Pahpa Oh Nohno Kan, Dahme Amwail Mehn Kahlemeng Kin Wia Mehn Kasukuhlpe?
“Nan amwail wialahr sapwellimen Koht seri kompoak kei, kumwail song en kahlemengih ih. Nan amwail mour kumwail weweidki limpoak.”—EPISOS 5:1, 2.
1. Soahngen kaweid dah kei me Siohwa ketikihong tepin pwopwoudo?
SIOHWA iei Sountepiada koasoandi en peneinei. Peneinei koaros pweipwandkihong ih arail mour pwehki ih me ketin wiahda tepin peneineio oh ketikihong tepin pwopwoudo manaman en wiahda seri. (Episos 3:14, 15) E ketikihong Adam oh Ihp kaweid kan me pid ara pwukoah kan oh pil ketin mweidohng ira ahnsou itar en doadoahngki pein ara koahiek en kapwaiada mepwukat. (Senesis 1:28-30; 2:6, 15-22) Mwurin Adam oh Ihp wiahda dihp, irair kan me peneinei kan anahne apwalihala kin apwalla. Ahpw mendahki met, Siohwa ni limpoak ketikihda kaweid kan me pahn kak sewese sapwellime ladu kan en apwalihkiala soahngen irair pwukat.
2. (a) Dahme Siohwa ketin doadoahngki pwehn kakehlailkihla kaweid nting kan lokaiahn kaweid kan? (b) Peidek dahieu pahpa oh nohno kan anahne en idek rehrail?
2 Ni duwen atail Sounpadahk Lapalap, Siohwa ketin wia laud sang ihte ketikihda kaweid nting kan ong dahme kitail anahne wia oh dahme kitail anahne en liksang. Mahs, e kin ketin kapatahpene kaweid kan me mih ni nting oh lokaia ni ah kin ketin doadoahngki samworo kan oh soukohp kan oh tapwin peneinei kan. Ihs me e kin ketin doadoahngki en kihda soahngen padahk pwukat nan atail ahnsou? Elder Kristian kan oh pahpa oh nohno Kristian kan. Ma komwi emen pahpa de nohno, komw kin wia omw pwais en padahkihong omw peneinei elen Siohwa kan?—Lepin Padahk 6:20-23.
3. Dahme tapwin peneinei sukuhlkihsang rehn Siohwa me pid padahk ni ahl me lipwalipw?
3 Iaduwen soahngen kaweid pwukat en kohda nan peneinei? Siohwa ketikihda mehn kahlemeng mwahu. E kin ni sansal kasalehda dahme mwahu oh dahme suwed, oh e kin ahnsou koaros kapwukapwurehieng kaweid kan. (Eksodus 20:4, 5; Deuderonomi 4:23, 24; 5:8, 9; 6:14, 15; Sosua 24:19, 20) E kin ketin doadoahngki peidek kan me pahn kahrehong emen en medemedewe. (Sohp 38:4, 8, 31) E kin ketin kamwekidada atail pepehm akan oh kaianehda mohngiongatail ni ah kin ketin doadoahngki karasaras kan oh karasaras en dahme kin uhdahn wiawi nan mour. (Senesis 15:5; Daniel 3:1-29) Pahpa oh nohno kan, ni ahnsou me kumwail kin padahkihong noumwail seri kan, kumwail kin kahlemengih mehn kahlemeng mwahu wet?
4. Dahme kitail sukuhlikihsang rehn Siohwa me pid kihda kaiahn, oh dahme kahrehda kaiahn me kesempwal?
4 Siohwa kin tengediong dahme pwung, ahpw e ketin mwahngih lipwen sohunsek. Ihme, mwohn ah pahn ketikihda kalokolok, e kin ketin padahkih oh pwurpwurehng ketikihda kehkehlik kan oh mehn kataman kan ong aramas sohunsek kan. (Senesis 19:15, 16; Seremaia 7:23-26) Ni ahnsou me e kin ketikihda kaiahn, e kin wia met ni uwe ieu me pwung, sohte daulihla. (Melkahka 103:10, 11; Aiseia 28:26-29) Ma ih met me kitail kin wiahiong neitail seri kan, e kin kadehdehda me kitail esehla Siohwa, oh e pahn mengei ong neitail seri kan en pil esehla duwen ih.—Seremaia 22:16; 1 Sohn 4:8.
