kan pil kin wia met: kaunopada arail pwais kan ong mihding kan, mwemweitla rehn sounkalohk kan pwehn kakehlail arail pali ngehn, apwahpwalih anahn akan ni pali ngehn en mwomwohdiso, oh ekei pak, tuhwong tohnmwomwohdiso ma kahpwal pwarada oh kihong irail kaweid. Ekei elder kan kin ahneki pwukoah laudsang met nan Kapokon en Circuit kan, Kapokon en District kan, oh doadoahk en kauwada Kingdom Hall kapw kan, oh Hospital Liaison Committee kan. Ni mehlel, brother pwukat kin inenen “doadoahk laud”!
16. Koasoiada ekei ahl kan me kitail kak kasalehda atail kin nsenohkin irail elder kan.
16 Iaduwen kitail kak wauneki irail? Pwuhk Sarawi mahsanih: “Meid kaperen diar mahsen pwung ni ahnsou me konehng!” (Lepin Padahk 15:23; 25:11) Eri, kalahngan oh kangoang kan me kin wiawi ni mehlel pahn kak kasalehong elder kan me kitail sohte kin mwamwahleki ahr doadoahk laud kan. Pil, kitail anahne en toupahrek ong dahme kitail kasik irail en wiaiong kitail. Ahpw, kitail anahne en saledek tuhwong irail ni ahnsou kitail anahne ahr sawas. Ekei ahnsou ‘mongiongitail kin medek mehlel’ oh kitail anahne mehn kangoang sang Paipel, kaweid sang rehn irail akan me “uhdahn pahn kak padahk” sang Mahsen en Koht. (Melkahka 55:4, NW; 1 Timoty 3:2) Ahpw, kitail pil anahne tamanda me elder kan pahn kak kihong kitail ekiste arail ahnsou, pwe e pil anahne sewese pein eh peneinei de meteikan nan mwomwohdiso. Kitail anahne en “limpoak” ong riatail brother kan me kin doadoahk laud, oh kitail pahn ahneki lamalam en toupahrek en dehr kasik irail en wia doadoahk laudsang dahme konehng. (1 Piter 3:8) Ahpw, kitail en kasalehda atail kalahnganki ahnsou kan me re kak kihong kitail.—Pilipai 4:5.
17, 18. Soangen tohnmetei dah kei me lih pwopwoud tohto en elder kan kin wia, oh iaduwen kitail kak kasalehda me kitail sohte kin manokehla sister lelepek pwukat?
17 Iaduwen irail lih pwopwoud kan en elder kan? Irail pil soh warohng atail nsenohkin irail? Pwe ni mehlel, re kin ehukihong mwomwohdiso arail pwoud kan. Re kin tohnmeteiki laud. Ekei ahnsou, elder kan kin apwalih anahn en mwomwohdiso kan ni pwong kan, ahpw, ni mehlel, ma sohte mihding pwukat, re pahn kak mihmi rehn arail peneinei kan. Nan mwomwohdiso tohto, mie Kristian lih lelepek kan me kin perenki tohnmeteikihla ahr ahnsou pwe ahr pwoud kan kak apwalih sapwellimen Siohwa sihpw kan.—Pil kilang 2 Korint 12:15.
18 Dahme kitail kak wia pwehn kasalehda me kitail sohte pahn manokehla Kristian sister lelepek pwukat? Kitail sohte pahn nohn daulihla kasik me ahr pwoud ohl kan pahn doadoahk laudsang dahme konehng. Ahpw kitail en dehr manokehla ia uwen kangoang laud e pahn wia ong irail ma kitail pahn kasalehda atail kalahngan ni lokaia. Lepin Padahk 16:24 mahsanih: “Ngihl kadek rasehng sukehn loangalap—mem oh mwahu ong paliwar.” Tehk duwen ekspiriens wet. Mwurin ehu mihding en Kristian, pwopwoud ehu tuhwong elder men oh pekihda ma ira kak koasoiong ih duwen neira pwutak. Ni ahnsou me elder menet koasoiong pwopwoudo, ahn elder pwoud awiawih ih, ni kanengamah. Mwurin kisin mihding wet, sistero ahpw tuhwong ahn elder pwoud oh koasoia: “I men kasalehda ahi kalangan ong komwi ni ahnsou me ahmw pwoud sewesehda ahi peneinei.” Mahsen en kalahngan pwukat me mengei oh kadek, ahpw met kin dokedoke mohngiong en elder pwoudo.
19. (a) Elder kan, nin duwen pwihn ehu, kin ni lelepek kapwaiada dah? (b) Dahme kitail koaros anahne nantiong song en wia?
19 Koasoandi en elder kan en apwalih sihpw kan iei ehu ‘kisakis mwahu’ me kohsang rehn Siohwa. (Seims 1:17) Ohl pwukat kaidehn ohl unsek kei; irail duwehte kitail koaros, irail kin wiahda sapwung. (1 Nanmwarki 8:46) Ahpw, nin duwen pwihn ehu, elder kan nan mwomwohdiso kan nin sampah pwon kin ni lelepek kapwaiada dahme Siohwa kupwurki irail en wia—kapwungala, kakehlailda, kaminimin, oh perehla sihpw kan. Eri, emenemen elder kan en koasoanehdi nan eh mohngiong en pousehla apwalih sapwellimen Siohwa sihpw kan ni kadek, oh met pahn kadehde me ih emen kisakis, de kapai ong riarail kan. Oh kitail koaros en nantiong kasalehda atail kalahnganki “kisakis kan me mih rehn ohl akan” sang ni atail pahn peikiong oh uhpaiong irail, oh wauneki irail pwehki ahr doadoahk laud. Ia uwen laud atail kalahngan pwe Siohwa ni limpoak ketikihong kitail ohl akan me kin padahkiong sapwellime sihpw kan: ‘Iei aht pwukoah: en sewese kumwail en papah Koht ni peren!’
Iaduwen Komw Pahn Sapeng?
◻ Dahme kahrehda mwomwohdiso kak rasehng paliwar ehu?
◻ Iaduwen elder kan kak sewese riarail brother kan en perenki papah Siohwa?
◻ Dahme kahrehda atail peikiong elder kan sohte kin itar, ahpw kitail pil anahne en uhpaiong irail?
◻ Ni ahl dah kei kitail kak kasalehda me kitail kin nsenohki elder kan?
[Kilel nan pali 14]
Elder kan kin kapinga meteikan me kin wia uwen me re kak ni arail papah Siohwa
[Kilel nan pali 15]
Sang ahr ngoangki iang doadoahk en kalohk, elder kan kak sewese tohnpeneinei oh meteikan en perenki papah Siohwa
[Kilel kan nan pali 16]
Kitail kin kalahnganki atail elder kan me kin doadoahk laud!