Sapwellimen Siohwa Kapai Kan Pahn Kipeiukedi?

“Kapai pwukat koaros uhdahn pahn kohwong uhk oh kipeiukedi, pwehki ke kin karonge kapitien Siohwa ahmw Koht.”​—DEUDERONOMI 28:2, New World Translation.

1. Dahme mehn Israel akan pahn wia ma irail pahn ale kapai kan de keria kan?

AHNSOU me arail kakahnseli nan sapwtehn ni erein sounpar 40 me kereniong nekier, irail mehn Israel akan mihmi nan sapwen Mohap. Sapwen Inouo mih mwohrail. Moses eri tepida ntingihdi pwuhken Deuderonomi, oh audepe kan kin kasalehda duwen kapai kan oh keria kan. Ma mehn Israel akan pahn “karonge kapitien Siohwa” ni ahr kin peikiong Ih, kapai kan pahn “kipeiraildi.” Siohwa kin ketin poakohng irail nin duwen “sapwellime aramas tohrohr akan” oh E kupwurki en doadoahngki sapwellime manaman ong irail. Ahpw, ma irail sohte pahn karonge Ih, re pahn riala.​—Deuderonomi 8:10-​14; 26:18; 28:2, 15.

2. Ia wehwehn lepin lokaiahn Ipru pwukat: “karonge” oh “kipehdi” me ntingihdi nan pwuhken Deuderonomi 28:2?

² Lepin lokaiahn Ipru me kin kawehwehdi “karonge” nan Deuderonomi 28:2 kin kasalehda wiewia ehu me kin kohkohweite oh sohte uhdi. Sapwellimen Siohwa aramas akan sohte pahn ihte karonge Koht ekei ahnsou; ahpw re anahne karonge Ih ahnsou koaros. Ma re pahn wia met, kapai kan sang Siohwa pahn kak kipeiraildi. Lepin lokaiahn Ipru me kawehwehdiong “kipehdi” kin wia lokaia me kin doadoahk ni ahnsoun pwekmen me kin kalap wehwehki “pwakihdi” de “lellahng.”

3. Iaduwen kitail kak kahlemengih Sosua, oh dahme kahrehda met inenen kesempwal?

³ Kaun en Israel, Sosua, pilada en karonge Siohwa oh ihme kahrehda e ale kapai tohto. Sosua mahsanih: “Kumwail pilada rahnwet ihs me kumwail pahn papah . . . A ngehi oh ei peneinei, se pahn papah Kauno [“Siohwa, NW].” Eri, ni ahnsou me aramas akan rong duwen met, irail ahpw sapeng, nda: “Se sohte pahn mweisang Kauno [“Siohwa,” NW] pwe se en uhd papah koht teikan.” (Sosua 24:15, 16) Pwehki lamalam pwung me Sosua ahneki, e wia emen sang rehn aramas malaulau sang eh dih me ale mweimwei en pedolong nan Sapwen Inou. Rahnwet, kitail pahn kereniong pedolong nan Sapwen Inou me keieu kaselel​—paradais nan sampah wet me pahn direkihla kapai kan me deilahsang kapai kan ni mwehin Sosua oh kapai pwukat pahn kohwong aramas akan me kenikenla rehn Koht. Kapai pwukat pahn kipeiukedi? Ma ke pahn karonge Siohwa, ke pahn ale kapai pwukat. Pwehn kakehlailda ahmw pilipil en karonge Siohwa, medemedewe duwen poadopoad en wehin Israel en mahs oh pil duwen mehn kahlemeng en ekei aramas me kitail pahn kak sukuhlikihsang.​—Rom 15:4.

Kapai de Keria?

