Keieu Kesempwaliki Sapwellimen Siohwa Doadoahk Nan Ahmw Mour

¹ Sises karasaiong sounrongorong akan duwehte sounwia ihmw riemen. Emen kauwada imwe pohn paip me wehwehki e kin peikiong kosonned en Krais oh met kahrehda e kak powehdi kasongosong kan me duwehte melimel. Sounwia ihmw teio kauwada imwe pohn pihken ni oaroahr oh met wehwehki me e kin roporop ong pein ih oh sapeik kahrehda e sohte kak powehdi kasongosong kan me lelohng ih. (Madiu 7:​24-​27) Nin doken atail kin momour nan koasoandi suwed wet, kitail kin lelohng uhwong tohto. Kitail kin kilang irair en sampah oh kitail wehwehki me kahn kamakam kowahlap pahn kereniong wiawi. Kitail kak ahneki pwoson kehlail oh dadaurete lel ni imwi? (Madiu 24:​3, 13, 21) Met pahn poahsoankihda dahme kitail kesempwaliki nan atail mour ahnsou wet. Kahrehda, e kesempwal kitail en pein idek rehtail, ‘I kin kesempwaliki ahi papah Koht oh peikiong Ih nan ahi mour ahnsou wet?’

² Ia wehwehn kesempwaliki sapwellimen Siohwa doadoahk nan atail mour ahnsou wet? Met wehwehki en mweidohng Siohwa en keieu nan atail mour. E kin pidada atail mwohneki mahs Wehio. E pil wehwehki peikiong Koht koasoandi en Koht koaros nan atail mour rahn koaros. E pil wehwehki atail pahn papah Siohwa ni mohngiong unsek ni ahnsou me kitail kin wia pein atail onop, onop en peneinei, oh onop Paipel nan mwomwohdiso oh pil nan kalohk, oh soahng pwukat koaros pahn wia dahme keieu kesempwal nan atail mour. (Ekl. 12:13; Madiu 6:​33) Soangen elen peik pahn imwikihla pwoson kehlail me duwehte takai de paip, me sohte kak ohkihla kasongosong kan me rasehng melimel.

³ E kaperen en kilang aramas rar kei ni arail kin keieu kesempwaliki arail papah Koht nan arail mour ahnsou wet oh irail kin koasoanehdi arail koasoandi kan en ahnsou kohkohdo pwehn kak papah Koht kohkohlahte, duwehte Sises wia. (Sohn 4:​34) Irail kin kolokolete koasoandi mwahu ong arail pali ngehn oh irail kin ale kapai tohto pwehki met. Emen nohno kawehwe iaduwen ih oh eh pwoud pweida ni ara sewese neira pwutak riemen en kekeirada papah Siohwa: “Se koasoanehdi me soahng koaros me wiawi nan aht mour kin pidada padahk mehlel​—iang towehda kapokon kan, kaunopada oh iang towehda mihding kan koaros, oh iang kalohk pil kin wia dahme keieu kesempwal nan aht mour.” Ah pwoud pil kapataiong oh koasoia: “Padahk mehlel kaidehn kisehn aht mour, ahpw iei ih aht mour. Soahng koaros me wiawi nan aht mour kin pidada padahk mehlel.” Iaduwen​—⁠ke koasoanehdi me sapwellimen Siohwa doadoahk me pahn keieu kesempwal nan mour en ahmw peneinei?

⁴ Koasoanehdi Ahmw Koasoandi en Wihk kan en Mwahu: Sapwellimen Siohwa pwihn kin sewese kitail en ahneki koasoandi mwahu ong atail pali ngehn ni e kin koasoanehdi mihding limau nan wihk koaros. Kristian kan me kin keieu kesempwaliki arail kaudok ong Siohwa kin koasoanehdi arail doadoahk, koasoandi en peneinei, oh pil koasoandi teikan pwe irail en kak iang towehda mihding kan koaros. Irail sohte kin mweidohng soahng teikan en kauwehla arail iang towehda mihding kan koaros.​—Pilipai 1:​10; Ipru 10:25.

⁵ Kristian mah kan kin wehwehki me mwenge pak siluh nan rahn ehu me kesempwal, pil duwehte atail koasoandi en mwenge ni pali ngehn pil kesempwal, oh met wehwehki me kitail anahne koasoanehdi mwahu atail koasoandi en wia pein atail onop, onop en peneinei oh pil kaunopada ong mihding kan. (Madiu 4:4) Ke kak koasoanehdi minit 15 de 20 rahn koaros pwehn kak wia pein ahmw onop? Dahme kesempwal iei ken dehr mweidohng soahng teikan en kauwehla ahmw koasoandi en onop. Koasoanehdi pwe ken ahnla koasoandi wet. Mwein ke pahn anahne pirida mwadang sang kuloak me ke kin pirida met. Irail tohn peneinei en Bethel 17,000 wasa koaros nan sampah kin pirida mwadang ni menseng pwehn kak wia arail wadawad en iren rahn. Ahpw, e sansal me ke anahne meir ni ahnsou me konehng pwehn ke kak kommoal mwahu pwe ken kak pirida mwadang ni menseng.