5. Dahme pahpa oh nohno kan kak sukuhlikihsang rehn Siohwa me pid duwen en rong?
5 E inenen kaselel pwe, Siohwa kin ketin rong nin duwen Sahm nanleng limpoak men. E sohte kin ihte ruwesehki aramas kaweid kan. E kin ketin kangoangehkin kitail en kasalehong ih audepen mohngiongatail kan. (Melkahka 62:8) Oh ma pepehm kan me kitail kasalehda sohte kin pwung, e sohte kin ketin wer sang nanleng lipwoare kitail. E kin ni kanengamah padahkkih kitail. Ihme, ia uwen konehng, kaweid en wahnpoaron Pohl: “Nan amwail wialahr sapwellimen Koht seri kompoak kei, kumwail song en kahlemengih ih”! (Episos 4:31–5:1) Ia uwen e wia mehn kalimeng mwahu ehu me Siohwa ketikihda ong pahpa oh nohno kan ni arail kin song kaweidih neirail seri kan! E wia mehn kahlemeng ehu me kin lel mohngiongatail oh kahrehong kitail en men kekeid nan sapwellime ahl.
Manaman en Mehn Kahlemeng
6. Iaduwen lamalam oh mehn kahlemeng en pahpa oh nohno kin sair neirail seri kan?
6 Likin kasukuhl ni lokaia, mehn kahlemeng kin pil kamwekid laud mour en me pwulopwul kan. Mendahki ma pahpa kan oh nohno kan mwahuki met de soh, neirail seri kan pahn alasang irail. Ele e pahn kaperenda pahpa oh nohno—ekei pak e kak kapwuriamwei irail—ni ahnsou me re rong neirail seri kan nda soahng kan me pein irail kin nda. Ni ahnsou me wiewia oh lamalam en pahpa oh nohno kan kin kasalehda kalahnganki loal mehkan me ngehnin, met pahn wia mehkot mwahu me pahn kamwekid seri kan.—Lepin Padahk 20:7.
7. Nin duwen pahpa men, mehn kahlemeng dahieu Sepda wiahda ong nah serepein, oh ia imwilahn met?
7 Lipwen mehn kahlemeng en pahpa/nohno kin karasahda mwahu nan Paipel. Sepda, me Siohwa ketin doadoahngki pwehn kahluwa mehn Israel kan en kana powehdi mehn Ammon kan, kin pil wia emen pahpa. Rekord en ah pasapeng ong nanmwarki en Ammon kin kasalehda me Sepda kin kalapw wadek poadoapoad en sapwellimen Siohwa wiewia kan ong mehn Israel. E kak koasoiahda poadoapoado ni saledek, oh e kasalehda pwoson kehlail Siohwa. Ni sohpeikidpe, ah mehn kahlemeng sewese nah serepein en kekeirada pwoson oh ngehnin tounmetei me e kasalehda ni ah alehda mouren papah Siohwa nin duwen lih kiripw poadidi men erein ah mour.—Sounkopwung 11:14-27, 34-40; pil kilang Sosua 1:8.
8. (a) Lamalam mwahu dahieu en Samuel pahpa oh nohno kasalehda? (b) Iaduwen met wia kapai ehu ong Samuel?
8 Samuel kin wia mehn kahlemeng mwahu nin duwen seri men oh e kin lelepek ong Koht nin duwen soukohp men erein ah mour. Komw mwahuki noumw seri kan en duwehte ih? Kasawih mehn kahlemeng me en Samuel pahpa oh nohno, Elkana oh Ana, wiahda. Mendahki irairo nan imwara sohte unsek, re kin kaukaule kohla Sailo pwehn kaudok, wasao me Impwal Sarawio kin mie. (1 Samuel 1:3-8, 21) Tehk duwen pepehm loal me Ana ahneki ni ah kapakap. (1 Samuel 1:9-13) Tehk duwen ia ara pepehm ong duwen kesempwalpen en kapwaiada inou kan me re wiahiong Koht. (1 Samuel 1:22-28) Ara mehn kahlemeng mwahu ni mehlel sewese Samuel en kekeirada irair kan me sewese ih en wia dahme pwung—mendahki aramas kan me mih limwa me dene re kin papah Siohwa sohte kin kasalehda arail wauneki sapwellimen Koht ahl akan. Kedekedeo, Siohwa likihkihong Samuel pwukoah en wiahla sapwellime soukohp.—1 Samuel 2:11, 12; 3:1-21.
