Kristian Elder kan, Iengetail Tohndoadoahk ong Atail Peren

1. Dahme Pohl rongada duwen Kristian kan nan Korint me kahrehiong eh inenen peren?

NAN pahr 55, wahnpoaron Pohl rongada me Kristian kan nan Korint kin ahnsou koaros akamai nanpwungarail. E kin poakepoake irail duwehte pahpa men eh kin poakohng nah seri kan, kahrehda e kadarala rehrail kisinlikou ehu pwehn kapwungirailla. (1 Kor. 1:11; 4:15) Pohl pil padahkihong kompoakepah Taitus en mwemweitla rehn mehn Korint ko oh mwuhr kohla reh ni wasahn peidi en sohp kan nan kahnimw en Troas pwehn padahkihong dahme wiawi. Mwurin sounpwong kei, Pohl mi Troas awiawih Taitus en kohla reh oh ndahng ia iren brother ko nan Korint. E medemedewehte irail. Ahpw Taitus sohte kohla reh oh Pohl eri seiloakla Masedonia. Ahpw Pohl uhdahn perenkihda ih oh Taitus ara tuhpene mwuhr wasao. Taitus padahkihong Pohl me brother ko nan Korint kapwaiada eh kaweido oh re uhdahn men tuhwong ih. Ahnsou me Pohl rongada met, e ‘kalaudelahr eh nsenamwahu.’​—2 Kor. 2:12, 13; 7:5-9.

2. (a) Dahme Pohl ntingkihlahng mehn Korint ko duwen pwoson oh peren? (b) Peidek dah kan kitail pahn sapengala?

² Sohte werei mwurin met, Pohl ntingihedi pil ehu kisinlikou ong mehn Korint ko. E ndahng irail: “Se sohte men wiahda kosonned ong kumwail dahme kumwail pahn pwoson, pwe amwail pwoson me uhdahn kehlail; ahpw se kin iang kumwail doadoahk ong ni pein amwail peren.” (2 Kor. 1:24) Ia wehwehn eh koasoi? Dahme elder kan nan mwomwohdiso kak sukuhlki sang dahme Pohl koasoia?

ATAIL PWOSON OH PEREN

3. (a) Ia wehwehn en Pohl koasoi ni eh nda: “Amwail pwoson me uhdahn kehlail”? (b) Ia duwen elder kan rahnwet arail alasang ahn Pohl mehn kahlemeng?

³ Pohl koasoia irair kesempwal riau me Kristian kan anahne ahneki: pwoson oh peren. Keieu, Pohl koasoia duwen pwoson oh ntingihedi: “Se sohte men wiahda kosonned ong kumwail dahme kumwail pahn pwoson,” oh “amwail pwoson me uhdahn kehlail.” Pohl ese me Kristian ko nan Korint kin papah Koht ni lelepek sang ni pein arail pwoson Koht, a kaidehn pwehki ih de emen tohrohr. E kamehlele me re uhdahn poakohng Koht oh men wia dahme pwung. Eri Pohl sohte anahne kaunda pwoson en rie Kristian ko, oh e sohte pil men wia met. (2 Kor. 2:3) Rahnwet, elder kan kin alasang Pohl oh kamehlele me riarail Kristian kan kin pwoson Koht oh papahki kahrepe pwung. (2 Des. 3:4) Elder kan sohte kin wiahda kosonned kakos kan ong mwomwohdiso. Ahpw re kin sewese riarail Kristian kan wiahda pilipil kan sang ni arail doadoahngki mehn kasukuhl kan sang nan Paipel oh sang arail idawehn kaweid sang sapwellimen Siohwa pwihn. Elder kan rahnwet sohte kin kaunda pwoson en iengerail Kristian kan.​—1 Pit. 5:2, 3.

4. (a) Ia wehwehn en Pohl koasoi ni eh ntingihedi: “Se kin iang kumwail doadoahk ong ni pein amwail peren”? (b) Ia duwen elder kan rahnwet ar alasang Pohl?

⁴ Pohl pil koasoia: “Se kin iang kumwail doadoahk ong ni pein amwail peren.” Ihs me Pohl koasoia me kin iang ih doadoahk? Irail pwukat iei me iang Pohl doadoahk laud pwehn sewese mehn Korint kan. Ia duwen atail ese met? Pwehki nan kisinlikouohte ong mehn Korint ko, Pohl koasoia meh riemen ahnsou me e ntingihedi duwen “Sises Krais . . . me ngehi, Sailas, oh Timoty padahkihongkumwailehr.” (2 Kor. 1:19) Pil ehu, ahnsou koaros me Pohl kin ntingihedi duwen ienge kan me iang ih doadoahk, e kin koasoakoasoia irail kan me iang ih doadoahk laud nan kalohk, duwehte Apolos, Akwila, Persila, Timoty oh Taitus. (Rom 16:3, 21; 1 Kor. 3:6-9; 2 Kor. 8:23) Eri, ni ahnsou me Pohl nda: “Se kin iang kumwail doadoahk ong ni pein amwail peren,” e kin ndindaiong mehn Korint ko me ih oh irail kan me iang ih doadoahk men wia uwen arail kak pwe ren kak sewese mwomwohdiso papah Koht ni peren. Rahnwet, elder kan men wia duwehte. Re men wia uwen arail kak pwehn sewese riarail Kristian kan “pereperen kaudokiong KAUN-O.”—Mel. 100:2; Pil. 1:25.

