Ke Kin Wia Kamwahu Ehu Ong Pein Uhk?

¹ Rahnwet, aramas rar rar kei men ese iaduwen re pahn kamwahuwihala arail kahpwal kan oh ahneki peren nan arail mour. Re kin perenki wadek soangen pwuhk kan me kin audaudki kaweid me re koapworopworki pahn sewese irail en kamwahuwihala arail kahpwal kan oh re kin pil koapworopworki pwihn en aramas akan me kin kihda kaweid pwehn kamwahuwihala arail mour. Mwein ekei kin kasalehda duwen sawas me re alehier sang pwuhk pwukat oh pwihn pwukat. Ahpw, ma ke pahn kilang duwen arail irair en mour, ke lemeleme pali laud en aramas nsenamwahu oh perenki mour pwehki soangen kaweid pwukat? Uhdahn soh!​—1 Kor. 3:​18-​20.

² Ni pali teio, Sounkapikpatail kin kihong aramas me men rong soangen kaweid me keieu mwahu ni soh isepe. Siohwa kin kupwurki aramas koaros en paiekihda sapwellime padahk kan. Ni kadek-sapan, e ketikihong aramas akan sapwellime Mahsen pwehn kaweidih irail en wia dahme pwung, oh e kin ketin kahrehda Rongamwahu en sapwellime Wehi en lohkseli wasa koaros nan sampah. (Mel. 19:​7, 8; Madiu 24:14; 2 Tim. 3:​16) Ma kitail pahn peikiong sapwellimen Siohwa kosonned akan, kitail pahn kak ahneki peren nan atail mour.​—Aiseia 48:17, 18.

³ Sapwellimen Siohwa kaweid kin mwahu sang pwuhk kan me kin audaudki kaweid sang aramas de soangen prokram kan me sampah kin koasoanehdi pwehn kamwahuwihala pein kitail. Kitail kak ale sawas me anahn oh kapai kan ma kitail me pahn wia uwen me kitail kak en doadoahngki mwahu koasoandi kan me Siohwa koasoanehdi ong kitail me sansal sang nan sapwellime Mahsen oh sapwellimen pwihn.​—1 Pit. 3:​10-​12.

⁴ Kamwahuwihala Pein Kowe Sang Kaweid me Ke Kin Ale Nan Mihding kan en Mwomwohdiso: Rahnwet, Siohwa kin kasalehda me e kin nsenohkin kitail ni e kin padahkiong kitail sapwellime ahl akan, oh kitail kak ale kapai kan ma kitail pahn peikiong sapwellime kaweid. Mihding limau me kin wiawi wihk koaros kin kasalehda sapwellimen Siohwa limpoak oh nsenoh. Ahnsou me kitail kin iang towehda mihding kan, atail kin sukuhliki duwen Koht pahn lalaudla. Kitail kin sukuhliki iaduwen kitail pahn pere pein kitail sang dahme suwed ni atail pahn karanih Siohwa. Ni ahl wet, kitail kak perenda.

⁵ Pil ehu, nan mihding kan en mwomwohdiso, kitail kak “langahda douluhl mohngiongatail kan.” (2 Kor. 6:​13) Met kin wehwehki me kitail pahn nantihong esehla tohnmwomwohdiso teikan. Kitail kak paiekihda kangoang me kin wiawi nanpwungatail, duwehte me wahnpoaron Pohl koasoia duwen nan sapwellime kisinlikou ong mwomwohdiso en Rom. (Rom 1:​11, 12) Ahnsou me e ntingwohng mehn Ipru kan, e kaweidih irail en dehr tokedihsang tiahk en pokonpene nin duwen Kristian akan.​—Ipru 10:24, 25.

⁶ Ma kitail pahn nsenohki meteikan, kitail kak ahneki peren nan atail mour. Kangoang kin kohwong kitail en rapahki ahl akan en sewese meteikan en ahneki peren mehlel. Atail mihding kan en Kristian kin sewese kitail en ale kamwahupatail oh pil kamwahupen irail me kitail kin werekiong. Kitail anahne sewese meteikan sang nan mohngiongatail.

