Kapai kan me Kin Kohsang Iang Doadoahk en Kalohk Nin Duwen Pioneer
1, 2. Kapai dah kan kin kohsang iang doadoahk en pioneer, oh dahme kahrehda?
1 Emen pioneer koasoia: “I ese me sohte pil ehu doadoahk tohrohr kak wahdohng ie soangen peren oh kansenamwahu me kin kohsang ehukihong meteikan padahk mehlel.” Pil emen pioneer koasoia: “Ni imwin ehuehu rahn, ahi meir kin kansenamwahu, oh mohngiongi kin dirkihla peren.” Pioneer riemenet kin wiliandi brother oh sister wasa koaros nan sampah ni ara kasalehda duwen ara pepehm oh madamadau duwen kapai kan me kin kohsang iang doadoahk en kalohk nin duwen pioneer.—Lepin Padahk 10:22.
2 Sewese meteikan en sukuhliki duwen loalokong pwung sang Mahsen en Koht me kak sewese aramas en ale komourparail—met kin wahdohng emen peren mehlel. (Wiewia 20:35; 1 Dese. 2:19, 20) Emen brother me werei nan pioneer koasoia: “E kin kaperen oh kin kangoange ie laud ahnsou me I kin kilang duwen manaman en Mahsen en Koht oh ia mwomwen e kin kamwekid aramas en wekidala arail mour.” Ei, ni ahnsou me pioneer kan kin tounmeteiki arail ahnsou pwehn sewese aramas oh onop Paipel rehrail, irail kak ale soangen kapai kan me duwehte pioneer pwukat.
3, 4. Iaduwen iang doadoahk en pioneer kin sewese emen en likih Siohwa, oh iaduwen pioneer e kak sewese emen en kekeirada ni pali ngehn?
3 Likih Siohwa: Pwehki rahn koaros pioneer kan kin likih sapwellimen Koht ngehn sarawi pwe irail en pweida mwahu nan kalohk, irail anahne nantihong kekeirada ni arail kin kasalehda “wahn ngehn akan” oh met kin wia mehn perepe ong irail. (Kalesia 5:16, 22, 23) Oh pil, pwehki pioneer kan kin kalap doadoahngki Mahsen en Koht, re kin ahneki koahiek en doadoahngki iren Paipel kan pwehn kasalehda duwen padahk mehlel oh kakehlailihala meteikan. (2 Tim. 2:15) Emen brother me pioneer sounpahr tohto koasoia: “Ahi iang doadoahk en pioneer sewese ie en kaloalehla ahi wehwehki duwen Pwuhk Sarawi, oh I kin doadoahngki dahme I ese sang nan Pwuhk Sarawi en sewese aramas en esehla Siohwa oh sapwellime kupwur kan.” Met kin uhdahn kansenamwahu!
4 Irail me iang doadoahk en Regular Pioneer pil anahne likih Siohwa ni ahl teikan. Arail pwoson kin laudla ni arail kin kilang iaduwen Siohwa kin kapaiada arail nanti en kaitarala arail anahn en paliwar. Emen brother, me mahki sounpahr 72 oh me Regular Pioneer sounpahr 55, koasoia: “Sohte pak ehu me Siohwa kansensuwedih ie.” Oh pil, pwehki pioneer kan kin kihsang nan arail mour soahng soh katepe kan, irail kin pein pere irail sang pwunod tohto nan mour. Met wia mehkot kansenamwahu en rong?—Madiu 6:22; Ipru 13:5, 6.
5. Iaduwen iang doadoahk en pioneer kak sewese emen en karanih Siohwa?
5 Karanih Koht: En ahneki nanpwung mwahu rehn Siohwa kin wia mehkot me keieu kesempwal. (Mel. 63:3) Ni ahnsou me kitail kin wia uwen atail kak nan kalohk oh wia met pwehki atail limpoak ong Siohwa, atail nanpwung mwahu reh kin kehlailda. (Seims 4:8) Emen brother me pioneer sounpahr tohto sang sounpahr 18 koasoia: “Iang wia doadoahk en pioneer kin sewese kitail en ‘song oh kilang me Siohwa me ketin mwahu,’ oh rahn koaros kekeirada ni atail karanih Sounkapikpatail.”—Mel. 34:8.
6. Dahme pioneer kan anahne ahneki, oh ihs me kin iang paiekihda likin irail pioneer kan?
6 Likin ahneki irair me anahn ong pioneer, irail pil anahne pwoson kehlail, oh limpoak kehlail ong Koht oh mehn mpatail, oh pil ahneki ngenin tohnmetei. (Madiu 16:24; 17:20; 22:37-39) Ahpw, ni ahmw kin kilang mas peren en irail pioneer kan wasa koaros nan sampah, ke pil ese me kapai kan me kohsang iang doadoahk en kalohk nin duwen pioneer kin inenen laud mehlel. (Mal. 3:10) Kapai pwukat sohte kin ongete pioneer kan, ahpw pil arail peneinei oh arail mwomwohdiso pil kin paiekihda soangen ngehn mwahu me pioneer kan kin kasalehda.—Pilipai 4:23.