9. (a) Ihs nan imwe me wia lipwalipw mwahu ong Timoty? (b) Soahngen aramas dahmen me Timoty wiahla?
9 Komw men noumw pwutak en duwehte Timoty, me nin duwen ohl pwulopwul men wiahla emen iengen wahnpoaron Pohl? En Timoty pahpa sohte kin pwoson, ahpw ah nohno oh ah nohno kahlap kin wiahda mehn kahlemeng mwahu ni ara kin kalahnganki mehkan me ngehnin. Met ni mehlel sewese wiahda poahsoan mwahu ong mouren Timoty nin duwen Kristian men. Kitail wadek duwen ah nohno, Iunis, oh ah nohno kahlap, Lois, ahneki “pwoson . . . soh mwalaun.” Ira sohte kin mwalaunki ara mouren Kristian; re uhdahn kin mour pahrekiong dahme re kamehlele, oh re kin padahkihong Timoty en pil wia soahngohte. Timoty kin kadehdehda me e wia aramas likilik oh me e uhdahn kin nsenohki kamwahupen meteikan.—2 Timoty 1:5 (New World Translation); Pilipai 2:20-22.
10. (a) Mehn kahlemeng dah kei likin pahpa oh nohno me kak sairada neitail seri kan? (b) Iaduwen atail pahn mwekidiki ma soahngen madamadau pwukat kin sansalda nan en neitail seri kan lokaia kan de lamalam kan?
10 Mehn kahlemeng kan me kin sair mour en neitail seri kan kaidehn koaros kin kohsang rehn pahpa oh nohno. Mehn kahlemeng mwahu de suwed kak kohsang iengarail seri teikan nan sukuhl, oh pil sounpadahk kan me arail doadoahk iei en kaianehda madamadau en me pwulopwul kan, oh pil aramas akan me kin pwungki me koaros en kapwaiada tiahk en keinek kan de tiahk en pwihn en aramas akan, oh pil irail semen en mwadong kan me kin ale kaping laud sang rehn aramas akan, oh kaun en wehipokon kan me arail wiewia kan kin pwarada nan nuhs kan. Seri tohto pil kin lelohng wiewiahn weid akan me kin pwarada nan ahnsoun mahwen. E pahn kapwuriamwei ong kitail ma neitail seri kan pahn alehda madamadau en aramas pwukat oh tepiada alasang irail ni arail lokaia oh lamalam kan? Iaduwen atail kin mwekidiki met ma neitail seri kan kin wia met? Atail lipwoare irail de kapahrek ong irail pahn kamwahuwiala kahpwalo? E soh pahn mwahu ma kitail sohte pahn mwadang en sapeng neitail seri kan, ahpw kitail en idek rehtail, ‘Mie mehkot nan sapwellimen Siohwa elen wiewia ong kitail me kak sewese kadehdehda iaduwen en apwalihala irair wet?’—Pil kilang Rom 2:4.
11. Ni ahnsou me pahpa oh nohno kin wiahda sapwung kan, iaduwen met kin sair lamalam en neitail seri kan?
11 Ni mehlel, pahpa oh nohno kan me sohte unsek sohte pahn ahnsou koaros apwalihala irair kan ni ahl me keieu mwahu. Re pahn wiahda sapwung kan. Ni ahnsou me seri kan esehda duwen met, e pahn kauwehla arail wauneki arail pahpa oh nohno kan? E kak, keieu ma pahpa oh nohno pahn song en ekihla pein arail sapwung kan ni ara ni lemei ngidingidki kasalehda ara manaman. Ahpw imwilao kak wekisang met ma pahpa oh nohno kin aktikitik oh ni saledek wehkada pein ara sapwung kan. Ni ahl wet, irail kak wiahda mehn kahlemeng kesempwal ehu ong neirail seri kan, me anahne en sukuhliki en wia soahngohte.—Seims 4:6.
