Kapokon en District “Pwoson Mahsen en Koht” en 1997

¹ Wahnpoaron Pohl katamankin Timoty me “audepen Pwuhk Sarawi unsek pwilisang rehn Koht.” (2 Tim. 3:​16) Pwehki Pwuhk Sarawi unsek pwilisang rehn Koht, ihme kahrehda kitail kak pwoson Pwuhk Sarawi. Oaralap en Kapokon en District pahr wet iei “Pwoson Mahsen en Koht.” Audepen padahk kan pahn kakehlail atail pwoson Paipel, mehnda ma ke wehwehkier padahk mehlel sounpahr tohto de ke ahpwtehn sukuhliki padahk mehlel. Kitail koaros anahne koasoanehdi pein atail ahnsou pwehn iang towehda rahn en Kapokon koaros. E pil pahn wia mehn kangoang ma irail me kin perenki rong, keieu irail me kitail kin onop Paipel rehrail, iang kitail towehda kapokon wet!

² E Konehng Kitail en Rong Kanaieng: Wahnpoaron Piter katamankin Kristian en mahs akan me e konehng irail en tehk oh rong kanaieng mahsen en kokohp, pwe e rasehng lamp ehu me kin dakedaker wasa rotorot. (2 Pit. 1:​19) E pil duwehte kitail. Atail mour nan sampah mering wet me mihmi pahn manaman en Sehdan kin duwehte mihmi nan wasa rotorot. Kitail kalahnganki me kitail kohsangehr nan rotorot en pali ngehn. (Kol. 1:​13; 1 Pit. 2:⁠9; 1 Sohn 5:​19) Ahpw ma kitail men mihmi nan marain, kitail anahne kolokolte atail pwoson ni atail kin rong kanaieng Mahsen en Siohwa. Atail Kapokon en District pahn kangoange kitail en wia met.

³ Kitail anahne nannanti pwehn ahnsou koaros medemedewe dahme irail me wia padahk kin koasoia, ahpw kitail pahn paiekihda ma kitail wia met. Kitail pahn nantiong meir mwadang pwong kan mwohn kapokon pwehn pepehd oh rong kanaieng ansoun kapokon. Kitail en mwadang kohla ni wasahn kapokon pwehn diarada deuatail oh soandi mwahu mwohn kapokon tepida. Kitail en iang koul oh kapakap ni tepin prokram en ehu ehu rahn. Aramas laud anahne wia kalimeng mwahu, oh pahpa oh nohno kan anahne kaiahne neirail seri kan.​—⁠Episos 6:⁠4.

⁴ Ma kitail pahn wadek oaralap en padahk kan en rahn mwohn kapokon kin tepida, kitail kak medemedewe duwen ire kan me pahn pwarada rahno. Met pahn kahrehda kitail en kasikasik ire kan me pahn pwarada. Kitail kak rong kanaieng pwehn rong ma mie ire kan me kitail kak doadoahngki pwehn kawehwe ong mehteikan dahme kahrehda kitail kin kamehlele Koht oh sapwellime inou en katingih irail kan me kin raparapahki ih. (Ipru 11:​1, 6) E pahn mwahu ma kitail pahn ntingihdi ekei ire kan pwehn sewese kitail tamanda mour en padahk kan. Ma kitail ntingihdi ire kan me nohn dir, kitail pahn katiasang ekei ire kaselel kan pwehki kitail nohn kedirepw nting.

⁵ Ni kapokon kan me wiawi pahr me ahpwtehn nek, aramas tohto mihmiseli likin wasahn mwondi en kapokon oh irail koasoakoasoiong mehteikan, ahpw sohte rongorong dahme “ladu lelepek oh loalokong” kaunopada ong kitail. Sises inouki me e pahn kamwenge kitail mwengehn ngehn ni ahnsou konehng. (Madiu 24:​45-​47) Ihme kahrehda, e kesempwal kitail en mwondi nan deuatail oh rongorong mwengehn ngehn me kaunopada ong kitail pwehn dehr mwamwahleki dahme kaunopada ong kitail. (2 Kor. 6:⁠1) E pil sansal me ahnsou me seri kan kin pwangahki rong padahk, irail kin peki ma irail kak kotala, oh irail uhd kohla likin wasahn mwondi en kapokon oh alialuseli. Ma pahpa/nohno kaiahne neirail seri kan nan pein imwarail, seri kan sohte pahn kalap anahne doadoahngki imwen kainen. Ekei pak, mwahnakapw kan oh peinakapw kan kin mihmi wasa doh sang arail pahpa oh nohno, koasoakoasoipene, loklokaia mwenginingin pene, oh ntingpene nanpwungarail. Irail pwulopwul kan, pwehki kasongosong tohto me irail kin lelong, anahne rongorong oh medemedewe kanaieng audepen padahk kan, kaidehn wia soahng teikan ansoun kapokon. Me pwulopwul kan anahne liksang soangen ineng kan me Siohwa sohte kupwurki. (Pil kilang 2 Timoty 2:​22.) Ma koaros, me laud oh me pwulopwul, kin rongorong kanaieng, met pahn kapinga Siohwa oh kaperenda Siohwa.

