Kapokon en District en “Sapwellimen Koht Elen Mour” en 1998
1 Lepin Padahk 10:29 kin katamankihong kitail me “elen Siohwa kin wia wasahn ruk kehlail ehu.” Ia uwen met kin wia oaralap ehu me konehng kapokon en pahr wet—“Sapwellimen Koht Elen Mour”? Iaduwen oarelap wet pahn wiawihda? Kitail koaros kin kasikasik dahme kaunopadahngehr kitail. Prokram en kapokono pahn kasalehda ripoht kan en iaduwen Siohwa kin kapaiada doadoahko nan soangsoangen wasahn kalohk kan.
2 Mie Katepen Nannanti Iang Towehda: Riatail tohto nan Aperika kin lelohng kahpwal laud pwehki mahwen oh pingiping kan me kin wiawi nan ekei wasa kan nan sahpwo. Re kin kilangwohng kapokon kan en sapwellimen Siohwa aramas kan me iei arail mour. Ekei kin sapal sang wasa doh pwehn towehda kapokon, oh re sohte lemehda en katiasang mihding ehu! Emen brother me mahki sounpahr 73 nan Democratic Republic of Congo (me mahs adaneki Zaire) sapalki mpen mwail 280 pwehn towehda ehu kapokon. E lel wasahn kapokon mwurin rahn 16, neh kan mpwospene, ahpw e perenki mih wasao. Mwurin kapokono, e pil sapal pwurehla ni imweo, peren oh kehlailla ni pali ngehn. E kin epwenki wia met erein sounpahr tohto!
3 Nan Mozambique emen sounapwali en district oh ah pwoudo kin sapal douda pohn dohl ehu oh kotehla lapalahn wasa ehu me duwehte sapwtehn pwehn towehda ehu kapokon en circuit. Re seiloaki mwail 55 nan awa 45. Koaros me iang towehda kapokon kin inenen ale mehn kangoang sang mehn kalimeng mwahu en pwopwoud wet. Peneinei tohto me iang kapokono kin pil wiahda soangen nannantiohte pwe ren kak iang towehda kapokono. Sounapwalih en district ripohtki me ekei brother kan, iangahki emen me mahki sounpahr 6, kin sapalki mwail 130!
4 Komw wiahdahr pilahn en iang towehda kapokon en pahr wet? Ke sohte pahn sapal reirei pwehn iang towehda, ahpw ke anahne nanti oh wiahda tohnmetei kan pwe komwi oh ahmw peneinei en kak iang towehda. Koasoanehdi en iang towehda prokram en kapokono pwon sang ni tepio lau imwisekla. Tohnsukuhl en Paipel tohto kin wia kekeirada pwehn wiahda arail inou ong Siohwa. Arail iang towehda kapokono pahn sewese irail en wiahda pilipil me pwung. Komw lukeiehr irail kan me ke onop en Paipel rehrail oh irail kan me perenki rong en iang uhk towehda kapokono?
5 Ni atail kin kohwei oh pwuredo sang kapokono, kitail en rapahki ahnsou mwahu kan en kalohk ni ahnsou soh lipilipil. Irail sounaude kahs kan, sounnetinet kan, sounsahpis, oh mehteikan ele pahn perenki rong en Wehio. Kitail kak kaunopada ong met ni atail pahn weuwa rehtail tract kan, makasihn kapw kan, brochure kan, oh pwuhk kan pwe kitail en isaneki ahnsou mwahu kan en kalohk ong aramas kan me kitail sohte kin kak kalohkiong rongamwahuwo.—2 Tim. 3:17.
6 “Kanaieng Duwen Amwail Kin Rong”: Koaros me iang towehda kapokon en loalokong oh kapwaiada kaweid me diarek nan Luk 8:18. Kangoang kohwong koaros en wahdo neirail Paipel iangahki pwuhk en koul oh ehu pwuhk en nting. Rong kanaieng mouren ehu ehu padahk kan, oh ntingihdi met. Pein kalelepek rehmw duwen iaduwen ahmw pahn pein kapwaiada ire pwukat. Ehu ehu ni pwong en kapokono, mwohn ahmw pahn meir, ke soh kousapahlih ire kan me ke ntingihdi oh kasawih ia uwen ahmw pahn kapwaiada sapwellimen Siohwa elen mour.—Lepin Padahk 4:10-13.
