Kapai Kan En Doadoahk En Pioneer
“Kapai en Siohwa—iei me kin kepwehpwehla, oh e sohte kin kapatahiong met medek.”—LEPIN PADAHK 10:22, New World Translation.
1, 2. (a) Iaduwen emen pioneer kasalehda ah pepehm ong doadoahk en kalohk kaukaule? (b) Dahme karehda pioneer kan kin kak ahneki peren unsek en katohnpadahk?
“MIE mehkot me pahn kaperen sang kilang aramaso me ke onop ong wiahla emen sounkapinga Siohwa pwatiet? E inenen kaperen oh pil kin kakehle ahmw pwoson en kilang uwen manaman en Mahsen en Koht ni ah kin kamwekidih aramas kan en wekidala arail mour pwehn kaperenda Siohwa.” Emen pioneer sang Canada me wiaiehr doadoahk en kalohk kaukaule me reireiki pohnangin sounpar 32 ntingihdi met. Me pid ah doadoahk en pioneer, e koasoia: “I sohte kak lemehda en wia ehu doadoahk tohrohr likin met. I uhdahn sohte kak leme me pahn mie mehkot likin met me kak wahdo soahngen perenohte.”
2 Komw pwungki me peren laud kin kohsang iang kisehn doadoahk en sewese emen ong mour? Ni mehlel, kaidehn pioneer kante me kin ahneki soahgen peren wet. Sapwellimen Siohwa ladu kan koaros mih pahn kehkehlik en “katohnpadahkih aramas,” oh re kin nantiong wia met. (Madiu 28:19) Ahpw, pwehki pioneer kan kin kak kalohk reirei, re kin kalap ahneki peren laud en wia doadoahk en katohnpadahk. Ahpw pioneer kan pil ahneki kating teikan. Koasoiong pioneer kan, oh re pahn padahkihong uhk me pioneer kin wia ahl kaselel ehu en pehmada ‘kapai en Siohwa me kin kapwehpwehla.’—Lepin Padahk 10:22 (NW).
3. Dahme ele kak kamwekidih kitail nin doken atail pousehlahte papah Siohwa?
3 Nan ahnsou keren kan, peidek kin kohwong pioneer kan sang soangsoangen sahpw kan nan sampah en kasalehda kapai kan me re ahnekihdi nan doadoahk en pioneer. Kitail en tehk dahme re nda. Ahpw, ke dehr mworusala, ma ahmw papah kin irairdi pwehki soumwahu, mahla, de soahngen irair teikan. Tamataman me, dahme kesempwal iei en papah Siohwa ki mouratail unsek, mendahki irair dah me kitail mihla loale. Eri, mendahki met, ni ahmw rong dahme wiawihong pioneer kan ele met pahn kalaudehla ahmw nsenohki alehda doadoahk kating wet ma komw kakohng.
Pepehm Loal en Nsenamwahu oh Peren
4, 5. (a) Dahme karehda ehukiong mehteikan rongamwahuwo kin wia wiewia ehu me kating laud? (b) Ia pepehm en pioneer kan duwen iang kisehn doadoahk en kalohk kaukaule?
4 “Kihkihwei me kaperen sang ale,” Sises mahsanih. (Wiewia 20:35) Ehi, mie katingpen en kihkihwei ni soh roporop. (Lepin Padahk 11:25) Met me inenen mehlel ni ahnsou me e kin pid ehukiohng meteikan rongamwahuwo. Pwe ni mehlel, kisakis laud dahieu me kitail kak kihong aramas emen sang en sewese ih en loalokongkihla Koht, me kin kahlwalahng mour soutuk?—Sohn 17:3.
5 Ihme e sohte kapwuriamwei me, irail ko me kin iang kalohk kaukaule kin kalap koasoia duwen peren oh pepehm en kaitarala me re kin alehsang arail kalohk. Emen pioneer me mahki sounpahr 64 sang Britain koasoia: “I ese me sohte ehu doadoahk likin met me kak wahdohng ie nsenamwahu me kohsang ehukihong mehteikan padahk mehlel. Emen liohdi sang sapwen Zaire koasoiahda ia wehwehn pioneer ong ih: “Doadoahk en pioneer kin wia mehn kamweit mehlel ong ie mwurin mehlahn ahi pwoud kompoako. Uwen laud en ahi kohla kalohk pwehn sewese meteikan, met kin katikitikiala ahi nsensuwed. I kin pwoson inou kan en Siohwa oh kin medemedewe laud iaduwen I kak sewese irail ko me I kin onopohng en wiahda wekidekla kan nan ahr mour. Ni imwin ehu ehu rahn, ahi meir kin kansenamwahu, oh mohngingih kin dirkihla peren.”
