Doadoahk en Pioneer​—⁠Ke Kak Iang?

¹ “I sohte kak medewehda en wia mehkot likin met. I uhdahn sohte kak medewehda me pahn mie mehkot me kak wahdo soangen peren wet.” Ihs me nda met? Emen rehn Sounkadehdehn Siohwa lop kei me wiahkihla doadoahk en kalohk kaukaule arail doadoahk kaperen nan mour. Komw medemedewe oh kapakapkiehr ma komw kak pioneer? Pwehki atail inoukihong Siohwa pein kitail, kitail uhdahn anahne medemedewe ma kitail kak wiahda awa tohto ni atail kalohkiseli rongamwahu en Wehio. Ni atail kin medemedewe mehn akadei wet, menlau tehk ekei peidek kan me tohto kin kalelepeki doadoahk en pioneer.

PEIDEK 1: “Ekei kin nda me kaidehn koaros kin kak pioneer. Iaduwen ahi pahn ese ma I kak pioneer?”

² Pasepengo kin poahsoanda pohn ahmw irair oh ahmw pwukoah kan me kohsang nan Pwuhk Sarawi. Mie me tohto me arail roson en paliwar oh irair en mour en ahnsou wet kahrehong irail en sohte kak wiahda awahn kalohk 90 nan sounpwong ehu. Ehu karasepen met iei sister lelepek tohto me wia Kristian lih pwopwoud kan oh nohno kan. Re kin kalap iang kalohk uwen me arail irair kin mweidong. Ni ahnsou me re kakohng, re kin auxiliary pioneer sounpwong ehu de tohto sang ehu ehu sounpahr, oh re kin dolungada peren me kin kohsang arail kalaudehla arail iang kalohk. (Kalesia 6:9) Mendahki arail irair kan ele sohte pahn kak mweidohng irail en kalohk nin duwen pioneer kan ahnsouwet, re kin kapwarehda ngehnin pioneer oh kin wia kapai ehu ong mwomwohdiso nin duwen sounkalohk en rongamwahuwo me idipek.

³ Ni pali teio, brother oh sister tohto me sohte ahneki pwukoah kan kin alehda doadoahk en pioneer ni arail kin koasoanehdi pwe doadoahk en pioneer en keieu nan arail mour. Iaduwen komwi? Kowe emen pwulopwul me kanekehlahr ahmw sukuhl? Komwi emen lih pwopwoud me ahmw pwoudo kak apwalih amwa peneinei? Ke pwopwoud oh sohte noumw seri kan me ke anahne apwalih? Ke kommoaldihsangehr ahmw doadoahk en mwohni (retired)? En pioneer de endehr pioneer kin wia koasoandi ehu me emen emen aramas anahne pein wiahda. Peideko iei: Ke kak kawekila koasoandi kan nan ahmw mour pwe ken pioneer?

⁴ Sehdan kin doadoahngki ah koasoandi en sampah wet pwehn audehkihda atail mour mehn koarompwa kan oh en powehdi kitail ni elen mouren roporop. Ma kitail nannanti en dehr kisehn sampah, Siohwa pahn sewese kitail en mwohnki mahs Wehio oh kitail pahn engiwohng oh alehda kapai en doadoahk en Wehio koaros me wiawihda ong kitail. Ma ke kak wekidala ahmw irair kan pwe ken papah nin duwen pioneer men, dahme ke soh wiahki met?

PEIDEK 2: “Iaduwen ahi pahn kak ese ma I pahn kak apwalih pein ngehi ni palien mwohni ma I pahn iang doadoahk en pioneer?”

⁵ E mehlel me nan sahpw tohto awahn doadoahk en mwohni me anahn ehu ehu wihk pwehn kak pwainkihda anahn akan en mour kin wia lalaudla erein sounpahr tohto, oh Siohwa kin kaukaule komour irail. Pwehn pweida mwahu nin duwen pioneer men, kitail anahne pwoson oh ahneki ngehnin tohnmetei. (Madiu 17:20) Kitail kak likih Melkahka 34:10 me mahsanih me ‘irail me kin rapahki Siohwa pahn ahneki soahng koaros me mwahu.’ Koaros me pahn iang doadoahk en pioneer anahne en wia met ni arail uhdahn pahn koapworopworki me Siohwa pahn apwalih irail. E kin ketin wiewia met ong pioneer lelepek kan nan wasa koaros! (Melkahka 37:25) Ni mehlel, me pahrekiong mouren kosonned kan nan 2 Deselonika 3:​8, 10 oh 1 Timoty 5:8, pioneer kan sohte pahn kasik me mehteikan pahn apwalih irail ni palien mwohni.