⁶ Ma emen attendant kin kihda kaweid ong emen duwen ire pwukat, meno me ale kaweid kak rongorong kanaieng oh kilangwong kaweid wet duwehte kisakis limpoak sang Siohwa. (Kalesia 6:⁠1) Koaros anahne tamanda me kahrepe kitail kin nantiong en iang towehda kapokon iei en “rongorong oh sukuhliki.” (Deud. 31:12) Oh pil, “Lepin padahk pwukat pil kak kalaudehla loalokong en men loalokong kan.” (Lepin Padahk 1:⁠5) Ihme kahrehda, mwohn kapokono pahn tepida, koasoiaiong ahmw peneinei kesempwalpen kumwail koaros en mwohdpene erein kapokono, rongorong kanaieng, pwe kumwail koaros en kak paiekihda sang audepen prokram pwon.

⁷ Mwomwatail Me Pahn Kaperenda Siohwa: Aramas koaros nan sampah kin kilang sapwellimen Siohwa aramas. (1 Kor. 4:⁠9) Koaros kin wehwehki me pali laud en Sounkadehdehn Siohwa kan kin likouda oh kapwatada ni ahl me konehng Kristian kan. Irail me kin doadoahngki kaweid en 1 Timoty 2:​9, 10 oh 1 Piter 3:​3, 4 kin wiliakapwala nin duwen mwomwarail, irail weklasang ahnsou me irail ahpwtehn tepida werekiong mwomwohdiso en Kristian. Mwomwen arail likou oh kapwat ahnsouwet weksang likou oh kapwat me kitail kin kilang nan sampah. Kitail anahne kanaieng pwe mowmwetail sohte pahn duwehte sampah​—⁠doadoahngki likou me ehu soahng, oh utungada sidail en sampah, oh doadoahngki likou me sohte konehng Kristian kan. Kitail pahn wia mehn kalimeng mwahu nin duwen likou oh kapwat konehng Kristian kan oh met pahn sewese irail me kapw kan en wehwehki dahme konehng Kristian kan.

⁸ Mendahki pali laud en Sounkadehde kan me iang towehda kapokon en pahr me ahpwtehn nek doadoahngki soangen likou oh kapwat me konehng Kristian, mie ekei brother oh sister kan me kin apwalki doadoahngki soangen likou oh kapwat me konehng Kristian.

⁹ Kasalehda Tiahk Mwahu: Tiahk mwahu iei kilelpen Kristian mehlel kan. (1 Pit. 2:​12) Atail tiahk kin kihda kadehde mwahu oh sewese mehteikan en kilang dahme pwoson Koht oh sapwellime Mahsen kak wia ong aramas. Met pahn kamwekid ekei en men esehla Siohwa. (Pil kilang 1 Piter 3:​1, 2.) Kitail ahneki pwais kaselel en kapinga Koht pwehki atail tiahk mwahu.

¹⁰ Mehn kataman tohto kin kohda me pid duwen en kaiahne seri kan. Mendahki ansoun kapokon kin kihong kitail ahnsou mwahu en mwemweit rehn riatail kan, pahpa oh nohno anahne taman ahnsou koaros arail pwukoah en apwalih neirail seri kan. Siohwa kihong pahpa oh nohno koaros pwukoah wet. (Lepin Padahk 1:8; Episos 6:⁠4) Ma ekei seri kan kin ketihwo, met kin kak kawehla ahdmwahu me Sounkadehde teikan nannanti en wiahda.​—⁠Lepin Padahk 29:15.

