Doadoahk en Pioneer—Elen Doadoahngki Atail Ahnsou ni Loalokong!
1, 2. Soangen kahpwal dah kan me ekei kin powehdi pwehn iang pioneer?
1 ‘Ei pwukoa diralahr! E pahn uhdahn mwahu ma I wia pioneer men ahnsou wet?’ Iei me emen sister medemedewe ni ahnsou me e rongorong elder men me pioneer wia ehu padahk nan mihting tohrohr en rahn riau me oaralap koasoia “Nantihwei Mwowe Nan Doadoahk en Pioneer.” Emen brother pwulopwul me pil wie rongorong padahkohte kin medemedewe, ‘Ia duwen brothero eh kin kak koasoanehdi eh ahnsou pwehn pioneer? Ngehi kaidehn elder men, ahpw ei mour kedirepwkihlahr kedirepw tohto!’
2 Ni eldero eh pousehlahte kasalehda duwen kapai kan me kohsang doadoahk en pioneer, e idek rehn ekei pioneer me kin wiahda wekidekla kan me anahn pwe irail en kak pioneer oh ia duwen Siohwa eh kin ketin kapaiada arail nannanti. Emen rehrail ahneki kahpwal en paliwar, emen eh pwoud sohte iang padahk mehlel, oh emen tounmeteikihla eh doadoahk en mwohni pweilaudo ahpw e kin mour ni ahl ehu me pahn itar ong nah mwohni me e kin wiahda met. Ni brother pwulopwulo oh sistero ara kin wie rongorong duwen pioneer pwukat ar kin pweida mwahu sang ni sapwellimen Siohwa sawas, ira eri pwurehng kasawih pein ara madamadau oh irair akan. Se pil men kangoange kumwail en pil wia met.
3. Soahng dah kei me kitail anahne tehk kanahieng ma kitail medemedewe en iang doadoahk en pioneer?
3 Kitail ese me Siohwa iei ih me Sounkapikpen mehkoaros oh Wasa Lapalahpie oh kitail pweipwandkihong ih atail mour. (Dan. 4:17; Wiewia 17:28) E sansal ong kitail me Siohwa kin ketin doadoahngki pwihn ehute. E wia pwais kaselel ong kitail en iang pwihn wet oh papah Siohwa ni lelepek oh utungada “ladu lelepek oh loalokong” pwehn kalohk ong aramas akan duwen Wehin Koht mwohn imwin koasoandi wet eh pahn leledo. (Luk 12:42; Mad. 25:40; 1 Pit. 2:9) Pwehki kitail momour ni “imwin rahn akan,” kitail wehwehki me ahnsoun kalohk wie mwotomwotalahr. (2 Tim. 3:1) Ahnsowohte, kitail pil anahne apwalih atail peneinei ong anahn en war akan. (1 Tim. 5:8) Neitail mwohni me kitail kin alehsang atail doadoahk en mwohni solahr itar duwehte mahs. Mwein atail roson en paliwar solahr duwehte mahs. Oh ni mehlel, kitail men ahneki ekis ahnsou oh mwohni ong pein kitail. (Ekl. 3:12, 13) Ihme kahrehda, ele kitail kin medemedewe ma atail ale luhk en pioneer wia pilipil mwahu ehu.
4. Dahme kahrehda emenemen kitail anahne en kasawih pein atail irair kan?
4 E konehng emenemen kitail en kasawih pein atail irair kan oh pilada ma kitail kak pioneer. (Rom 14:12; Kal. 6:5) E kin wia mehn kangoang laud en tehk duwen tohtohlahn irail kan me mwekidki luhk en iang doadoahk en pioneer. Mendahki kapwunod kan oh kahpwal kan en imwin rahn pwukat, ripoht en kalohk me mihmi nan 2014 Yearbook kasalehda me sapwellimen Siohwa aramas me kereniong meh 1,500,000 nan sampah pwon kin nantihong wiewia doadoahk en kalohk nin duwen pioneer. Sohte lipilipil ma irail kin papah Siohwa nan wasa ieu me apwal en mwohni, sohte mehn peidaid, kahpwal en soumwahu de kahpwal teikan, irail brother oh sister pwukat sohte kin pwangahkihda wiewia dahme mwahu, oh e konehng kitail en kapinga irail. (Kal. 6:9) Re ale sapwellimen Siohwa luhk en song ma e pahn ketin sewese irail. (Mal. 3:10) Irail kin pehm me doadoahk en pioneer kin sewese irail en doadoahngki arail ahnsou oh mwohni ni elen loalokong oh irail kin kilang me Siohwa kin ketin kapaiairailda pwehki arail wiahda wekidekla kan me anahn pwe irail en kak iang doadoahk en pioneer oh kak mihmihte nan doadoahko.