6. Peren tohrohr dahieu ekei pioneer kan kin lelohng?
6 Ekei me kin pioneer ki sounpahr tohto kin ahneki peren tohrohr en papah nan wasa doh kan, oh kauwada mwomwohdiso kan, me kin kedekedeo wiahla circuit kan. Karasepe ehu, nan Abashiri, Hokkaido (dekehn Sapan me keieu mih ni paliepeng), mie sister men me wia pioneerki erein sounpahr 33. Liho tamanda me ni ah tepin iang kapokon en circuit—ong dekehn Hokkaido—aramas 70 te me iang towehda kapokono. Ahpw ahnsouwet? Mie circuit 12 pohn dekeho, oh sounkalohk pohnangin meh 12,000 ahnsouwet. Medewehla ia uwen mohngiongih dirkihla peren ni ahnsou me e towehda kapokon tikitik oh laud kan rehn pokon en ienge sounkalohk en Wehio pohn dekeho!
7, 8. Peren dahieu irail kan me pioneer wereila kin lelohng?
7 Ekei pioneer me wiaiehr doadoahk wet wereila kin ahneki peren en kilang irail kan me sukuhlki Paipel papidaisla oh eri akadeiong pwukoa laud kan en papah. Nan Sapan sister men me kin pioneer nan wasa duwau sangete nan 1957 kin tamanda ah pwilikihdi makasihn Awake! ehu rehn emen serepein pwulopwul me kin doadoahk nan pangk. Erein sounpwong duwau serepeino papidaisla. Mwuri e pwopwoudla, oh ih oh eh pwoudo wiahla special pioneer kei. Ia uwen kaperen ong sister pioneero ni ahnsouwo, nan ah doadoahk en pioneer kasiluh, me soundoulik en circuit oh eh pwoudo—en sister pioneero Paipel study en mahso, mwemweitdohng ah mwomwohdiso!
8 Ihme e sohte kapwuriamwei me irail ko me kin wiahkihla kalohk en pioneer arail doadoahk kin kilangwohng doadoahk wet nin duwen “kapai pweilaud ehu me emen en kanaiehng,” duwen emen me pioneerki sounpahr 22 koasoiahki met!
Kadehdepen Epwel en Siohwa
9. Nin duwen Sounketikihda Lapalahpie, dahme Siohwa inoukihong sapwellime ladu kan, oh ia wehwehn met ong kitail?
9 Siohwa, Sounketikihda Lapalap, ketin inoukihda me e pahn kamoure sapwellime ladu kan, ni ah pahn apwalih irail ni pali ngehn oh pali wahr. Nanmwarki en mahs Depit kak nda: “Ni ei pwulopwul, oh met ni ei mahlahr, I saikinte kilang aramas mwahu men me Kauno ketin likidmeliehla, de nah seri kan pekipeki ar tungoal kisin mwenge.” (Melkahka 37:25) Ni mehlel, koapworopwor wet sang rehn Koht sohte kihsang rehtail pwukoah en apwalih atail peneinei ni pali wahr, e pil sohte kihong kitail manaman en isaneki kadek en riatail Kristian kan. (1 Deselonika 4:11, 12; 1 Timoty 5:8) Ahpw mendahki met, ni atail kin pein nsenki wiahda tohnmetei kan nan atail mour pwehn papah Siohwa ni unsek, e sohte pahn likidmeliehla kitail.—Madiu 6:33.
10, 11. Sang dahme kin wiawihong irail, dahme pioneer tohto kin esehki duwen sapwellimen Siohwa erpit en apwalih irail?
10 Pioneer kan sang nan sampah pwon esehsang dahme kin wiawihong pein irail me Siohwa kin ketin apwalih irail ko me kin mweidala pein irail nan epwelpen lime kan. Tehk duwen irair en pwopwoud pioneer ehu me kosoulahng kisin kahnimw ehu, wasa me anahnepen sounkalohpen Wehio inenen laud. Mwurin sounpwong keite, doadoahk en mwohni wasao apwalla, oh neira mwohni nekinek koaros nekla. Mwurin met re pil alehdi neirail insurance bill ong warara sidohsa me mihmi ni uwen tala $81. Brothero kawehwe: “Se uhdahn sohte kak pwainla met. Se kapakap ngidingidki met pwohngo.” Mandahn rahno, re alehdi kisinlikou ehu sang rehn peneinei ehu me pil apwal ni pali en mwohni. Peneineio alehdi neirail mwohni en taks (refund), kisinlikouwo kawehwe, oh pwehki e laud sang dahme re kasik, re men ehukiong pwopwoud pioneero ekei mwohnio. Re kadarado tala $81! Brother pioneero koasoia: “I sohte pahn manokehla rahno—wunen likin paikiet uhda! Se inenen kalahnganki en peneinei wet kadek.” Siohwa kin pil kalahnganki soangen kadek wet, me kin wia irair en kadek me e kin kangoangehki sapwellime ladu kan en kasalehda.—Lepin Padahk 19:17; Ipru 13:16.