⁶ Mehmen me medemedewe en pioneer anahne wia dahme Sises mahsanih: “Mwohndi mahs oh medemedewe uwen pweine.” (Luk 14:28) Wia met kin kasalehda elen loalokong. Koasoiong irail ko me pioneer oh pweida mwahu erein sounpahr tohto. Kalelepek rehrail duwen iaduwen Siohwa kin komour irail. Sounapwalih en Circuit wiaiehr emen pioneer koahiek oh e pahn perenki kihda iren sawas kan ong iaduwen ken pweida nan doadoahk en pioneer.

⁷ Aramas emen ele sohte uhdahn pahn pehm mehlel en inoun Sises me kileledi nan Madiu 6:33 lau e mweidala pein ih nan limen Siohwa. Emen sister pioneer lelepek koasoia: “Ni ahnsou me iengeo oh ngehi ahpwtehn kohla nan aht wasahn kalohk kapw nin duwen pioneer kan, ihte me mih reht iei kisin nappa kei, kisin pwete kis, oh sohte nait mwohni. Se kangala mwenge ko ni soutiko oh koasoia, ‘Met sohlahr kenat mwenge ong lakapw.’ Se kapakapki met oh meirla. Ni mensehngie en mandahn rahno emen Sounkadehde en wasao kohdo reht oh kasalehong kiht ihs ih oh koasoia, ‘I kin kapakapki me Siohwa en kadarado pioneer kan. Met I kak iang kumwa kalohk pali laud en rahnwet, ahpw pwehki I kin kousoan likin kahnimw, I pahn iang kumwa mwengehn souwas, ihme I wahkihda mwenge me kitail koaros kak kangpene.’ Mwengeo audaudki uduk en kou tohto oh nappa kan.” Ihme e sohte kapwuriamwei me Sises kihong kitail mehn kamehlel me kitail en ‘dehr pwunodki amwail mour kan’! Ih eri kapataiong: “Ihs rehmwail me kak kareireikihla sounpahr kei eh mour pwunupwunodki mepwukat?”​—⁠Madiu 6:​25, 27.

⁸ Sampah me kapilpene kitail kin wia mouren roporopla. Kitail kin mihla pahn kapwunod laud en alehda soangen mour wet. Ahpw, atail ahneki lamalam karakarahk ong doadoahk en pioneer pahn karehong kitail en nsenamwahukihte atail mour me sohte kepwehpwe. (1 Tim. 6:8) Pioneer kan me kin itarkiehr arail anahn en mour oh koasoanehdi mwahu arail mour kin ahneki ahnsou laud ong kalohk oh kin ale peren laud oh kehl en pali ngehn sang arail kin padahkihong mehteikan padahk mehlel. Mendahki re sohte kin songosong en kainapwihdi sang irail kaperen en mour koaros, arail lamalam toupahrek ong arail irair en pelien mwohni kin kak kahreong irail en paiekihda kapai kan en pioneer.

⁹ Ma ke pehm me kitail momour ni imwin rahn akan oh me sampah suwed wet kereniengehr imwisekla, ke pahn mwekidki ni pali ngehn en wiahda tohnmetei kan me anahn pwehn kalohkiseli rongamwahuwo ni ahnsou mwahu koaros. Ni ahmw pahn pil pwurehng kasawih ahmw irair en pelien mwohni oh pwilikihdi ire wet nan limen Siohwa, ele ke pahn wehwehkihda me ke kak papah ih kaukaule. Mendahki ma ke pil tohnmeteikihla ekei kepwe kan me ke kin perenki pwehn kak pioneer, ke pahn paiekihda sapwellimen Siohwa kapai kan.​—⁠Melkahka 145:16.

PEIDEK 3: “Nin duwen emen me pwulopwul (teenager), dahme I en medemedewe en pilkihda ahi doadoahk pioneer?”

