Peneinei Kan, Kapinga Koht Nin Duwen Amwail Wia Kisehn Sapwellime Mwomwohdiso
“I kin kapinga Siohwa mwohn pokon en sapwellime aramas akan.”—MELKAHKA 26:12, New World Translation.
1. Dahme pil kesempwal en wia kisehn kaudok mehlel likin onop Paipel oh kapakap nan pein imwatail kan?
KAUDOK ong Siohwa sohte kin pid ihte kapakap oh onop en Paipel ni pein imwatail kan, ahpw e kin pid iang wiewia kan en sapwellimen Koht mwomwohdiso. Kehkehlik kin kohwong Israel en mahs en “kapokonepene aramas akan koaros, ohl, lih, seri,” pwe ren sukuhliki sapwellimen Koht kosonned akan oh kapwaiada. (Deuderonomi 31:12; Sosua 8:35) Irail me mah kan oh pil irail ‘mwahnakapw oh peinakapw akan’ irail koaros kin ale kangoang en kapinga mwaren Siohwa. (Melkahka 148:12, 13) Koasoandi pwukat me kin pil kadoadoahk nan mwomwohdisohn Kristian. Nan Kingdom Hall kan nan sampah pwon, ohl akan, lih akan, oh seri kan kin iang pasepeng kan nan mihding kan me tohnmwomwohdiso kin kak iang pasepeng kan, oh irail tohto me kin perenki iang pasepeng kan.—Ipru 10:23-25.
2. (a) Dahme kahrehda kaunopada ong mihding kan inenen kesempwal ong sewese pwulopwul kan en perenkihda mihding kan? (b) Ahn ihs mehn kahlemeng mwahu me keieu kesempwal?
2 Ni mehlel, en sewese me pwulopwul kan en iang wia wiewia koaros en mwomwohdiso kaidehn mehkot mengei. Dahme kahrehda, ekei seri kan me kin iang ahr pahpa oh nohno kan iang towehda mihding kan, ahpw re sohte kin perenki mihding kan? Mehlel, pali laud en seri kan sohte kak mwohndi oh rongorong ni ahnsou reirei oh irail kin mwadang pwangada. Ahpw, ma re pahn kaunopada ong mihding kan, met pahn kak sewese apwaliala kahpwal wet. Ma seri kan sohte kin kaunopada, re sohte kak iang pasepeng kan nan mihding kan ni ahl me pahn mie katepe. (Lepin Padahk 15:23) Oh ma re sohte pahn kaunopada, e pahn inenen apwal ong irail en kekeirada ni pali ngehn. (1 Timoty 4:12, 15) Eri, dahme kak wiawi? Keieu, pahpa oh nohno kan anahne idek pein rehrail ma pein irail kin kaunopada ong mihding kan. Arail mehn kahlemeng mwahu pahn kak kamwekidada neirail seri kan. (Luk 6:40) En koasoanehdi mwahu onop en peneinei pahn kak sewese koasoandi wet en pweida mwahu.
Kakehlailda Mohngiong kan
3. Ni ahnsou me onop en peneinei kin wiawi, dahme kahrehda papah oh nohno kan anahne nantihong en kakehlailda mohngiong kan, oh dahme re anahne wia?
3 Onop en peneinei iei ahnsoun kakehlailda mohngiong kan kaidehn ihte audehkihda madamadau loalokong. Met kin wehwehki me pahpa oh nohno kan anahne pohnese kahpwal kan en tohnpeneinei kan oh irail anahne kasalehda me re kin nsenohkin pein emenemen irail. Siohwa kin ketin “song mohngiong en aramas koaros.”—1 Kronikel 29:17.
4. (a) Ia wehwehn “sehse lamalam”? (b) Dahme anahn pwehn “saikedi pein mohngiongatail”?
4 Dahme Siohwa kin diarada ni ahnsou me e kin song mohngiong en neitail seri kan? Pali laud en irail pahn nda me re kin poakohng Koht, oh met inenen mwahu. Ahpw, emen me pwulopwul de emen me ahpwtehn sukuhliki duwen Siohwa sohte kin nohn wehwehki sapwellimen Siohwa ahl akan. Pwehki e soakoahiek, mwein e kak wia soahngen aramas me Paipel kin mahsanih, “sehse lamalam akan.” Mwein kaidehn eh pepehm kan koaros me suwed, ahpw e anahne ahnsou laud en kaiahne pein eh mongiong pwehn kaperenda Koht. Met kin pidada madamadau kan, ineng kan, pepehm kan, oh mehn akadei kan en ehuwong dahme Koht kin kupwurki uwen ah kak nin duwen aramas sohunsek men. Ni ahnsou emen pahn kaiahne pein ih ni elen Koht, e kin “saikedi pein mohngiongih.”—Lepin Padahk 9:4; 19:8, NW.
