Kauwada Peneinei Ngehnin Kehlail Ehu

“Kekeirirailda ni kaiahn oh madamadau en Siohwa.”​—EPISOS 6:4, New World Translation.

1. Ia kupwuren Koht ong peneinei, ahpw dahme uhd wiawi?

“KUMWA kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros.” (Senesis 1:28) Ahnsou me Siohwa Koht mahsanihong Adam oh Ihp mahsen pwukat kin wia tepin ahnsou me Koht ketin koasoanehdi koasoandi en peneinei. (Episos 3:14, 15) Tepin pwopwoudo koapworopworki me re pahn mih nin sampah oh kadaudokara kan pahn kousoan wasa koaros nin sampah​—re pahn wiahla peneinei en aramas unsek kan me pahn kousoanpene oh mour peren nan paradais nin sampah wet oh re pahn miniminpene ni arail pahn kaudokiong Sounkapikparail Lapalap. Ahpw, Adam oh Ihp wiahda dihp, oh sampah wet sohte dirkihla aramas pwung kan me kin lemmwiki Koht. (Rom 5:12) Mouren peneinei mwadang ohla, oh kailok, mwersuwed, oh “sempoak” kin kalap wiawi nan “imwin rahn akan.”​—2 Timoty 3:1-5; Senesis 4:8, 23; 6:5, 11, 12.

2. Kadaudok en Adam kan kin ahneki soahngen irair dah kei, ahpw dahme anahn ma irail men kaianehda arail peneinei kan en kehlailda ni pali ngehn?

² Adam oh Ihp me wiawihda pwehn rasehng Koht. Edetehn Adam wiahda dihp, Siohwa mweidong ih en wiahda seri kan. (Senesis 1:27; 5:1-4) Duwehte Adam, kadaudoke kan kin ese duwen tiahk mwakelekel oh irail kak sukuhliki en dehdehkihla dahme pwung oh dahme sapwung. Re kak sukuhliki en kaudokiong Sounkapikparail oh kesempwalpen ahr kin poakohng Ih ki kapehdirail unsek, mour unsek, lamalam koaros unsek oh kehl unsek. (Mark 12:30; Sohn 4:24; Seims 1:27) Oh pil, re pahn kak ale kaiahn en “wiahda me pwung; limpoak pwoatopoat, oh peikiong Koht ni karakarahk.” (Maika 6:8) Pwehki irail aramas dipan akan, irail anahne nantihong tehk kanahieng en kaianehda arail peneinei kan pwehn kehlail ni pali ngehn.

Isaneki Ahnsou Mwahu Koaros

3. Iaduwen pahpa oh nohno kan ‘isaneki ahnsou mwahu’ en kaiahnehda neirail seri kan?

³ Nan ahnsou suwed pwukat, e kin wia doadoahk laud ong pahpa oh nohno kan pwehn sewese neitail seri kan en “poakohng Siohwa” oh “kailongki me suwed.” (Melkahka 97:10) Pahpa oh nohno loalokong kan pahn ‘isaneki ahnsou mwahu koaros’ en wia doadoahk apwal wet. (Episos 5:15-17) Ma kowe emen pahpa de nohno, iaduwen ke pahn kak wia met? Keieu, ke anahne en koasoanehdi pwe soahng kan me kesempwal en keieu nan amwail mour, isaneki ahnsou mwahu ong “dahme keieu mwahu,” iangahki padahki oh kaiahne noumw seri kan. (Pilipai 1:10, 11) Keriau, kihong kamengeipen ahmw mour. Mwein ke anahne uhdi sang ekei wiewia kan me sohte kesempwal. De mwein ke anahne en kesehla dipwisou kan me ke kin naineki me pahn kihsang ahmw ahnsou laud. Nin duwen Kristian pahpa de nohno men, ke sohte pahn koluhkihla ahmw wia uwen me ke kak ni ahmw pahn kaiahnehda noumw seri kan en lemmwiki Koht.​—Lepin Padahk 29:15, 17.