4. Ni en Koht ketin sapeng kapakap en Solomon, dahme e ketikihong ih, oh iaduwen atail pepehm akan duwen kapai pwukat?

⁴ Ni ahnsou me Nanmwarki Solomon wie kakaun, pali laud en ahnsou, irail mehn Israel akan kin ale kapai kaselel kan me kin kohsang rehn Siohwa. Irail kin paiekihda meleilei oh rehken mwenge oh dipwisou tohto. (1 Nanmwarki 4:25) Edetehn e sohte peki rehn Koht paien sampah kan, ahn Solomon kepwehpwe wiahla mehkot ndand. Ahpw, ni ahnsou e pwulopwul oh soh-koahiek, e kapakapki ah mongiong en peik​—Siohwa eri sapeng eh pekipek oh ketikihong ih erpit oh loalokong. Met kin sewese Solomon en kapwungala aramas ni pwung, en dehdehkihla dahme mwahu sang dahme suwed. Edetehn Koht pil ketikihong ih diren kepwe kan en sampah oh waunla rehn aramas akan, nin duwen emen ohl pwulopwul, Solomon kin kalahnganki katepen kepwehpwe kan ni pali ngehn. (1 Nanmwarki 3:9-​13) Sohte lipilipil ma kitail wia aramas kepwehpwe de soh, ia uwen laud atail kalahngan ma kitail kin paiekihda sapwellimen Siohwa kapai kan oh kepwehpwe ni pali ngehn!

5. Dahme wiawiong mehn Israel oh Suda ni ahnsou me re sohte kin karonge Siohwa?

⁵ Mehn Israel akan manokehla en kasalehda arail kalahnganki sapwellimen Siohwa kapai kan. Pwehki re sohte karonge Ih, keria kan pahn kipeiraildi. Ihme kahrehda, arail imwintihti kan kalowehdi irail oh wehin Israel oh Suda kalipilipala. (Deuderonomi 28:36; 2 Nanmwarki 17:22, 23; 2 Kronikel 36:17-​20) Ahpw, sapwellimen Koht aramas akan sukuhliki sang kalokolok wet me kapai kan me kin kohsang rehn Koht pahn kipe ihte irail kan me kin karonge Siohwa? Luhwen mehn Suhs akan me pwurala uhdakarail nan pahr 537 B.C.E. ahneki ahnsou mwahu ehu en kasalehda ma re ahneki “erpit” oh kesempwaliki arail karonge Koht.​—Melkahka 90:12.

6. (a) Dahme kahrehda Siohwa kadaralahng sapwellime aramas akan Akkai oh Sekaraia en wiewia kokohp? (b) Mehnia mouren kaweid me sansal ni ahnsou me Koht doadoahngki Akkai pwehn kawehwehda sapwellime mahsan?

⁶ Irail mehn Suhs ako me pwurala sapwarail tepida wiahda pei sarawi ehu oh tepida onehda sapahl tehnpas en Serusalem. Ahpw, ni ahnsou me uhwong laud tepida wiawi, arail ngoang luwetala oh arail doadoahk uhdi. (Esra 3:1-3, 10; 4:1-4, 23, 24) Re pil tepida mwohneki dipwisoun sampah kan​—⁠soahng kan me kin kihong irail mour nsenamwahu. Ihme kahrehda, Koht kadaralahng rehrail soukohp Akkai oh Sekaraia en kakehlailada aramas pwukat en pwurehng ngoangki kaudok mehlel. Siohwa doadoahngki soukohp Akkai oh mahsanih: “Nei aramas akan, dahme kumwail pahn mihmihki nan ihmw kaselel kan, a ei Tehnpas Sarawio ahpw pahn wiewia mohn tehnpas ehu? . . . Kumwail sohte kilang dahme wiewiawi ong kumwail? Kumwail padokedi wahnsahpw tohto, ahpw dolung me malaulau. Mie kanamwail mwenge, ahpw kumwail sohte kak medkihla. . . . Oh tohndoadoahk men sohte kak ale pweine me itar en mourki.” (Akkai 1:4-6) Ma re kesehla soahng ngehnin kan pwehn rapahki paien sampah kan​—⁠re sohte pahn kak ale sapwellimen Siohwa kapai kan.​—Luk 12:15-​21.

7. Dahme kahrehda Siohwa mahsanihong mehn Suhs ako: “Kumwail sohte kak ese dahme mepwukat wiewiawihkihong kumwail”?

⁷ Pwehki mehn Suhs akan soupesengkihla arail kedirepw en ehu ehu rahn, re manokehla me kapai kan me kin kohdohng irail duwehte keteu ni ahnsoun rahk pahn lelohng irail ihte ma re pahn kolokol arail lelepek ong Koht mendahki kalokolok. (Akkai 1:9-​11) Ia uwen konehng kaweid wet: “Kumwail sohte kak ese dahme mepwukat wiewiawihkihong kumwail?” (Akkai 1:7) Ni ehu wehwe, Siohwa mahsanih ong irail: ‘Medemedewe oh kilang pahrekpenehn mehpwukat​—⁠amwail doadoahk soh katepe kan nan sahpw kan oh irair en tehnlahn imwen kaudok.’ Mwurinte met, e sansal me mahsen en soukohp akan me kohsang rehn Siohwa lel mohngiongarail pwe re pwurehng onehda sapahl Tehnpas Sarawio oh kanokehla nan pahr 515 B.C.E.