5. Peidek dahieu me kohwong ekei brother oh sister kan? Dahme kitail anahne medemedewe?

⁵ Me keren, peidek ehu kowohng ekei brother oh sister ngoang kan sang soangsoangen sahpw kan, “Lokaia dah oh wiewia dah me elder men wia me kahrehiong uhk peren?” Kitail pahn koasoiapene arail pasapeng kan. Ni atail wia met, medemedewe soahng kan me elder kan nda de wiahda me kahrehiong uhk peren. Eri, kitail koaros enmedemedewe duwen dahme kitail kak wia pwehn sewese mwomwohdiso en kin pereperen.a

“RAHNMWAHU ONG . . . KOMPOAKEPAI MEHLEL PERSIS”

6, 7. (a) Ia ehu ahl me elder kan kak alasang Sises, Pohl, oh pil sapwellimen Koht ladu teikan? (b) Dahme kahrehda brother oh sister kan kin perenki atail taman ederail?

⁶ Brother oh sister tohto nda me re kin perenki ni elder kan ar kin kasalehda nsenohkin irail. Ehu ahl me elder kan kin wia met iei sang ni arail alasang Depit, Elihu, oh Sises. (Wadek 2 Samuel 9:6; Sohp 33:1; Luk 19:5.) Sapwellimen Siohwa ladu lelepek pwukat kasalehda me re kin nsenohki meteikan sang ni arail ekerkin irail adarail kan. Pohl pil ese uwen kesempwal en tamataman oh doadoahngki eden rie Kristian kan. Kaimwiseklahn ehu nah kisinlikou ko, e kasalehda eden rie Kristian tohtohsang meh 25. Emen rie lih Kristian iei Persis. Pohl nda duwen lih menet: “Rahnmwahu ong . . . kompoakepahi mehlel, Persis.”—Rom 16:3-15.

⁷ Ekei elder kin apwalki tamataman ahd akan. Ahpw ni emen elder eh nantihong taman eden brother oh sister kan, re kin pehm me e nsenohkin irail. (Eks. 33:17) Brother oh sister kan pil kin perenki ni elder kan kin likwerih ederail ni ahnsoun onop en Kahn Iroir de pil mihting teikan.—Pil kilang Sohn 10:3.

E “KIN WIA DOADOAHK LAUD ONG ATAIL KAUN”

8. Ia ehu ahl kesempwal me Pohl kin alasang Siohwa oh Sises?

⁸ Pohl pil kasalehiong meteikan me e nsenohkin irail sang ni eh kin kapinga irail. Met pil wia ehu ahl me elder kan kak sewese riarail brother oh sister kan papah Koht ni peren. Ni ahnsou me Pohl ntinglahng mehn Korint ko, e padahkihong irail me e kin pohlkin irail. E nda: “I kin kapinga kumwail.” (2 Kor. 7:4) Kitail kak kamehlele me dahme Pohl nda kahrehiong brother ko nan Korint en pehm me e poakepoake irail. Pohl pil kapinga mwomwohdiso teikan pwehki arail doadoahk mwahu. (Rom 1:8; Pil. 1:3-5; 1 Des. 1:8) Oh mwurin eh koasoia duwen Persis nan nah kisinlikowo ong mwomwohdisohn Rom, Pohl pil nda me Persis “kin wia doadoahk laud ong atail Kaun.” (Rom 16:12) E sansal me Persis ale kangoang ni eh rong lokaia ko. Ni Pohl eh kapinga meteikan, e kin alasang Siohwa oh Sises.​—Wadek Mark 1:9-11; Sohn 1:47; Kaud. 2:2, 13, 19.

