Tuhpenehn Kalohk me Kin Kapwaiada Kahrepen Mihting Wet
1. Ia kahrepen tuhpenehn kalohk?
1 Ehu ahnsowo, Sises ketin tuhwong sapwellime tohnpadahk 70a mwohn ar kohla wia doadoahk en kalohk. (Luk 10:1-11) E ketin kangoange irail sang ni eh katamankihong irail me re sohte pahn kelehpw oh me Siohwa “kaunen rahket,” pahn ketin kaweid irail. E pil ketikihong irail kaweid kan me kaunopada irail en wia doadoahk wet, oh e ketin koasoaneiraildi ni “wad riemen.” Rahnwet, tuhpenehn kalohk me kitail kin wia mwohn atail kohla kalohk kin pil wia duwehte met. E kin kangoange, kaunopada, oh koasoanehdi kitail.
2. Ia pahn kin uwen werei en tuhpenehn kalohk?
2 Rahn teio, tuhpenehn kalohk kin reireiki minit 10 lel 15, me iangahki en koasoanehdi pwihn kan, pilada wasahn kalohk, oh kapakap. Met koasoandi wekidekla. Tepisang April, tuhpenehn kalohk pahn reireiki minit limau lel isuh. Ahpw, ma tuhpenehn kalohk pahn wiawi mwurin mihting en mwomwohdiso ehu, e pahn mwotomwotsang minit limau lel isuh, pwehki irail kan me iang tuhpenehn kalohk ahpwtehn alehier ire tohto sang nan Paipel. En wia mihting mwotomwot ong tuhpenehn kalohk pahn kihong kitail ahnsou laud nan doadoahk en kalohk. Pil patehng met, ma pioneer kan de sounkalohk kan tepidahr arail doadoahk en kalohk mwohn tuhpenehn kalohk, ahnsou mwotomwotte me re pahn anahne uhdi ong tuhpene wet.
3. Ia duwen tuhpenehn kalohk eh kak koasoandi mwahu pwe en kak keieu sawas ong sounkalohk kan?
3 Tuhpenehn kalohk pahn anahne koasoandi mwahu pwe en kak uhdahn sawas laud ong sounkalohk kan. Nan mwomwohdiso tohto e kin mwahu pwihn en kalohk kan en tuhpene wasa kan me wekpeseng ahpw kaidehn koaros tuhpene wasakiste. Ele met pahn kamengeiongala sounkalohk en kohla wasahn tuhpenehn kalohk oh wasahn kalohk. Koasoandi ong irail sounkalohk kan kak mwadang wiawihda, oh ele e pahn mengeiong sounapwalih pwihnen kalohk kan en kin tetehk mwahu irail kan me re pwukoahki. Pwihn en elder kan kak koasoiapene irair en arail wasa kan oh koasoanehdi dahme pahn keieu mwahu. Mwohn kaimwisekihla kapakap en tuhpenehn kalohk, koaros anahne ese iawasa oh ihs me re pahn iang kalohk.
4. Dahme kahrehda kitail en dehr medewe me tuhpenehn kalohk sohte nohn kesempwal duwehte mihting en mwomwohdiso teikan?
4 Kesempwal Duwehte Mihting en Mwomwohdiso Teikan: Pwehki tuhpenehn kalohk eh kin wiawi ong kamwahupen irail kan me pahn kohla kalohk, mwein kaidehn tohnmwomwohdiso pwon pahn iang towehda. Ahpw, met sohte wehwehki me e sohte wia mehkot laud de sohte nohn kesempwal duwehte mihting en mwomwohdiso teikan. Duwehte atail mihting kan koaros, tuhpenehn kalohk iei sawas ehu sang Siohwa me kihong kitail ahnsou mwahu en kangoange emenemen ong kasalepen limpoak oh wiewia mwahu kan. (Ipru 10:24, 25) Ihme kahrehda, me kihpeseng pwihnen kalohk kan pahn anahne kaunopada mwahu pwe eh padahk en kak kawauwih Siohwa oh irail kan me iang tuhpene en kak paiekihda. Ma e konehng en wia met, sounkalohk kan me pahn iang kalohk anahne nantihong iang tuhpene.