4. Iaduwen peneinei ehu kak kaukaule miniminpene?

⁴ Isaneki ahnsou mwahu en mih rehn noumw seri kan, keieu ong ahnsou kan me kin pid pali ngehn, oh ahnsou pwukat koaros kin inenen katapan mehlel oh re kin kak kaminiminpene tohnpeneinei kan. Ahpw, dehr soukautih. Koasoanehdi ahnsou me ke pahn mih rehn noumw seri kan. Met sohte kin wehwehki me tohnpeneinei pahn mihmipene nan ihmw ehu ahpw emen emen irail pahn wia pein nsenarail. Seri kan kin kekeirada mwahu ma mie sawas sang rehn arail pahpa oh nohno kan ehu ehu rahn. Pahpa oh nohno kan anahne kasalehong neirail seri kan ahr limpoak laud ahnsou koaros oh kasalehda me irail kin nsenohki neirail seri kan. Mwohn pwopwoud kan pahn wiahda arail pilipil en naineki seri, re anahne medemedewe ni mehlel pwukoa kesempwal wet. (Luk 14:28) Eri, irail sohte pahn kilangwong kaiahnehda seri kan nin duwen doadoahk kapwang ehu. Ahpw, irail pahn kilangwong pwukoa wet nin duwen pwais kaselel ehu.​—Senesis 33:5; Melkahka 127:3.

Padahk ki Sang Ni Ahmw Koasoi Mwahu kan oh Mehn Kahlemeng Mwahu

5. (a) Padapadahkiong seri kan en poakohng Siohwa kin tepikihda dah? (b) Kaweid dahieu kin kohwong pahpa oh nohno kan nan pwuhken Deuderonomi 6:5-7?

⁵ Ma ke men sewese noumw seri kan en poakohng Siohwa, e kin tepikihda pein ahmw limpoak ong Siohwa. Limpoak kehlail ong Koht pahn kamwekid uhk en kapwaiada sapwellime kaweid kan koaros ni lelepek. Met kin pidada me ke pahn kaiahne noumw seri kan “ni kaiahn oh madamadau en Siohwa.” (Episos 6:4, NW) Koht kin ketikihong pahpa oh nohno kan kaweid en wia mehn kahlemeng mwahu ong neirail seri kan, koasoi ong irail oh padahk ong irail. Deuderonomi 6:5-7 mahsanih: “Eri, ke en poakohng Kauno omw Koht sang nan mohngiongomw unsek, ni ngehnomw unsek, oh ni omw kehl koaros. Dehr manokehla kosonned pwukat me I kihong kumwail rahnwet. Padahkihong noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” Ma ke pahn kangoange irail oh kaweidih irail ahnsou koaros, ke kak padahkiong noumw seri kan duwen sapwellimen Koht kosonned akan. Noumw seri kan pahn kehn me ke poakohng Siohwa oh met pahn kak kamwekid irail en karanih Siohwa.​—Lepin Padahk 20:7.

6. Iaduwen pahpa oh nohno kan kak isaneki irair wet me seri kan kin sukuhliki sang mehn kahlemeng kan me re kin kilang?

⁶ Seri kan kin perenki en sukuhliki mehkot. Irail kin rong kanahieng oh kilang mwahu ahmw wiewia kan oh kin mwadang kahlemengih pahpa oh nohno kan. Ni ahnsou me irail kin kilang me ke sohte kin noahrok mwohni, met kin sewese irail en pil kapwaiada kaweid en Sises. Ke padahkiong irail en dehr pwunodki dipwisou en sampah ahpw ‘rapahki mahs wehin Koht.’ (Madiu 6:25-33) Sang ni ahmw kin wia koasoi kan me kin kangoange meteikan duwen padahk mehlel kan en Paipel, sapwellimen Koht mwomwohdiso, elder idihdda kan, ke kin padahkiong noumw seri kan en wauneki Siohwa oh kesempwaliki sapwellime sawas kan ni pali ngehn. Pwehki seri kan kin mwadang kilang ma pahpa oh nohno kan kin kawekila arail kaweid kan de wiewia kan, pahpa oh nohno kan anahne sang arail tiahk kan oh madamadau kan kasalehda me irail kin pein kesempwaliki oh kalahnganki mehkan ni pali ngehn. Ni ahnsou me pahpa oh nohno kan kilang me pein ahr mehn kahlemeng mwahu kin kahrehong neirail seri kan en pil poakohng Siohwa, met kin wia mehkot inenen kaperen!​—Lepin Padahk 23:24, 25.