⁷ Wahnpoaron Pohl pil koasoia ireohte ahnsou me e kaweidih Timoty ni eh mahsanih: “Kaiakaiahne pein kowe pwe ken kak lelepek ong Koht nan ahmw mour.” (1 Tim. 4:7) Kitail kak idek pein rehtail: ‘I kin wie kaiakaiahne pein ngehi? I kin sukuhliki dahme I pahn wie ma I pahn ale kamwahupei sang dahme I kin rong nan mihding kan en mwomwohdiso?’ Atail pasapeng en peidek pwukat pahn “ei” ma kitail pahn rong kanahieng padahk kan nan mihding kan oh doadoahngki kaweid pwukat nan atail mour. Ma kitail kin doadoahngki masatail kan en pwoson, kitail sohte pahn medemedewe duwen brother kan me wia padahk, ahpw kitail pahn tamataman me Siohwa me kin wia atail Sounpadahk Lapalap oh Ih me kin ketin padahkiong kitail soahng koaros me kitail kin sukuhliki nan mihding kan.​—Aiseia 30:20.

⁸ Theocratic Ministry Sukuhl oh Service Mihding: Mihding riau pwukat kin sewese kitail en koahiekla nan kalohk. Theocratic Ministry Sukuhl iei sukuhl me Society koasoanehdi pwe tohnsukuhl kan en kaukaule ale kaweid. Ke kak kasalehda ahmw kekeirada nin duwen sounkapahrek men oh sounpadahk men me kin koahiek en padahkiong aramas Mahsen en Koht. Ahpw, ma ke pahn paiekihda sang sukuhl wet, ke pahn anahne iangala sukuhlo, kaukaule iang towehda oh wia uwen me ke kak ni ahmw pahn wia ahmw padahk kan. Ma ke pahn ale kaweid me kohwong uhk oh doadoahngki kaweid pwukat, ke pahn kak kekeirada.

⁹ Service Mihding kin kasukuhlih kitail duwen kesempwalpen doadoahk en kalohk en Kristian oh e pil kin kasalehda dahme kitail pahn wia ni atail pahn iang doadoahk en katohnpadahk. Kowe oh ahmw peneinei kin paiekihda sang mihding riau pwukat? Ehu pwopwoud en Kristian kawehwehda: “Nan Service Mihding ehu, se rong me e pahn mwahu ma se pahn wadekpene iren rahn nin duwen peneinei. Mahs, se sohte kin wia met, ahpw met, se kin wia.” Iaduwen re ale kamwahuparail? Re wehkada: “Se diarada me ahnsou me se kin kohpene oh mwengehn soutik, se kin inenen peren. Se sohlahr kin akamaipene.” Iaduwen​—⁠seri tikitik kan kin paiekihda sang mihding kan? Ei. Emen nohno koasoia: “E kin sansal me neit seri kan kin mwekidki dahme re kin rong nan mihding kan. Rahn teio, se diarada me neit pwukat me sounpahr weneu kin wia lokaia likamw. Ahpw, nan mihding en wihko, keieun padahk kin pid duwen lokaia likamw. E sansal me neit pwutako ese me e sapwung pwe ahnsou padahko wiawi, e kilang eh pahpa oh tohrekdi nan sehr oh e kin mesen nsensuwed. E uhdahn wehwehki duwen oaralap en padahko, eri, e sohla kin likamw mwurin padahko.”

¹⁰ Emen sister me kin pioneer koasoia me e kin peren pwe nan Service Mihding, re kin koasoia duwen iren sawas kan me kin kak sewese kitail en kamwahuwihala atail kalohk. Pwekihda? E kawehwehda: “Likamwete ahi padahk kin duduwehte ahnsou koaros. Ekei pak, I kin lemeleme me padahk kan me kin mihmi nan Atail Doadoahk Ong Wehio sohte pahn pweida. Ahpw, nan Service Mihding, ahnsou me I kin rong kangoang me kitail en song padahk kan, I kin ngoangki wia padahk pwukat. Ahi wia met kin sewese ie en perenki ahi kalohk!” Wihk kei mwuri, brother kan kaweidih kitail en tepida onop en Paipel ahnsou me kitail kin tepin tuhwong aramas akan, oh I eri tepida onop en Paipel rehn emen serepein me kin kapakapki sawas sang Koht.

¹¹ Ni ahnsou me ke kin rong padahk me kin koasoia pilipil kan me kitail kin wia, ke kin pehm me Siohwa kin mahsen ong uhk? Emen brother kin pehm duwehte met. E koasoia: “Nan ehu mihding me ahpwtehn wiawi, emen brother koasoia soangen mehn kamweit me mwahu ong Kristian kan en iang oh pil kilang oh soangen mehn kamweit me sohte mwahu. I kin perenki kilang pakir nan TV. Ahpw, mwurin padahko, I wehwehki me pakir kin wia soangen mehn kamweit me sohte mwahu Kristian akan en iang oh pil kilang. Eri, mwurin mwo, I sohla kin kilang.” Ei, brother menet wehwehki me e kin perenki kilang tiahk lemei oh pei, ahpw, e mwekidki kaweid me pid ire wet oh kapwaiada kaweid wet ni aktikitik.​—Mel. 11:5.