Kitail sohte pahn wiahki tuhpenehn kalohk mehkot sohte laud de sohte nohn kesempwal duwehte mihting en mwomwohdiso teikan
5. (a) Ia ahn sounapwalih en kalohk eh pwukoa ong koasoanehdi tuhpenehn kalohk? (b) Ia duwen sister men eh pahn kihpeseng pwihnen tuhpenehn kalohk?
5 Kaunopada me Emen me Pahn Kihpeseng Pwihnen Kalohk Kin Wia: Pwe emen en kak kaunopada eh padahk ong mihting ehu, e anahne alehdi koasoandi wet mwohn eh pahn wia eh padahk. Met pil duwehte ong tuhpenehn kalohk. Mehlel, ahnsou me pwihn en kalohk kan tuhpene wasa kan me wekpeseng, sounapwalih en ehuehu pwihnen kalohk kan de sounsawasparail kan me pahn kin kihpeseng pein arail pwihnen kalohk. Ahpw, ahnsou me mwomwohdiso pahn tuhpenehn kalohk wasa ehute, sounapwalih en kalohk pahn koasoanehdi emen en kihpeseng pwihnen kalohk. Ekei sounapwalih en kalohk kan kin kihong irail kan me kin kihpeseng pwihnen kalohk kan koasoandi oh kihda koasoandi wet wasahn pakair. Sounapwalih en kalohk pahn anahne medewe mwahu ni ahnsou me e pahn wiahda koasoandi ong ihs me pahn kihpeseng pwihnen kalohk. E anahne tamataman me ahn me kihpeseng pwihnen kalohk eh koahiek en padahk oh ese wiahda koasoandi mwahu me pahn kahrehda tuhpenehn kalohk en pweida mwahu. Ma sohte elder, sounsawas men, de emen brother koahiek me papidais kak wia met ni ekei rahn kan, sounapwalih en kalohk pahn koasoanehdi emen sister koahiek me papidais en wia met.—Kilang oaralap me koasoia “Ma Anahne Sister Men me Pahn Kihpeseng.”
6. Dahme kahrehda e kesempwal ong me pahn kihpeseng pwihnen kalohk en kaunopada mwahu?
6 Ni ahnsou me kitail alehdi pwukoa ong Sukuhl ong Sapwellimen Koht Doadoahk de Mihting en Kalohk, kitail kin mehleliong oh kaunopada mwahu. Me malaulau rehtail me pahn awih lao kitail pahn kohkohlahng mihting ahpw tepida medemedewe dahme kitail pahn nda. Kitail anahne kilangwohng atail pwukoahn kihpeseng pwihnen tuhpenehn kalohk duwehte met. Pwehki tuhpenehn kalohk eh pahn mwotomwotala, kaunopada mwahu me keieu kesempwal pwe tuhpenehn kalohko en kak kihda sawas mwahu oh imwisekla ni ahnsou me koasoandi. Kaunopada mwahu pil kin iangahki alehdi wasahn kalohk mwohn ahnsoun tuhpenehn kalohk.
7. Ia ekei soahng kan me me pahn kihpeseng pwihnen kalohko kak koasoiapene?
7 Dahme en Koasoiapene: Pwehki irair kan wekpeseng nan ehuehu wasahn kalohk kan, ladu lelepeko saikinte kihda padahk ong ehuehu tuhpenehn kalohk. Koakon, “Erein Tuhpenehn Kalohk, Ele Ke Kak Koasoiapene” kasalehda ekei soahng kan me kitail kak wia. Nin duwen me kalapw wiawi, tuhpenehn kalohko pahn wiawi nin duwen padahk oh tohnmwomwohdiso pahn iang koasoi. Ekei pak, ele e pahn iangahki ehu kamwomwada me pahn kaunopada mwahu de kasdo ieu me konehng me kohsang jw.org. Ni ahnsoun me e pahn kaunopada eh padahk ong tuhpenehn kalohk, me pahn kihpeseng pwihnen kalohko pahn anahne medewe dahme pahn kangoange oh sewese kaunopada irail kan me pahn kohla kalohk rahno.