7, 8. Mehnia mehn kahlemeng kin kasansalehda duwen kesempwalpen kaiahne seri sang ahnsou me re tikitik, oh kitail pahn kapingahki ihs pweidahn kaiahn wet?

⁷ Kitail kak sukuhliki sang mehn kahlemeng mwahu en pwopwoud ehu me kohsang Venezuela duwen kesempwalpen kaiahne seri kan sang ni ahnsou me re pwulopwul. (2 Timoty 3:15) Met kin pidada pwopwoud pwulopwul ehu, Félix oh Mayerlín. Ira kin iang doadoahk en Regular Pioneer. Ni ahnsou me neira pwutak ipwidi, me ede Felito, ira kin ngoangki en wia uwen me ira kak en kaiahne ih nin duwen tohnkaudok en Siohwa. Mayerlín tepida wadek pwuhk me oaralap koasoia Nei Pwuhk en Poadoapoad kan en Paipel, me Sounkadehdehn Siohwa kan wiahda​—Mayerlin kin wadek ong Felito. Ni ahnsou me e pwulopwulte, Felito esehla kilel kan en Moses oh aramas teikan me mih nan pwuhko.

⁸ Ni ahnsou me e pwulopwul, Felito pein tepida kalohk ong aramas teikan. E lel ah mehn akadei en wiahla emen sounkalohk en Wehio, oh mwuri, e papidaisla. Kedekedeo, Felito pil wiahla emen Regular Pioneer. Eh pahpa oh nohno koasoia: “Ni ahnsou me se kin kilang neit pwutak kekeirada, se wehwehki me Siohwa oh sapwellime kaweid kan me kahrehda.”

Sewese Seri kan en Kekeirada ni Pali Ngehn

9. Dahme kahrehda kitail anahne kalahnganki kaweid ni pali ngehn me kin kohsang pwihn en ladu lelepek oh loalokong?

⁹ Makisihn tohto, pwuhk epwiki kei, oh Internet Web site kid kid kei me kin kihda kaweid ong kaiahne seri kan. Makisihn me adaneki Newsweek wiahda artikel tohrohr ehu me pid duwen seri kan oh e koasoia met: pali laud en ahnsou “kaweid pwukat me kin kohsang soangen sawas pwukat kin uhpene, oh pil me inenen kapwuriamwei en sukuhliki me sawas me ke lemeleme me ke kak likih​—mwuhr, ke diar me e sapwung.” Ia uwen laud atail kalahngan ong Siohwa me e ketikihong kitail kaweid kan pwen sewese atail peneinei kan en kekeirada ni pali ngehn! Ke kin doadoahngki sawas koaros me kin kohsang pwihn en ladu lelepek oh loalokong?​—Madiu 24:45-47.

10. Iaduwen pahpa oh nohno kan iangahki seri kan pahn kak paiekihda sang onop Paipel nin duwen peneinei ehu?

¹⁰ Anahn kesempwal ong peneinei kan iei en kaukaule wia arail onop Paipel nin duwen peneinei ehu oh irail anahne wia met ni irair en meleilei. Pahpa oh nohno kan anahne en kaunopada mwahu pwe irail kak kasukuhlih mwahu neirail seri kan, oh onop pahn kaperen oh pahn kangoange irail. Pahpa oh nohno kan pahn kak ese dahme mih nan mohngiong oh madamadau en neirail seri kan ma irail pahn kak sewese neirail seri kan en kasalehda duwen arail pepehm akan. Ehu ahl kitail kak tehk ma atail onop en peneinei kin pweida mwahu de soh, ma tohnpeneinei kan koaros nan peneinei kin kasikasik onopo.

