Iaduwen Tohn Peneinei Koaros Kak Miniminpene Pwehn Iang Pidada—Onop En Paipel
1 Padahk mehlel kin kahrehong mouren peneinei en miehla katepe oh kahrepe, ahpw en pweida ni atail papah Siohwa sohte kin pein miehla. Ahnsou oh nannanti kin anahn pwehn kauwada peneinei ehu me pahn kehlail ni pali ngehn. Mie anahn laud ehu ong tohnpeneinei kan en doadoahkpene nan ire wet. Tepin artikel wet me mih ni pali siluh me pahn kin wiawihda ireirekdo pahn koasoia iaduwen peneinei kan kak miniminpene pwe ren kekeirada koasoandi mwahu en onop.
2 Wadek Paipel Rahn Koaros: Lepin Padahk 24:5 mahsanih me “ohl emen me loalokong kin kehlail.” (New World Translation) Loalokong me kohsang kaukaule wadewadek Mahsen en Koht pahn kihong aramas emen kehl en loale me anahn pwehn kak pelianda uhwong kan me Sehdan kin wiahiong ah pali ngehn. (Melkahka 1:1, 2) Kumwail kin wadekpene Paipel rahn koaros nin duwen peneinei ehu? Nan koasoandi en Theocratic Ministry School mie iren Paipel kan me kin kileledi me kitail en wadek me adaneki “Supplemental Bible-Reading Schedule” likin iren Paipel kan me koasoansoandi en wadawadla ehuehu wihk nan pahr ehu. Pwe peneinei kan en idawehn koasoandi wet, re anahnehte minit kei me kakete reireikihte minit 10 ehuehu rahn. Pilada ehu ahnsou me pahn mwahuong peneinei, duwehte ni ahnsoun mwengehn ni menseng, de mwurin mwengehn soutuk, de mwohn meir ni pwong, en wadekpene Paipel oh tehkpene iren rahn sang nan kisin pwuhko Examining the Scriptures. Wiahkihla met kisehn ehu koasoandi en omw peneinei me kumwail kin wia rahn koaros.
3 Onoppene Ehuehu Wihk: Onop en Paipel en peneinei pahn wia mehkot me keieu kesempwal nan ehuehu wihk rehn peneineio. Emenemen tohnpeneinei anahne en utungada ni arail pahn kin perenki iang pasepeng nan onopo. Tapwin peneineio pahn men tehkada anahn en ah peneinei ni ah kin pilada oaralap me re pahn onopki oh rahn me re pahn onop, ahnsoun onop, oh uwen reirei en onopo. Nan koasoandi en wihko, e pahn mwohneki mahs mwohn mehkoaros onop en peneinei. E sohte pahn mweidohng wiewia kan me sohte nohn kesempwal en kedirepwe arail koasoandi en onop Paipel.—Pilipai 1:10, 11.
4 Pahpa men kin kihsang salen delepohn ni lioal pwe pisnes kan kin kalap dengwala reh ni imweo ni ahnsou me eh peneineio kin wiewia arail onop. Ma irail kan me e kin wia pisnes rehrail kin kohdo ni imweo, e kin luhke irail en iang onopo de ren awih lau onopo imwisekla. Pahpao kin nantiong tehk pwe sohte mehkot pahn kedirepwe en ah peneineio onop. Met kin kamwekid nah seri kan, oh ah pisneso kin pweida mwahu.
5 Ia uwen kaperen ma tohnpeneinei kan kin miniminpene nan wiewiahn pali ngehn kan! Lelepek nan atail nannanti en iang kisehn onop en Paipel en peneinei pahn wahdo kapai en Siohwa.—Melkahka 1:3.