Dahme Atail Mehn Kahlemeng Kak Padahkih
12, 13. (a) Dahme seri kan anahne en sukuhlki duwen limpoak, oh iaduwen met kak kasukuhl ni ahl me keieu lipwalipw? (b) Dahme kahrehda e kesempwal seri kan en sukuhliki duwen limpoak?
12 Mie mehn kasukuhl kesempwal tohto me kak wia mehn padahk lipwalipw ahnsou me kaweid akan kin kohda ni lokaia oh pil patehng mehn kahlemeng mwahu. Tehk duwen ire kesempwal pwukat:
13 Kasalehda limpoak sohroporop: Ehu mehn kasukuhl me keieu kesempwal me pahn kehlailkihla mehn kahlemeng iei limpoak. “Kitail kin ahneki limpoak pwehki [Koht] eh tepin limpoak ong kitail.” (1 Sohn 4:19) Siohwa iei ih me wia utupen limpoak oh e wia mehn kahlemeng me keieu mwahu en limpoak. Limpoak wet, a·gaʹpe, kin pwarada nan Paipel tohto sang pahn pak 100. E wia irair ehu me kin kadehdehda ihs me Kristian mehlel. (Sohn 13:35) Soahngen limpoak wet en kasansal ong Koht oh Sises Krais oh aramas akan en kasalehda soahngen limpoak wet ong emenemen—pil ong aramas akan me kitail sohte kin perenki. (Madiu 5:44, 45; 1 Sohn 5:3) Limpoak wet anahne en mihmi nan mohngiongatail oh sansal nan atail mour ma atail padahk ong neitail seri kan pahn kak mie katepe. Wiewia kin lipwalipw laud sang lokaia. Nan peneinei, seri kan anahne en kilang oh pehm limpoak oh soahngen irair kan me duwehte poakpoake. Ma sohte soahng pwukat, seri kan sohte pahn kak kekeirada ni paliwar, lamalam, oh palien pepehm. Seri kan pil anahne en kilang iaduwen limpoak kin sansalda ni pwung ong iengerail Kristian kan likin peneinei.—Rom 12:10; 1 Piter 3:8.
14. (a) Iaduwen seri kan kak ale kasukuhl en wiahda doadoahk ehu en mwahu pwehn wahdo nsenamwahu? (b) Iaduwen met kak wiawi nan irair en omw peneinei?
14 Kaiahniong doadoahk: Doadoahk kin wia kisehn mour. Pwehn ahneki pepehm me mie katepe, aramas men anahne en sukuhliki iaduwen en wiahda doadoahk me mwahu. (Eklesiasdes 2:24; 2 Deselonika 3:10) Ma pahpa oh nohno kihong emen seri pwukoah en wia doadoahk ehu ahpw sohte padahkihong iaduwen en wiahda doadoahko oh eri kin lipwoare pwehki e sohte wiahda doadoahko mwahu, serio sohte pahn sukuhliki en wiahda doadoahk me mwahu. Ahpw ni ahnsou me seri kan sukuhliki doadoahko ni arail uhdahn iang arail pahpa oh nohno doadoahk limwahrail oh pahpa oh nohno kin kapingahkin seri kan arail doadoahk, seri kan uhdahn pahn sukuhliki en wia doadoahk me pahn wahdo nsenamwahu. Ma kahlemeng en pahpa oh nohno kin iangahkihte kawehwe kan, seri kan pahn sukuhliki kaidehn ihte iaduwen en wiahda doadoahko ahpw pil iangahki en powehdi kahpwal kan, iaduwen en wia doadoahko lao e kanekehla, oh iaduwen en doadoahngki lamalam pwung oh wiahda koasoandi kan. Ni ahl pwukat, re kak ale sawas en kalahnganki me Siohwa kin pil ketin doadoahk, oh me e kin ketin wiahda sapwellime doadoahk en mwahu, oh me Sises kin kahlemengih Semeo. (Senesis 1:31; Lepin Padahk 8:27-31; Sohn 5:17) Ma peneinei ehu kin doadoahk en wahnsahpw de wia pisines ehu, ekei tohnpeneinei kan kin doadoahkpene. De mwein nohno kak padahkihong nah pwutak de serepein iaduwen en wia mwenge oh kamwakelehda mwurin mwenge. Emen pahpa me ah doadoahk en mwohni kin dohsang imwarail kak pilahni en iang nah seri kan wia doadoahk ni imwarail. Ia uwen katapan ma pahpa oh nohno kin medemedewe kaidehn en ihte mwadang wiahda doadoahko en nekila ahpw en kaunopada seri kan ong mour!