Ni ahnsoun me e pahn kaunopada eh padahk ong tuhpenehn kalohk, me pahn kihpeseng pwihnen kalohko pahn anahne medewe dahme pahn kangoange oh sewese kaunopada irail kan me pahn kohla kalohk rahno
8. Dahme ele pahn keieu mwahu en koasoiapene erein tuhpenehn kalohk kan ni Rahn Kaunop kan oh Rahn Sarawi kan?
8 Karasepe, ni Rahn Kaunop kan, sounkalohk tohto kin kihla Kahn Iroir. Me tohto me kin iang kalohk Rahn kaunop kan sohte kin iang kalohk rahn teikan nan wihk ko, eri mwein re pahn apwalki tamataman kisin wiepen padahk kan me re praktiski erein arail Kaudok en Peneinei ni soutik. Ihme kahrehda, ele e pahn mwahuong me pahn kihpeseng pwihnen kalohk en kousapahlih ehu kisin wiepen padahk kan sang mwurin Atail Doadoahk ong Wehio. Pil ehu ahl koasoiapene ia duwen kitail kak doadoahngki rohng en sahpwet kan, de mehkot me pahn wiawi, de rahnen kasarawi kan ong kihla makasihn kan de ia duwen atail kak kaunopada tohnihmwo en kasik atail pahn pwurehng pwurala, ma e ale makasihno. Ma ekei me iang tuhpenehn kalohko iangehr kihla Kahn Iroir me kitail pahn kihla nan sounpwongo, me kihpeseng pwihnen kalohko kak idek rehrail en ehukihong koaros ni mwotomwot ekei iren sawas kan de mehkot me re lelohng ni arail wia met me pahn kangoange koaros. Ni Rahn Sarawi kan, me pahn kihpeseng pwihnen kalohk kan ele kak pilada en wia duwehte met ong pwuhk en kihla ong sounpwongo. Pwuhken onop kan, kisin pwuhk kan me duwehte Rohng Mwahu oh Rong Koht pwe Ken Mour Kohkohlahte oh pwuhken Paipel Padahngki ele re kak kihla ahnsou sohte lipilipil, eri me kihpeseng pwihnen kalohko kak koasoiapene ni mwotomwot ia duwen atail kak kihla pwuhk pwukat.
9. Dahme kitail kak koasoiapene ni imwin wihk kan ni ahnsoun doadoahk tohrohr?
9 Ma tohnmwomwohdiso pahn wia doadoahk tohrohr ehu ni imwin wihko, me pahn kihpeseng pwihnen kalohk kan ele kak koasoiapene ia duwen atail pahn kak kihla makasihn kapw kan iangahki doaropwehn luhko de kisin doaropweo, de e kak koasoia dahme emen kak wia ma mie me perenki rong. Pil ehu ahl iei ehukihong irail soahng mwahu kan me wiawi me kasalehda kesempwalpen doadoahk tohrohr wet.
10, 11. Dahme kahrehda ahn sounkalohk kan kaunopada kesempwal ong pweidahn tuhpenehn kalohk?
10 Kaunopada sang Sounkalohk kan: Sounkalohk kan pil ahneki pwukoa en kahrehiong tuhpenehn kalohk en pweida. Sang ni ar kaunopada mwahu mwohn ahnsoun tuhpenehn kalohk, de mwein erein arail kaudok en peneinei, e pahn mie mehkot me re kak ehukihong sounkalohk teikan. Kaunopada mwahu pil kin wehwehki en alehdi makasihn kan oh pwuhk kan mwohn lel wasahn tuhpenehn kalohk pwe koaros en kak kohkohla wasahn kalohk oh sohte anahne pwapwandseli.
