Sawas ong Peneinei kan

1. Ia duwen peneinei en Israel kan ar kin paiekihda koasoandi en Sapad ehuehu wihk?

¹ Wiepen Sapad iei koasoandi limpoak ehu sang rehn Siohwa me peneinei kan kin paiekihda. Mehn Israel kan kin kommoal sang arail doadoahk kan oh kihong ahnsou pwehn medemedewe sapwellimen Siohwa kupwuramwahu oh arail nanpwungmwahu reh. Pahpa oh nohno kan kak pil isaneki ahnsou mwahu wet pwehn katengehdiong Kosonnedo nan mohngiong en neirail seri kan. (Deud. 6:6, 7) Rahnen Sapad kin kihda ahnsou ong sapwellimen Siohwa aramas akan pwe ren kin tehk mwahu arail nanpwungmwahu reh ehuehu wihk.

2. Dahme rahnen Sapad kin padahkihong kitail duwen Siohwa?

² Mehlel me Siohwa solahr kupwurki peneinei kan en kasarawih rahnen Sapad. Ahpw, Kosonnedo kin padahkihong kitail mehkot me pid duwen Koht. E kin ketin nsenohki kamwahupen nanpwungmwahu en sapwellime aramas akan reh ahnsou koaros. (Ais. 48:17, 18) Rahnwet, ehu ahl me Siohwa kin ketin kasalehda sapwellime limpoak iei sang ni koasoandi en Kaudok en Peneinei nin soutik.

3. Ia kahrepen Kaudok en Peneinei nin soutik?

³ Ia Kahrepen Kaudok en Peneinei nin soutik? Nan January 2009, Onop en Paipel en Mwomwohdiso tepida wiawi ni soutik me Sukuhl ong Sapwellimen Koht Doadoahk oh Mihting en Kalohk kin wiawi. Ehu kahrepen wekidekla wet iei pwehn kihong peneinei kan ahnsou pwehn kakehlailihala arail nanpwungmwahu rehn Siohwa sang ni arail pahn koasoanehdi ehu soutik en ehuehu wihk ong Kaudok en Peneinei. Kangoang kohwong ehuehu peneinei en kasaula arail onop en peneinei ong pwong me Onop en Paipel en Mwomwohdiso kin wiawi ma kak. Oh en doadoahngki ahnsou wet pwehn koasoiapene Paipel oh pil onopki mehkan me pid anahn en peneinei ni soh karuwaru.

4. Peneinei ehu anahne koasoanehdi en awa ehute ong Kaudok en peneinei? Menlau kawehwehda.

⁴ Pwehn kak iang towehda Onop en Paipel en Mwomwohdiso, kitail anahne ahnsou ong kaunopada, kohlahng mihtingo oh soahng teikan. Ong pali laud en kitail, en iang towehda mihting wet kin reirei sang awa ehu. Sang ni wekideklahn atail koasoandi en mihting kan, met kitail kakehr doadoahngki soutiko ong kaudok ong Siohwa nin duwen ehu peneinei. Ihme kahrehda kitail en dehr kamwotehla atail Kaudok en Peneinei ni soutik ong awa ehute. Ahpw, kitail anahne medewe duwen anahn oh irair en atail peneinei oh koasoanehdi ahnsou nin duwen me konehng.

5. Ia duwen, peneinei kan anahnehte koasoakoasoipene? Menlau kawehwehda.

⁵ Ia Duwen, Peneinei kan Anahnehte Koasoakoasoipene? Ni pwopwoud kan oh peneinei me naineki seri kin koasoiapene ire kan me pid Paipel, e kin kangoange emenemen. (Rom 1:12) Tohn peneineio kin karanihala emenemen. Kahrehda koasoiapene iren Paipel kan anahne en kin keieu kesempwal nan Kaudok en Peneinei nin soutik. Ahpw, emenemen tohn peneinei pil kak pein wia arail onop. Karasepe, mwurin arail koasoipene, irail kak mihmihpene oh emenemen kak pousehla wia pein eh onop. Mwein e kak kanekehla eh kaunopada ong mihting kan de pil wadewadek Kahn Iroir de Awake! Ekei peneinei kin pilada en sohte kilang kasdo nin soutiko pwon.

6. Ia mwomwen koasoakoasoipene eh pahn kin wiawi?

⁶ Ia Mwomwen Koasoakoasoipene Eh Pahn Kin Wiawi? Koasoandio sohte anahne en peidek oh pasapengte. Pwehn wiahda Kaudok en Peneinei nin soutik en kaperen, peneinei tohto kin doadoahngki soangen koasoandiohte me kin wiawi ni soutik en Niesil kan. Re kin nehkpeseng arail koasoandi en kaudoko ni pali kei oh kin wia ni soangen mwohmw kei. Karasepe, re kak wadekpene Paipel, kaunopadahng ekei kisehn mihting kan, oh kin wia kamwomwada kan ong doadoahk en kalohk. Mie sawas nan pali 6.