5, 6. Iaduwen pahpa oh nohno kan kak sewese neirail seri kan en ‘saikedi pein mohngiongarail’?
5 Pahpa oh nohno kan kak sewese neirail seri kan en ‘saikedi pein mohngiongarail’? Ni mehlel, sohte aramas men me kak kihong aramas teikan irair mwahu en mohngiong. Pein emenemen kitail kin ipwikihdi atail pwung en wiahda atail pilipil kan, oh e kin poahsoanehda pohn dahme kitail kin kalapw medemedewe. Pahpa oh nohno kan ni elen loalokong kak sewese neirail seri kan en pein kaselehda dahme mihmi nan mohngiongirail. Pahpa oh nohno kan kak doadoahngki peidek pwukat, ‘Ia ahmw pepehm duwen met?’ oh ‘Dahme ke uhdahn men wia?’ Pahpa oh nohno anahne rong kanahieng. Dehr kaselehda me ke lingeringer de pwuriamweiki. (Lepin Padahk 20:5) Irairen kadek, wehwehki ahr pepehm kan, oh limpoak me kesempwal ma ke men lel mohngiongarail.
6 En kakehlailda irair mwahu kan nan neitail seri kan, kitail anahne ahnsou koaros koasoia duwen wahn ngehn akan—ehu ehu wahn ngehn ni oaritik—oh sawaspene nin duwen peneinei ehu en kakairada wahn ngehn. (Kalesia 5:22, 23) Kakairada omw limpoak ong Siohwa oh Sises Krais, kaidehn ihte sang atail koasoi kan me kitail anahne poakohng ira, ahpw koasoiada duwen kahrepe kan kitail men poakohng ira oh iaduwen kitail kak kasalehda limpoak wet. (2 Korint 5:14, 15) Kakehlailda ineng en men wia dahme pwung sang ni omw pahn koasoiaiong irail duwen kapai kan me pahn kohsang wia dahme pwung. Ma ke pahn koasoia duwen imwila suwed kan me kohsang tiahk suwed, met pahn kak sewese neitail seri kan en soikala madamadau sapwung kan, lokaia suwed kan, oh tiahk suwed kan. (Eimwos 5:15; 3 Sohn 11) Kasalehda iaduwen atail madamadau kan, atail lokaia kan, oh atail tiahk kan—ma mwahu de suwed—pahn kak alehda soangen nanpwung dah me pahn mie nanpwungen emen emen kitail oh Siohwa.
7. Dahme kak sewese seri kan en powehdi kahpwal kan oh wiahda ahr pilipil kan ni ahl me pahn sewese irail en karanih Siohwa?
7 Ni ahnsou me seri men lelohng kahpwal ehu de anahne wiahda eh pilipil, kitail kak idek reh: ‘Ia madamadau en Siohwa ong kahpwal wet? Dahme ke ese duwen Siohwa me kamwekid uhk en nda met? Ke kapakapki ong Siohwa duwen kahpwal wet?’ Tepida mwadang en sewese noumw seri kan en ahnla en nantihong esehla kupwuren Koht oh kapwaiada. Ni ahr kin karanih Siohwa, re pahn perenki kekeid nan sapwellimen Koht ahl akan. (Melkahka 119:34, 35) Met pahn sewese irail en kalaudehla arail kalahnganki pwais kaselel ehu me kitail kin ahneki en iang mwomwohdiso en Koht mehlel.
Kaunopada ong Mihding en Mwomwohdiso kan
8. (a) Dahme pahn kak sewese kitail en koasoiapene anahn akan en atail peneinei ni ahnsou me kitail kin wia atail onop en peneinei? (b) Ia uwen kesempwal onop wet?
8 Ni ahnsoun onop en peneinei, ke anahne koasoiapene duwen anahn akan en tohnpeneinei kan. Ahpw, ke kak koasoiapene anahn kan koaros? Ke sohte kak koasoiapene anahn akan koaros ni ahnsoukiste. Ahpw ke kak ntingihdi anahn akan koaros. (Lepin Padahk 21:5) Ekei ahnsou ke kak kousapahlih dahme ke ntingihdi oh tehk duwen anahn dah kei me kesempwal en koasoia ni ahnsowo. Nsenohki kekeiradahn emenemen tohnpeneinei kan koaros. Koasoandi en onop en peneinei iei kisehn palien kasukuhl en Kristian, me kin sewese kitail en mour ni ahnsouwet oh pil kaunopada kitail ong mour soutuk.—1 Timoty 4:8.