11. (a) Mehn akadei dah kei pahpa oh nohno kan pahn kak sewesehki neirail seri kan en wiahda? (b) Dahme imwikihla ni ahnsou me emen serepein en mehn Sapahn nantihong kapwaiada eh mehn akadei?

¹¹ Wiahda mehn akadei kan me kin poahsoankihda Pwuhk Sarawi kak sewese peneinei en kehlail ni pali ngehn, oh pahpa oh nohno kan anahne sewese neirail seri kan en wiahda mehn akadei pwukat. Iet ekei mehn akadei konehng kan: wadek Paipel rahn koaros, wiahla sounkalohk en Rongamwahu men me kin iang kalohk sounpwong koaros, oh kekeirada oh wiahda inou ong Siohwa oh papidaisla. Mehn akadei teikan pahn kak pid kalohk kaukaule nin duwen Regular Pioneer, doadoahk nan Bethel, de misineri. Ni ahnsou me serepein en mehn Sapahn men me adaneki Ayumi iangala sukuhl en elementary, e wiahda ah mehn akadei en kalohk ong ong ienge tohnsukuhl koaros nan eh class. Pwehn sewese eh sounpadahk oh ienge tohnsukuhl kan pwe ren perenki rong, e alehdi mweimwei en kihdi ekei sawaspen Paipel kan nan library. Imwilahn met, e tepida onop Paipel rehn aramas 13 erein sounpar weneu me e iang sukuhl en elementary. Emen tohnsukuhl en Paipel iangahki kise kan wiahla Kristian papidaisla kan.

12. Iaduwen seri kan kak ale kapai laud sang mihding en Kristian akan?

¹² Pil ehu anahn ong sewese peneinei kan en kehlailda ni pali ngehn iei en kaukaule iang towehda mihding kan. Wahnpoaron Pohl kangoange ienge pwoson akan en ‘dehr tokedihsang atail tiahk en pokonpene, duwen ekei ar kin epwehnki wia.’ Kitail en wia met, pwe me pwulopwul kan oh pil me laud kan kin ale kapai laud sang ar kin kaukaule iang towehda mihding en Kristian akan. (Ipru 10:24, 25; Deuderonomi 31:12) Seri kan anahne en sukuhliki en rong kanahieng. E kesempwal ren kaunopada ong mihding kan, pwe kapai laud kan kin kohsang arail kin iang pasapeng kan. Edetehn seri pwulopwul men pahn kak tepida wia pasapeng mwotomwot, lepin lokaia kei de wadek wasa tikitik ehu nan parakrap, e pahn keieu katapan mehlel ong seri kan ma arail pahpa oh nohno kan pahn sewese irail en rapahki arail pasapeng oh doadoahngki pein arail lokaia kan ong mehpwukat. Kumwail pahpa oh nohno kan kin wia mehn kahlemeng mwahu en kaukaule wia pasepeng katapan kan? E pil pahn mwahu ma emen emen tohnpeneinei en mie pein nah Paipel, pein nah pwuhk en koul, oh ehu kopy en makisihn de pwuhk me kitail kin doadoahngki nan mihding kan.

13, 14. (a) Dahme kahrehda pahpa oh nohno kan anahne iang neirail seri kan ni ahnsoun kalohk? (b) Dahme pahn sewese seri kan en paiekihda oh perenkihda doadoahk en kalohk?

¹³ Pahpa oh nohno loalokong kan kin kahre neirail seri kan en doadoahngki arail kehl ong papah Siohwa, oh sewese irail en kesempwaliki doadoahk en kalohk. (Ipru 13:15) Ma pahpa oh nohno kan pahn iang neirail seri kan kalohk, irail pahn kak kaiahne neirail seri kan en wiahla sounkalohk kan “me sohte kin namenengki eh doadoahk, me kin padahkihong aramas akan mahsen en Koht ni mehlel.” (2 Timoty 2:15) Eri, iaduwen kowe? Ma kowe emen pahpa de nohno, ke kin sewese noumw seri kan en kaunopada ong kalohk? Met pahn sewese noumwail seri kan en perenki wia doadoahk en kalohk, oh pahn katapan laud oh pweida mwahu ong irail.