11 Pioneer tohto pil kak koasoiahda soahng wette me kin wiawihong irail. Idek rehrail, oh re pahn padahkiong uhk me Koht saikinte “likidmeliehla” irail. Ni ah kilangwohng sounpar 55 me e mihki nan doadoahk en kalohk kaukaule, emen pioneer me mahki sounpar 72 koasoia, “Siohwa sohte kin likidmeliehla.”—Ipru 13:5, 6.
“Ahl Kaselel Ehu en Kerenihla Siohwa”
12. Dahme karehda doadoahk en kalohkiseli rongamwahuwo kin wia kapai kaselel ehu?
12 E kin pil wia kapai ehu me Siohwa kin pil padahkiong kitail en kalokiseli rongamwahu en sapwellime Wehi. E kin kilangwohng kitail—mendahki kitail aramas soh unsek— me iei sapwellime “tohndoadoahk” nan doadoahk en komour wet. (1 Korint 3:9; 1 Timoty 4:16) Ni atail kin kalohkihong mehteikan duwen Wehin Koht, ni atail kin pakairki kasohrlahn me suwed kan, ni atail kin kawehwehong aramas kan sapwellime limpoak kaselel ni ah ketikihda tomw ehu, ni atail kin pahkpeseng sapwellime Mahsan momour oh padahkih audepe kesempwal kan ong aramas mohngiong mehlel kan, kitail kin kerenihla atail Sounkapikadao, Siohwa.—Melkahka 145:11; Sohn 3:16; Ipru 4:12.
13. Dahme ekei kin koasoiahki mwekid me arail doadoahk en pioneer kin wiahiong arail nanpwung rehn Siohwa?
13 Pioneer kan kin kak doadoahkihla ahnsou laud nan ehu ehu sounpwong sukusukuhlki oh padapadahngki duwen Siohwa. Iaduwen re pehm me met kin kamwekidih arail nanpwung rehn Koht? Emen elder nan France me pioneerki sounpar eisek samwa sapengki: “Doadoahk en pioneer kin wia ahl kaselel ehu en kerenihla Siohwa.” Emen pioneer nan sahpwo, me pioneer sounpahr 18 nan doadoahk en kalohk kaukaule, koasoia: “Doadoahk en pioneer mweidong kiht en ‘song oh kilang me Siohwa me mwahu,’ rahn koaros kin kakehlailla at nanpwung rehn at Sounkapikadao.” (Melkahka 34:8) Emen sister nan Britain me pioneerki sounpar 30 kin ahneki soangen pepehmohte. E koasoia: “Ahi kin alehda kaweid sang ni ngehnin Siohwa nan ahi doadoahk en kalohk kin kakerenihehla ong Koht. I inenen kamelele me ngehnin Siohwa pak tohto kin kahlwaiehlahng ehu ihmw ni ahnsou me konehng.”—Kaparekiong Wiewia 16:6-10.
14. Iaduwen pioneer kan kin paiekihda arail doadoahngki Paipel oh pwuhk kan me poahsoanda pohn Paipel rahn koaros pwehn padahki mehteikan?
14 Pioneer tohto kin diarada me doadoahngki Paipel oh pwuhk kan me poahsoanda pohn Paipel rahn koaros pwehn kawehwe oh padahngki padahk mehlel en Pwuhk Sarawi kin sewese irail en kekeirada arail loalokongkihla Mahsan en Koht. Emen brother nan Spain me mahki sounpar 85 me pioneerki sounpahr 31 kawehwe: “Doadoahk en pioneer kin sewese ie en loalokongkihla laud Paipel, loalokong wet me I kin doadoahngki pwehn sewesehki aramas tohto en esehla Siohwa oh kupwure kan.” Emen sister sang Britain me pioneerki sounpahr 23 koasoia: “Doadoahk en kalohk kaukaule seweseiehr kekeirada perenki tungoale mwengehn ngehn.” Kawehwehong mehteikan “koapworopwor me mi rehmwail” kak kakehle pein ahmw pwoson me pid kamehlel kan me komw kin kesempwalki. (1 Piter 3:15) Emen pioneer sang Australia koasoia: “Doadoahk en pioneer kin kamwahuwiala ahi pwoson ni ahi kin koasoiaiong mehteikan duwen met.”