8. Kaweid dahieu me Siohwa ketikihong irail mehn Suhs akan ni mwehin Malakai, oh pwekihda?

⁸ Ahpw, ni mwehin soukohp Malakai, irail mehn Suhs akan pwurehng luwetala ni pali ngehn, pwe re wia meirong soh konehng kan ong Koht. (Malakai 1:6-8) Eri, Siohwa kangoange irail en wahlahng nan Tehnpas Sarawio eisek kis ehu en arail dipwisou kan koaros pwe irail en kak song duwen manaman en Koht, oh kilang me Koht pahn ritingadahng irail dipwisou kesempwal en nanleng oh kamwerehdiong irail soangen kamwahu kan ni uwe ieu me laud. (Malakai 3:10) Irail mehn Suhs akan kin doadoahk laud pwehn alehdi soahng kan me Koht kakete pil ketikihong irail ma re pahn karonge kapitien Koht!​—2 Kronikel 31:10.

9. Kitail pahn kasawihada mouren aramas silimen dah kei me ntingihdi nan Paipel?

⁹ Likin poadopoad en mehn Israel akan, Paipel pil kin kasalehda duwen mour en aramas tohto me alehda kapai kan sang Siohwa pwe re karonge Siohwa, oh Paipel pil kin kasalehda duwen irail akan me ale keria kan pwe re sohte karonge Siohwa. Ni ahnsou wet, kitail pahn kilang dahme kitail kak sukuhliki sang rehn aramas silimen​—Pohas, Napal, oh Ana. E pahn mwahu ma ke kak wadek pwuhken Rud oh pil pwuhken 1 Samuel 1:1​–​2:21 oh 1 Samuel 25:2-​42.

Pohas Kin Karonge Koht

10. Irair dah kei nan mouren Pohas oh Napal kin duwepenehte?

¹⁰ Edetehn Pohas oh Napal sohte memour nan dih ehu, ekei irair akan nan ara mour kin duwepenehte. Karasepe ieu, ohl riemen pwukat me momour nan sapwen Suda. Ira koaros sapwenihkihla sahpw akan oh wia aramas kepwehpwe kan, oh ira koaros pil aleier ahnsou tohrohr ehu en kasalehda limpoak-kadek ong emen me anahne sawas. Ahpw, ihte irair pwukat nan ara mour me duwepenehte.

11. Iaduwen Pohas kasalehda me e kin karonge Siohwa?

¹¹ Pohas kin momour ni ahnsoun sounkopwung en mehn Israel akan. E kin wauneki aramas teikan, oh nah tohndoadoahk kan kin pil wauneki ih. (Rud 2:4) Pohas kin peikiong Kosonnedo, kahrehda e kin tehk pwehn mie luwen wahnsahpw kan ong aramas semwehmwe kan. (Lipai 19:9, 10) Dahme Pohas wia ni ahnsou me e diarada duwen irairo me Rud oh Naomi mihmi loale oh ni ahnsou me e kilang Rud ah kin nantihong apwalih en ah pwoud eh nohno me mahlahr? E poakpoakehda Rud oh padahkiong nah tohndoadoahk akan en mweidong ih en rikada luwen wahnsahpw akan nan eh mwetuwel. Sang eh wiewia limpoak kan oh mahsen kan, Pohas kin kasalehda me ih emen ohl ngehnen me kin karonge Siohwa. Kahrehda, e alehda sapwellimen Koht kupwur kan oh kapai kan.​—Lipai 19:18; Rud 2:5-​16.

12, 13. (a) Iaduwen Pohas kasalehda me e kin inenen kesempwaliki sapwellimen Siohwa kosonned duwen pwainda sapahl? (b) Kapai sarawi dah kei kin kohwong Pohas?