9. Mehn akadei dah kei me kin pid kaunopada ong mihding kan me kitail kak wia erein atail onop en peneinei kan?
9 Amwail kaunopada ong mihding kan en mwomwohdiso kin pil wia kisehn onop en peneinei? Mie ekei mehn akadei kan ke kak kileleiong ahmw peneinei en lel ni ahnsou me kumwail kin wia onop en peneinei. Ekei mehn akadei pwukat pahn anahne wihk, ekei sounpwong, de ekei pil kak lel sounpar mwohn ahr pahn kak kanokehla. Medewehla duwen mehn akadei pwukat: (1) emenemen tohnpeneinei kan kak kaunopada en iang pasepeng nan mihding en mwomwohdiso kan; (2) emenemen tohnpeneinei kan en nantihong pasepeng ni pein eh lokaia kan; (3) doadoahngki iren Paipel kan nan pasepeng kan; oh (4) doudouloale padahk kan pwehn kak pein kapwaiada. Soahng pwukat koaros kak sewese emen en poadidi ong padahk mehlel.—Melkahka 25:4, 5.
10. (a) Iaduwen kitail kak kesempwaliki duwen ehu ehu mihding kan en mwomwohdiso? (b) Dahme kahrehda met kin katapanki?
10 Mehnda ma ahmw onop en peneinei kin poahsoanda pohn Kahn Iroir, dehr manokehla duwen kesempwalpen pein emenemen tohnpeneinei kan de peneinei pwon en kaunopada ong mihding en Pwuhk Study, Theocratic Ministry Sukuhl, oh Service Mihding. En kaunopada ong mihding pwukat pahn pil sewese kitail en kekeid nan sapwellimen Siohwa ahl. Ke kak ekei pak kaunopada ong mihding kan nin duwen peneinei ehu. Sang ni amwail pahn doadoahkpene, koahiek en onop Paipel pahn kekeirada. Met pahn imwikihla tohnpeneinei kan en paiekihda laud mihding kan. Likin mehkan me kesempwal, pil anahne koasoiapene duwen kapai kan en kaukaule kaunopada ong mihding pwukat oh kesempwalpen koasoanehdi ahnsou kan.—Episos 5:15-17.
11, 12. Iaduwen kitail kak paiekihda kaunopada ong koul en mihding kan en mwomwohdiso, oh iaduwen kitail kak wia met?
11 Nan Kapokon kan me oaralap koasoia “Sapwellimen Koht Ahl,” kitail kin ale kangoang en kaunopada ong pil ehu koasoandi en atail mihding kan—koul akan. Ke kin kapwaiada met? Met pahn kak sewese atail madamadau kan oh mohngiongatail kan en kesempwaliki padahk mehlel en Paipel kan oh ni ahnsowohte kalaudehla atail perenki mihding kan en mwomwohdiso.
12 Ma kitail pahn wadek oh koasoiapene duwen ia wehwehn mahsen kan nan koul akan me kitail pahn onop ni mihding kan, met pahn kak sewese kitail en koul sang mohngiongatail kan. Nan Israel en mahs, irail kin kalapw doadoahngki mehn keseng kan nan arail kaudok. (1 Kronikel 25:1; Melkahka 28:7) Mie emen nan ahmw peneinei me ese doadoahngki mehn keseng? Dahme ke soh doadoahngki mehn keseng wet oh praktis ehu koul en Wehio ong wihko, oh koulki koulo nin duwen peneinei ehu. Oh pil kak doadoahngki cassette kan. Nan ekei sahpw akan, riatail brother kan kin inenen samanih koul oh re sohte doadoahngki keseng. Ni ahnsou me re pahn alu nanial kan de doadoahk nan sapwarail kan, re kin kalapw perenki kokoulki koul kan me koasoanehdier nan mihding kan en mwomwohdiso ong wihko.—Episos 5:19.
Kaunopada ong Kalohk nin duwen Peneinei ehu
13, 14. Dahme kahrehda e wia mehkot kesempwal en koasoipene nin duwen peneinei ehu pwehn sewese kitail en kaunopada mohngiongatail kan ong doadoahk en kalohk?
13 Kalohkong meteikan duwen Siohwa oh sapwellime kupwure kan kin wia mehkot me inenen kesempwal nan atail mour. (Aiseia 43:10-12; Madiu 24:14) Mendahki ma kitail pwulopwul de mah, kitail kin perenki doadoahk wet oh pweida mwahu ma kitail kin kaunopada. Iaduwen kitail kak kaunopada ong kalohk nin duwen peneinei ehu?