¹¹ Kihda Ahmw Sawas en Pwainla Pweipwand en Kapokon: Koaros pahn anahne doadoahngkihla ekis neirail mwohni pwehn iang towehda kapokon. Oh pil mie pweipwand me kitail anahne pwainla, duwehte liohl oh soahng pwukat pwehki atail doadoahngki Kingdom Hall ong atail kapokon. Koaros kin kalanganki ni emen emen kitail kin kihda pein atail sawas sang mongiongatail.​—⁠Wiewia 20:35; 2 Kor. 9:​7, 11, 13.

¹² Wasahn Mwondi: Mehn kaweid me kohda sangete sounpahr teio pahn pil kohwong kitail pahret, iei me KITAIL KAK NEKIDALA WASAHN MWONDI IHTE ONG PEIN ATAIL PENEINEI DE ARAMAS ME IANG WARATAIL SIDOHSA. E mwahu en kilang me tohto me rong kaweid wet sang pahr teiko, oh met kin kahrehda irair en limpoak me kin kapilpene wasahn kapokon.

¹³ Pepdais: Irail me pahn pepdais pahn mwohndi nan sehr kan me irail kilelediong mwohn prokram en Rahn Kaunop pahn tepida. Irail me pahn pepdais pahn wahda arail likou en pampap me konehng Kristian kan oh arail daul. Nan pahr teikan, ekei doadoahngki likou me sohte konehng oh pwehki met, kasalehda me irail sohte kasalehda wahu ong ahnsouo. Elder kan me kin kousapahlih peidek kan en pwuhken Our Ministry pahn tehk ma aramaso kin wehwehki duwen soahng pwukat. Pepdais iei kilelpen inou ong Koht arail mour oh pepdais mehkot kesempwal nanpwungen aramaso oh Siohwa. Ihme kahrehda, e sohte pahn konehng aramas en pwoaloapwoal de kolpeh ahnsou me re pepdais.

¹⁴ Camera kan, Camcorder kan, oh Audiocassette Recorder kan: Kitail kak doadoahngki camera kan oh dipwisou en recording kan ansoun kapokon. Ahpw, atail doadoahngki soahng pwukat sohte pahn wia mehkot me pahn kahrehda mehteikan sohte kak kilang mwahu prokramo. E sohte pahn konehng kitail en alialuseli wia kilel kan oh kedirepwih mehteikan ahnsou me irail men rongorong. E pil sohte konehng dipwisou pwukat en patehng sahl kan me brother me wia prokram doadoahngki, oh pil dipwisou kan sohte pahn mihmi wasa kan me aramas alu de wasa kan me pahn irehdi aramas en kilang prokramo.

¹⁵ Mwenge Ni Wasahn Kapokon: Pwehki met brother oh sister kan sohla kin wia mwenge ni wasahn kapokon, met kahrehda irail kak mwondi oh rongorong prokram en kapokon. Tohto ntingihdi arail kalangan ong Society duwen koasoandi wet. Ni ahnsou wet, koaros anahne koasoanehdi pwehn wahda pein kenarail mwenge. Menlau dehr wahda mehkot me wiawihda sang kilahs oh dehr wahda sakau en wai ni wasahn kapokon. Mie me kin mwenge ansoun prokram. Met sohte kin kasalehda wahu.

¹⁶ Kitail kin kalahnganki atail kamadipw en mwengehn ngehn oh pil miniminiong riatail ni popohl ansoun mwengehn souwas. Ma kitail men daur kahrepe koasoandi wet, kitail kak wahda kenatail mwenge pwe kitail sohte pahn anahne kohla oh pwainda kenatail. Ih duwen kitail kak mweidong ahnsou laud en miniminiong riatail brother oh sister kan.

¹⁷ Kitail kak peren pwe Kapokon en District “Pwoson Mahsen en Koht” pahn kerenieng tepida! Kitail koaros kak kaunopada mwahu pwehn iang towehda prokramo pwon, oh paiekihda sang kamadipw en mwengehn ngehn me Siohwa kaunopada ong kitail sang sapwellime pwihn. Ni ahl wet, kitail pahn “koahiekla ni soangen wiewia mwahu koaros” ni rahn kan me kohkohdo.​—⁠2 Tim. 3:​17.