“Kapokonepene Aramas akan”
1. Ia duwen mihting tohrohr kan (district convention oh international convention) ar kin duwehte pokonpenehn mehn Israel kan mwurinte arail mweselsang Isip?
1 Mwurinte arail mweselsang Isip, Siohwa ketin padahkihong Moses en “kapokonepene aramas akan” ni Nahna Sainai pwe ren rong dahme E mahsanih oh ren esehla waunekin Ih oh padahkihong neirail seri kan duwen Sapwellime ahl akan. (Deud. 4:10-13) Ia uwen met eh wia mehkot me irail sohte kak manokehla oh kakehlailih arail pwoson! Erein sounpwong kei sang met, sapwellimen Siohwa aramas akan pahn pokonpene ni mihting tohrohr kan (district convention oh international convention) pwe ren ale kaweid sang rehn Siohwa. Dahme kitail anahne wia pwe kitail en kak paiekihda laud met?
2. Dahme kitail anahne wia pwehn onopada ong atail mihting tohrohr?
2 Onopada: Siohwa ketin mahsanihong mehn Israel ko ren onopada ong kapokon laud ni Nahna Sainai. (Eks. 19:10, 11) Duwehte met, koaros me pahn iang towehda mihting tohrohr pwukat anahne kaunopada mwahu, kaidehn ongete irail me pahn mie arail pwukoa nan prokramo. Karasepe, me tohto pahn anahne koasoanehdi pwehn kommoal sang doadoahk. Mweinte omw irair duwehte en Nehmaia. E men pwilikihdi eh doadoahk en sounkohwahn wain ong Nanmwarki Ardaserksihs pwe en kak kohla iang sewese kauwada kehl en Serusalem, ahpw e sehse ma nanmwarkio pahn pwungki. Nehmaia kapakap oh ni eimah kasalehda eh pekipek ni lokaia kadek. Nanmwarkio mweidohng ih en kohkohla oh kihong ih ekei sawas ong arail doadoahk en kauwada kehlo! (Neh. 2:1-9) Patehng omw pekihda kommoal sang doadoahk, ke koasoanehdier omw koasoandi en seiloak oh wasa me ke pahn mi ie? Elder kan pahn perenki sewese irail kan me anahne sawas. Koasoanehdi en kohdo mwadang mwohn mihting tohrohr pahn tepida, oh kaunopada en ‘kalaudehla omw tehk soahng kan’ me ke pahn rong.—Ipru 2:1, NW.
3. Dahme pahn sewese kitail en kaunopada atail mohngiong ong prokramo?
3 Pil ehu ire kesempwal me pid atail onopada iei kaunopada atail mohngiong pwe kitail en kak rong oh sukuhlki audepen padahk kan. (Esra 7:10) Prokram en mihting tohrohro pahn kohda nan jw.org Web site oh e pahn kasalehda ehuehu oaralap en padahk kan patehng ehu de riau iren Paipel kan ong ehuehu padahk. Met wia mehn doadoahk mwahu ong Kaudok en Peneinei en koasoiahpene erein wihko lao lel rahn me koasoandi mihting tohrohro. Ekei sounkalohk kan kin print neirail prokram oh doadoahngki pwehn ntingihdi ire kan erein mihting tohrohro.
4. Ia duwen pahpa oh nohno kan ar kak doadoahngki ahnsoun mihting tohrohr pwehn padahkih neirail seri kan?
4 ‘Padahkih Noumwail Seri kan’: Ehu kahrepen pokonpenehn Nahna Sainai iei pahpa oh nohno kan en Israel en ‘padahkih nair seri kan.’ (Deud. 4:10) Mihting tohrohr kin kihong pahpa oh nohno kan ahnsou mwahu en pil wia met. Pahpa nohno kan anahne mwohdehng neirail seri kan erein mihting tohrohr oh sewese irail en rong kanahieng. Mwurin kaimwiseklahn ehuehu rahn en mihting tohrohr oh mwuhr ni ahnsoun Kaudok en Peneinei, peneinei kan kak koasoiahpene prokramo.
5. Ia duwen atail pahn kak paiekihda atail pahn iang towehda mihting tohrohr me pahn wiawi?
5 Kapokon en Nahna Sainai sewese mehn Israel kan en kalahnganki arail pwais kaselel en wia sapwellimen Koht aramas. (Deud. 4:7, 8) Atail mihting tohrohr me kohkohdo wiawihda pwe kitail koaros en kak paiekihda ni soangen ahlohte. Erein rahn riau de siluh kitail pahn kak sokieisang nan en Sehdan sampah me rasehng sapwtehn sakanakan ehu. Kitail pahn paieki mehn kangoang kan oh popohl oh miniminpene nanpwungen tohnkaudok en Siohwa kan. (Ais. 35:7-9) Ni rahnen Siohwa kerekerendohr, kitail en dehr tokedihsang atail ahnsou mwahu en kin tuhpene pwehn kangoange emenemen!—Ipru 10:24, 25.