14 Duwehte mehkan koaros me kin pid atail kaudok, e kesempwal en kaunopada mohngiongatail kan. Kitail anahne koasoiapene dahme kitail pahn wia oh pil dahme kahrehda kitail pahn wia mehpwukat. Ni mwehin Nanmwarki Seosopat, aramas akan kin ale kaweid sang kosonned en Koht, ahpw Paipel padahkiong kitail me irail sohte “kaunopada mohngiongarail kan.” Pwehki met, re kin mweidong pein irail en kak lohdi pahn kasongosong kan me kak kahluwa irail sang kaudok mehlel. (2 Kronikel 20:33; 21:11) Atail mehn akadei kan kaidehn ihte en ripohtki atail awahn kalohk kan de kihla pwuhk kan. Kitail kin wia doadoahk en kalohk pwehki atail limpoak ong Siohwa oh limpoak ong aramas akan me anahne ahnsou en pilada mour. (Ipru 13:15) Met iei doadoahk ehu me kitail “tohndoadoahk kei me kin iang Koht wiewia sapwellime doadoahk.” (1 Korint 3:9) Kitail ahneki pwais kaselel ehu! Kitail kin iang tohnleng kan ni ahnsou me kitail kin iang doadoahk en kalohk. (Kaudiahl 14:6, 7) Ahnsou mwahu ehu en sewese noumw seri kan en kakairada kalahnganki ahnsou me onop en peneinei kin wiawi, ni onop en ehu ehu wihk de ni ahnsou me ahmw peneinei kin koasoiapene Iren Rahn!
15. Iahd kitail kak kaunopada ong kalohk nin duwen peneinei ehu?
15 Ke kin ekei pak doadoahngki ahnsoun onop en peneinei pwehn sewese ahmw peneinei en kaunopada ong kalohk erein wihko? En wia met pahn kak imwikihla kapai tohto. (2 Timoty 2:15) Met kak sewese ahr doadoahk en kalohk en pweida mwahu. Ekei pak, ke kak koasoanehdi ehu ahnsou nan amwail onop en peneinei pwehn ihte kaunopada ong kalohk. Ahpw, ni mehlel, e pahn mwahu en koasoiaiong ahmw peneinei duwen ekei wasa me irail kak kamwahuiala ahr padahk kan en kalohk mwurin onop en peneinei de pil ehu ahnsou erein wihko.
16. Koasoiapene kesempwalpen soahng kan me kitail kak wia me kileldi nan parakrap wet.
16 Onop en peneinei kan kak pid duwen ekei kahk kan duwehte met: (1) Kaunopada ehu padahk iangahki ehu iren Paipel oh wadek iren Paipel ma mie ahnsou. (2) Tehk me tohnpeneinei koaros mie arail ehd en kalohk, Paipel, pwuhk en nting, pen de pensil, oh pil doaropwe (tract) kan, pwuhk kan, brochure kan, oh makisihn kan me sohte ohla. Sohte anahne pwainda ehd en kalohk me pweilaud, ahpw ahmw ehd en kalohk anahne soandi mwahu oh mwakelekel. (3) Koasoiapene iawasa oh iaduwen kitail kak wia kalohk ni ahnsou sohte lipilipil. Ni ahnsou me ke pahn iang noumw seri kan kalohk, kumwa kak pwurehng koasoiapene kaweid pwukat. Kihda sawas mwahu kan, ahpw dehr nohn kihda kaweid tohto.
17, 18. (a) Soahngen kaunopada dah kei me peneinei ehu kak wia pwehn kahrehong arail doadoahk en kalohk en pweida mwahu? (b) Ire dah kei en kaunop wet pahn kak wiawi ni ehu ehu wihk?
17 Kisehn doadoahk me Sises Krais ketikihong sapwellime tohnpadahk kan iei doadoahk en katohnpadahk. (Madiu 28:19, 20) Katohnpadahk kin pidada laudsang ihte kalohk. E kin pid padahkih aramas. Iaduwen ahmw onop en peneinei kak sewese komwi en koahiekla nan doadoahk wet?