15. Dahme me tohto kin men wia pwehn kak iang wia doadoahk en pioneer oh mihmihte loale, oh pwehkida?
15 E sansal me, pioneer pwukat kin kamehlele me re piladaiehr soangen doadoahk en papah ehu me kin wahdo kapai tohto sang rehn Siohwa. Ihme e sohte kapwuriamweiki me tohto kin pein nsenki wiahda koasoandi kan nan arail mour, pil kin tohnmeteikihla doadoahk en mwohni oh kepwe kan, pwehn kak iang doadoahk en pioneer oh mihmihte loale!—Lepin Padahk 28:20.
Mohngiongomw Inengieng Doadoahk Laud en Pioneer?
16, 17. (a) Ma komw kin medemedewe ma komw kak pioneer de soh, dahme komw kak wia? (b) Ia pepehm en ekei me sohte kak pioneer?
16 Mwurin ahmw tehkehr dahme pioneer kan koasoiahki duwen kapai kan en doadoahk en pioneer, ele komw pahn medemedewe ma komw kak iang pioneer? Ma ehi, dahme komw soh koasoiong emen pioneer me pweida mwahu nan doadoahk en kalohk kaukaule wet? Komw pahn pil diarada me e pahn wia sawas laud en koasoi ong emen elder kan nan mwomwohdiso, emen me ese ahmw irair—ese ahmw roson en war, irair kan me kak ireuhkdi, oh ahmw pwukoahn peneinei. (Lepin Padahk 15:22) Dahme mehteikan nda pahn pil sewese uhk en kasawih ni keneinei pwehn kilang ma komw kak pioneer. (Luk 14:28.) Ma komw kak pioneer, omw pai pahn inenen laud mehlel.—Malakai 3:10.
17 Ahpw, iaduwen sounkalohk en Wehio kan me sohte kak pioneer, mendahki re inengieng wiahda awa tohto nan kalohk? Tehk, karasepe ehu, pepehm en emen Kristian sister me nannanti kelehpw apwaliahda nah seri pahmen. E koasoia: “I inenen nsensuwed, pwehki mahso I kin pioneer, ahpw met, I sohte kak wiahda awa tohto duwehte me I kin wiahda mahso.” Sister menet inenen poakepoake nah seri kan oh men apwalih irail. Ni ahnsouwohte, e inengieng wiahda awa tohto nan doadoahk en kalohk. E kawehwehda: “I perenki kalohk.” Kristian lelepek teikan kin pil ahneki soahngen pepehmohte me arail limpoak ong Koht kin kamwekidih irail en men papahki Siohwa ‘mohngiongarail unsek.’—Melkahka 86:12.
18. (a) Dahme Siohwa kupwurki sang rehtail? (b) Dahme karehda kitail en dehr mworuskihla ma irair kan kin irehdi dahme kitail kak wia?
18 Tamataman me dahme Siohwa kasik sang rehtail iei me kitail en papahkiohng ih mouratail unsek. Oh uwen deilahn en emen papahki moure unsek kin weksang en mehteio. Ekei kin kak kawekila arail koasoandi kan pwe ren kak papah nin duwen pioneer kaukaule kan. Me tohto teikan kin auxiliary pioneer ekei sounpwong de kaukaule, oh kin wiahda awa 60 ehu ehu sounpwong nan doadoahk en kalohk. Ahpw, pali moron en sapwellimen Siohwa aramas, kin wia doadoahk en kalohk oh padahk ki mourarail unsek nin duwen sounkalohk en Wehio. Ihme ma komw uhdahn kin irairkihdi soumwahu, mahla, de pwukoahn peneinei, de irair teikan, en dehr mworusala. Ma komw kihda uwen me komw kakohng koaros, eri ahmw papah me kesempwal mwohn silangen Koht, duwehte irail ko nan doadoahk en kalohk kaukaule!
Koaros Kak Kasalehda Ngehnin Pioneer
19. Dahkot ngehnin pioneer?
19 Mendahki komw sohte kak pioneer, komw kak pil kasalehda ngehnin pioneer. Dahkot ngehnin pioneer? Doarepweo Atail Doadoahk en Wehio en July 1988 koasoia: “E kin wehwehki en ahneki lamalam pwung ong kehkehliko en kalohk oh katohnpadahk, uhdahn loaleniong kasalehda limpoak oh nsenohki aramas, kin tohnmetei, oh kin diar peren ni ahr idawehn ni keneinei Soumaso, oh perenki mehkan me ngehnin, kaidehn mehkan ni war.” Iaduwen komw kak kasalehda ngehnin pioneer?
