Kapokon en District “Sapwellimen Koht Mahsen en Kokohp” en 1999

¹ Ni ahnsou me mehn Israel kan pahn nektehn pidelong nan Sapwen Inou, Moses padahkiong irail en kalahnganki sapwellimen Koht kaweid. E padahkiong irail: “Kaidehn mahsen kan me sohte katepe ong kumwail. Ih amwail mour.” (Deud. 32:45-​47) Kitail soh kin kalahngan ong Siohwa pwe E kin nsenohki atail mour oh kin kasalehda met ni E kin kahluwa kitail ki sapwellime Mahsen? Ihme kahrehda, kitail kasikasik Kapokon en District “Sapwellimen Koht Mahsen en Kokohp” me pahn wiawi sounpwong kohkohdo oh kitail kasikasik dahme Siohwa kaunopada ong kitail.

² Kitail wehwehki me Siohwa kupwurki kitail en iang rahn koa­ros me kapokon pahn wiawi, eri, ihme ke koasoanehdier me ke pahn iang kapokono pwon. Ke kak kamehlele me Siohwa kin wehwehki duwen tohnmetei oh nannanti kan me sapwellime ladu kan kin wiahda pwehn iang towehda kapokon, oh e kin tamataman oh kalahnganki dahme kitail kin wia. (Ipru 6:​10) Ni atail iang towehda kapokon sang ni koul me wiawi ni tepin kapokon lel kapakap me kin kaimwsekla kapokon, kitail kak kasalehda atail kalahnganki sapwellimen Koht mahsen kan ong kitail. (Deud. 4:​10) Kitail pil men kasalehda atail kalahnganki doadoahk laud me riatail brother kan kin wia ni arail kaunopada ong kapokon. Mehn kataman kan me ntingihdi nan artikel wet kin kohwong kitail pwehn sewese kitail en paiekihda mwengehn ngehn oh minimin en Kristian kan nan kapokon.

Mwohn Kapokon Tepida

³ Irail me ke kin onop oh aramas teikan me kin perenki rong anahne sawas en iang towehda kapokon? Dahme re kilang oh rong ni arail iang towehda kapokon kak kamwekid irail en men papah Siohwa. (1 Kor. 14:25) Elder kan pahn tehk duwen irail me kin anahne sawas ong wasahn pweidi de mehn peidaid, keieu irail me mah kan nan mwomwohdiso, oh sewese irail, ni limpoak.​—Kalesia 6:​10.

⁴ Pwehki pali en First Aid nan kapokon kin wiawihda pwehn ihte apwalih kahpwal karuwaru kan (emergency), se kangoange komwi en pein wahdo kenomw aspirin, pein ahmw bandage kan, mehn nget kan, oh wini en nan mpwei, oh soahng kan me mwein ke pahn anahne erein kapokon.

⁵ Pwehn wia soangen koasoandi me mengei ong koaros oh sohte pahn kangala ahnsou laud, Society koasoanehdier me emen emen kitail en wah pein kenatail mwenge ehu ehu rahn. Brother tohto idawehn kaweid wet oh re diarada me ni kommoal en mwengehn souwas, re kak mwohndi rehn arail peneinei oh iang irail mwenge. Riatail tohto koasoia me re perenki kommoal en souwas oh met kin kihong irail arail ahnsou mwahu en koasoiong brother oh sister teikan. Ihme kitail anahne kaunopada mwahu: pwainda mwenge oh dahme kitail pahn nim mwowe oh koasoanehdi soahng pwukat nan kisin koakon de cooler me kak mihmi pahn atail sehr. Se koapworopworki me koaros me kin iang towehda kapokon pahn idawehn kaweid wet. Ma mie aramas akan me men iang kitail towehda kapokon, re pil anahne wahdo pein kenarail mwenge. E sohte mwahu en wahda soahng kan me wiawihda sang klas nan wasahn kapokon oh pil e sohte konehng en wahda sakau nan wasahn kapokon.