¹⁰ Nin doken ahmw pahn kereniongehr kanekehla ahmw sukuhl, ke kin medemedewe duwen ahmw ahnsou kohkohdo. Ke mwahuki en meleilei, kaperen oh pweida mwahu. Sounkaweid en sukuhl kan ele pahn nantiong en kahluwaukalahng nan ehu doadoahk en mwohni me pahn kahrehda ken anahne sukuhl laud erein sounpahr tohto. Ahmw nsenmwakelekel en Kristian me kaiahnda mwahu pahn kapehmihkin uhk me ke anahne kaunopada pwehn papah Siohwa uwen ahmw kak koaros. (Eklesiasdes 12:1) Ele ke pahn pil medemedewe me ehu rahn ke pahn pwopwoudla oh wiahda ahmw peneinei. Dahme ke pahn wia?

¹¹ Koasoandi kan me ke wiahda ahnsou wet nan ahmw mour pahn koasoanehdi ia mwomwen ahmw ahnsou kohkohdo. Ma ke wiahlahr emen Sounkadehdehn Siohwa me inouda oh papidaislahr, komw kihongehr Siohwa ahmw mour unsek. (Ipru 10:7) Tepin ahnsou mwahu me ke ahneki, song auxiliary pioneer sounpwong ehu de tohtohsang. Met pahn kapehmikin uhk peren oh pwukoah kan me kin kohsang doadoahk en regular pioneer, oh ke pahn esehda dahme ke pahn wiahiong ahmw mour. Eri, pwehki ahmw neksangehr sukuhl oh sohte wiliankihdi dahme ke kin wia mahs ehu doadoahk en mwohni kaukaule, ke soh tepida regular pioneer? Ekei me kin awih lau ahnsou ehu mwuhr pwehn paiekihda doadoahk en pioneer kin koluhkihla arail sohte mwadang tepida.

¹² Nin duwen me pwulopwul men, isaneki ahmw ahnsou mwahu kan en kolokolte ahmw kiripw oh paiekihda kapai kan me doadoahk en kalohk kaukaule kin wahdo. Ma ke inengieng en pwopwoudla ehu rahn, sohte poahsoan en pwopwoud me ke pahn wiahda me pahn mwahusang en keieu kalohk nin duwen regular pioneer men. Ni ahmw kekeirada oh mahla ni lamalam oh pali ngehn, ele ke pahn pilada en wiahkihla doadoahk en regular pioneer ahmw doadoahk rehn meno me ke pwoudkihda me pil ahneki soangen lamalam wette. Ekei pwopwoud kan me kin wiahpene doadoahk en regular pioneer kin pil alehda doadoahk en circuit de doadoahk en misineri. Met iei soangen mour me keieu kansenamwahu!

¹³ Mendahki ia uwen werei me ke regular pioneer, ahmw kasukuhl pahn unsekla oh ke alehiehr kaiahn kesempwal me sukuhl en sampah sohte kak kihda. Doadoahk en pioneer kin kasukuhlkihong emen kaiahn en pein koasoanehdi ah koasoandi kan, oh ia pahn wiewia ong aramas teikan, oh iaduwen ahmw pahn likih Siohwa, oh iaduwen ahmw pahn kekeirada kanengamah oh kadek​—⁠irair kan me pahn kakoahiekuhkala ong pwukoah toutou kan.

¹⁴ Tohnsampah kin sehse dahme pahn wiawi nan arail mour. Soahng malaulaute me uhdahn poatopoat, likin dahme Siohwa ketin inoukihda. Pwehki ahmw ahnsou kohkohdo miehr mwohmw, mie ahnsou ehu me pahn mwahusang ahnsouwet en medemedewe ni keneinei dahme ke pahn wiahki ahmw mour nan pahr kan me kohkohdo? Kasawih ni keneinei kapai en doadoahk en pioneer. Ke sohte pahn koluhkihla ahmw pilada en wiahkihla regular pioneer ahmw doadoahk.

PEIDEK 4: “E soh kin ahnsou koaros wia kapwunod ehu en lel awa 90? Iaduwen ma ahi awa sohte lel awa 90 sounpwong koaros?”

¹⁵ Ni ahnsou me ke kin audehda doaropwe (application) en regular pioneer, ke anahne sapengla peideko: “Ke koasoanehdier pein ahmw wiewia kan pwe ken kak lel awa 1,000 me anahn ong sounpahr ehu?” Pwehn kak wiahda awa wet, ke anahne wiahda awa siluh nan rahn ehu. E sansal me ke anahne koasoandi me mwahu oh pein kaiahn uhk en kapwaiada met. Pioneer tohto kin wiahda koasoandi me re kak kapwaiada erein sounpwong keite.