¹² Mehn kadehde me keieu mwahu duwen ahn Pohas ah kin wia karonge Siohwa iei ahnsou me e men kapwaiada sapwellimen Koht kosonned duwen pwainda sapahl ni soh-roporop. Pohas kin wia uwen me e kak pwe sohso en eh peneinei​—ahn Naomi pwoud Elimelek me mehlahr​—en mihmihte nan peneinei en Elimelek. Sang ni koasoandi ehu me wiawi me liohdi men kak “pwoudikihda rien ah pwoud me melahr,” met wehwehki me liohdio kak pwoudikihda emen ohl me kisehn peneinei en eh pwoud me melahr pwe neira pwutak pahn ipwidi oh kolokolete sohso en peneinei. (Deuderonomi 25:5-​10; Lipai 25:47-​49) Rud men wiliandi Naomi oh pwopwoud pwehki Naomi mahlahr oh e solahr kak neitik. Eri, ni ahnsou me emen ohl me kisehn peneinei en Elimelek sohte men sewese Naomi, Pohas uhd pwoudikihda Rud. Aramas akan kin kilang neira pwutak Oped nin duwen nein Naomi oh e pil alehier manaman en kosonnedo en wiahla nein Elimelek.​—Rud 2:19, 20; 4:1, 6, 9, 13-​16.

¹³ Kapai tohto kipehdi Pohas pwehki e men kapwaiada sapwellimen Koht kosonnedo ni soh-roporop. Ki neira pwutak Oped, Pohas oh Rud alehdi pwais kaselel en wiahla kadaudok kan en Sises Krais. (Rud 2:12; 4:13, 21, 22; Madiu 1:1, 5, 6) Sang wiewia soh-roporop kan en Pohas, kitail sukuhlikier me kapai kan kin kipehdi irail kan me kin kasalehda limpoak ong aramas teikan oh kapwaiada sapwellimen Koht kosonned akan.

Napal Sohte Kin Peik

14. Soangen ohl dah Napal?

¹⁴ Napal kin weksang Pohas, e sohte kin peikiong Siohwa. E kauwehla sapwellimen Koht kosonned: “Ke en poakohng mehn mpomw duwehte omw kin poakohng pein uhk.” (Lipai 19:18) Napal sohte kin kesempwaliki soahng ngehnin kan; ih aramas emen me “inenen lemei oh kin wie suwed akan.” Pein nah ladu kan kin nda me e wia “ohl soh katepe men.” Ede kin inenen konehng ih, pwe Napal kin wehwehki “pweipwei.” (1 Samuel 25:3, 17, 25) Eri, dahme Napal pahn wia ni ahnsou me e ahneki ahnsou mwahu en kasalehda kadek ong emen me anahne sawas​—iei Depit, me keidi en Siohwa?​—⁠1 Samuel 16:13.

15. Iaduwen Napal wiaiong Depit, oh iaduwen Apikail kin weksang eh pwoud?

¹⁵ Ni ahnsou me Depit oh nah aramas akan kin mihmi nan wasa me nein Napal mahn akan kin mih ie, irail ahpw perehla nein Napal mahn akan sang aramas lipirap akan, oh irail sohte peki pweinen ahr doadoahk. Emen silipen sihpw en Napal koasoia met, “Re apwalih kiht ni rahn oh nipwong erein ahnsou me se mihmi rehrail oh iang apwahpwalih nait pelinmen kan.” Ahpw, ni ahnsou me nein Depit meninkeder kan peki rehn Napal ekis kanarail mwenge, Napal ahpw “weriwer oh lipwoare irail” oh sohte kihong irail kanarail mwenge. (1 Samuel 25:2-​16, NW) Ahn Napal pwoud, Apikail, eri mwadangete kihpene mwenge kan oh wahla rehn Depit. Depit inenen lingeringer pahn Napal eri e pilahn en kemehla Napal oh nah aramas akan. Ahpw, pwehki dahme Apikail wia kahrehda aramas tohto kakete mour​—⁠Depit sohte kemehla irail​—⁠oh pil ahn Apikail wiewia mwahu sewese Depit en dehr dipkihda dipen kemehla aramas. Ahpw, e sansal me noarok oh lemei me inenen laud mehlel rehn Napal. Eri, mpen rahn eisek mwuri, “Kauno ahpw ketin kaloke Napal, e ahpw mehla.”​—1 Samuel 25:18-​38.