15. Ni ahl dah kei seri kan kak sukuhliki mehn kasukuhl kan en pwoson? Karasahda.
15 Kolokolte pwoson mendahki kahpwal akan: Pwoson pil wia kisehn atail mour me kesempwal. Ni ahnsou me pahpa oh nohno kin koasoia pwoson nan onop en peneinei, seri kan pahn sukuhliki en wehwehkihla duwen met. Re pil pahn wehwehkihla duwen mehn kadehde me kahrehda pwoson en tepiada kekeirada nan mohngiongarail. Ahpw ni ahnsou me re kilang arail pahpa oh nohno kan kasalehda pwoson me kehlail ni ahnsoun kasongosong laud kan, lipwen met ong irail pahn kak mihmi erein arail mour. Emen tohnsukuhl en Paipel nan Panama kin ale kamasak sang rehn ah pwoudo me dene en pidoi sang nan imwara ma lih sohte uhdisang ah papah Siohwa. Mendahki met, liho, oh iangahki nah kisin seri pahmen, kin kaukaule aluhki mwail 10 oh pil iangahki dake poas mwail 20 pwehn lellahng Kingdom Hall me keieu keren. Pwehki mehn kangoang wet, ekei tohn ah peneinei meh 20 me alehda padahk mehlel.
Wia Mehn Kahlemeng en Wadek Paipel Rahn Koaros
16. Dahme kahrehda kangoang kin kohda me peneinei en wadek Paipel rahn koaros?
16 Ehu tiahk me keieu kesempwal me peneinei kan kak wiahda—tiahk me pahn mie katepe ong pahpa oh nohno kan oh wia mehn kahlemeng ong seri kan en alasang—iei en kaukaule wadek Paipel. Ma kak, wadek Paipel rahn koaros. Kaidehn uwen tohtohn iren Paipel me wadawadla me kesempwal. Me keieu kesempwal iei en wadek kaukaule oh iaduwen met kin wiawi. Ong seri kan, re kak kapataiong arail wadek en Paipel, rongorong cassette en Nei Pwuhk en Poadoapoad Kan en Paipel ma cassette wet mie ni pein amwail lokaia. Wadewadek Mahsen en Koht rahn koaros kin sewese kitail en mwohneki mahs madamadau en Koht kan. Oh ma kaidehnte emenemen tohnpeneinei ahpw peneineio pwon kin wia soahngen wadawad en Paipel wet, met kak sewese tohnpeneinei koaros en kekeid nan sapwellimen Siohwa ahl. Kangoang en wia tiahk wet kin kohda nan Kapokon kan me oaralap koasoia “Sapwellimen Koht Ahl” me ahpwtehn wiawi nan sipai me oaralap koasoia Families—Make Daily Bible Reading Your Way of Life! (Lokaiahn Pohnpei: Peneinei kan—Wiahki Wadawad en Paipel Rahn Koaros en Wia Elen Amwail Mour!)—Melkahka 1:1-3.
17. Iaduwen en peneinei wadek Paipel rahn koaros oh wadlikihla mouren iren Paipel kan kin sewese ren kapwaiada kaweido nan Episos 6:4?