7 E sansalda me erein kapokono ekei kin mwomwohd de alialu likio ni arail pahn mih nan wasahn kapokono oh rongorong padahk. Ekei sapwellimen Siohwa ladu kan en mahso wiahda sapwung toutou kan nan arail mour pwehki re sohte rong kanaieng sapwellimen Siohwa mehn kataman kan. Ni mehlel kitail en liksang wiahda soangen sapwungohte.—2 Nanmwarki 17:13-15.
8 “Ladu lelepek oh loalokong” kaunopadahier kaweid kan me kitail koaros anahne. E keieu kesempwal kitail en “ngoangki kapwaiada mwahu padahk kan me kitail rong” erein ehu ehu padahk kan en prokram en kapokono. Padahk me pahn kesempwal ong kitail pahn kohda ehu ehu rahn, iangahki ire kan me pahn uhdahn wia lipwalipw mwahu ong elen atail mour nan ahnsou kohkohdo. Atail kin rongorong kanaieng oh doadoahngki mwahu dahme Siohwa ketikihda ni pali ngehn ni kapokono, pahn katengehdi teng atail pwoson, eri “kitail sohte pahn peila” sang sapwellimen Koht elen mour.—Madiu 24:45; Ipru 2:1.
9 Kapwat Me Kin Kawauwi Siohwa: Nan ahnsou apwal pwukat, kitail anahne rong kanaieng laud sang mahs pwe kitail endehr mihla pahn ngehnin sampah wet. (1 Korint 2:12) Atail likou kan oh kapwat kan anahne en kasalehda karakarahk oh en kasalehda wauneki Kohto me kitail kin kaudokiong. (1 Tim. 2:9, 10) Kitail sohte anahne likou pweilaud kan pwehn iang irail ko me “kapingahki atail padahk duwen Koht, atail Sounkomour.” (Taitus 2:10) Dehr mwamwahleki mehn kadehde kehlail me kitail kak wiahda sang ni atail pahn likouda ni ahl ehu me pahn kawauwi Siohwa.
10 Wiewia Me Kin Kapinga Siohwa: Kitail ese me atail wiewiahn Kristian kak kamwekid en mehteikan lamalam ong kaudok mehlel. Ihme kahrehda, kitail men aht wiewia en ahnsou koaros warohng rongamwahuwo oh kin wahdo kaping ong Siohwa.—Pilipai 1:27.
11 Pahr samwalahro, kapokon en district ehu tepin wiawihda ni paliepeng en Angola. Ni rahn keriau en kapokon, polis riemen en wasao pekederlahng wasahn kapokono pwehn tetehk me re kolokolte onopek mwahu. Re mih wasahn kapokono rahno pwon. Ni kaimwseklahn rahno, re kasalehda ara wadekala dahme re rong oh tiahk mwahu me re kilang. Emen ira koasoia: “Ia kahrepen se pekederkihdo wasaht? Se ese me Sounkadehdehn Siohwa kan kin meleilei nan arail kapokon kan.”
12 Iaduwen atail wiewia kan ni kapokon en pahr wet pahn kamwekidih irail ko me pahn tepin iang towehda? Re pahn tehkada ngehnin minimin me pahn sansalda ni atail doadoahkpene nin duwen irail kan me toukihda arail sawas? Re pahn wadekala mwakelekel en atail wasahn kapokon oh wadekala kilang me mwohn atail kin mweselsang wasahn kapokono, kitail oh neitail seri kan kin rikadahsang kihd akan me mihmihseli limwahn atail sehr kan? Re pahn kilang atail wiewia mwahu ni atail kin seiloakla oh pwurodohsang wasahn kapokon? Re pahn tehk me nin duwen pahpa oh nohno kan, kitail kin tetehk neitail seri kan ahnsou koaros? Kitail en tehk mwahu me atail wiewia kan en wia lipwalipw mwahu ong irail ko me kilang kitail.