9. Dahme kahrehda koaros nan mwomwohdiso kin peren ni arail kin kapinga emenemen?

⁹ Elder kan rahnwet pil kin ese uwen kesempwal en ndahng riarail brother oh sister kan me re kin kalahnganki irail. (Lep. Pad. 3:27; 15:23) Ni elder men eh kapinga rie Kristian kan, e kin kasalehda me e nsenohkin irail oh kin tetehk arail wiewia mwahu kan. Brother oh sister kan nan mwomwohdiso anahne rong lokaia kangoang sang rehn elder kan. Emen sister me dauliher sounpar 50 nda me sohte me kin kapinga ih ni eh wasahn doadoahk. Re sohte kin nsenohki emenemen oh kin men siaipene. Eri ni emen elder eh kalahngankihong ih dahme e wiahdao nan mwomwohdiso, met kansenamwahwihala ih. E nda: “Met kahrehiong ien pehm me Semei nanleng kin ketin poakepoake ie.” Emen brother me kin apwalih nah seri riemen nda me me keren, emen elder padahkihong ih uwen eh kalahnganki dahme e wiewia. Dahme eldero ndahng ih uhdahn kangoange ih en pousehlahte wia uwen eh kak nan eh papah Koht. E sansal me ni elder men eh kapinga ni mehlel rie Kristian kan, e kin sewese irail ren pousehlahte papah Koht ni peren oh “re sohte pahn luwetala.”—Ais. 40:31.

“KUMWAIL EN WIA SILEPEN MWOMWOHDISOHN KOHT”

10, 11. (a) Ia duwen elder kan arail alasang Nehmaia? (b) Ia duwen elder men eh kak kakehlaka pwoson en rie brother oh sister kan ni ahnsou me e mwemweitla rehrail?

¹⁰ Ia pil ehu ahl kesempwal elder kan kin kasalehda limpoak ong riarail kan oh sewese irail en papah Koht ni peren? Re kin mwadang en sewese irail kan me anahne kangoang. (Wadek Wiewia 20:28.) Ni ahl wet, re kin alasang sapwellimen Koht ladu lelepek kan nan Paipel. Karasepe, Paipel mahsanih me ni ahnsou me Nehmaia tehkada me rie mehn Suhs ko mworusalahr, e wia mehkot me kangoange irail. (Neh. 4:14) Rahnwet, elder kan men wia soahngohte. Ni ahnsou me riarail brother kan kin mworusala, elder kan kin wia dahme re kak pwehn kangoange irail. Elder kan kin song en mwemweitla rehrail ni imwarail kan oh kihong irail “kapai ehu,” me wehwehki, re kin koasoia soahng kan me kin kakehlaka arail pwoson. (Rom 1:11) Ia duwen elder kan ar kak wia met?

¹¹ Emen elder anahne medemedewe kanahieng irail kan me e men kangoange mwohn eh pahn mwemweitla rehrail. Karasepe, e kak pein idek reh: ‘Soangen kahpwal dah kan me brother de sister menet ahneki? Dahme I kak nda pwehn kansenamwahwihala? Iren Paipel dah de poadopoad en ihs nan Paipel me pahn kak kangoange ih?’ Ma elder men kin medemedewe duwen rie brother de sister kan mwohn eh pahn mwemweitla rehrail, e kak nda soahng kan me pahn uhdahn sewese irail, ahpw kaidehn en koasoiahte soahng kan me re kin wiewia rahn akan. Ni eh mwemweitla rehrail, eldero en mweidohng brothero de sistero ren koasoi oh e pahn kin rong kanahieng dahme re nda. (Seims 1:19) Emen sister nda: “E uhdahn kansenamwahu ni emen elder eh kin rong kanahieng.”​—Luk 8:18.

12. Ihs nan mwomwohdiso me anahne kangoang? Dahme kahrehda?

¹² Ihs me kin anahne kangoang sang elder kan? Pohl ndaiong elder ko ren tehk kanahieng “sihpw akan koaros.” Tohnmwomwohdiso koaros anahne kangoang oh pil sounkalohk oh pioneer kan me kin papah ni lelepek erein sounpar tohto. Dahme kahrehda re anahne kangoange sang elder kan? Mendahki arail pwoson Koht kin kehlail, ekei pak re pehm me pein irail solahr kak dadaur pahn kahpwal kan me sampah suwed wet kin kahrehda. Soangen brother oh sister pwukat pil kin anahne sawas. Kitail kilang irair keper ehu me wiawihong Nanmwarki Depit me duwehte met.

APISAI “SEWESEHDA DEPIT”

13. (a) Ni ahnsou dah me Ispipenop pilada en kemehla Depit? (b) Ia duwen Apisai eh kak sewesehda Depit ni ahnsou me anahn?