20. Iaduwen pahpa oh nohno kan kak kasalehda ngehnin pioneer?
20 Ma komwi pahpa men de nohno men me naineki kisin seri kan, komw kak ni mohngiong unsek kangoangehkin irail en wiahkihla arail doadoahk pioneer. Ahmw lamalam en ehi ong doadoahk en kalohk kak katengehdi rehrail anahnepen en wiahkihla doadoahk en Siohwa mehkot me keieu kesempwal nan arail mour. Komw kak lukehdo pioneer kan oh soundoulik kan oh arail pwoud kan nan imwomw pwe noumw seri kan en kak paiekihda kalimeng en irail ko me kin diar peren nan doadoahk en kalohk kaukaule. (Pil tehk Ipru 13:7.) Pil nan peneinei kan me arail pelien lamalam kan wekpeseng, pahpa oh nohno pwoson kan, sang arail lokaia oh sang arail mehn kalimeng, kak sewese neirail seri en wiahkihla doadoahk en kalohk kaukaule mehn akadei nan arail mour.—2 Timoty 1:5; 3:15.
21. (a) Iaduwen kitail koaros kak utung irail kan me kin pioneer? (b) Dahme elder kan kak wia pwehn kangoange pioneer kan?
21 Nan mwomwohdiso, kitail koaros kak utung ni unsek irail kan me kak pioneer. Karasepe ehu, komw kak iang emen pioneer kalohk, keieu ni ahnsou kan me pioneero ele pahn kelepw kalohk? Komw pahn diarada me pahn mie “sawaspenen pwoson.” (Rom 1:11, 12) Ma komwi elder men, komw kak wia soahng kan pwehn kangoange pioneer kan. Ni ahnsou me pwihn en elder kan kin tuhpene, re anahne kaukaule tehk anahn en pioneer kan. Ni ahnsou me pioneer men kin mworusala de ahneki kahpwal kan, en dehr mwadang kangoange me en uhdisang pioneer. Nin doken soahngen koasoandi wet ele kin anahn nan ekei irair, en dehr manokehla me doadoahk en pioneer kin wia kapai kaselel ehu me laduhn kalohk kaukaule menet kin uhdahn kesempwalki. Ele ihte me anahn iei kangoang oh ekei kaweid katapan kan de sawas. Rahn ohpis en Society nan Spain ntingihdi: “Ma elder kan kin kangoange doadoahk en pioneer, oh utung pioneer kan nan doadoahk en kalohk, oh apwalih irail kaukaule, pioneer kan kin ahneki peren laud pwehki met, oh pil ahneki pepehm me mie kateperail, oh pahn men kaukaule pioneer mendahki mehn koarompwa kan me kin pwarada.”
22. Nan ahnsou apwal wet en poadoapoad en aramas, dahme kitail en nannanti wia?
22 Kitail momour nan ahnsou apwal en poadoapoad en aramas. Siohwa ketikihongehr kitail doadoahk en komour me kitail anahne kapwaiada. (Rom 10:13, 14) Mendahki ma kitail kak iang kisehn doadoahk en kalohk kaukaule nin duwen pioneer kan de sohte kak, kitail en kasalehda ngehnin pioneer. Kitail en ahneki irair en karuwaru oh ngehnin tohnmetei. Kitail en nantiong kihong Siohwa dahme e kupwurki sang kitail—papahki mouratail unsek. Oh kitail en tamataman me ni ahnsou me kitail kihda uwen koaros me kitail kakohng, mendahki ma e kin rasehng nein liohdio kisin sens kan de en Mery leh pweilaudo, atail papah kin sang mouratail unsek, oh Siohwa kin kesempwalki atail papahki mouratail unsek!
Komw Tamataman?
◻ Dahme karehda doadoahk en kalohk kaukaule kin wahdo pepehm en nsenamwahu oh peren?
◻ Sang dahme kin wiawihong irail, dahme pioneer tohto esehki duwen sapwellimen Siohwa erpit en apwalih nah ladu kan?
◻ Iaduwen pioneer kan kin pehm me arail kalohk kin kamwekidih arail nanpwung rehn Siohwa?
◻ Iaduwen komw kak kasalehda ngehnin pioneer?
[Kilel nan pali 17]
Pioneer kan kin ale peren laud sang katohnpadahk
[Kilel nan pali 17]
Nomw seri kan kak paikihda arail werekiong sounkalohk en Wehio kaukaule kan
[Kilel nan pali 17]
Elder kan kak kangoange pioneer kan nan kalohk