Paiekihda Laud Sang Mihding en Tuhpenehn Kalohk
1. Iaduwen mihding en tuhpenehn kalohk kak sewese kitail?
1 Tuhpenehn kalohk kan me katapan kin kihda mehn kangoang oh kaweid kan me ke kak doadoahngki mwohn atail pahn kohla kalohk. E kin kahrehda kitail en kak iang sounkalohk teikan nan doadoahk en kalohk pwe kitail en kak ale sawas oh kasukuhl. (Lepin Padahk 27:17; Eklesiasdes 4:9, 10) Dahme kitail kak wia pwe kitail en paiekihda laud nan mihding pwukat?
2. Ia ekei sawas kan me ih me kihpeseng kalohk anahne tehk?
2 Ih me kin Kihpeseng Pwihn en Kalohk: Ire kan me kin kohda nan mihding pwukat sohte kin ahnsou koaros ntingdi mwowe. Ihme kahrehda, kaunopada mwahu anahn ma ke pahn kihpeseng kalohk. Ke dehr kin ahnsou koaros ihte koasoia iren rahn, ma iren rahno kin pidada duwen doadoahk en kalohk en rahno eri ke kak doadoahngki. Medewehda dahme kak kihda sawas me irail kan me iang kalohk rahno kak doadoahngki. Karasepe, ke mwein men koasoia de pil kamwomwada ehu padahk. Ke kak pilada en kousapahlih ehu ire sang nan pwuhken Reasoning, pwuhken Ministry School, de ehu padahk sang nan Service Mihding me ahpwtehn wiawi. Ni ahnsou teikan, ke kak medewe dahme ke kak wia pwehn kamwahuwihala ehu kahpwal me pahn pwarada nan ahmw wasahn kalohk, de ke kak koasoia iaduwen ke kak kahrehong onop meteikan en men rong oh tepiada onop Paipel, keieu ma tohto sounkalohk kan pahn kohla rehn arail Return Visit kan. Sohte lipilipil dahme ke koasoia, nantiong en ngoangki oh kihda mehn kangoang.
3. Ia uwen reirei mihdingo pahn wiawi, oh dahme pahn koasoandier mwohn e pahn imwisekla?
3 Tepiada mihding ni ahnsou kileldi mehnda ma ke ese me mie ekei me pahn pwand. Doadoahngki mehn tenek mwahu ni ahmw pahn kihpeseng pwihn en kalohk, oh kihda wasahn kalohk ong irail kan me anahne. Duwen reirei en mihdingo, sohte pahn reirei sang minit 10 de 15 oh pil mwotomwot sang ma mihding en mwomwohdiso pahn wiawi mwuri. Mwohn ahmw pahn kanekehla mihdingo, koaros pahn esehier ihs me re pahn iang oh iawasa re pahn kalohk ie. Mihdingo pahn imwikihla kapakap.
4. Dahme kak sewese koaros en paiekihda laud mihding en kalohk?
4 Ke Kak Sawas: Ong mihding en mwomwohdiso kan, kitail kin kasalehda wahu ong Siohwa oh nsenohki meteikan sang ni atail pahn mwadang kohla. Iang pasapeng. Ke kak mweidala ih me wia mihding en kalohk en kilelehiong uhk ihs me ke pahn iang de ke kak pilada ihs me ke pahn iang mwohn mihdingo. Ma ke pahn pein wiahda ahmw koasoandi kan nantihong en “esehla meteikan” sang ni ahmw pahn iang sounkalohk teikan, ahpw kaidehn kompoakepahmw keren kan te. (2 Korint 6:11-13) Ahnsou mihdingo pahn nek dehr nantihong en kawekihla koasoandi kan, oh mwadang kohla nan ahmw wasahn kalohk.
5. Ia kahrepen mihding en kalohk?
5 Kahrepen mihding en kalohk kin wiawi pil duwehte kahrepen mihding en mwomwohdiso E kin koasoandi en wiawi pwe kitail en kak “nsenoh sawaspene ni kasalepen atail limpoak oh atail wiewia mwahu kan.” (Ipru 10:24, 25) Ma kitail kin nantiong en paiekihda sang nan mihding pwukat, kitail pahn ale sawas en wia atail doadoahk en kalohk—en wia ‘doadoahk mwahu’ ehu!
[Peidek en Onop]