17 Wadek Paipel nin duwen peneinei ehu kin pahrekiong dahme wahnpoaron Pohl ntingihdi nan sapwellime kisinlikou sarawi ong Kristian kan nan Episos, me iei: “Sahm akan, dehr kamwakar mwahl noumwail seri kan, ahpw kekeirirailda ni kaiahn oh ni madamadau en Siohwa.” (Episos 6:4, NW) Ia wehwehn met? “Kaianehda ni madamadau” kin wehwehki “kihong lamalam loale;” ihme pahpa Kristian kan kin ale kangoang en kihong madamadau en Siohwa nan loalen neirail seri kan—en sewese seri kan en esehla madamadau kan en Siohwa. Kangoangehki seri kan en wadlikihla mouren iren Paipel kan kak sewese irail en wia met. Mehn akadeio iei en ahneki madamadau en Siohwa en kahluwa lamalam en seri kan pwe arail ineng kan oh wiewia kan en ekis ekis uhd kasalehda kosonned en Koht akan mendahki ma pahpa oh nohno mih rehn neira seri kan de soh. Paipel kin wia poahsoan en soahngen madamadau wet.—Deuderonomi 6:6, 7.
18. Ni ahnsou me kitail kin wadek Paipel, dahme anahne pwe kitail en (a) wehwehkihla ni sansal? (b) paiekihda kaweid me e audaudki? (c) peikiong dahme e kasalehda duwen sapwellimen Siohwa kupwur kan? (d) paiekihda dahme e koasoiahki duwen lamalam oh wiewia kan en aramas?
18 Ni mehlel, ma Paipel pahn kamwekid atail mour, kitail anahne en wehwehki dahme e mahsanih. Ong me tohto, re anahne en wadek iren Paipel kan tohto sang pak ehute. Pwehn wehwehkihla mouren ekei lokaia kan, kitail anahne en kilangada lokaia kan nan dikseneri de nan pwuhken Insight on the Scriptures. Ma iren Paipelo kin audaudki kaweid de kehkehlik ehu, doadoahngki ahnsou en koasoia irair kan nan atail ahnsou me konehng kaweido de kehkehliko. Eri, komw kak pein kalelapak rehmwi, ‘Iaduwen kapwaiada kaweid wet kak kapaikitailda?’ (Aiseia 48:17, 18) Ma iren Paipelo kin koasokoasoia duwen ekei kupwuren Siohwa, komw kak pein kalelapak rehmwi, ‘Iaduwen atail mour kin mwekidiki met?’ Ele mwein komw kin wadewadek duwen koasoi ehu nan Paipel me kin kasalehda duwen lamalam oh wiewia kan en aramas kan. Kapwunod dah kei nan mour me re kin lelohng? Iaduwen re kin powehdi met? Iaduwen kitail kak paiekihda arail mehn kahlemeng mwahu? Mweidohng ahnsou pwehn koasoia ia wehwehn koasoio nan atail mour nan rahnwet.—Rom 15:4; 1 Korint 10:11.
19. Ni atail kahlemengih Koht, dahme kitail pahn wiahda ong neitail seri kan?
19 Ia uwen met wia ahl mwahu ehu en katengehdiohng nan atail lamalam oh mohngiong madamadau en Koht! Eri kitail pahn ale sawas en wiahla “sapwellimen Koht seri kompoak kei, kumwail song en kahlimengih ih.” (Episos 5:1) Oh kitail pahn wiahda mehn kahlemeng mwahu me uhdahn warohng neitail seri kan en alasang.
Komw Tamataman?
◻ Iaduwen pahpa oh nohno kan kak paiekihda mehn kahlemeng en Siohwa?
◻ Dahme kahrehda kaweidih seri kan ni lokaia anahne en iangahkihte mehn kahlemeng mwahu en pahpa oh nohno?
◻ Ia ekei mehn kasukuhl kan me seri kan kak sukuhliki mwahu sang mehn kahlemeng en pahpa oh nohno?
◻ Iaduwen atail kak paiekihda mehlel en peneinei kin wadek Paipel?
[Kilel kan nan pali 20]
Me tohto kin paiekihda wadek Paipel rahn koaros nin duwen peneinei ehu