¹⁶ Ahpw, Eklesiasdes 9:11 mahsanih ni mehlel, ‘Paisuwed kin lelohng aramas koaruhsie.’ Soumwahu laud de irair teikan me aramas kin lelohng kin kak kahrehong emen pioneer en sohte kak wiahda awa kan me anahn nan pahro. Ma kahpwalo sohte reireiki sounpwong tohto oh e wiawi tepin pahr en kalohk, ele ihte me anahn iei koasoandi en wiahda awa ko me e sohte wiahda nan pahro. Ahpw iaduwen ma ehu kahpwal laud pwarada ni en sounpwong keite me luhluhwe nan pahr en kalohk oh regular pioneer men sohte kak wiahda awa ko me anahn?

¹⁷ Ma ke soumwahuda ahnsou kis erein sounpwong keite de ma pwehki kahrepe karuwaru teikan me ke sohte kak irehdi me kahrehda ke sohte kak wiahda awa ko me anahn, ke kak tuhwong emen tohn Congregation Service Committee oh kawehwehiong kahpwalo. Ma elder pwukat lemeleme me e konehng en mweidohng ken kaukaulehte nan doadoahk en regular pioneer ni ahmw sohte anahne en wiahda awa ko me anahn ong pahro, re kak wiahda koasoandi wet. Secretary pahn kileledi pohn noumw rekord en sounkalohk en mwomwohdiso me ke sohte anahne wiahda awa ko me ke sohte wiahda. Met sohte wehwehki me erein ahnsou me ke sohte wiahda awa ko ke kommoal sang pioneer, ahpw anahn tohrohr wet kin wiawihong uhk pwehki ahmw irair.​—⁠Kilang insert en Atail Doadoahk Ong Wehio en August 1986, parakrap 18.

¹⁸ Pioneer koahiek kan kin wiahda awa tohto nan tepin pahr en kalohk. Re kin mwohneki arail doadoahk en pioneer, ihme ekei pak re anahne katikiala arail wiewia kan me sohte katepe. Ma pioneer men sohte wiahda ah awa kan pwehki e sohte wiahda koasoandi mwahu de pwehki e sohte kapwaiada ah koasoandi, e anahne en ese me e pwukoahki en wiahda awa ko me e sohte wiahda oh endehr kasik en ale sawas tohrohr.

¹⁹ Mie ahnsou kan me irair en emen pioneer pahn wekila me e sohte kak irehdi. E pahn diarada me erein ahnsou reirei e sohte kak wiahda awa ko me anahn pwehki e kalap soumwahu de pwehki ah pwukoahn peneinei laudla de irair teikan. Nan irair wet, elen loalokong iei en pwurela wiahla emen sounkalohk oh iang kalohk ahnsou soh lipilipil me e kakong nan doadoahk en auxiliary pioneer. Sohte koasoandi en mweidohng emen en mihmihte nan pwihn en pioneer ma ah irair solahr mweidohng en kak wiahda awa 1,000 ko.

²⁰ Se koapworopworki me koasoandi en kihda sawas tohrohr ong irail ko me warohng pioneer pahn kamwekid me tohto en pidelong nan doadoahk en pioneer ni arail sohte pahn pwunodki ire wet. E pil pahn kangoange irail ko me mih nan doadoahk en regular pioneer en pousehlahte pioneer. Se men regular pioneer kan en pweida mwahu nan arail doadoahk en kalohk kaukaule.

PEIDEK 5: “I men wiahda mehkot katapan oh nsenamwahuki wia met. Doadoahk en pioneer pahn kihong ie met?”

²¹ Kitail kak ahneki nsenamwahu mehlel ihte ma kitail ahneki nanpwungmwahu rehn Siohwa oh kamehlele me kitail kin papah ih ni lelepek. Sises dadaurete pahn tuhkehn kalokolok “pwehki peren me e kasikasik.” (Ipru 12:2) Ah nsenamwahu kin kohsang wia kupwuren Koht. (Melkahka 40:8) Nan koasoandi wet, kitail kak paiekihda nsenamwahu mehlel ma pali laud en atail wiewia kan nan mour kin pidada atail kaudok ong Siohwa. Mehkan me kitail kin nannantiong ni pali ngehn kin kihong kitail pepehm me mie katapen nannanti pwukat pwehki sang nan mongiongatail kitail ese me dahme kitail wiewia me pwung. Nsenamwahu kin kohsang kihkihwei, oh kitail ese me sohte ahl ehu me mwahusang met en kihda pein atail ahnsou en padahkihong mehteikan iaduwen ren ale mour soutuk nan sapwellimen Koht sampah kapw.​—⁠Wiewia 20:35.