⁶ Ke pilahn en papidais nan Kapokon en District? Brother kan pahn kileledi sehr kan me irail me pilahn en papidaisla pahn mwohndi loale, oh attendant kan pahn kasalehda wasao. Ma ke kak, mwohndi wasao mwohn prokram en kapokon pahn tepida rahno. Wahda noumw Pwuhk Sarawi, pwuhken koul, towel, oh likou konehng en doadoahngki ahnsou me ke pahn kohla nan pihl. Seht kan me mwotomwot oh singiles me mie nting oh soahng pwukat me sohte konehng en doadoahngki ong ahnsou me kitail men wauneki Siohwa. Elder kan anahne kousapahlih peidek kan nan pwuhken Our Ministry rehn irail me pilahn en papidais pwe re pahn wehwehki ire pwukat. Pwehki papidais wia kilelpen emen me inoukihong Siohwa Koht eh mour, e pahn sohte konehng irail me pilahn en papidais en kolpeh ahnsou me ke pahn papidais.

Erein Kapokon

⁷ Wenihmw kan en wasahn kapokon pahn ritingida ni kuloak 8 ni menseng rahn kan me kapokon wiawi. Ke kak nekidala sehr kan ongete pein ahmw peneinei oh irail kan me iang waromwail sidohsa. Brother kan pahn nekidala sehr kan ong brother oh sister mah kan, oh iangahki irail me handicap oh me mwoator.

⁸ Ke kak doadoahngki camera kan, camcorder kan, oh audio­cassette recorder kan ni wasahn kapokon. Ahpw, menlau dehr kihdi soahng pwukat nan wasahn alu de doadoahngki soahng pwukat ni ahl ehu me pahn kahrehda mehteikan sohte kak kilang mwahu wasahn padahk. Menlau dehr doakoahng ni salen liohl de mehn lokaia en kapokon misihn pwukat.

⁹ Ke kak koasoanehdi ahmw ahnsou pwehn kamwakele wasahn kapokon mwurin prokram en rahn koaros? De ke kak kihda ahmw sawas nan department teikan? Ma ke kak sawas, menlau kohla ni wasa me kileldi “Volunteer Service Depament” ni wasahn kapokon. Seri kan pahnangin sounpahr 16 kak sawas ma ah pahpa de nohno iang ih de emen aramas laud me koahiek. Ahpw, koaros me kak sawas kamwakele wasahn kapokon ni arail pahn rikada kihd me re kin kilang mih­mih­seli oh kesehla nan ehu wasahn kihd.

¹⁰ Kitail koaros alehier kaweid mwahu me pid duwen likou kan oh kapwat kan me konehng kitail en doadoahngki ni atail iang towehda kapokon. Karasepe ehu: Kaweid pwukat kin kohda nan insert kan en Atail Doadoahk Ong Wehio, kitail pil kak kilang kilel kan nan neitail pwuhk kan oh makasihn kan, oh me keieu kesempwal, kitail kak wadek dahme Siohwa kin kaweidkin kitail nan sapwellime Mahsen, Pwuhk Sarawi. (Rom 12:2; 1 Tim. 2:​9, 10) Aramas akan kin ese ihs kitail oh dahme kahrehda kitail kin pokonpene nan arail kahnimw. Ihme kahrehda, atail likou oh kapwat kin wia mehn kadehde mwahu ong irail, mendahki kitail saikinte koasoiong irail. Pali moron en Sounkadehdehn Siohwa kan kin wia mehn kahlemeng mwahu ni arail likou oh kapwat. Ahpw, ekei pak kitail kin kilang likou kan oh kapwat kan me kasansalehda ngehn en sampah. Soangen likou me kin kasalehda paliware kin kasalehda me emen saikinte wiahla aramas ngehnin men. Ma emen kin doadoahngki likou oh kapwat me konehng Kristian kan oh kin mwakelekel, e kin kak kahrehong mehteikan en karanih ih. Irail tapwin peneinei kan anahne tehk tohn­peneinei koaros oh dahme re pilahn en likouki de kapwatki nan wasahn kapokon. Oh e pahn mwahu en tehk ahn tohn­peneinei likou oh kapwat pil likin wasahn kapokon. Doadoahngki lapel badge kan mwohn kapokon pahn tepida oh mwurin kapokon pahn wia mehn kadehde me kitail kin papah Siohwa oh me kitail iang sapwellime pwihn mwakelekel.​—Pil tehk Mark 8:​38.