16. Iaduwen kitail kak kahlemengih Pohas oh tateki wiewia kan en Napal?

¹⁶ Eri, e sansal me Pohas oh Napal kin inenen wekpeseng! Kitail anahne soikala wiewia lemei oh roporop me Napal kasalehda, oh kitail en kahlemengih Pohas ni eh kin kasalehda kadek oh soh-roporop. (Ipru 13:16) Kitail kak wia met ni atail kin kapwaiada kaweid en wahnpoaron Pohl: “Eri nindokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Rahnwet, sapwellimen Sises “sihpw teikan,” irail Kristian akan me ahneki koapworopwor en mour nan sampah, kin ahneki pwais kaselel ieu en wia mwahu ong sapwellimen Siohwa me keidi, iei luwen me keidi kan en 144,000, me pahn ale mour soutuk nanleng. (Sohn 10:16; 1 Korint 15:50-​53; Kaudiahl 14:1, 4) Sises kin kilangwong wiewia limpoak pwukat nin duwen me kin wiawiong pein ih, oh wiewia mwahu pwukat kin imwikihla sapwellimen Siohwa kapai kan.​—Madiu 25:34-​40; 1 Sohn 3:18.

Kasongosong kan oh Kapai kan me Ana kin Lelohng oh Ale

17. Ana lelohng kasongosong dahieu, ahpw soangen madamadau dahieu me e ahneki?

¹⁷ Sapwellimen Siohwa kapai kan pil kohwong lih lelepek, Ana. E kin kousoan rehn eh pwoud, Elkana, nan sahpw nahnahn Epraim. Nin duwen Kosonnedo kin mweidong, Elkana pil pwoudiki emen lih me ede Penina. Ana sohte neitik, oh met mehkot kanamenek ong lihen Israel kan, ahpw Penina me neitik ekei seri kan. (1 Samuel 1:1-3; 1 Kronikel 6:16, 33, 34) Ahpw, Penina sohte sewese oh kamweitiala Ana, e uhd kin kaloke oh kasarowe ih lao lel Ana sengiseng oh solahr men mwenge. Suwed sang met, Penina kin wia met “ni ehu ehu sounpar,” ni ahnsou me arail peneinei kin kohlahng Sailo nan Tehnpas Sarawi en Siohwa. (1 Samuel 1:4-8) Ia uwen lemei oh soh kadek en Penina, oh ia uwen met kin wia kasongosong laud ong Ana! Ahpw, sohte pak ehu me Ana kapwukoahki Siohwa kasongosong wet; oh sohte pak ehu me e mihmi ni imwe oh sohte iang eh pwoud kohla Sailo. Ihme kahrehda, kapai laud ehu pahn kipehdi ih.

18. Soangen mehn kahlemeng dahieu me Ana wia ong kitail?

¹⁸ Ana wia mehn kahlemeng mwahu ong sapwellimen Siohwa aramas akan nan rahnwet, keieu ong irail akan me kin nsensuwedkihla lokaia soh-kadek kan. Ni ahnsou me met pahn wiawi, e sohte mwahu en kelehpwla. (Lepin Padahk 18:1) Ana sohte kin mweidong kasongosong wet en kaluwetala eh perenki iang mih nan wasa me padahk en Mahsen en Koht kin wiawi oh wasa me sapwellime aramas akan kin pokonpene ong kaudok. Met sewese ih en kolokolete eh kehl ni pali ngehn. Uwen loal en eh kehl ni pali ngehn kin sansal nan eh kapakap kaselel me ntingihdi nan pwuhken 1 Samuel 2:1-​10.a

19. Iaduwen kitail kak kasalehda atail kalahnganki soahng ngehnin kan?

¹⁹ Nin duwen sapwellimen Siohwa ladu kan en nan rahnwet, kitail sohte kin wia atail kaudok nan Tehnpas Sarawi ehu. Ahpw, kitail kak kasalehda ia uwen laud atail kalahnganki soahng ngehnin kan duwehte Ana kin wia. Karasepe ieu, kitail kak kasalehda atail kalahngan loal ong paien nanleng kan sang ni atail kin ahnsou koaros de kaukaule iang towehda mihding en Kristian akan oh kapokon kan. Kitail en doadoahngki ahnsou pwukat en kangoange meteikan nan kaudok mehlel en Siohwa, me mweidohng kitail “en kin papah Ih oh dehr perki mehkot; pwe kitail en kin mwakelekel oh pwung.”​—Luk 1:74, 75; Ipru 10:24, 25.