¹⁴ Dahme kahrehda e kin wia katapan laud ong pahpa oh nohno kan en iang neirail seri kan ahnsoun kalohk? Pwe ni ahl wet, seri kan kak kilang oh alasang mehn kahlemeng mwahu en arail pahpa oh nohno kan. Ni ahnsowohte, pahpa oh nohno kan kak kilang duwen madamadau kan, tiahk kan, oh ia uwen koahiek neirail seri kan. E pahn mwahu ma noumw seri kan kin iang uhk ihmw lel ihmw, pwurehng pwurala rehn aramas akan me perenki rong (return visit kan) oh pil iang uhk ni ahmw pahn kohla rehn aramas me kin onop Paipel (Paipel study kan). Ma kak, emen emen seri en naineki pein eh ehd en kalohk, oh e pahn mwahu ma pahpa oh nohno kan pahn padahkiong irail en apwalih mwahu eh ehd en kalohk oh soahng koaros en mwakelekel. Ma ke kin kaukaule kaiahne oh kangoange noumw seri kan ni ahl me pwung, arail kalahngan mehlel ong doadoahk en kalohk pahn kekeirada, oh seri kan pahn kilangwong doadoahk en kalohk nin duwen ehu ahl en kasalehda limpoak ong Koht oh mehn mpatail kan.​—Madiu 22:37-39; 28:19, 20.

Kolokolete Ahmw Roson en Pali Ngehn

15. Pwehki en kolokolete pali ngehn en peneinei ehu me inenen kesempwal, ia ekei ahl akan kitail pahn kak wia met?

¹⁵ E inenen kesempwal en sewese ahmw peneinei en kolokolete arail roson en pali ngehn. (Melkahka 119:93) Ehu ahl en wia met iei en koasoiaiong tohn ahmw peneinei ahnsou koaros duwen mehkan me pid pali ngehn. Kumwail kin koasoiapene Iren Rahn? Ke kin kalapw ehukiong irail ekspiriens kan me pid kalohk de ire kesempwal kan sang Watchtower oh Awake! makisihn kan “ni ahnsou ke kin alialu nanial”? Ke kin tamanda en kapakap ong Siohwa oh kasalehda ahmw kalahnganki ahmw mour oh sapwellime sawas laud kan “ni ahnsou ke kin kommoal oh pil ni ahnsou ke pahn pirida”? (Deuderonomi 6:6-9) Ni ahnsou noumw seri kan pahn kilang ahmw limpoak ong Koht ni soahng koaros me ke kin wia, met pahn sewese irail en poadidi nan padahk mehlel.

16. Ia katepe en kangoange neitail seri kan en wiahda pein arail research?

¹⁶ Ekei ahnsou, seri kan pahn anahne sawas en powehdi kahpwal akan me kin pwarada nan arail mour. Ahpw, mwahusang en ahnsou koaros padahkiong irail dahme re anahne wia, dahme ke soh kasalehong irail iaduwen irail pahn kak ese duwen kupwuren Koht ong ire kan me re men ese, sang ni ahmw pahn kangoange irail en pein wiahda arail research (roporop)? Padahkiong seri kan en doadoahngki mwahu mehn doadoahk kan oh pwuhk kan me pwihn en ‘ladu lelepek oh loalokong’ wiahda ong kitail pahn kak sewese irail en karanih Siohwa. (1 Samuel 2:21b) Oh pil, ni ahnsou irail kin ehukihong tohnpeneinei teikan nan arail peneinei duwen dahme re sukuhliki sang arail research nan Paipel, pali ngehn en peneinei pahn kehlailda.