¹³ Mwurinte Depit eh keidi pwehn wiahla nanmwarki, e peiong Kolaiad, kadaudok en kodon sang Repa. Depit kommwad oh kemehla kodono. (1 Sam. 17:4, 48-51; 1 Kron. 20:5, 8) Sounpar tohto mwuri, nan mahwen ehu nanpwungen mehn Israel oh Pilisdia ko, Depit peiong pil emen kodon. Eden kodono iei Ispipenop, e pil kohsang nan kadaudokohte. (2 Sam. 21:16) Ahpw ahnsowo, kodono kereniong kemehla Depit. Dahme kahrehda? Kaidehn pwehki e solahr nohn kommwad. Paipel mahsanih me “Depit inenen ngirala.” Ahnsou me Ispipenop tehkada me Depit pwangadahr, e medewe me ih ahnsou mwahu me e pahn kemehla. Ahpw Apisai mwadang kohla oh sewesehda Depit oh kemehla kodono. (2 Sam. 21:15-17) Depit kereniong mehla. E uhdahn kalahnganki Apisai eh kin tetehk ih kanahieng oh mwadang sewesehda ni ahnsou me eh mour mihla nan keper. Dahme kitail kak sukuhlki sang met?

14. (a) Dahme sewese kitail en kolokolte atail lelepek nan irair uhdahn apwal akan? (b) Ia duwen elder kan arail kak sewese meteikan en kolokolete arail lelepek oh pwurehng peren? Menlau kihda ehu karasaras.

¹⁴ Sapwellimen Siohwa aramas akan nan sampah pwon kin papahte Koht, mendahki Sehdan oh meteikan kin song en kahrehda en apwal ong irail. Ekei kitail kin ahneki kahpwal kan me mwomwen duwehte kodon kei ong kitail. Ahpw kitail kin uhdahn likih Siohwa, oh ahneki kehl en kolokolte atail lelepek nan irair uhdahn apwal ako, duwehte Depit eh ahneki kehl en kemehla Kolaiad. Ahpw mie pak me kitail kin pehm me kitail sohte ahneki kehl me itar pwehn peiong ahn Sehdan sampah. Nan soangen ahnsou ko, e mengei ong kitail en mworuskihla kahpwal kan me mwowe kitail kin kak dadaur. Ahpw elder men ele kak tehkada duwen atail pepehm oh kihong kitail sawas me kitail anahne ni ahnsou me konehng. Eri kitail kin pehm me kitail kak pousehlahte papah Koht ni peren. Me tohto rehtail alehier sawas ni ahl wet. Pioneer sister men me dauliher sounpar 60 nda: “Ekei ahnsou samwalahr ko, I pehm me I sohte nohn kehlail, oh kalohk kin kahrehda I uhdahn pwangada. Elder men tehkada ei luwetala oh kohdo koasoiong ie. Se koasoia iren Paipel ehu me uhdahn kangoange ie. I kapwaiada eh kaweido oh I paiekihda.” E pil nda: “Ia uwen limpoak en eldero pwehn tehkada ei luwetalahr oh seweseiehda!” E mwahu en ese me mie elder kan me kin nsenohki kitail oh ahnsou koaros onopada en sewese kitail, duwehte Apisai eh kin tetehk pwehn sewese Depit.

RE ESE ME POHL POKPOAKE IRAIL

15, 16. (a) Dahme kahrehda brother oh sister kan poakohng Pohl? (b) Dahme kahrehda kitail kin poakohng elder kan?

¹⁵ Elder kan kin uhdahn doadoahk laud. Ekei pak mwein re sohte kin meir mwahu pwehki irail kin medemedewe laud duwen riarail brother oh sister kan oh mwein re kin pirida ni lukepen pwong pwehn kapakapkin irail de sewese irail. (2 Kor. 11:27, 28) Ahpw elder kan kin perenki wia dahme re anahne wia, duwehte Pohl. Pohl ntinglahng mehn Korint ko: “I pahn netikihla mehkoaros me I ahneki, pil pein ngehi, pwe I en sewesehkin kumwail.” (2 Kor. 12:15) Pwehki Pohl poakohng rie Kristian ko, e “netikihla” pein ih de e doadoahngki eh kehl koaros pwehn kakehlakahda irail. (Wadek 2 Korint 2:4; Pil. 2:17; 1 Des. 2:8) Ihme kahrehda Kristian ko uhdahn poakohng Pohl.​—Wiewia 20:31-38.

¹⁶ Kitail pil kin poakohng elder kan oh kalahngankihong Siohwa eh ketin doadoahngki irail pwehn apwalih kitail. Kitail kin perenki arail kasalehda arail nsenohki emenemen kitail oh arail kin mwemweitdo rehtail pwehn kangoange kitail. Kitail pil kalahnganki arail kin ahnsou koaros onopada pwehn sewese kitail ni ahnsou me kitail pehm me pein kitail solahr kak dadaur pahn atail kahpwal kan. Soangen elder pwukat kin uhdahn doadoahk laud ong atail peren.