²² Pioneer me koasoipe wiawi nan tepin parakrap kawehwehda ni ahl wet: “Mie mehkot me pahn kaperen sang kilang aramaso me ke onopong wiahla emen sounkaping pwerisek en Siohwa? E kin kaperen oh kakehlailda ahmw pwoson en kilang ia uwen manaman en Mahsen en Koht ni ah kin kamwekid aramas kan en wiahda wekidekla kan nan arail mour pwe ren kak kaperenda Siohwa.” (Kilang Watchtower [lokaiahn wai] en October 15, 1997, pali 18-23.) Eri, dahme kin wahdohng uhk nsenamwahu? Ma kaidehn peren mwotomwot me sampah kin kihda, ahpw ke kin kesempwalki nannanti poatopoat kan me mie katepe, eri, doadoahk en pioneer kaukaule pahn kihong uhk pepehm me ke wiahda mehkot katapan me uhdahn pahn kaperenihuhkada.

PEIDEK 6: “Ma kitail sohte anahne iang doadoahk en pioneer pwehn kak ale mour soutuk, kaidehn ahi pilipil ma I pahn pioneer de soh?”

²³ Mehlel, kowe me pahn pilada ma ke pahn pioneer de soh. Siohwa kelepw me kak tenekih ahmw irair kan en mour. (Rom 14:4) E sapwellimaneki pwung en kasik sang rehmw me ke pahn papahkihong ih mongiongomw unsek, ahmw mour unsek, ahmw lamalam unsek, oh ahmw kehl unsek. (Mark 12:30; Kalesia 6:​4, 5) E kin kupwurperenki emen me kin perenki kihkihwei oh emen me kin papah ih ni peren, kaidehn ni elen menseirin de pwehki idihd. (2 Korint 9:7; Kolose 3:​23) Ihme kahrehda ahmw ineng en pioneer anahne mihmi ni irair en pali ngehn. Pwe ma soh, doadoahk en pioneer sohla pahn kaperen ong uhk. Karepen ahmw iang doadoahk en pioneer iei pwehki ke poakohng Siohwa oh aramas akan nan ahmw wasahn kalohk. (Madiu 9:​36-​38; Mark 12:30, 31) Ma ih met ahmw pepehm, eri ke anahne medemedewe en iang doadoahk en pioneer.

²⁴ Se koapworopworki me dahme sansalda wasaht pahn sewese uhk tenekih ahmw ahnsou mwahu en pioneer. Ke kak wekidala ahmw irair pwe ken kak iang doadoahk en regular pioneer? Ntingting pah iei kalendar ehu me oaralap koasoia “Ahi Koasoandi en Kalohk en Pioneer Ehu Ehu Wihk.” Kilang ma ke kak audehda ahmw koasoandi me pahn kak mweidohng uhk en wiahda mpen awa 23 ehu ehu wihk ong kalohk. Eri, pwoson oh likih Siohwa. Ki sapwellime sawas ke kak pweida mwahu! E inoukihda: “I pahn . . . kamwerehdiong kumwail soangen kamwahu kan ni uwe ieu me laud.”​—⁠Malakai 3:​10.

²⁵ Eri, se kalelelpek, “Doadoahk en Pioneer​—⁠ke kak iang?” Ma ke kak nda “Ehi,” eri koasoanehdi rahn me ke pahn tepida regular pioneer ni ahnsou keren oh koapworopworki me Siohwa pahn kapaikinuhkada ehu mour kaperen!

[Kakon nan pali 6]

(Pwehn kilang nting kan ni soandi mwahu, kilang pwuhk wet)

Ahi Koasoandi en Kalohk en Pioneer Ehu Ehu Wihk

Doadoahngki noumw pinsel pwehn ntingihdi ahmw koasoandi en ehu ehu rahn nan wihko.

Koasoanehdi uwen awa 23 ehu ehu wihk ong kalohk.Koasoandi en awa koaros me kapatapatpene nan ehu ehu wihk_