¹¹ Nanmwarki loalokong Solomon mwekidki ngehn sarawi ni ah ntingihdi me “seri kan kin wia mehkot sapwung ni ar sohte wehwehki oh seukautih” oh “ma seri men pahn mweimweiong pein nsene, e pahn kanamenekihala ine.” (Lepin Padahk 22:15; 29:15) Se kin kilang nan kapokon kan en pahr teikan, ekei Sounkadehde pwulopwul kan me sohte me apwalih irail kin katairong de wia soahng kan me kin kahrehda brother oh sister teikan en sohte kak rong kanahieng padahk kan me wiawiawi. Pwehki pahpa oh nohno kan kin pwukoahki dahme neirail seri kan kin wia, e konehng seri kan en mwohndi rehn arail pahpa oh nohno kan pwe, ni ahl wet, pahpa oh nohno kan kak tehk ma neirail seri kan, rong mwahu padahk kan oh tiahk mwahu de soh.

¹² E pahn mwahu ma brother oh sister kan pahn ntingihdi iren Paipel kan oh mour en padahk kan erein ahnsou me kapokon wiawi. Ntingihdi ire mwotomwot kan pwehn kak rong kanahieng padahk kan oh dahme ke ntingihdi pahn kak sewese komwi en tamanda mour en padahk kan. Kousapahlih dahme ke ntingihdi rehn ahmw peneinei de kompoakepahmw kan pwehn sewese komwi en tamataman mour en padahk kan oh ke sohte pahn mwadang manokehla mour en padahk kan.

¹³ Sapwellimen Siohwa aramas kan kin kihda arail sawas laud ahnsou koaros pwehn utungada padahk mehlel. (Eksodus 36:​5-7; 2 Kron. 31:10; Rom 15:26, 27) Ahmw sawas me ke kin wia ong doadoahk en kalohk kin pil pwainda anahn akan ong kapokon kan oh wasahn kapokon kan. Ma ke pahn wiahda check, menlau ntingihdi “Watch­tower” wasao me nda “Pay to the order of.”

¹⁴ Nin duwen me ntingihdi nan Eimwos 3:7, Siohwa mahsanih me E “sohte kin ketin wia mehkot, ma e sohte kin ketin kasalehiong sapwellime ladu soukoup kan kupwure.” Pwehki Siohwa “kin kasalehda soahng rir kan koaros,” E kamwekid ohl kan en ntingihdi pwung kokohp epwiki kei nan Pwuhk Sarawi oh soahngen kokohp kan me pid duwen ahnsouwet oh mahs pweidahier. (Dan. 2:​28, 47) Ahpw, ekei kokohp kan me pid duwen ahnsou kohkohdo saikinte pweida. Kapokon en District “Sapwellimen Koht Mahsen en Kokohp” en 1999 pahn kakehlail ahmw pwoson sapwellimen Koht inou kan. Rong kanahieng sapwellimen Koht mahsen ong komwi. Doadoahngki dahme ke kilang oh rong​—⁠nan kalohk, nan mwomwohdiso, oh nan ahmw mour. Kitail kapakapki sapwellimen Siohwa kapai ni atail pahn koasoanehdi en iang ehu ehu rahn me kapokon me diren mwengehn ngehn pahn wiawi!

[Blurb]

Pilahn en iang rahn koaros me kapokon pahn wiawi!