11 E pil kesempwal en koasoanehdi en lel wasahn tuhpenehn kalohk kan minit kei mwohn eh pahn tepida. Mehlel, kitail kin nantihong en mwadang lel mihting en mwomwohdiso kan koaros. Ahpw, e kin keieu kerempwahla koasoandi ni ahnsou me kitail kin pwand en lella ni tuhpenehn kalohk. Ia duwen? Brother me pwukoahki kihpeseng pwihno tehkehr ire kei mwohn eh koasoanehdi irail. Ma ekeite sounkalohk kan me iang, ele e kak pilada en kadarala koaros nan wasahn kalohk kan me saikinte nekla. Ma ekei alu kohla iang tuhpenehn kalohk oh wasahn kalohko doh, ele e kak kihong sounkalohk pwukat en iang irail kan me kin tangahki sidohsa. Ma wasahn kalohko ekis keper me tiahk en mwersuwed kin wiawi ie, ele e pahn koasoanehdi brother kan en iang ih sister kan doadoahk de doadoahk karanih irail. Ele e pahn koasoanehdi sounkalohk luwet kan en doadoahk wasa kan me patapat de ihmw kan me kehndake kan mwotomwot. Ele e pahn koasoanehdi sounkalohk kapw kan ren iang irail kan me koahieklahr kan. Ahpw, ma sounkalohk men pwand en lella wasahn tuhpenehn kalohk, koasoandi pahn anahne wekidekla de pwurehng wiawi pwe en kak sewese irail me pwand kan. Mehlel, ekei pak pahn mie kahrepe mwahu kitail kin pwand. Ahpw, ma kitail kalapw pwand, ele kitail kak idek rehtail ma iei pwehki kitail sohte kin kalahnganki tuhpenehn kalohk de kitail sohte kin wiahda koasoandi mwahu mwowe.
12. Ma ke kin kalapw wiahda pein omw koasoandi ong kalohk, dahme ke kak medewe mahs?
12 Sounkalohk kan me iang tuhpenehn kalohk kak pilada en wiahda pein arail koasoandi kan mwohn tuhpenehn kalohk tepida de re kak iang emen me sounkihpeseng pwihnen kalohko koasoanehdi en iang irail. Ma ke kin kalapw wiahda pein ahmw koasoandi, ke kak ‘langahda douluhl mohngiongomw’ ni omw pahn iang soangsoangen sounkalohk kan ah kaidehn iengomw kante me ke karanih? (2 Kor. 6:11-13) Ekei pak ke kak koasoanehdi en iang sounkalohk kapw men en sewese ih kakairada eh koahiek en padahk? (1 Kor. 10:24; 1 Tim. 4:13, 15) Rong kanahieng kaweid koaros me ke alehdi, iangahki kaweid me pid wasa me re koasoanehong uhk ken tepida kalohk. Ni ahnsou me tuhpenehn kalohko imwisekla, song en dehr wekidala koasoandi kan ahpw samwalah wasahn kalohk.
13. Ma koaros me iang pidada kin tehk kanahieng oh wia arail pwukoa, ia duwen tuhpenehn kalohk eh pahn wia kamwahu ong kitail?
13 Mwurin arail doadoahk en kalohk, meh 70 me Sises ketin koasoanehdi arail doadoahk en kalohko “pwurodo, pereperen kowahlap.” (Luk 10:17) E sansal me arail tuhpene rehn Sises mwohn ar tepida wia doadoahk en kalohk sewesei irail en pweida. Rahnwet, tuhpenehn kalohk pil kak wia soangen kamwahu wet. Ma koaros me iang pidada kin tehk kanahieng oh wia arail pwukoa, tuhpenehn kalohk pahn kangoange, kaunopada, oh koasoanehdi kitail en kapwaiada atail pwukoa pwe “kadehde en mie ong aramas koaros.”—Mad. 24:14.
a Ekei nting en Paipel kan mahs kin nda “70,” a ekei kin nda “72.”