¹² Kapahrek ong Wehipokon, Onop en Kahn Iroir, oh Pwuhk Study en Mwomwohdiso: Wihk koaros, oaralap en Kapahrek ong Wehipokon kin wekpeseng. Dahme ke kin sukuhliki sang padahk pwukat? Emen ohl pwopwoud Kristian koasoia iaduwen e kin paiekihda: “Ehu kapahrek ong wehipokon kin koasoia duwen wahn ngehn kan. Brother me wia padahko koasoia dahme pein ih kin wia pwehn kekeirada wahn ngehn kan: e kin pilada wahn ngehn ehu oh nantihong doadoahngki nan wihko pwon. Ni imwin wihko, e kin medemedewe ma e kasalehda wahn ngehno de soh. Wihk mwuri, e kin pilada pil ehu wahn ngehn pwehn kasalehda. I perenki dahme e koasoia oh song en wia duwehte.” I inenen perenki dahme I sukuhliki oh iaduwen I pahn kak doadoahngki dahme I sukuhliki!

¹³ Onop en Kahn Iroir kin sewese kitail en doadoahngki kaweid en Paipel nan soangsoangen irair en mour. Met kin kameleileidi kitail mendahki ma soahng tohto kin kak wia kapwunod kan nan atail mour. Onop en Kahn Iroir kin pil sewese kitail en wehwehki duwen padahk kan me kawehwe kapw kin kohda. Karasepe ieu, kitail soh paiekihda artikel kan me mihmi nan Watchtower (lokaiahn wai) en May 1, 1999 (artikel pwukat mihmi nan Kahn Iroir en October 1999​—⁠lokaiahn Pohnpei) oh oaralap kan koasoia: “Soahng Pwukat Koaros Uhdahn Pahn Wiawi,” “Mehmen Me Wadek Met, En Wehwehki,” oh “En Pepehd oh En Pwerisek!” Iaduwen ke mwekidki onop pwukat? Ke kin kasalehda sang ahmw wiewia kan me ke mwekidki kaweid en Sises me pid ahnsou kohkohdo? Ke kin kaunopada pein kowe ong dahme pahn wiawi ahnsou me “Sansal Kansensuwed Likemisiko . . . pahn uhda nan wasa sarawio”? (Madiu 24:15-​22) Ke kin kasalehda sang ahmw mehn akadei kan oh ahmw mour me ke kin keieu kesempwaliki, kaidehn en kepwehpwehla, ahpw en kasarawi mwaren Siohwa nan ahmw mour? Nan Onop en Kahn Iroir, kitail soh kin sukuhliki en wia kamwahu ehu ong pein kitail ahnsou wet?

¹⁴ Medewehla duwen soahng tohto me kitail kin sukuhliki nan Pwuhk Study en Mwomwohdiso wihk koaros. Ni ahnsou wet, kitail wie onop en brochure me oaralap koasoia Dahme Koht Kupwurki Kitail en Wia? Sang ahnsou me kitail tepida onop brochure lel met, ke soh kin kilang me ahmw pwoson wie kehlailla ehu ehu wihk? Atail onop kin kakehlail atail nanpwung mwahu rehn Siohwa oh e kin kaunopada kitail ong mour soutuk.

¹⁵ Siohwa kin Padahkiong Kitail Iaduwen Kitail Kak Ahneki Peren Mehlel Nan Atail Mour: Ma kitail pahn peikiong sapwellimen Koht kosonned akan, kitail sohte pahn lelohng kahpwal laud kan oh uhd nsensuwedki kahpwal pwukat. Pil ehu, kitail pahn ahneki peren mehlel nan atail mour. Ma kitail pahn kekeid nan sapwellimen Siohwa ahl akan, kitail sohte pahn mwomwohd oh kilangwei, ahpw kitail pahn uhdahn wia dahme pwung. Oh irail me kin uhdahn wia doadoahk me Koht kin padahkiong kitail en wia pahn ahneki peren mehlel.​—1 Kor. 3:9; Seims 1:​25.

¹⁶ Medemedewe laud iaduwen ke pahn doadoahngki kaweid kan me ke kin sukuhliki nan mihding kan en mwomwohdiso. (Sohn 13:17) Papah Koht ni ngoang oh sang nan mohngiong unsek. Ma ke wia met, ke pahn uhdahn peren. Ahmw mour pahn nsenamwahu oh katapan. Ei, ke pahn wia kamwahu ehu ong pein uhk.