20, 21. Kapai dahieu me Ana alehdi pwehki e kin lelepek ong Koht?

²⁰ Siohwa mahsanih lelepek me Ana kasalehda oh e ketikihong ih kapai tohto. Ni ehu ahnsou me eh peneinei wia arail seiloklahng Sailo duwehte me re kin wia ehu ehu sounpar, Ana eri sengiseng oh kapakap ohng Koht oh e inoukihda kehlail nan kapehde: “Maing Kaun Wasa Lapalap, komw ketin mahsanih sapwellimomwi lidu menet! Komw ketin mwahngih ei apwal oh ketin kupwurei ie! Komw dehr ketin likidmelieiehla! Ma komw pahn ketin kupwurehiong ie emen pwutaken, I pahn inoukihda met me I pahn kasarawihong komwi erein eh mour unsek, oh e sohte pahn sehkasang pitenmoange.” (1 Samuel 1:9-​11) Koht ketin karonge pekipek me Ana wia oh ketin kapaiakihda ih pwutak emen, oh ih eri kihong ede Samuel. Ni ahnsou me e solahr kin kadihdi serio, e ahpw wahlahng Sailo pwe e pahn kak papah nan Tehnpas Sarawio.​—1 Samuel 1:20, 24-​28.

²¹ Ana kin kasalehda me e kin poakohng Koht oh kapwaiada eh inou me pid Samuel. Nna, medemedewe duwen kapai laud kan ih oh Elkana paiekihda pwehki neira pwutak kin papah nan sapwellimen Siohwa Tehnpas Sarawio! Kristian pahpa oh nohno tohto kin pil ahneki soangen peren oh kapai kan ni ahnsou me neirail pwutak kan oh serepein kan kin papah nin duwen pioneer kan, tohn Bethel kan, de ni ahl teikan me kin kawauwih Siohwa.

Karonge Siohwa Ahnsou Koaros!

22, 23. (a)Dahme pahn wiawiong kitail ma kitail pahn karonge kapitien Siohwa? (b) Dahme kitail pahn sukuhliki nan artikel en mwuhr?

²² Dahme pahn wiawiong kitail ma kitail pahn ahnsou koaros karonge Siohwa? Eri, kitail pahn kepwehpwe ni pali ngehn ma kitail pahn poakohng Koht ni mohngiong unsek oh kapwaiada atail inou ong Ih. Mendahki kitail anahne dadaurete oh sohte lohdi pahn kasongosong laud kan, sapwellimen Siohwa kapai kan pahn uhdahn kipekitaildi​—pali laud en ahnsou ni ahl akan me kitail sohte kin kasik.​—Melkahka 37:4; Ipru 6:10.

²³ Kapai tohto pahn kohwong sapwellimen Koht aramas akan ni ahnsou kohkohdo. Pwe “pokon kalaimwun” kin karonge Siohwa ni peik, irail pahn pitsang “kahn kamakam kowahlap” oh irail pahn pil paiekihda peren kan en mour nan sapwellimen Koht sampah kapw. (Kaudiahl 7:9-​14; 2 Piter 3:13) Iei ih ahnsou me Siohwa pahn kaitarala ni unsek ineng pwung kan en sapwellime aramas akan koaros. (Melkahka 145:16) Artikel en mwuhr pahn kasalehda me pil ni ahnsouwet, irail akan me kin karonge kapitien Siohwa kin alehdi ‘soangen wiawi sapan koaros oh kisakis mwahu koaros kin kohdihdo sang nanleng.’​—Seims 1:17.

[Nting tikitik me mi pahs]

Ke Tamataman?

• Dahme poadopoad en wehin Israel padahkiong kitail duwen kapai kan me kin kohsang rehn Koht?

• Iaduwen Pohas oh Napal wekpeseng?

• Iaduwen kitail pahn kak kahlemengih Ana?

• Dahme kahrehda kitail anahne karonge kapitien Siohwa?

[Kilel nan Pali 8]

Nanmwarki Solomon kapakapki ah mongiong en peik, oh Siohwa ketin kapaiada ih oh ketikihong ih erpit

[Kilel nan Pali 10]

Pohas kin wauneki aramas oh pil kadek ong irail

[Kilel nan Pali 13]

Ana me ale kapai laud kan pwehki e kin likih Siohwa