7. Pahpa oh nohno, ia pahn mwomwen ahnsoun kaudok?

⁷ Pahpa oh Nohno, Ia Pahn Mwomwen Ahnsoun Kaudok? Omw peneinei pahn sukuhl mwahu nan wasa me meleilei oh mie limpoak. Ekei pak kumwail kak onop liki ma iren mesenleng me mwahu. Ma e anahn a kumwail pil kak kihong ahnsoun kommoal. Ekei peneinei kin pil wiahda kisin mwenge marahra mwurin onopo. Pahpa oh nohno en dehr kin doadoahngki ahnsou kiset ong lipwoar de kaweid. Ele irail pahn anahne kihong ekis ahnsou en koasoia iren kahpwal ehu me ira kilangada. Ahpw, ma mie en emen seriko kahpwal, e pahn keieu mwahu en koasoia ehu ahnsou tohrohr pwe en dehr kanamenekihala mwohn rie kan. Kaudok en Peneinei nin soutik en dehr wia ahnsou kasangat ehu ahpw e anahne kasalehda me Koht me kitail kin kaudokiong wia Koht en peren men.

8, 9. Soangen kaunopada dah me kaunen peneinei kan anahne wia?

⁸ Ia Duwen Kaunen Peneinei men Eh Kak Kaunopada? Peneineio pahn paiekihda laud ma kaunen peneineio kin kaunopada mwohn ehuehu ahnsoun Kaudok en Peneinei nin soutik sang ni eh pahn pilada dahme re anahne koasoiapene oh ahl keieu mwahu ren ehukihpene ire kan. (Lep. Pad. 21:5) E pahn mwahu ma ohlo pahn koasoiaiong liho duwen met. (Lep. Pad. 15:22) Ma kowe kaunen peneinei, dahme ke sou idek rehn noumw seri kan ia arail madamadau kan? Ma ke pahn wia met, ke pahn esehla soahng kesempwal tohto me re kin perenki oh medemedewe.

⁹ Pali laud en wihk kan, kaunen peneinei sohte pahn anahne doadoahngki ahnsou laud en kaunopada. Peneineio ele kin perenki ehu wiepen onop nan ehuehu wihk oh kaunen peneineio sohte pahn anahne wiahda koasoandi kapw ahnsou koaros. Ele e kak diarada kamwahupen kaunopada mwurin ehuehu kaudok eh kin imwisekla. Ni ahnsowo, e kin tamatamante anahn en eh peneinei. Ekei kaunen peneinei kan kin ntingihada arail koasoandi oh langahda wasa me peneinei pwon kak kilang, duwehte ni ice box. Met kin kahrehda peneinei en kasikasik oh perenki. E pil kin kihong ahnsou ren kaunopada ma mie anahn.

10. Ia duwen irail kan me kin koukousoan kelehpw ar kak doadoahngki ahnsoun Kaudok en Peneinei nin soutik?

¹⁰ Ia Duwen Ma Sohte Ei Peneinei? Irail me koukousoan kelehpw kak doadoahngki ahnsoun Kaudok en Peneinei nin soutik ong pein arail onop. Koasoandi mwahu en pein onop anahne iangahki wadawad en Paipel, kaunopada ong mihting kan, oh wadek Kahn Iroir. Ekei sounkalohk kan kin pilada ehu oaralap tohrohr ren onopki ni ahnsowo. Ekei pak, re kak luke emen sounkalohk de ehu peneinei pwe en iang irail koasoiapene ire kaselel kan me pid Paipel.

11, 12. Ia ekei kapai kan sang kaukaule wia Kaudok en Peneinei nin soutik?

¹¹ Ia Kapai kan en Kaukaule Wia Kaudok en Peneinei nin Soutik? Irail kan me kin mohngiong unsek ong kaudok mehlel kin karanihala Siohwa. Patehng met, peneinei kan me kin kaudokpene kin karanihala emenemen. Pwopwoud ehu ntingihdi kapai kan me ira alehdi: “Nin duwen ehu pwopwoud pioneer me sohte naineki seri, se kin uhdahn kasikasik at Kaudok en Peneinei nin soutik. Se kin pehm me se kin karanihala emenemen oh pil Samatail me ketiket nanleng. Met ni at kin pirida ni rahn me se koasoanehdi en onopene, se kin ndapene: ‘Pwohng en dah pwohnget? Pwohng en Kaudok en Peneinei!’”

¹² Koasoandi en wia Kaudok en Peneinei nin soutik pil kin sewese peneinei kedirepw kan. Emen nohno kiripw me kin apwahpwalih nah pwutak riemen oh kin pioneer ntingihdi: “Mahs at onop en peneinei sohte kin pweida mwahu. E sohte kalapw wiawi pwehki ei kin pwangada. I sohte kin kak medewehda ia duwen ei pahn kak wia soahng koaros. Kahrehda I ntingwohng kumwail pwehn kalahngankihong kumwail koasoandi en Kaudok en Peneinei nin soutik. Met at onop en peneinei kin pweida oh se kin alehdi kapai tohto.”