13 Pwainla Pweinen Kapokon: Mie en Society kosonned ehu me pid “sohte pweinen sehr kan, sohte meirong” ni kapokon kan. Eri, iaduwen pweinen kapokono kin pweipweila? Irail ko me iang towehda kapokono kin kihda sawas laud. Kitail koapworopworki me ke pahn kasalehda ngehnin kadek duwehte me sapwellime Koht ladu kan en mahs kasalehda. (2 Korint 8:7) Doadoahk keneinei kin wiawihda pwehn tehk kanaieng me mwohni kan koaros me aramas sawaskihda kin nekinekla, oh re kin ripohtki, oh doadoahngkihong kahrepeo me aramas kan sawaskihda mwohni ko.
14 Wasahn Mwomwohd kan: Kaweido me kin kohda erein sounpahr tohto pahn pil duduwehte, iei me SEHR KAN PAHN NEKINEKDI ONGETE PEIN AHMW PENEINEI (PAHPA/NOHNO/SERI KAN) OH IRAIL KAN ME IANG WARAMWAIL SIDOHSA. Met pahn kalaudehla irair en limpoak me kin sansalda wasahn kapokono. Ni wasahn kapokon tohto, ekei sehr kan kin mih wasa me pahn mengei en aluwei oh mwohndi loale sang sehr teikan. Menlau kasalehda ese lamalam, oh mweidohng me mah kan oh mehteikan me arail irair kahreong ren anahne mwohd nan sehr pwukat. Tamataman me ‘limpoak sohte kin raparapahki dahme mwahuwohng ih kelepw.’—1 Korint 13:4, 5; Pilipai 2:4.
15 Papah Nin Duwen Emen Me Toukihda Pein Ah Sawas: Ke kak koasoanehdi ekei ahnsou kan ni kapokon kan en iang sawas nan wasahn kapokon? Papah riomw Kristian kan, ma ihte ong awa kei, pahn inenen sawas laud oh wahdohng pein uhk nsenamwahu. Seri kan pahnangin sounpahr 16 pil kak kihda arail sawas ni arail pahn iang arail pahpa de nohno de emen me laud doadoahk.
16 Camera kan, Camcorder kan, oh Audiocassette Recorder kan: Camera kan oh misihn en record kan ele pahn kadoadoahk ni kapokon kan. Ahpw, ahmw doadoahngki kepwe pwukat endehr kedirepwe mehteikan. Alialuseli kilikilel ahnsou kopokon wiawi pahn kedirepwe mehteikan me nannanti en rong padahk kan. Dehr doakoahong ni salen liohl de mehn lokaia en kapokono misihn en record sohte lipilipil, oh misihn pwukat endehr perehla wasahn alu kan, de pere mehteikan en sohte kak kilang me wia padahk kan.
17 Mwenge kan Nan Wasahn Kapokon: Emen emen me iang towehda kapokono en wahdo pein kene mwenge pwehn dehr pidoi sang wasahn kapokono pwehn pwain mehkot liki erein ahnsou mwotomwot en kommoal mwurin souwas. Mwenge marahra me katapan ong paliwar oh mengei en tile me itar. Insert en neitail doaropwe Atail Doadoahk Ong Wehio en May 1995, parakrap 26 kihda ekei iren sawas kan ong dahme kitail pahn wahdohng ni kapokon kan. E sohte mweimwei kitail en wahdohng wasahn kapokon kan deupen mwenge klahs oh sakau kan. Deupen mwenge me duwehte cooler kan oh ehd kan anahne en tikitik pwehn kak mih pahn ahmw sehr. Ekei nan wasahn kapokon kin mwengemwenge oh niminim ahnsou prokram kin wiawi. Met kin kasalehda arail sohte wauneki ahnsouwo.
18 Ia uwen atail perenki pwe kapokon en “Sapwellimen Koht Elen Mour” en 1998 pahn kereniongehr tepida! Ke kanokehla ahmw pilahn en iang towehda? Ni mehlel, ke pahn kehlailla ni pali ngehn, oh nantiong en pousehlahte raparapahki sapwellimen Koht elen mour ong ahmw kapai soutuk.