18 Nin duwen peneinei ehu, ke kak koasoiapene duwen ihs irail akan me pahn mwahu ahmw peneinei en pwurehng pwurala rehrail. Ekei mwein ale pwuhk kan; ekei mwein ihte kin rong atail padahk kan. Mwein ke tuhwong irail ni ahnsou me ke wia doadoahk en kalohk ihmw lel ihmw de kalohk ahnsou sohte lipilipil, mwein ni ahmw kalohk nan sidohwa kan de kalohk ni imwen sukuhl. Mweidong sapwellimen Koht Mahsen en kahre iuk. (Melkahka 25:9; Esekiel 9:4) Koasoanehdi ong emenemen nan ahmw peneinei ihs me re pahn pwurala rehrail nan wihko. Dahme kitail pahn koasoiaiong tohnihmwo? Koasokoasoi en peneinei pahn kak sewese tohnpeneinei koaros en kaunopada. Kileledi ekei iren Paipel kan me kitail kak kasalehong aramas me perenki rong kan oh pil ekei ire kesempwal kan sang brochure Dahme Koht Kupwurki Kitail en Wia? de pwuhk me oaralap koasoia Knowledge That Leads to Everlasting Life. Dehr songen koasoia oaralap tohto ni ahmw pwurehng pwurala rehn aramas emen. Kihong peidek ehu rehn tohnihmwo en medemedewe lao ke pwurala reh. E pahn mwahu ma peneinei kan koaros pahn wia met ehu ehu wihk ahnsoun arail onop en peneinei: en pilahnehda ihs emenemen tohnpeneinei pahn pwurehng pwurala reh oh ahnsou dah mwahu en pwurehng pwurala reh oh mehn akadei dahieu e pahn akadeiong. Met pahn kak sewese doadoahk en kalohk en peneinei pwon en pweida mwahu.
Padahkiong Irail Sapwellimen Siohwa Ahl
19. Ma tohnpeneinei kan men pousehla kekeid nan sapwellimen Siohwa ahl, oh soangen pepehm dah re pahn ahneki, oh dahme kin kahrehong emen en ahneki irair wet?
19 E sohte mengei en wia emen tapwin peneinei nan sampah suwed wet. Sehdan oh nah ngehn saut akan kin nantihong song en kauwehla pali ngehn en sapwellimen Siohwa ladu kan. (1 Piter 5:8) Oh pil nan rahnpwukat, kumwail pahpa oh nohno kan kin lelohng kahpwal laud, keieu kumwail pahpa oh nohno kan me sohte amwail pwoud. Inenen apwal en ahneki ahnsou en wiahda soahng koaros me ke men wia. Ahpw e pahn mie katepen ahmw pahn nantihong kapwaiada, mehnda ma ehute kaweid, ehu ehu ahnsoun onop en peneinei, oh ekis ekis nantihong kamwahuiala ahmw prokram en onop en peneinei. Ma ke kilang irail kin karanih komwi, ni lelepek, kekeid nan sapwellimen Siohwa ahl, e kin wia mehkot me kansenamwahu ong komwi. Pwehn pweida ni atail kin kekeid nan sapwellimen Siohwa ahl, tohnpeneinei kan anahne en perenki iang towehda mihding kan en mwomwohdiso oh perenki iang doadoahk en kalohk. Met kak pweida ma tohnpeneinei kan pahn kaunopada—kaunopada me pahn kakairada mohngiong oh sewese koaros nan peneinei en iang doadoahk wet me pahn pweida mwahu.
20. Dahme pahn kak sewese pahpa oh nohno kan en ahneki peren me ntingihdi nan 3 Sohn 4?
20 Wahnpoaron Sohn ntinghidi duwen irail akan me e pein sewese ni pali ngehn: “Sohte me I perenki sang ei rong me nei kompoakepahi kan kin momourki mour mehlel.” (3 Sohn 4) Onop en peneinei kan me kin wiawi pwehn lel arail mehn akadei kan oh tapwin peneinei kan me kin sewese tohnpeneinei kan ni kadek oh nsenohkin anahn akan en emenemen tohnpeneinei kan kin kak sewese eh peneinei en kak ahneki peren wet. Ni en pahpa oh nohno kan pahn sewese arail peneinei en kakairada kalahnganki oh kesempwalki sapwellimen Koht ahl, re kak sewese ahr peneinei kan en paiekihda elen mour me keieu mwahu.—Melkahka 19:7-11.
Komw Kak Kawehwe?
◻ Dahme kahrehda kaunopada ong mihding kan inenen kesempwal ong neitail seri kan?
◻ Iaduwen pahpa oh nohno kan kak sewese neirail seri kan en ‘saikedi pein mohngiongarail’?
◻ Iaduwen atail onop en peneinei kak sewese kitail en kaunopada ong mihding kan koaros?
◻ Iaduwen sang ni atail pahn kaunopada ong kalohk nin duwen peneinei ehu pahn kak sewese kitail en koahiekla?
[Kilel nan pali 29]
Kitail kak paiekihda sang atail pahn praktis koul kan me pahn wiawi ahnsoun mihding kan