13. Dahme pahn kasalehda ia uwen omw peneinei eh pahn paiekihda koasoandi wet?

¹³ Duwehte rahnen Sapad, koasoandi en Kaudok en Peneinei nin soutik iei kisakis ehu sang rehn Samatail nanleng me kak sewese peneinei kan. (Seims 1:17) Mwomwen peneinei en Israel kan kin doadoahngki rahnen Sapad kin kasalehda ia uwen ar kin paiekihda arail kin nantihong kamwahwihala arail nanpwungmwahu rehn Siohwa. Pil duwehte mwomwen atail doadoahngki Kaudok en Peneinei nin soutik, e kin kasalehda ia uwen atail peneinei pahn paiekihda koasoandi wet. (2 Kor. 9:6; Kal. 6:7, 8; Kol. 3:23, 24) Ni atail kin doadoahngki mwahu koasoandi wet, atail peneinei kak ahneki pepehm duwehte soun melkahkao: “A duwen ngehi, ia uwen kesempwal en ei karanih Koht, pwe I en diar silepei rehn KAUN-O Koht, Wasa Lapalahpie.”—Mel. 73:28.

[Kilel nan Pali 5]

Kaudok en Peneinei ni soutik en dehr wia ahnsou kasangat ehu ahpw e anahne kasalehda me Koht me kitail kin kaudokiong wia Koht en peren men

[Kilel nan Pali 6]

NEKIDALA

Ekei Sawas ong Kaudok en Peneinei

Paipel:

• Wadekpene ehu pali nan wadawad en Paipel en wihko. Ma iren wadawad en Paipel kin koasoia soangsoangen aramas kei eri koasoanehdi emenemen tohnpeneinei en mwomwehda aramaso oh wadek dahme aramas ko nda nan ireo.

• Kamwomwada ehu ire nan wadawad en Paipel.

• Kihong emenemen tohnpeneinei en wadek ehu wasa nan irelaud kan me koasoandiong wadawad oh ren ntingihdi ehu de riau peidek ong ireo. Kumwail eri rapahkihda pasapengpen peidek ko.

• Kaunopada ehu kisin doaropwe me mie ehu iren Paipel ie oh song en wadlikihala oh kawehwe ireo ehuehu wihk. Kihpene kisin doaropwe pwukat oh kousapahlih ehuehu wihk pwe kumwail en kilang me depe kumwail tamataman.

• Kumwail kak wadek noumwail Paipel kan ahnsou me kumwail kin rongorong wadawad en Paipelo nan CD ape.

Mihting kan:

• Kumwail kak ehupene oh kaunopada ong ehu pali en mihting kan.

• Koulkipene koul me koasoandi ong wihk en mwurio.

• Ma mie me pahn iang padahk nan Sukuhl ong Sapwellimen Koht Doadoahk de pil kamwomwada nan Mihting en Kalohk, peneinei kak koasoiapene ia duwen eh pahn wia padahko de kamwomwada pwe peneinei pwon en kilang.

Anahn kan en Peneinei:

• Kamwomwada ia duwen omw pahn apwalihala kahpwal ehu me kakete pwarada nan sukuhl.

• Wia kamwomwada ehu me seri kan oh pahpa, nohno pahn kawiliali. Seri kan pahn uhd rapahkihda ire kan ong ehu oaralap irail eri kawehwehiong pahpa oh nohno.

Kalohk:

• Kamwomwada padahk kan me kumwail pahn doadoahngki ni imwin wihko.

• Koasoiapene mehn akadei me peneinei kak wia pwehn kalaudehla arail iang doadoahk en kalohk ni ahnsoun Kataman de ahnsoun kommoal.

• Mweidohng emenemen tohn peneinei minit kei en kak rapahkihda ia duwen arail pahn sapeng soangsoangen peidek kan me kakete pwarada nan arail wasahn kalohk oh kumwail wia kamwomwada kan.

Pil Ekei Sawas:

• Wadekpene ehu ire sang nan Kahn Iroir oh Awake! kapw kan.

• Emenemen tohnpeneinei kak wadek ehu ire me re perenki sang nan Kahn Iroir oh Awake! kapw kan oh koasoia ahnsoun Kaudok en Peneinei nin soutik.

• Ekei pak luke emen sounkalohk de ehu pwopwoud pwe ira en iang amwail Kaudok en Peneinei nin soutik oh idek rehrail ren ehukihong kumwail duwen arail doadoahk en kalohk de ia duwen arail iangala padahk mehlel.

• Kilang oh koasoiapene ehu neitail kasdo kan.

• Mwurin amwail iang ehu mihting tohrohr, kousapahlih ire kesempwal kan.

• Kasawih sapwellimen Siohwa kepikipik kan oh koasoiapene dahme e kin padahkihong kitail duwen Siohwa.

• Nin duwen peneinei ehu, wiahda soahng kan me duwehte warihmwo, mahlenihada map en sahpw kan nan Paipel, de ntingihada keirekidi en peneinei en Sises ape.