5. Ia duwen emen sister eh sewese nah serepeino sang ni eh pwelel?
5 Pioneer kan Kin Ale Kapai kan: Emen sister nan Cameroon me naineki kisin serepein kis kawehwehda ia duwen eh kin pioneer: “Sangete ahnsou me nei serepeino ipwidi, e kin iang ie kalohk ahnsou koaros. Pil mwohnte eh tepida alu, I kin pirehiong ih ni tihnsoweie doadoahngki kisin likou oh wa ih. Ehu ni menseng ni at wia doadoahk en kalohk, I uhdi ni ehu kisin sidohwa limwahn ahlo. Nei serio aluhsang ie, oh e wahda ekei makasihn sang nan ei kopwouo. E alu wasawasas kolahng ni pil ehu kisin sidohwa. Mendahki e sohte nohn kak lokaia, emen lih kilang ih oh e kihong liho ehu makasihn. Liho uhdahn pwuriamweikihla seri menet eh tikitik ahpw iang doadoahk en kalohk. E perenki ale makasihno oh e pil pwungki en onop Paipel rehi!”
6. Dahme emen elder kin wia mendahki eh inenen kin kedirepw?
6 Pwehki eh mwekidki luhk en iang doadoahk en sawaspen pioneer, emen elder me pil tapwin peneinei nan Zambia me kin doadoahk mpen awa 40 nan wihk ehu ong eh doadoahk en mwohni koasoanehdi en iang doadoahk en sawaspen pioneer mendahki eh inenen kin kedirepw. E men wiahda mehn kahlemeng mwahu ong eh mwomwohdiso oh eh peneinei. Ekei pak, e kin peidi limwahn ahl oh kapirada ngilen wadawad en pwuhken Sawas ong Nsenamwahu en Peneinei oh luke aramas me kin alialu pohn ahlo en kohdo rong audepen pwuhko. Ni ahl wet, e kihla pwuhk 29, oh tepida onop Paipel rehn aramas riemen.
7. Ia duwen tohn mwomwohdiso koaros ar kak kasalehda arail utung doadoahk en pioneer?
7 Nan ehu sapw me karanih Zambia me adaneki Zimbabwe kin sansal arail kin utung doadoahk en pioneer. Ehu mwomwohdiso me mie sounkalohk 117 ripohtki me irail sounkalohk 70 iang doadoahk en sawaspen pioneer oh meh 9 iang doadoahk en pioneer. Pil ehu mwomwohdiso me mie sounkalohk 94 ripohtki me irail sounkalohk 58 iang doadoahk en sawaspen pioneer. Pil ehu mwomwohdiso me mie sounkalohk 126 ripohtki me sounkalohk 58 iang doadoahk en sawaspen pioneer oh pil meh 4 iang doadoahk en pioneer. Mendahki brother kan kin kedirepwki anahn en peneinei, pwukoa nan mwomwohdiso, oh re pil kin iang doadoahk en kauwada ohpis en Sounkadehdehn Siohwa kan, re kin nannantihte doadoahngki arail ahnsou ni elen loalokong nan doadoahk en kalohk.
8. Ia duwen Siohwa eh pahn ketin sewese kitail ma kitail kin mwohneki mahs sapwellime Wehi?
8 Pioneer kan kin wehwehki me iang doadoahk en pioneer oh pil kin dadaurete arail wiewia doadoahk wet sohte kin kohsang pein arail kehl. Irail wehwehki me soahng koaros me re kak wia kin pweida pwehki irail kin likih kehl me “Koht ketikihong” irail. (1 Pit. 4:11) Arail pwoson kin sewese irail en doudoulahte nan arail doadoahk en kalohk rahn koaros. Pioneer me kin pweida sohte kin rapahki mehkan me kansenamwahu ong pein irail, re kin pohnese me re pahn “diarada apwal laud” nan doadoahk en kalohk, ahpw irail pahn ale kapai mwuledek.—1 Des. 2:2.