⁶ Ma ke wia tapwin peneinei, ken koasoanehdi koasoandi en ahmw peneinei ong amwail pali ngehn. Ekei peneinei kan kin wadek Paipel, oh pil Pwuhk en Pahr, de pil ehu pwuhk ni arail kin mwengehn soutik oh kommoal. Ekei pahpa oh nohno kan me neirail seri kan kekeirada oh wiahla Kristian kan me kehlail ni pali ngehn kin nda me met pwehki irail wiahda arail koasoandi pak ehu nan wihk koaros en ehukihpene soahng ngenin kan. Emen pahpa koasoia: “I pehm me kekeiradahn pali ngehn en neit seri kan kohsang aht kaukaule onop en peneinei ni soutik en Ni Esil, koasoandi wet tepida sounpahr 30 samwalahro.” Koaros nah seri silimen papidaisla ni arail pwulopwul, oh mwuri, irail koaros wiahla Regular Pioneer. Likin onop en peneinei, tohnpeneinei kan kak wiahda kamwomwada en kalohk oh mihding kan de irail kak wia soahng teikan me pahn kaperen oh sewese irail en kekeirada ni pali ngehn.

⁷ Nan ahmw koasoandi en wihk koaros, ke ‘koasoanehdi ahmw ahnsou’ pwehn iang kalohki Wehio? (Kol. 4:5) Pali laud en kitail kin kedirepw pwe kitail kin nantihong kapwaiada atail pwukoa en peneinei oh pwukoa nan mwomwohdiso. Ma kitail sohte wiahda atail koasoandi en iang kalohk nan wihk koaros, e pahn mengei en mweidohng soahng teikan en kauwehla atail iang doadoahk kesempwal wet nan wihk koaros. Emen brother me kin ahneki pisnis en kekeirada oh netiki kou kan (cattle ranch) koasoia: “Nan pahr 1944, I diarada me ihte ahl me I kak iang kalohk nan wihk koaros ma I pahn koasoanehdi ehu rahn nan wihk koaros en iang kalohk. Lel rahnwet, I kin koasoanehdi ehu rahn pwehn kak iang kalohk nan wihk koaros.” Emen Kristian elder diarada me kolokol koasoandi mwahu en kalohk kin sewese ih en iang kalohk awa 15 nan ehu ehu sounpwong (average). Ma mie kedirepw pahn pwarada Rahn Kaunop, e kin koasoanehdi en wia ah kedirepw mwurin ah iang kalohk ni menseng en Rahn Kaunop. Ke kak koasoanehdi pwe kowe oh ahmw peneinei en iang kalohk ehu rahn nan wihk koaros, oh koasoandi wet en wia kisehn amwail mour en pali ngehn?​—Pilipai 3:​16.

⁸ Kasawihada Ahmw Koasoandi en Mour: Mie soahng kan me kin kak kauwehla atail keieu kesempwaliki sapwellimen Siohwa doadoahk nan atail mour. Paisuwed kan kak kauwehla atail koasoandi mwahu en onop, mihding, oh kalohk. Oh atail imwintihti, Sehdan, pahn wia uwen e kak en kauwehla atail koasoandi mwahu en pali ngehn. (1 Dese. 2:​18; Episos 6:​12, 13) Ken dehr mweidohng mehn kerepwa pwukat en kaluweteiukala, oh kahrehiong uhk en men uhdi sang ahmw papah Siohwa. Wia soangen wekidekla koaros me anahn pwe ken kak kolokol ahmw koasoandi kan en pali ngehn. Ken tamataman me ma koasoandi katapan pahn pweida nan ahmw mour, ke anahne nannanti, doadoahk laud oh lamalam kehlail pwehn kak pweida.