Kihong Likilik Unsek Ong Siohwa

17. Dahme kahrehda pahpa de nohno kiripw kan en dehr nsensuwedla ni ahr kin kaiahne neirail seri kan nin duwen Kristian akan?

¹⁷ Iaduwen pahpa de nohno kiripw kan pahn kak kakehlailda pein arail peneinei kan? Me kin pid kaiahne seri kan, aramas pwukat kin lelohng kahpwal akan likin kahpwal akan me aramas teikan kin kalapw lelohng. Ahpw, kumwail pahpa de nohno kiripw kan, menlau dehr nsensuwedla! Kumwail pahn kak pweida, nin duwen me pahpa de nohno kiripw tohto me kin likih Koht kin pweida mwahu, irail kin peikiong sapwellimen Koht kaweid kan, oh irail me kaiahneda seri kan en wiahla aramas kehlail kan ni pali ngehn. (Lepin Padahk 22:6) Ni mehlel, Kristian akan me wiahla pahpa de nohno kiripw kan anahne en likih Siohwa ni unsek. Irail anahne en likih me E pahn ketikihong irail sawas.​—Melkahka 121:1-3.

18. Anahn dah kei me pid madamadau kan oh pali war akan en neirail seri kan me pahpa oh nohno kan anahne en tehk, ahpw dahme pahn keieu kesempwal irail en sewewe neirail seri kan en wia?

¹⁸ Pahpa oh nohno loalokong kan pahn pohnese me mie ‘ahnsoun peren oh ahnsoun kahlek.’ (Eklesiasdes 3:1, 4) Ma ke men sewese madamadau oh paliwar en noumw seri en kekeirada, e kesempwal irail pahn ahneki ahnsoun kommoal kan oh ni toupahrek ahnsoun mwadong konehng kan. Koul kan me pahn kangoange aramas akan oh keieu kokoulki koul kan me kin kapinga Koht pahn kak sewese seri men en ahneki madamadau pwung kan me pahn kak kakehlailda eh nanpwungmwahu rehn Siohwa. (Kolose 3:16) Ahnsou me emen pwulopwul, iei ahnsou mwahu en kaunopada en wiahla aramas mah me kin lemmwiki Koht, pwehki ke pahn kak paiekihda mour kohkohlahte nan paradais nin sampah.​—Kalesia 6:8.

19. Dahme kahrehda pahpa oh nohno kan kak likih me Siohwa pahn kapaiada ahr kin nantihong en kaiahnehda neirail seri kan?

¹⁹ Siohwa kin kupwurki peneinei en Kristian akan koaros en kehlail ni pali ngehn oh miniminpene. Ma kitail kin poakohng Koht oh kin wia uwen me kitail kak en peikiong sapwellime Mahsen, E pahn kapaiada kitail oh ketikihong kitail sawas me anahn en kapwaiada sapwellime kaweid kan. (Aiseia 48:17; Pilipai 4:13) Tamanda met, me ahnsou mwahu me ke ahneki met en padahkih oh kaiahne noumw seri kan me mwotomwot oh sohte pahn pwurehng wiawi. Eri, wia uwen me ke kak en kapwaiada kaweid kan en Mahsen en Koht, oh Siohwa pahn ketin kapaiada ahmw kin nantihong en kaiahnehda ahmw peneinei en kehlailda ni pali ngehn.

Dahme Kitail Sukuhliki?

• Dahme kahrehda isaneki ahnsou mwahu me kesempwal ni ahnsou kitail kin kaiahne neitail seri kan?

• Dahme kahrehda mehn kahlemeng mwahu en pahpa oh nohno kan me kesempwal?

• Ia ekei ahl akan me pahn kak sewese seri kan en kekeirada ni pali ngehn?

• Iaduwen peneinei ehu pahn kak kolokolete ahr pali ngehn?

[Kilel kan nan pali 18]

Peneinei kehlail kan ni pali ngehn kin kaukaule wadek Mahsen en Koht, iang towehda mihding kan koaros, oh doadoahkpene nan doadoahk en kalohk