9. Ia duwen atail kak paiekihda en Pohl mehn kahlemeng mwahu?
9 Kitail en Kahlemengih Mehn Kahlemeng Mwahu en Pohl: Paipel kin kasalehda ia duwen wahnpoaron Pohl eh kin pweida mwahu nan kalohk oh sawas laud me e kin kihong aramas tohto. Ahpw, ma mie emen me eh pwukoa diralahr, Pohl iei emen. E kin dadaurete mendahki kalokolok oh kahpwal akan pwe en kak kalohki rongamwahu oh kakehle mwomwohdiso kan. E pil anahne dadaurete eh kahpwal en paliwar. (2 Kor. 11:21-29; 12:7-10) E kin koasoanehdi teng en doadoahngki eh ahnsou ni elen loalokong. E kin kasalehda me e kin wiahda eh doadoahk kan koaros sang sapwellimen Siohwa sawas. (2 Kor. 4:7) Sohte emen irail akan me Pohl sewese kak nda me Pohl kin doadoahngki mwahl eh ahnsou oh kehl en papah Siohwa de e kakete wiahda mwahu sang dahme e wiewia. Ni mehlel, rahnwet kitail pil kin paieki en Pohl eh doadoahngki eh ahnsou ni elen loalokong! Ia uwen atail kin kalahnganki kaweid me Pohl kihda pwehn sewese kitail en koasoanehdi dahme keieu kesempwal nan atail mour oh pil tengedihongete padahk mehlel nan ahnsou apwal pwukat!
10. Dahme kahrehda met uhdahn kesempwal sang mahs kitail en doadoahngki atail ahnsou ni elen loalokong?
10 Ahnsou wet, “atail ahnsou mwotomwotalahr” en kalohki rongamwahwo. (1 Kor. 7:29; Mad. 24:14) Kahrehda, e konehng emenemen kitail en pein idek rehtail, ‘Ma ei mour pahn imwisekla lakapw, I kak patohwan ong Siohwa rahnwet me I kin doadoahngki ei ahnsou ni elen loalokong?’ (Seims 4:14) Ke sou kapakapohng Siohwa ahnsou wet, oh kamehlelehiong ih duwen omw ineng en doadoahngki omw ahnsou ni elen loalokong nin duwen emen sapwellime Sounkadehde kan? (Mel. 90:12) Kapakapki sapwellimen Siohwa sawas en kihsang soahng kan me sohte kesempwal sang nan omw mour. Mendahki mahso ke lemeleme me ke sohte kak pioneer, ke sou men pwurehng kasawih omw mour oh tehk ma ke kakehr pioneer ahnsouwet?
11. Mehnda ma kitail kak de sohte kak wia pioneer, dahme sapwellimen Siohwa sounpapah kan kak kamehlele?
11 Doadoahngki Mwahu Irair kan me Ke Mihmi Loale: Mehlel me kaidehn koaros kak kalohk awa 70 nan sounpwong koaros nin duwen pioneer, pwehki irair en sounkalohk koaros kin wekpeseng. Ahpw, sounkalohk tohto kin koasoanehdi en kalohk awa 50 nan sounpwong ehu nin duwen sawaspen pioneer ahnsou koaros me irail kak. Ma ke sohte kak iang pioneer de sawaspen pioneer pwehki irair kan me ke mihmi loale, ke dehr mworusala. Kaukaule kapakap pwe omw irair akan en kak wekidekla. Ma ke pil sohte kak wekidala omw irair me ke mihmi loale ahnsou wet, tamataman me Siohwa kin ketin kupwurperenki sohte lipilipil dahme ke kak wia ni omw papah ih sang nan mohngiongomw unsek. (Mad. 13:23) E mwahngih me ke kin kesihnenda teng ni omw kin papah ih oh me ke pil kin wia uwen omw kak koaros nin duwen sounkalohk lelepek men me kin kalohk sounpwong koaros. Mwein ke kak nantihong koahiekla nan kalohk, oh nantihong kamwahwihala omw koahiek nin duwen omw kin wia sounkalohk oh sounpadahk en rongamwahwo.—1 Tim. 4:16.
12. Dahme kitail en dehr peikasalki?
12 Pwehki “rahn lapalap oh kamasepwehk” en Siohwa kerendohr, kitail anahne doadoahngki atail ahnsou ni elen loalokong pwe en kanekehla doadoahk me Siohwa kehkehlikihong kitail en wia. (Soel 2:31) Sehdan ese me eh ahnsou mwotomwotlahr, oh e kin wia uwen eh kak koaros en kahpwalihala atail mour oh kahrehiong kitail en sohpeisang soahng kan me keieu kesempwal. (Pil. 1:10; Kaud. 12:12) Dehr peikasalki me Siohwa sohte kin ketin nsenohkin uhk. Siohwa kak ketin sewese iuk en kihsang nan omw mour soahng soh katepe kan oh pil ketin sewese iuk en wia uwen omw kak koaros nan kalohk. (Mel. 145:16) E kaperen pwe sounkalohk tohto, ni arail kin pwurehng kasawih oh tehk sapahlih arail irair akan, irail kin diarada me irail kakehr iang pwihn en pioneer de sawaspen pioneer kan. Ni mehlel, pioneer kan kin diarada nsenamwahu mehlel ni arail kin doadoahngki arail ahnsou ni elen loalokong. Ke pahn duwehte irail?