⁹ Kitail en dehr mweidohng ngenen sampah wet en kohda nan atail koasoandi en pali ngehn oh ekis ekis kauwehla atail ahnsou oh dahme kitail nantihong en wia. Kitail anahne kasawihada pein kitail, doadoahngki soangen peidek kan duwehte: ‘Ahi irair en mour kin ekis ekis solahr toupahrek duwehte mahs oh I solahr kin ngoangki papah Siohwa duwehte mahs? I tepidahr kesempwaliki soahng kan me pidada sampah wet me pahn sohralahr? (1 Sohn 2:​15-​17) Ia uwen laud en ahi ahnsou I kin doadoahngki ong pein ngehi, seiloak, mwadong, de mehn kamweit kan​—duwehte kilang TV de Internet​—⁠oh iaduwen ahnsou pwukat kin kapahrekiong ahnsou me I kin doadoahngki ong kekeirada ahi pali ngehn?’

¹⁰ Ma ke pehmada me ahmw mour kin ekis ekis direkihla soahng soh katepe kan, dahme ke anahne wia? Ke soh wia duwehte Pohl me kapakapki me rie kan en “kamwahuwihala arail koasoandi,” oh ken kapakap ong Siohwa oh peki sapwellime sawas en kamwahuwihala ahmw koasoandi oh pwurehng koasoanehdi sapwellime doadoahk en keieu nan ahmw mour? (2 Kor. 13:​9, 11, footnote) Mwurin ahmw peki sapwellimen Siohwa sawas, nantihong wia mwekid kan me pwung ong ahmw kapakap oh kamwahuwihala ahmw koasoandi kan pwehn kak doadoahk mwahu nan ahmw mour. (1 Kor. 9:​26, 27) Siohwa pahn sewese iuk en dehr sohpeisang ahmw papah Ih oh peikiong Ih.​—Menlau tehk Aiseia 30:20, 21.

¹¹ Kedirepwki Sapwellimen Koht Doadoahk me Kaperen: Aramas rar rar kei rahnwet kin nantihong rapahki peren nan arail mour oh ni ahnsou me arail mour pahn kereniong imwisekla, irail diarada me kepwehn sampah me irail ngoangki ale sohte kak kihong irail soangen peren oh nsenamwahu mehlel. E duwehte “pwakipwakih kisinieng.” (Ekl. 2:​11) Ni pali teio, ma kitail pahn mwohneki Siohwa nan atail mour, ‘aririh Siohwa ahnsou koaros,’ kitail kak ahneki peren oh nsenamwahu mehlel nan atail mour. (Mel. 16:​8, 11) Met kin kak wiawi pwe kitail kin pohnese me pwehki Siohwa, kitail mihmiehki oh momourki. (Kaud. 4:​11) Ma sohte Siohwa, atail mour sohte katepe. Pwehki kitail kin papah Siohwa, atail mour kin katapan oh kin sewese pein kitail oh meteikan en mour mwahu oh mehlel oh pahn kak imwikihla mour soutuk.

¹² E kesempwal kitail en dehr soukautih oh kesehla atail pepehm en karuwaru me en Sehdan sampah pahn kereniong imwisekla. Atail mour oh madamadau en ehu ehu rahn kin pidada atail koapworopwor en dahme pahn wiawi ahnsou kohkohdo. Ni mwehin Noha, aramas me sohte kamehlele me nohlik pahn wiawi “sasairki nohliko,” irail kin medemedewehte pein nsenarail​—mwengmwenge, niminim, oh pwopwoud​—lao lel nohliko “kamwopwirailla.” (Madiu 24:37-​39) Rahnwet, irail me kin kihong soahng kan me pidada sampah wet en keieu nan arail mour pahn diarada me dahme re koapworopworki nan sampah wet pahn sohrala ni ahnsou me “rahn en Siohwa” pahn wiawi me iei rahn me ohla me keieu laud nan poadoapoad en aramas pahn wiawi.​—2 Piter 3:​10-​12.

¹³ Eri, ken kihong ahmw papah Siohwa oh kapwaiada kupwure en keieu nan ahmw mour. Sohte mehkot ke kak ale sang sampah wet me likilik oh mwahu duwehte soangen kapai kan oh kamwahu kan sang Siohwa me kitail kak likih. E sohte kin ketin likamw​—e kin kapwaiada sapwellime inou kan koaros me e kin wiahda. (Taitus 1:2) E sohte kak pwoula​—E pahn tamatamante soahng koaros me kitail kin wia ong Ih. (Apakuk 1:​12; 2 Tim. 1:​12) Mour en peik oh pwoson me kitail kin mourki ahnsou wet kin wia tepidahn atail mour en peik oh pwoson me kitail pahn memour kohkohlahte ni atail papah Koht en peren mehlel, iei Siohwa!​—1 Tim. 1:​11; 6:​19.

[Kilel nan Pali 3]

“Padahk mehlel kaidehn kisehn aht mour, ahpw iei ih aht mour. Soahng koaros me wiawi nan aht mour kin pidada padahk mehlel.”